𐴀𐴝𐴙𐴑𐴧𐴙𐴝𐴁𐴡𐴃 𐴌𐴟𐴇𐴝𐴙𐴚𐴒𐴙𐴝 𐴉𐴟𐴖𐴝 𐴀𐴠𐴑 𐴎𐴡𐴕 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴀𐴝𐴙𐴑𐴧𐴙𐴝𐴁𐴡𐴌 𐴁𐴤𐴟𐴔𐴠 𐴌𐴥𐴠𐴑𐴧𐴤𐴗𐴝 𐴀𐴝𐴙𐴑𐴧𐴙𐴝𐴁 𐴑𐴦𐴡𐴓𐴠𐴅𐴡𐴌 𐴋𐴤𐴝𐴑𐴠 , 𐴏𐴠𐴃𐴡𐴔𐴁𐴡𐴌 𐴔𐴝𐴐𐴡𐴌 𐴴 𐴃𐴝𐴌𐴥𐴞𐴑𐴡𐴃 𐴁𐴞𐴀𐴞𐴕𐴧𐴝 𐴀𐴡𐴕𐴟𐴔𐴝𐴕𐴞𐴑 𐴷 𐴁𐴝𐴎𐴠 , 𐴒𐴦𐴝𐴃 𐴒𐴟𐴓𐴞𐴌 𐴉𐴡𐴌𐴡𐴀𐴡𐴕𐴠 𐴌𐴟𐴇𐴝𐴙𐴚𐴒𐴙𐴝 𐴉𐴟𐴖𐴝 𐴀𐴠𐴑 𐴎𐴡𐴕 𐴔𐴡𐴌𐴞 𐴒𐴞𐴘𐴡𐴘 𐴊𐴠 , 𐴊𐴠𐴐𐴡𐴙𐴃𐴧𐴝 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

𐴋𐴠𐴁𐴝𐴙𐴚𐴡𐴃 𐴃𐴤𐴝𐴑𐴠𐴊𐴠 / 𐴎𐴡𐴔𐴞𐴌 𐴇𐴟𐴏𐴡𐴕 , 𐴀𐴝𐴙𐴑𐴧𐴙𐴝𐴁 𐴑𐴦𐴡𐴓𐴠𐴅𐴡𐴌 𐴋𐴤𐴝𐴑𐴠 𐴀𐴝𐴏𐴥𐴠𐴊𐴠 𐴉𐴟𐴓𐴞𐴐𐴢 𐴄𐴤𐴠𐴌𐴥𐴝𐴚𐴡𐴌 𐴶 𐴳 𐴓𐴡𐴔𐴁𐴤𐴡𐴌 𐴀𐴞𐴕𐴑𐴗𐴝𐴌𐴞 𐴒𐴠𐴀𐴞𐴄 𐴁𐴤𐴝𐴌𐴝𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴀𐴡𐴑𐴃𐴤𐴡𐴃 , 𐴉𐴟𐴓𐴞𐴐𐴡𐴌 𐴒𐴤𐴝𐴣𐴄𐴞𐴌 𐴁𐴤𐴟𐴃𐴡𐴌𐴃𐴧𐴟 𐴒𐴟𐴓𐴞 𐴔𐴝𐴌𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴔𐴡𐴌𐴞 𐴒𐴞𐴘𐴡𐴘 𐴁𐴡𐴓𐴞 , 𐴕𐴝𐴔 𐴕𐴡 𐴈𐴡𐴘𐴁𐴝𐴌 𐴐𐴡𐴌𐴥𐴡𐴃 𐴓𐴡𐴘 𐴏𐴟𐴑 𐴊𐴠𐴈𐴥𐴝 𐴊𐴠𐴐𐴤𐴡𐴙𐴃𐴧𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

