𐴔𐴡𐴌𐴥𐴡𐴚 𐴔𐴡𐴌𐴥𐴝 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴃 𐴲 𐴴 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴡𐴕 𐴀𐴥𐴡𐴘𐴧𐴠 𐴱𐴱

𐴀𐴥𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴤𐴞𐴑𐴡𐴌 𐴔𐴡𐴌𐴥𐴡𐴚 𐴔𐴡𐴌𐴥𐴝 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴌 , 𐴚𐴥𐴝 𐴔𐴡𐴌𐴥𐴝𐴚 𐴆𐴤𐴙𐴡𐴚 𐴉𐴝𐴌𐴝𐴌 𐴈𐴝𐴣𐴏𐴠 𐴀𐴝𐴌𐴑𐴝𐴕 𐴁𐴤𐴝𐴐𐴞 𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴝𐴀𐴝𐴙𐴕 𐴶 𐴲 𐴎𐴡𐴕 𐴀𐴝𐴌 𐴁𐴠𐴍𐴞𐴀𐴝𐴙𐴕 𐴶 𐴱 𐴎𐴡𐴕 , 𐴁𐴠𐴒𐴧𐴤𐴟𐴕𐴠 𐴔𐴞𐴓𐴝𐴘 𐴲 𐴴 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝𐴌𐴠 𐴱𐴱

𐴀𐴝𐴙𐴅𐴧𐴙𐴝 𐴁𐴞𐴀𐴞𐴕𐴧𐴝 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴁𐴡𐴕 𐴒𐴡𐴌𐴥𐴞 𐴔𐴡𐴌𐴥𐴡𐴚 𐴔𐴡𐴌𐴥 𐴝 𐴐𐴤𐴡𐴀𐴡𐴌𐴡𐴌 𐴉𐴟𐴓𐴞𐴐𐴢 𐴃𐴤𐴝𐴕𐴝𐴌 𐴒𐴝𐴣𐴌𐴝𐴃𐴡𐴃 𐴒𐴤𐴡𐴓𐴝𐴘 𐴀𐴠𐴌𐴞𐴀𐴞 𐴔𐴦𐴡𐴊𐴧𐴞𐴔𐴝 𐴑𐴤𐴟𐴓𐴞𐴁𐴝𐴌 𐴁𐴠𐴁𐴡𐴏𐴃𐴤𐴝 𐴒𐴡𐴌𐴥𐴠𐴌 𐴁𐴡𐴓𐴞 , 𐴔𐴡𐴌𐴥𐴡𐴚 𐴔𐴡𐴌𐴥𐴝 𐴐𐴤𐴡𐴀𐴡𐴌𐴡𐴃 𐴃𐴤𐴝𐴑𐴠𐴊𐴠 𐴌𐴠𐴂𐴟𐴄𐴝𐴌 𐴀𐴥𐴡𐴑𐴧𐴡𐴓𐴡𐴌 𐴉𐴠𐴙𐴏𐴢 𐴁𐴦𐴟𐴑 𐴂𐴠𐴙𐴅𐴡𐴃 𐴓𐴠𐴙𐴑𐴧𐴤𐴙𐴠𐴊𐴠 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴠 𐴱𐴱

𐴏𐴠𐴃𐴡𐴔𐴁𐴡𐴌 𐴔𐴝𐴐𐴡𐴌 𐴸 𐴱 𐴃𐴝𐴌𐴥𐴞𐴑𐴡𐴃 𐴔𐴝𐴎𐴤𐴠 𐴘𐴥𐴡, 𐴀𐴥𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴤𐴞𐴑𐴡𐴌 𐴂𐴡𐴏𐴧𐴞𐴔 𐴐𐴤𐴡𐴀𐴡𐴌𐴡𐴌, 𐴐𐴗𐴠 𐴏𐴡𐴗𐴚 𐴘𐴠𐴕 𐴐𐴤𐴡𐴀𐴡𐴌𐴡𐴃 𐴔𐴝𐴎𐴤𐴠 𐴘𐴥𐴡 𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴝𐴀𐴝𐴙𐴕 𐴹 𐴱 𐴎𐴡𐴕 𐴀𐴝𐴌 𐴁𐴠𐴍𐴞𐴀𐴝𐴙𐴕 𐴲 𐴱 𐴎𐴡𐴕 𐴁𐴠𐴒𐴧𐴤𐴟𐴕𐴠 𐴔𐴞𐴓𐴝𐴘 𐴱 𐴳 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴱𐴱

𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴁𐴡𐴕 𐴒𐴡𐴌𐴥𐴞 𐴁𐴦𐴝𐴊𐴠 𐴀𐴠𐴈𐴥𐴡𐴕 𐴐𐴗𐴠 𐴏𐴡𐴗𐴚 𐴘𐴠𐴕 𐴐𐴤𐴡𐴀𐴡𐴌𐴡𐴌 𐴉𐴟𐴓𐴞𐴐𐴢 𐴃𐴤𐴝𐴕𐴝𐴌 𐴒𐴝𐴣𐴌𐴝𐴃𐴡𐴃 𐴒𐴤𐴡𐴓𐴝𐴘 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 𐴁𐴡𐴓𐴞 , 𐴔𐴟𐴓𐴥𐴝 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴈𐴥𐴡𐴁𐴡𐴌 𐴕𐴡𐴑𐴤𐴡𐴓 𐴒𐴡𐴌𐴥𐴞 , 𐴀𐴥𐴠𐴌𐴝𐴖𐴡𐴋𐴧𐴞 𐴈𐴥𐴡𐴁𐴡𐴌𐴞 𐴃𐴝𐴕𐴥𐴝 𐴘𐴠 𐴈𐴡𐴘𐴧𐴠𐴊𐴠 𐴘𐴝𐴀𐴝𐴕 𐴐𐴤𐴟𐴌𐴟𐴃 𐴎𐴝𐴕𐴝 𐴒𐴞𐴘𐴠 𐴱𐴱

𐴔𐴡𐴒𐴢 𐴀𐴝𐴌 𐴁𐴡𐴌𐴔𐴥𐴝 𐴊𐴟𐴕𐴥𐴞 𐴋𐴝𐴀𐴝𐴘𐴧𐴠 𐴔𐴞𐴓𐴞𐴀𐴞 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴀𐴝𐴌𐴑𐴝𐴕𐴡𐴌 𐴊𐴠𐴐𐴤𐴡𐴙𐴃𐴧𐴝𐴃𐴝 𐴇𐴥𐴡𐴑 𐴈𐴝𐴌𐴥𐴞 𐴓𐴡𐴘 , 𐴊𐴠𐴐𐴢 𐴏𐴥𐴝𐴌 𐴁𐴞𐴊𐴠𐴐𐴤𐴞 𐴁𐴝𐴕𐴝𐴘𐴁𐴡𐴓𐴧𐴝 , 𐴀𐴝𐴒𐴡𐴌 𐴒𐴤𐴞𐴕 𐴀𐴠𐴌𐴞 𐴃𐴡𐴃𐴧𐴝𐴎𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 𐴊𐴧𐴠 𐴸 𐴳 𐴲 𐴁𐴡𐴏𐴥𐴡𐴌 𐴀𐴥𐴡𐴘𐴧𐴠 , 𐴔𐴡𐴕𐴃𐴡𐴌 𐴀𐴝𐴓𐴧𐴝𐴇𐴢 𐴃𐴝𐴀𐴝𐴓𐴝𐴌 𐴌𐴝𐴇𐴔𐴡𐴃𐴠 𐴑𐴝𐴔𐴞𐴘𐴝𐴁 𐴀𐴥𐴡𐴘 𐴕𐴡𐴀𐴡 𐴉𐴝𐴌𐴠 𐴱𐴱

