𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴌𐴠 𐴐𐴤𐴝𐴐𐴡𐴕 𐴒𐴡𐴌𐴡𐴀𐴡𐴕𐴡𐴌 𐴓𐴧𐴝 𐴔𐴝𐴌𐴝𐴔𐴝𐴌𐴞 : 𐴀𐴠𐴑 𐴎𐴡𐴕𐴡𐴌 𐴔𐴡𐴗𐴃 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴄𐴠𐴑𐴕𐴝𐴉𐴡𐴌 𐴕𐴟𐴖𐴝𐴉𐴝𐴌𐴝 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 , 𐴁𐴠𐴌𐴟𐴊𐴧𐴤𐴞 𐴋𐴝𐴀𐴝𐴘 𐴀𐴝𐴃𐴡𐴚- 𐴁𐴝𐴊𐴞 𐴏𐴡𐴓𐴔𐴝𐴕 𐴐𐴝𐴇 𐴒𐴟𐴌𐴟𐴉𐴡𐴌 𐴇𐴥𐴝𐴔𐴓𐴝𐴃 , 𐴔𐴟𐴇𐴝𐴔𐴧𐴡𐴊 𐴀𐴞𐴓𐴞𐴘𐴝𐴏𐴢 𐴕𐴝𐴔𐴡𐴌 𐴀𐴠𐴑 𐴅𐴟𐴖𐴝𐴕 𐴔𐴝𐴌𐴝 𐴒𐴞𐴘𐴠 𐴱𐴱

𐴏𐴠𐴃𐴡𐴔𐴁𐴡𐴌 𐴔𐴝𐴐𐴡𐴌 𐴸 𐴱 𐴃𐴝𐴌𐴥𐴞𐴑 𐴌𐴦𐴡𐴘 𐴁𐴝𐴌𐴠 , 𐴀𐴡𐴕𐴟𐴔𐴝𐴕𐴞𐴑 𐴌𐴝𐴙𐴃𐴡𐴌 𐴉𐴝𐴣𐴏𐴢 𐴁𐴝𐴎𐴠 , 𐴀𐴟𐴉𐴡𐴎𐴞𐴓𐴝𐴌 𐴕𐴥𐴞𐴓𐴝 𐴘𐴟 𐴂𐴞 𐴕𐴟𐴖𐴝𐴉𐴝𐴌𐴝 𐴶 𐴲 𐴓𐴡𐴔𐴁𐴤𐴡𐴌 𐴌𐴠𐴅𐴞𐴏𐴄𐴝𐴌 𐴑𐴠𐴀𐴠𐴔𐴡𐴌 𐴁𐴞- 𐴁𐴡𐴓𐴡𐴑𐴡𐴃 , 𐴔𐴡𐴌𐴝𐴌 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕 𐴒𐴤𐴡𐴙𐴄𐴧𐴙𐴠 𐴱𐴱

𐴔𐴡𐴌𐴞 𐴒𐴞𐴘𐴡𐴘𐴊𐴠 𐴀𐴞𐴓𐴞𐴘𐴝𐴏𐴡𐴌 𐴉𐴟𐴖𐴝 𐴔𐴟𐴇𐴝𐴔𐴧𐴡𐴊 𐴌𐴟𐴁𐴠𐴓𐴠 𐴎𐴝𐴕𐴝𐴘𐴧𐴠𐴊𐴠 , 𐴀𐴝𐴙𐴅𐴧𐴙𐴝 𐴒𐴡𐴀𐴡𐴙𐴕 𐴌𐴝𐴙𐴃𐴡𐴌 𐴀𐴡𐴕𐴟𐴔𐴝𐴕𐴞𐴑 𐴴 𐴁𐴝𐴎𐴠 𐴰 𐴱 / 𐴲 𐴱 𐴎𐴡𐴕 𐴀𐴥𐴝𐴣𐴃𐴞𐴘𐴝𐴌 𐴀𐴡𐴓𐴝 𐴀𐴝𐴃𐴡𐴚𐴁𐴝𐴊𐴞 𐴈𐴡𐴊𐴦𐴟𐴕 𐴀𐴝𐴣𐴀𐴝𐴌 𐴒𐴤𐴡𐴌𐴡𐴌 𐴁𐴤𐴟𐴃𐴡𐴌𐴠 𐴒𐴤𐴡𐴓𐴞 , 𐴀𐴝𐴣𐴀𐴝𐴌 𐴔𐴝𐴣 – 𐴁𐴤𐴝𐴘𐴧𐴡𐴌𐴠 𐴌𐴝𐴇𐴝𐴔 𐴏𐴥𐴝𐴌𐴝 𐴀𐴡𐴃𐴞𐴌𐴡𐴃𐴧𐴡 𐴔𐴝𐴌𐴝 𐴊𐴤𐴡𐴌𐴝 𐴎𐴟𐴓𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴞 𐴱𐴱

