𐴌𐴟𐴇𐴝𐴙𐴚𐴒𐴙𐴝𐴌 𐴏𐴠𐴇𐴠𐴃𐴡𐴌 𐴈𐴥𐴠𐴊𐴔𐴡𐴃 𐴄𐴤𐴞𐴑𐴔𐴡𐴃𐴠 𐴀𐴥𐴡𐴘𐴁𐴡𐴓𐴧𐴝 𐴅𐴝𐴂𐴝𐴕𐴠 𐴃𐴞𐴕𐴧𐴥𐴝𐴕 𐴀𐴠𐴔𐴁𐴟𐴓𐴥𐴠𐴕𐴏𐴢 𐴊𐴝𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴟𐴑𐴤𐴞𐴘𐴝𐴌 𐴀𐴠𐴓𐴝𐴑𐴝𐴃 𐴃𐴤𐴝𐴑𐴠𐴊𐴠 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴁𐴡𐴓𐴝𐴎𐴟𐴌𐴞 𐴔𐴡𐴅𐴁𐴟𐴌 𐴁𐴝𐴕𐴝𐴘 𐴊𐴠𐴐𐴡𐴃𐴧𐴟 𐴕𐴠𐴀𐴠𐴓𐴝𐴘 𐴊𐴞𐴘𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 , 𐴏𐴠𐴇𐴠𐴃𐴡𐴌 𐴈𐴥𐴠𐴊𐴔𐴡𐴃 𐴀𐴝𐴌 𐴊𐴝𐴁𐴝𐴘 𐴀𐴡𐴐𐴤𐴟𐴃𐴡𐴌 𐴈𐴥𐴠𐴊𐴔𐴡𐴃 𐴄𐴤𐴞𐴑𐴔𐴡𐴃𐴠 𐴀𐴥𐴡𐴘 𐴉𐴝𐴌𐴠 𐴉𐴝𐴀𐴝𐴕 𐴅𐴝𐴂𐴝𐴕𐴡𐴌 𐴔𐴝𐴙𐴕𐴐𐴤𐴠 , 𐴀𐴟𐴑𐴤𐴞𐴘𐴝𐴌 𐴉𐴠𐴌𐴥𐴠𐴕𐴆𐴤𐴞𐴂𐴢 𐴇𐴥𐴝𐴐𐴉𐴝𐴃𐴝𐴓𐴡𐴃 , 𐴃𐴞𐴕𐴧𐴥𐴝𐴕 𐴀𐴠𐴔𐴁𐴟𐴓𐴥𐴠𐴕𐴏𐴢 ( 𐴓𐴝𐴐𐴡𐴌 𐴒𐴝𐴌𐴥𐴞 ) 𐴊𐴝𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴠𐴕 𐴅𐴞 𐴀𐴡 𐴘𐴠 𐴏𐴝𐴓𐴝𐴀𐴝 𐴊𐴠 𐴉𐴠𐴌𐴥𐴠𐴕𐴆𐴤𐴞𐴂𐴢 𐴇𐴥𐴝𐴐𐴉𐴝𐴃𐴝𐴓𐴡𐴌 𐴑𐴝𐴕𐴟𐴕𐴞 𐴀𐴝𐴌 𐴔𐴝𐴓𐴞 𐴋𐴞𐴂𐴝𐴌𐴔𐴥𐴠𐴕𐴡𐴌 𐴁𐴡𐴌𐴡 𐴀𐴡𐴉𐴥𐴞𐴏𐴝𐴌 / 𐴔𐴟𐴇𐴝𐴔𐴧𐴡𐴊 𐴐𐴡𐴔𐴞𐴔 𐴌𐴠𐴎𐴝𐴌 𐴇𐴥𐴝𐴃𐴠 𐴇𐴥𐴝𐴃𐴠 , 𐴁𐴝𐴚𐴓𐴝𐴊𐴠𐴐𐴡𐴃 𐴀𐴝𐴏𐴥𐴠𐴊𐴠 𐴅𐴝𐴂𐴝𐴕𐴡𐴌 𐴏𐴥𐴡𐴉𐴞𐴌 / 𐴀𐴞𐴄𐴟 𐴕𐴝𐴀𐴡𐴑𐴞 𐴘𐴠 , 𐴀𐴝𐴙𐴅𐴧𐴙𐴝 𐴐𐴤𐴡𐴔 𐴁𐴝𐴌𐴠 𐴀𐴠𐴑 𐴉𐴥𐴝𐴣𐴑𐴐𐴠𐴕𐴡𐴃 , 𐴃𐴞𐴕𐴧𐴥𐴝𐴕 𐴀𐴠𐴔𐴁𐴟𐴓𐴥𐴠𐴕𐴏𐴡𐴌 𐴏𐴝𐴁𐴤𐴞 𐴒𐴡𐴏𐴥𐴝𐴘 𐴊𐴞𐴘𐴠 𐴱𐴱