𐴀𐴥𐴠 𐴏𐴞𐴓𐴏𐴥𐴞𐴓𐴝𐴃 𐴲 𐴱 𐴰 𐴲 𐴐𐴤𐴡𐴕𐴡𐴃 𐴔𐴡𐴒𐴢 𐴀𐴝𐴌 𐴇𐴥𐴡𐴑𐴟𐴔𐴡𐴃𐴠 𐴔𐴞𐴓𐴞 𐴂𐴠𐴓𐴝𐴕 𐴁𐴝𐴕𐴝𐴘 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴈𐴝𐴍𐴞 𐴔𐴝𐴌𐴞 𐴒𐴤𐴡𐴌 𐴏𐴥𐴝𐴌𐴝 𐴃𐴤𐴡𐴌 𐴏𐴥𐴝𐴌𐴝 𐴒𐴡𐴌𐴥𐴞 𐴑𐴠𐴀𐴠𐴔𐴡𐴃 𐴒𐴤𐴡𐴓𐴝𐴘 , 𐴓𐴡𐴌𐴝 𐴏𐴡𐴌𐴝 𐴁𐴡𐴕 𐴒𐴡𐴌𐴥𐴞 𐴀𐴦𐴟𐴛𐴅𐴧𐴙𐴝𐴌 𐴃𐴡𐴓𐴠 𐴑𐴟𐴌𐴥𐴝 𐴁𐴝𐴣𐴊𐴤𐴞 𐴌𐴝𐴙𐴑𐴧𐴤𐴙𐴠 𐴉𐴝𐴀𐴝𐴕 𐴁𐴡𐴕 𐴒𐴡𐴌𐴥𐴞 𐴌𐴝𐴑𐴤𐴞 𐴊𐴞𐴘𐴠 𐴱𐴱

𐴀𐴥𐴠 𐴑𐴠𐴀𐴠𐴔𐴡𐴌 𐴁𐴤𐴟𐴃𐴡𐴌𐴠 𐴈𐴥𐴝𐴘𐴃𐴠 𐴓𐴡𐴘𐴃𐴠 𐴁𐴠𐴐𐴤𐴞 𐴊𐴟𐴑 𐴉𐴝𐴀𐴝𐴌 𐴊𐴧𐴠 𐴀𐴥𐴠𐴃𐴡𐴓𐴧𐴝 , 𐴊𐴠𐴐𐴡𐴌 𐴁𐴤𐴟𐴃𐴡𐴌𐴠 𐴀𐴡𐴙𐴕𐴧𐴡 𐴐𐴤𐴡𐴀𐴡𐴌 𐴀𐴥𐴡𐴑𐴧𐴡𐴓𐴡𐴃 𐴘𐴝𐴃𐴡 𐴊𐴠𐴐𐴡𐴌 𐴁𐴝𐴀𐴝𐴌𐴠 𐴀𐴡𐴙𐴕𐴧𐴡 𐴊𐴠𐴐𐴡𐴃 𐴎𐴝𐴘 , 𐴈𐴝𐴔𐴝𐴘 𐴒𐴡𐴌𐴥𐴞𐴁𐴡𐴓𐴧𐴝 𐴀𐴝𐴌𐴑𐴝𐴕𐴡𐴃𐴧𐴟 𐴕𐴠𐴀𐴠𐴓𐴞 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 , 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴏𐴥𐴝𐴁𐴟𐴃 𐴏𐴥𐴝𐴌𐴝 𐴏𐴥𐴡𐴉𐴡𐴌 𐴒𐴡𐴌𐴡𐴀𐴡𐴌 , 𐴁𐴡𐴓𐴞 𐴈𐴡𐴀𐴡𐴘 𐴊𐴤𐴡𐴌𐴞 𐴊𐴤𐴡𐴌𐴞 𐴎𐴞𐴘𐴡𐴓𐴡𐴃 𐴒𐴤𐴡𐴓𐴝𐴘 𐴉𐴥𐴠𐴓𐴝𐴀𐴝𐴌 , 𐴀𐴞𐴀𐴞𐴕 𐴀𐴥𐴡𐴙𐴓𐴊𐴠 𐴅𐴠𐴕𐴡𐴏𐴥𐴝𐴘𐴋𐴡𐴌 𐴁𐴝𐴂𐴢 𐴱𐴱

Sources : Arakan Express News