𐴎𐴠𐴁𐴡𐴌 𐴎𐴝𐴃𐴞 𐴐𐴤𐴟𐴕𐴝 𐴌𐴟𐴉𐴝 𐴄𐴞𐴛𐴝 𐴉𐴡𐴙𐴐𐴤𐴝 𐴓𐴟𐴄 𐴔𐴝𐴌 𐴒𐴡𐴌𐴥𐴞 𐴓𐴡𐴘 𐴁𐴦𐴝𐴊𐴠, 𐴀𐴝𐴣𐴀𐴝𐴌 𐴁𐴝𐴉𐴡𐴌𐴥𐴠 𐴁𐴝𐴙𐴅𐴧𐴝𐴘 𐴁𐴝𐴙𐴅𐴧𐴝𐴘 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠 , 𐴀𐴦𐴝𐴛 𐴘𐴝𐴀𐴝𐴕𐴡𐴌 𐴏𐴥𐴡𐴀𐴞 𐴇𐴥𐴡𐴑 𐴁𐴞𐴏𐴝𐴌 𐴏𐴝𐴀𐴝𐴘 , 𐴌𐴦𐴡𐴘 𐴁𐴝𐴌𐴠 𐴊𐴦𐴟𐴛𐴅𐴧𐴙𐴝 𐴄𐴠𐴑𐴕𐴝𐴉𐴡𐴌 𐴔𐴡𐴋𐴠𐴓 𐴃𐴤𐴝𐴕𐴝𐴌 ( 𐴀𐴡 𐴏𐴞 ) 𐴔𐴟𐴇𐴝𐴔𐴧𐴡𐴃 𐴇𐴝𐴉𐴞𐴎𐴟𐴌 𐴌𐴝𐴇𐴔𐴝𐴕𐴠 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕 𐴏𐴥𐴡𐴀𐴞 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴀𐴥𐴞𐴁𐴝 𐴘𐴠 𐴈𐴡𐴘𐴧𐴠𐴊𐴠 , 𐴒𐴤𐴡𐴄𐴡𐴕𐴝𐴌 𐴈𐴥𐴡𐴁𐴡𐴌 𐴉𐴝𐴘 𐴔𐴡𐴃𐴧𐴡𐴌 𐴀𐴝𐴣𐴀𐴝𐴌𐴝 𐴒𐴤𐴡𐴄𐴡𐴕𐴝𐴌 𐴎𐴝𐴒𐴝𐴃 𐴎𐴝𐴘 , 𐴔𐴡𐴌𐴝 𐴓𐴝𐴐𐴢 𐴀𐴟𐴊𐴧𐴤𐴝𐴌 𐴒𐴡𐴌𐴡𐴀𐴡𐴕𐴡𐴌 𐴉𐴡𐴌𐴠 , 𐴔𐴟𐴀𐴝𐴘𐴕𐴝 𐴃𐴡𐴊𐴡𐴕𐴃𐴡 𐴒𐴡𐴌𐴥𐴞𐴁𐴡𐴓𐴧𐴝 𐴑𐴝𐴑𐴏𐴡 𐴁𐴝𐴎𐴝𐴌 𐴔𐴟𐴌𐴊𐴝 𐴈𐴥𐴝𐴕𐴝𐴃 𐴉𐴡𐴣𐴀𐴡𐴏𐴝𐴘 𐴊𐴞𐴘𐴞 𐴱𐴱