𐴏𐴝𐴁𐴤𐴞 𐴒𐴡𐴏𐴥𐴝𐴘 𐴊𐴞𐴘𐴠𐴊𐴠 𐴉𐴥𐴝𐴣𐴑𐴐𐴠𐴕 𐴀𐴥𐴞𐴁𐴝𐴃 , 𐴑𐴡𐴑𐴏𐴡 𐴁𐴝𐴎𐴝𐴌 𐴎𐴞𐴓𐴝𐴌 𐴕𐴝𐴀𐴞𐴁 𐴑𐴡𐴔𐴞𐴐𐴕𐴝𐴌 / 𐴔𐴟𐴇𐴝𐴔𐴧𐴡𐴊 𐴔𐴝𐴔𐴟𐴕𐴟𐴌 𐴌𐴡𐴐𐴞𐴊 𐴀𐴝𐴌 𐴉𐴠𐴌𐴥𐴠𐴕𐴆𐴤𐴞𐴂𐴢 𐴇𐴥𐴝𐴐𐴉𐴝𐴃𐴝𐴓𐴡𐴌 𐴕𐴝𐴀𐴞𐴁 𐴋𐴝𐴘𐴌𐴠𐴑𐴄𐴝𐴌 / 𐴀𐴝𐴁𐴟𐴓 𐴇𐴝𐴏𐴕𐴝𐴃 𐴏𐴞𐴊𐴧𐴞𐴑 𐴀𐴝𐴌𐴀𐴥𐴡 𐴀𐴡𐴙𐴕𐴧𐴡 𐴀𐴝𐴊𐴞𐴑𐴝𐴌 𐴀𐴥𐴡𐴑𐴧𐴡𐴓 𐴀𐴥𐴡 𐴇𐴥𐴝𐴎𐴞𐴌 𐴀𐴝𐴐𐴧𐴤𐴞𐴀𐴞𐴓 𐴱𐴱

𐴀𐴥𐴠 𐴉𐴥𐴝𐴣𐴑𐴐𐴠𐴕𐴡𐴃 / 𐴀𐴞𐴄𐴟 𐴕𐴝𐴀𐴡𐴑𐴞 𐴘𐴠 𐴈𐴡𐴘𐴧𐴠𐴊𐴠 ! 𐴀𐴞𐴕𐴏𐴝𐴕𐴞𐴘𐴡𐴃𐴞 𐴔𐴡𐴊𐴡𐴊𐴡𐴌 𐴁𐴝𐴁𐴡𐴃𐴠 𐴇𐴥𐴝𐴔𐴞𐴐𐴤𐴝 𐴅𐴝𐴂𐴝𐴕 𐴁𐴝𐴚𐴓𐴝𐴊𐴠𐴐𐴡𐴌 𐴉𐴥𐴟𐴣𐴖𐴝𐴣𐴃𐴞 𐴀𐴝𐴏𐴥𐴠 , 𐴀𐴝𐴌 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌 𐴕𐴡𐴏𐴥𐴡𐴓 𐴉𐴥𐴟𐴌𐴝 𐴑𐴝𐴌𐴖𐴝𐴘𐴃𐴧𐴟 𐴉𐴡𐴌𐴝𐴕 𐴁𐴝𐴏𐴝𐴘 , 𐴀𐴟𐴑𐴤𐴞𐴘𐴝 𐴑𐴠𐴀𐴠𐴔𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴠𐴊𐴠 𐴁𐴡𐴌𐴔𐴥𐴝𐴌 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴏𐴠𐴇𐴠𐴃𐴡𐴌 𐴈𐴥𐴠𐴊𐴔𐴡𐴃𐴡𐴃 , 𐴀𐴝𐴌 𐴁𐴞𐴘𐴝𐴌𐴝𐴙𐴔𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴀𐴝𐴕𐴝𐴀𐴝 𐴕𐴞𐴎𐴝𐴀𐴝 𐴒𐴡𐴌𐴡𐴀𐴡𐴕𐴡𐴃 , 𐴀𐴠𐴔𐴁𐴟𐴓𐴥𐴠𐴕𐴏𐴢 𐴀𐴞𐴀𐴞𐴕 𐴈𐴥𐴝𐴏𐴢 𐴒𐴡𐴌𐴥𐴞 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴞𐴁𐴡 𐴊𐴠 𐴀𐴝𐴐𐴤𐴝 𐴒𐴡𐴌𐴥𐴠𐴌 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱𐴱

