𐴌𐴠𐴕𐴠𐴕 𐴆𐴤𐴙𐴡𐴚 𐴐𐴤𐴡𐴀𐴡𐴌𐴡𐴌 𐴓𐴥𐴝𐴔𐴥𐴠 𐴒𐴤𐴟𐴕 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃 𐴵 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 𐴱𐴱

𐴔𐴡𐴒𐴧𐴗𐴥𐴠 𐴋𐴞𐴐𐴄𐴤𐴞𐴑 , 𐴆𐴤𐴙𐴡𐴑 𐴑𐴠𐴌𐴝𐴙𐴚 , 𐴌𐴠𐴕𐴠𐴕 𐴆𐴤𐴙𐴡𐴚 𐴐𐴤𐴡𐴀𐴡𐴌 𐴀𐴠𐴓𐴝𐴑𐴝𐴌 𐴌𐴠𐴕𐴠𐴕 𐴆𐴤𐴙𐴡𐴚 𐴐𐴤𐴡𐴀𐴡𐴌 𐴓𐴥𐴝𐴔𐴥𐴠 𐴒𐴤𐴟𐴕 𐴀𐴝𐴕𐴏𐴡𐴓𐴡𐴌 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃 , 𐴀𐴝𐴌𐴑𐴝𐴕𐴡𐴌 𐴁𐴤𐴝𐴐𐴞𐴕𐴊𐴝 𐴵 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴠 , 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 𐴊𐴠 𐴘𐴝𐴀𐴝𐴕 𐴉𐴟𐴓𐴞𐴐𐴡𐴌 𐴀𐴟𐴏𐴞𐴓𐴝𐴘𐴠 𐴎𐴝𐴕𐴝 𐴒𐴞𐴘𐴠 𐴱𐴱

𐴖𐴝𐴑𐴞𐴘𐴝 𐴀𐴥𐴡𐴙𐴓𐴊𐴠 ! 𐴌𐴠𐴕𐴠𐴕 𐴆𐴤𐴙𐴡𐴚 𐴄𐴡𐴀𐴡𐴕𐴡𐴌 𐴋𐴗𐴥𐴝𐴚 𐴒𐴤𐴟𐴕 𐴌𐴥𐴠𐴑𐴧𐴗𐴥𐴝𐴌 𐴀𐴟𐴃𐴧𐴡𐴌 𐴔𐴝𐴃𐴤𐴝𐴃 𐴀𐴝𐴏𐴥𐴠𐴊𐴠 / 𐴀𐴥𐴟 𐴀𐴡𐴚 𐴔𐴙𐴥𐴟𐴌 𐴒𐴤𐴡𐴌𐴡𐴃 , 𐴀𐴝𐴌𐴑𐴝𐴕𐴡𐴌 𐴔𐴡𐴚𐴋𐴤𐴟 𐴑𐴠𐴌𐴝𐴙𐴚𐴡𐴌 𐴁𐴤𐴝𐴐𐴞𐴕𐴊𐴝 , 𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴝𐴀𐴝𐴙𐴕 𐴵 𐴎𐴡𐴕 , 𐴁𐴠𐴍𐴞𐴀𐴝𐴙𐴕 𐴸 𐴎𐴡𐴕 , 𐴒𐴟𐴌𐴝 𐴉𐴟𐴖𐴝𐴙𐴕 𐴊𐴟𐴘 𐴎𐴡𐴕 , 𐴁𐴠𐴒𐴧𐴤𐴟𐴕𐴠 𐴔𐴞𐴓𐴝𐴘 𐴵 𐴱 𐴎𐴡𐴕 , 𐴃𐴡𐴀𐴡𐴙𐴃𐴧𐴝 𐴃𐴤𐴝𐴙𐴑𐴧𐴙𐴠𐴊𐴠 𐴀𐴡𐴑𐴃𐴤𐴡𐴃 𐴱𐴱