𐴒𐴤𐴡𐴄𐴡𐴕𐴝 𐴒𐴤𐴡𐴄𐴝𐴘𐴧𐴠𐴊𐴠 𐴀𐴥𐴞𐴃𐴝𐴌𐴝 𐴀𐴝𐴌 𐴀𐴞𐴓𐴞𐴘𐴝𐴏𐴡𐴌 𐴀𐴝𐴉𐴡𐴏𐴡𐴃 𐴊𐴟𐴐𐴧𐴡𐴕𐴞 𐴀𐴝𐴏𐴥𐴠 , 𐴃𐴝𐴌𐴝𐴌 𐴁𐴤𐴟𐴃𐴡𐴌 𐴀𐴝𐴉𐴡𐴏𐴡𐴃 𐴈𐴡𐴙𐴅𐴧𐴙𐴝 𐴘𐴥𐴡 𐴀𐴝𐴏𐴥𐴠 , 𐴀𐴝𐴌 𐴀𐴞𐴓𐴞𐴘𐴝𐴏𐴢 𐴀𐴥𐴡 𐴏𐴡𐴓𐴔𐴝𐴕 𐴐𐴝𐴇𐴢 𐴒𐴟𐴌𐴟𐴉𐴡𐴌 𐴔𐴝𐴕𐴥𐴟𐴙𐴐𐴢 𐴀𐴝𐴐𐴧𐴞𐴀𐴞𐴓 𐴱𐴱

𐴎𐴠 𐴊𐴟𐴐𐴧𐴡𐴕𐴞𐴌 𐴕𐴡𐴃𐴞𐴅𐴝𐴃 𐴑𐴠𐴀𐴠𐴔𐴡𐴌 𐴁𐴠𐴌𐴟𐴊𐴧𐴤𐴞 𐴉𐴝𐴄𐴞 𐴘𐴠 𐴀𐴝𐴃𐴡𐴚𐴁𐴝𐴊𐴞 𐴁𐴡𐴕𐴞 𐴀𐴥𐴝𐴣𐴃𐴞𐴘𐴝𐴌 𐴓𐴡𐴘 𐴀𐴡𐴗𐴓 𐴉𐴝𐴃𐴝𐴌𐴞 𐴔𐴝𐴌𐴝 𐴊𐴤𐴡𐴌𐴝 𐴒𐴡𐴌𐴥𐴞 𐴔𐴝𐴃𐴤𐴝𐴃 𐴀𐴝𐴒𐴤𐴝𐴃 𐴒𐴡𐴌𐴥𐴞 𐴊𐴤𐴝𐴘 𐴒𐴞𐴘𐴡𐴘 𐴱𐴱

𐴁𐴦𐴝𐴊𐴠 𐴀𐴥𐴞𐴃𐴝𐴌𐴝 𐴓𐴡𐴖𐴧𐴠 𐴃𐴡𐴖𐴧𐴠 𐴑𐴠𐴀𐴠𐴔𐴡𐴌 𐴋𐴝𐴑𐴄𐴡𐴌 𐴈𐴥𐴝𐴕𐴝𐴃 𐴕𐴞𐴘𐴧𐴠 , 𐴃𐴡𐴀𐴡𐴘 𐴋𐴝𐴑𐴄𐴡𐴌 𐴀𐴥𐴡𐴑𐴧𐴡𐴓𐴠 𐴔𐴡𐴌𐴞 𐴒𐴞𐴘𐴡𐴘 𐴁𐴡𐴓𐴞 𐴈𐴡𐴘𐴧𐴠 , 𐴓𐴝𐴐𐴢 𐴔𐴟𐴀𐴝𐴘𐴕𐴝 𐴒𐴡𐴌𐴡𐴀𐴡𐴕𐴡𐴌 𐴁𐴦𐴝𐴊𐴠 𐴒𐴤𐴡𐴄𐴡𐴕𐴝 𐴓𐴡𐴘 𐴁𐴝𐴎𐴤𐴝𐴘𐴧𐴝 𐴀𐴝𐴏𐴥𐴠𐴊𐴠 𐴀𐴥𐴞𐴃𐴝𐴌𐴝𐴌 𐴓𐴧𐴝 𐴑𐴝𐴕𐴟𐴕𐴞 𐴁𐴠𐴁𐴡𐴏𐴃𐴤𐴝 𐴒𐴡𐴌𐴥𐴝 𐴎𐴝𐴘𐴁𐴡 𐴁𐴡𐴓𐴞 𐴘𐴥𐴡 ( 𐴀𐴡 𐴏𐴞 ) 𐴘𐴠 𐴈𐴡𐴘𐴧𐴠 𐴱𐴱

Sources : Ukhiyanews.com