𐴀𐴡𐴑𐴄𐴟𐴁𐴡𐴌 𐴔𐴝𐴐𐴡𐴃 𐴌𐴟𐴇𐴝𐴙𐴚𐴒𐴙𐴝𐴌 𐴖𐴝𐴉𐴠𐴏𐴞 𐴀𐴥𐴡𐴘𐴁𐴡 𐴁𐴡𐴓𐴞 𐴀𐴝𐴐𐴤𐴝 𐴒𐴡𐴌𐴥𐴠𐴌 , 𐴇𐴥𐴠𐴉𐴝𐴎𐴡𐴃𐴞 𐴀𐴟𐴎𐴞𐴌 𐴱𐴱

𐴑𐴟𐴊𐴟𐴌𐴡𐴃𐴞 𐴀𐴝𐴉𐴡𐴃 𐴏𐴥𐴡𐴣𐴀𐴡𐴓𐴝 𐴀𐴝𐴌 𐴇𐴥𐴠𐴉𐴝𐴎𐴡𐴃𐴞 𐴀𐴟𐴎𐴞𐴌/ 𐴀𐴠𐴕 𐴀𐴝𐴔𐴟𐴌 𐴌𐴝𐴇𐴔𐴝𐴕𐴠 , 𐴏𐴡𐴓𐴠𐴌 𐴊𐴧𐴠 𐴁𐴡𐴏𐴥𐴡𐴌𐴡𐴌 𐴀𐴡𐴑𐴄𐴟𐴁𐴡𐴌 𐴔𐴝𐴐𐴡𐴃 , 𐴌𐴟𐴇𐴝𐴙𐴚𐴒𐴙𐴝𐴌 𐴖𐴝𐴉𐴠𐴏𐴞 𐴐𐴤𐴟𐴌𐴟 𐴀𐴥𐴡𐴘𐴁𐴡 𐴁𐴡𐴓𐴞 𐴀𐴝𐴐𐴤𐴝 𐴎𐴝𐴀𐴞𐴌 𐴒𐴡𐴙𐴅𐴧𐴤𐴙𐴠 , 𐴀𐴥𐴞𐴁𐴝 𐴘𐴠 𐴈𐴡𐴘𐴧𐴠𐴊𐴠 , 𐴁𐴡𐴌𐴔𐴥𐴝𐴃 𐴀𐴠𐴈𐴥𐴡𐴕 𐴏𐴡𐴓𐴠𐴌 𐴊𐴧𐴠 𐴎𐴟𐴓𐴟𐴔 𐴀𐴡𐴃𐴧𐴞𐴏𐴝𐴌𐴡𐴌 𐴏𐴥𐴡𐴁𐴡𐴁𐴠 , 𐴁𐴡𐴌𐴔𐴥𐴝𐴌 𐴈𐴡𐴕𐴥𐴡 𐴊𐴠𐴐𐴤𐴡𐴙𐴃𐴧𐴝 𐴁𐴝𐴚𐴓𐴝- 𐴊𐴠𐴐𐴡𐴃 𐴉𐴝𐴌𐴥𐴝𐴘𐴁𐴝𐴌 𐴐𐴤𐴟𐴎𐴟𐴑 𐴕𐴡 𐴀𐴥𐴡𐴘𐴁𐴡 𐴱𐴱

𐴎𐴠 𐴈𐴡𐴕𐴥𐴡 𐴀𐴝𐴁𐴡𐴏𐴃𐴤𐴝𐴃 𐴁𐴝𐴚𐴓𐴝𐴊𐴠𐴐𐴡𐴃 𐴒𐴤𐴡𐴓𐴝 𐴌𐴟𐴑𐴤𐴞 𐴊𐴞𐴘𐴝 𐴎𐴝𐴘𐴁𐴡 , 𐴏𐴠𐴃𐴡𐴔𐴁𐴡𐴌 𐴔𐴝𐴐𐴡𐴌 𐴷 𐴃𐴝𐴌𐴥𐴞𐴑 𐴁𐴟𐴙𐴃 𐴁𐴝𐴌𐴠 𐴊𐴦𐴟𐴛𐴅𐴧𐴙𐴝 , 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴞𐴕𐴏𐴝𐴕𐴞 𐴐𐴤𐴝𐴕𐴃𐴞 𐴔𐴡𐴊𐴡𐴊 𐴉𐴥𐴝𐴀𐴡𐴕𐴋𐴞𐴐𐴤𐴠𐴕 𐴀𐴠𐴕 𐴅𐴞 𐴀𐴡 𐴘𐴠 𐴀𐴡𐴌𐴒𐴡𐴕𐴥𐴝𐴙𐴎 𐴒𐴡𐴙𐴅𐴧𐴤𐴙𐴠𐴊𐴠 𐴏𐴥𐴞𐴔𐴞𐴕𐴝𐴌𐴡𐴌 𐴉𐴥𐴟𐴌𐴝𐴕𐴃𐴞𐴃 , 𐴈𐴡𐴃𐴤𐴝 𐴀𐴞𐴀𐴞𐴕 𐴌𐴠𐴂𐴟𐴄𐴝𐴌 𐴀𐴥𐴡𐴑𐴧𐴡𐴓𐴡𐴌𐴠 𐴈𐴡𐴘𐴧𐴠𐴊𐴠 𐴱𐴱