𐴀𐴝𐴙𐴅𐴧𐴙𐴝 𐴏𐴠𐴃𐴡𐴔𐴁𐴡𐴌 𐴔𐴝𐴐𐴡𐴌 𐴰 𐴱 𐴃𐴝𐴌𐴥𐴞𐴑𐴡𐴃 , 𐴁𐴞𐴀𐴞𐴕𐴧𐴝 𐴏𐴥𐴡𐴀𐴡𐴌𐴠 𐴌𐴠𐴕𐴠𐴕 𐴆𐴤𐴙𐴡𐴚 𐴐𐴤𐴡𐴀𐴡𐴌𐴡𐴌 , 𐴓𐴥𐴝𐴔𐴥𐴠 𐴒𐴤𐴟𐴕 𐴀𐴝𐴕𐴏𐴡𐴓𐴡𐴌 𐴉𐴟𐴓𐴞𐴐𐴢 𐴃𐴤𐴝𐴕𐴝𐴌𐴃𐴧𐴟 , 𐴉𐴟𐴓𐴞𐴐𐴡𐴌 𐴁𐴡𐴌𐴡 / 𐴖𐴥𐴝𐴚 𐴛𐴗𐴥𐴠𐴕𐴡𐴌 𐴏𐴥𐴡𐴊𐴧𐴝𐴌𐴞𐴃 𐴉𐴟𐴓𐴞𐴐𐴢 𐴈𐴡𐴊𐴦𐴟𐴕 𐴀𐴝𐴀𐴝𐴘 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴠 𐴒𐴤𐴡𐴘𐴊𐴠 𐴘𐴝𐴀𐴝𐴕 , 𐴁𐴡𐴕 𐴀𐴥𐴡𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕 𐴀𐴝𐴌𐴑𐴝𐴕𐴡𐴃𐴧𐴟 𐴌𐴠𐴕𐴒𐴟𐴕 , 𐴘𐴝𐴀𐴝𐴕𐴃𐴟 𐴃𐴤𐴡𐴌𐴠 𐴃𐴤𐴡𐴌𐴠 𐴔𐴡𐴓𐴠𐴆𐴤𐴙𐴝 𐴎𐴝𐴘 𐴁𐴡𐴓𐴧𐴝 𐴀𐴝𐴙𐴐𐴧𐴤𐴙𐴠𐴊𐴠 𐴔𐴝𐴕𐴥𐴟𐴙𐴐𐴢 𐴊𐴠 𐴎𐴝𐴕𐴝 𐴒𐴞𐴘𐴠 , 𐴑𐴟𐴀𐴟𐴂𐴑𐴝𐴌 𐴁𐴡𐴌𐴔𐴥𐴝 𐴔𐴠𐴓𐴠𐴄𐴠𐴌𐴞 𐴘𐴠 𐴀𐴝𐴌𐴑𐴝𐴕𐴡𐴌 𐴁𐴤𐴝𐴐𐴞𐴕𐴊𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡 𐴌𐴠 , 𐴀𐴝𐴌𐴑𐴝𐴕𐴡𐴌 𐴁𐴝𐴀𐴝𐴌𐴠 𐴓𐴦𐴡𐴃 𐴉𐴝𐴘𐴓𐴠 𐴔𐴡𐴕𐴃𐴡𐴌 𐴁𐴡𐴕 𐴒𐴡𐴌𐴥𐴞 𐴉𐴥𐴠𐴓𐴝𐴃 𐴀𐴝𐴏𐴥𐴠 𐴱𐴱

𐴀𐴝𐴌𐴑𐴝𐴕 𐴀𐴥𐴡𐴘𐴃𐴠 𐴑𐴠𐴘𐴞𐴚 𐴂𐴠𐴌𐴠𐴕𐴠 ( 𐴄𐴦𐴤𐴝𐴘𐴓𐴠𐴕𐴡𐴌 ) 𐴁𐴡𐴖𐴋𐴝𐴌 𐴉𐴡𐴙𐴅𐴧𐴡𐴕𐴃𐴡 , 𐴉𐴥𐴟𐴖𐴝𐴕𐴝𐴌 𐴌𐴝𐴏𐴧𐴝 𐴉𐴝𐴕𐴥𐴞𐴌 𐴌𐴝𐴏𐴧𐴝 𐴁𐴠𐴒𐴧𐴤𐴟𐴓𐴧𐴝 , 𐴑𐴟𐴀𐴟𐴂𐴑𐴝𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴁𐴠𐴐𐴤𐴞 𐴒𐴡𐴌𐴥𐴞 𐴉𐴦𐴝 𐴉𐴦𐴝 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓 𐴊𐴞𐴘𐴠 , 𐴎𐴞𐴃𐴝𐴌𐴥𐴝 𐴀𐴝𐴌𐴑𐴝𐴕𐴡𐴌 𐴁𐴤𐴝𐴐𐴞𐴕𐴊𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴃𐴟𐴖𐴝𐴘 𐴃𐴟𐴖𐴝𐴘 𐴁𐴡𐴕 𐴒𐴡𐴌𐴥𐴞 , 𐴔𐴦𐴡𐴊𐴧𐴞𐴔𐴝 𐴑𐴤𐴟𐴓𐴞 𐴈𐴡𐴔𐴡𐴃 𐴊𐴟𐴘 𐴁𐴡𐴏𐴥𐴡𐴌𐴡𐴌 𐴊𐴧𐴡𐴌𐴠 𐴎𐴞𐴘𐴡𐴓 𐴊𐴞𐴘𐴝𐴃 𐴀𐴝𐴏𐴥𐴠 𐴱𐴱

Sources : The Arakan Express News