𐴉𐴠𐴌𐴥𐴠𐴕𐴆𐴤𐴞𐴂𐴡𐴌 𐴏𐴠𐴇𐴠𐴃𐴡𐴌 𐴁𐴡𐴌𐴡 / 𐴋𐴝𐴑𐴄𐴡𐴌 𐴒𐴟𐴓𐴝𐴔 𐴌𐴡𐴏𐴦𐴟𐴓𐴠 ! 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴉𐴥𐴟𐴣𐴖𐴝𐴣𐴃𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓 𐴀𐴥𐴡 𐴏𐴠𐴇𐴠𐴃𐴡𐴌 𐴀𐴡𐴐𐴤𐴝𐴕𐴃𐴞𐴃 𐴀𐴝𐴏𐴥𐴠 , 𐴀𐴥𐴠𐴃𐴡𐴓𐴧𐴝 𐴉𐴠𐴌𐴥𐴠𐴕𐴆𐴤𐴞𐴂𐴢 𐴇𐴥𐴝𐴐𐴉𐴝𐴃𐴝𐴓𐴠 𐴌𐴟𐴇𐴝𐴙𐴚𐴒𐴙𐴝 𐴀𐴝𐴌 𐴊𐴠𐴐𐴤𐴡𐴙𐴃𐴧𐴝 𐴊𐴟𐴕𐴥𐴞 𐴋𐴝𐴀𐴝𐴘𐴌 𐴈𐴥𐴠𐴊𐴔𐴡𐴃 𐴒𐴡𐴌𐴥𐴞𐴁𐴡 𐴱𐴱

𐴀𐴠𐴔𐴁𐴟𐴓𐴥𐴠𐴕𐴏𐴢 𐴀𐴞𐴀𐴞𐴕𐴠 𐴊𐴟𐴕𐴥𐴞 𐴋𐴝𐴀𐴝𐴘𐴃𐴧𐴟 𐴰 𐴰 𐴰 𐴰 𐴰 𐴳 𐴃𐴞𐴕 𐴓𐴝𐴑 𐴎𐴡𐴕𐴡𐴌 𐴈𐴝𐴣𐴏𐴠 𐴉𐴡𐴣𐴀𐴡𐴏𐴞 𐴉𐴝𐴌𐴞𐴁𐴡 , 𐴀𐴠𐴈𐴥𐴡𐴕 𐴀𐴟𐴑𐴤𐴞𐴘𐴝 𐴀𐴝𐴌 𐴑𐴡𐴑𐴏𐴡 𐴁𐴝𐴎𐴝𐴌 𐴀𐴟𐴉𐴡𐴎𐴞𐴓𐴝𐴃 , 𐴁𐴞𐴘𐴝𐴌𐴝𐴙𐴔𐴧𐴙𐴝𐴌 𐴈𐴥𐴠𐴊𐴔𐴡𐴃 𐴒𐴡𐴌𐴥𐴝 , 𐴈𐴥𐴡𐴌𐴝𐴁 𐴔𐴟𐴀𐴟𐴏𐴡𐴔𐴡𐴌 𐴈𐴝𐴓𐴠 𐴀𐴥𐴟𐴊𐴧𐴝 𐴁𐴠𐴐𐴤𐴞 𐴀𐴝𐴏𐴝𐴕 𐴀𐴥𐴡𐴘𐴁𐴡 𐴱𐴱

𐴋𐴝𐴑𐴄𐴡𐴌 / 𐴒𐴟𐴓𐴝𐴔 𐴌𐴡𐴏𐴦𐴟𐴓𐴠 , 𐴅𐴝𐴂𐴝𐴕𐴡𐴌 𐴔𐴝𐴙𐴕𐴐𐴤𐴡𐴌 𐴊𐴝𐴕 𐴏𐴥𐴡𐴈𐴝𐴖𐴡𐴃 𐴀𐴝𐴌 𐴇𐴥𐴝𐴔𐴊𐴡𐴌𐴡𐴊𐴞𐴌 𐴁𐴠𐴐𐴤𐴞 𐴐𐴤𐴟𐴑𐴟𐴌𐴞𐴘𐴝 𐴒𐴡𐴙𐴅𐴧𐴤𐴙𐴠 𐴀𐴝𐴌 𐴊𐴟𐴕𐴥𐴞 𐴊𐴠𐴐𐴡𐴌 𐴔𐴝𐴎𐴠 𐴀𐴝𐴊𐴡𐴌 𐴔𐴟𐴇𐴝𐴁𐴧𐴡𐴃 𐴀𐴝𐴌 𐴊𐴟𐴏𐴃𐴞𐴊𐴝𐴌 𐴇𐴥𐴝𐴔𐴞𐴐𐴤𐴝 𐴁𐴝𐴑𐴞 𐴃𐴤𐴝𐴑𐴞𐴁𐴡𐴓𐴧𐴝 𐴊𐴟𐴀𐴝 𐴒𐴡𐴙𐴅𐴧𐴤𐴙𐴠 𐴱𐴱

Sources : Dhakatribune