𐴀𐴝𐴣𐴀𐴝𐴌𐴝 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴡𐴌 𐴈𐴝𐴣𐴏𐴠 𐴉𐴝𐴄𐴤𐴝𐴀𐴝𐴘𐴓𐴝𐴔 𐴊𐴠 𐴌𐴟𐴇𐴝𐴙𐴚𐴒𐴙𐴝𐴌 𐴓𐴞𐴐𐴄𐴤𐴞 , 𐴘𐴝𐴀𐴝𐴕𐴡𐴌𐴃𐴧𐴟 𐴁𐴡𐴌𐴔𐴥𐴝 𐴘𐴠 𐴵 𐴳 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙 𐴖𐴝𐴉𐴠𐴏𐴢 𐴓𐴡𐴘 𐴎𐴝𐴘𐴁𐴤𐴡 𐴁𐴡𐴓𐴞 𐴔𐴡𐴃 𐴎𐴝𐴀𐴞𐴌 𐴒𐴡𐴙𐴅𐴧𐴞𐴀𐴞𐴓 𐴁𐴡𐴓𐴞 , 𐴋𐴝𐴑𐴄𐴡𐴌 𐴀𐴠𐴕 𐴀𐴝𐴔𐴟𐴌 𐴌𐴝𐴇𐴔𐴝𐴕𐴠 𐴈𐴡𐴘𐴧𐴠 , 𐴔𐴡𐴕𐴃𐴡𐴌 𐴀𐴠𐴈𐴥𐴡𐴕 𐴃𐴦𐴡𐴃 𐴃𐴝𐴌𐴥𐴝𐴌 𐴁𐴤𐴟𐴃𐴡𐴌𐴠 𐴃𐴡𐴀𐴡𐴙𐴃𐴧𐴝 𐴑𐴠𐴙𐴏𐴧𐴥𐴟 𐴒𐴤𐴡𐴌𐴒𐴟𐴐𐴧𐴤𐴞 𐴘𐴝𐴕𐴥𐴝 𐴀𐴡𐴐𐴤𐴟𐴁𐴞𐴊𐴝 𐴱𐴱

𐴖𐴝𐴉𐴠𐴏𐴞𐴌 𐴈𐴝𐴔 𐴅𐴡𐴓𐴊𐴞 𐴀𐴥𐴡𐴘 𐴀𐴝𐴘𐴁𐴤𐴡 , 𐴀𐴠 𐴈𐴡𐴃𐴤𐴝 𐴈𐴟𐴖𐴝𐴈𐴡𐴀𐴡𐴘 𐴒𐴡𐴌𐴡𐴀𐴡𐴕𐴡𐴌 𐴁𐴦𐴝𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴊𐴝𐴁𐴞 𐴊𐴝𐴌𐴝 𐴔𐴝𐴕𐴞𐴓𐴡𐴘𐴁𐴡 𐴑𐴡𐴁𐴟𐴓 𐴒𐴡𐴌𐴥𐴞𐴁𐴡 , 𐴁𐴡𐴓𐴞 𐴁𐴡𐴌𐴔𐴥𐴝𐴌 𐴕𐴡𐴔𐴝𐴙𐴕𐴊𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 , 𐴀𐴥𐴠𐴍𐴠 𐴀𐴥𐴞𐴃𐴝𐴌𐴝𐴌 𐴏𐴞𐴕𐴧𐴡𐴃𐴝 𐴀𐴝𐴌 𐴇𐴥𐴠𐴉𐴝𐴎𐴡𐴃𐴡 𐴌𐴠 𐴈𐴥𐴝𐴄𐴞 𐴒𐴡𐴌𐴥𐴝 𐴎𐴝𐴘𐴁𐴡 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴏𐴥𐴡𐴚𐴑𐴡𐴄 𐴇𐴥𐴡𐴓 𐴒𐴡𐴌𐴥𐴞𐴁𐴝𐴌 𐴁𐴝𐴁𐴡𐴃𐴠 , 𐴁𐴝𐴚𐴓𐴝𐴊𐴠𐴐𐴢 𐴀𐴝𐴌 𐴊𐴠𐴐𐴁𐴞𐴊𐴠𐴐𐴡𐴌 𐴏𐴞𐴁𐴡𐴌 𐴔𐴟𐴀𐴟𐴕𐴃𐴟 , 𐴁𐴡𐴌𐴔𐴥𐴝 𐴁𐴠𐴐𐴤𐴞 𐴓𐴟𐴃𐴝 𐴔𐴟𐴃𐴤𐴝 𐴀𐴝𐴌 𐴓𐴡𐴆𐴞𐴓𐴝 𐴁𐴡𐴓𐴞 𐴘𐴥𐴡 / 𐴋𐴝𐴑𐴄𐴡𐴌 𐴀𐴠𐴕 𐴀𐴝𐴔𐴠 𐴈𐴡𐴘𐴧𐴠 , 𐴁𐴡𐴖𐴋𐴝𐴌𐴡𐴌 𐴈𐴡𐴕𐴥𐴡 𐴑𐴞𐴏𐴞𐴔𐴧𐴝 𐴀𐴡𐴐𐴤𐴝𐴕𐴃𐴞𐴌 𐴇𐴥𐴝𐴓𐴡𐴃𐴡𐴌 𐴎𐴡𐴌𐴞𐴘𐴝 , 𐴌𐴟𐴇𐴝𐴙𐴚𐴒𐴙𐴝𐴌 𐴖𐴝𐴉𐴠𐴏𐴞𐴌 𐴖𐴡𐴌𐴠 𐴊𐴤𐴝𐴁𐴧𐴝 𐴕𐴡 𐴀𐴝𐴘𐴁𐴡 𐴁𐴡𐴓𐴞 𐴘𐴥𐴡 𐴀𐴥𐴞𐴁𐴝 𐴘𐴠 𐴀𐴝𐴐𐴤𐴝 𐴎𐴝𐴀𐴞𐴌 𐴒𐴡𐴙𐴅𐴧𐴙𐴠 𐴱𐴱

Sources : Ukhiyanews.com