“𐴔𐴡𐴄𐴡𐴌 𐴏𐴝𐴙𐴌𐴑𐴤𐴠𐴓𐴡𐴌 𐴈𐴝𐴁𐴡𐴏𐴢 𐴉𐴡𐴃𐴧𐴡𐴌𐴡 𐴊𐴠𐴈𐴥𐴝𐴌𐴊𐴧𐴠 𐴀𐴡𐴑𐴃𐴤𐴡𐴃 , 𐴒𐴤𐴝𐴣𐴄𐴞𐴌 𐴁𐴤𐴟𐴃𐴡𐴌𐴃𐴧𐴟 𐴒𐴟𐴓𐴞 𐴔𐴝𐴙𐴅𐴧𐴤𐴙𐴠 , 𐴒𐴟𐴓𐴞 𐴈𐴥𐴝𐴘𐴧𐴠𐴊𐴠 𐴀𐴥𐴞𐴁𐴝 𐴔𐴡𐴄𐴡𐴌 𐴏𐴝𐴙𐴌𐴑𐴠𐴓𐴡𐴌 𐴉𐴞𐴏𐴥𐴡𐴃𐴧𐴟 𐴁𐴡𐴘𐴍𐴥𐴝𐴃 , 𐴔𐴡𐴄𐴡𐴌 𐴏𐴝𐴙𐴌𐴑𐴠𐴓 𐴏𐴝𐴓𐴝𐴀𐴡𐴙𐴕𐴧𐴝 𐴔𐴟𐴀𐴟𐴕𐴃𐴟 , 𐴀𐴥𐴠𐴃𐴡𐴑𐴧𐴡𐴕𐴡𐴃 𐴒𐴤𐴝𐴣𐴄𐴞𐴌 𐴁𐴤𐴟𐴃𐴡𐴌𐴃𐴧𐴟 𐴒𐴟𐴓𐴞 𐴔𐴝𐴙𐴅𐴧𐴤𐴙𐴠 , 𐴀𐴥𐴡𐴊𐴡𐴃 𐴔𐴡𐴌𐴞 𐴒𐴞𐴘𐴡𐴘 “ 𐴱𐴱

𐴸 𐴱 𐴁𐴡𐴏𐴥𐴡𐴌 𐴁𐴡𐴐𐴢 𐴀𐴡𐴓𐴝 𐴌𐴟𐴇𐴝𐴙𐴚𐴒𐴙𐴝 𐴉𐴟𐴖𐴝 𐴎𐴡𐴔𐴞𐴌 𐴇𐴟𐴏𐴡𐴕𐴡𐴌 𐴓𐴝𐴐𐴢 , 𐴀𐴝𐴙𐴑𐴧𐴙𐴝𐴁𐴡𐴌 𐴁𐴡𐴌 𐴇𐴥𐴝𐴐𐴉𐴝𐴃𐴝𐴓𐴡𐴃 𐴉𐴡𐴣𐴀𐴡𐴏𐴝𐴘 𐴊𐴞𐴘𐴠 𐴁𐴡𐴓𐴞 𐴘𐴥𐴡 𐴔𐴝𐴕𐴥𐴟𐴙𐴐𐴢 𐴀𐴥𐴞𐴁𐴝 𐴘𐴠 𐴈𐴡𐴘𐴧𐴠 , 𐴀𐴠𐴕𐴋𐴞𐴓𐴧𐴝 𐴏𐴥𐴟𐴕𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴉𐴟𐴖𐴝 𐴀𐴠𐴑 𐴎𐴡𐴕 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠𐴊𐴠 𐴘𐴝𐴀𐴝𐴕𐴡𐴌 𐴁𐴝𐴁𐴡𐴃𐴠 , 𐴀𐴝𐴌𐴑𐴝𐴕𐴡𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴃𐴡𐴌𐴉𐴥𐴡𐴌𐴃𐴧𐴟 𐴔𐴝𐴃𐴞𐴁𐴤𐴝𐴌 𐴀𐴠𐴅𐴝𐴎𐴡𐴃 𐴀𐴝𐴏𐴥𐴠𐴊𐴠 , 𐴑𐴝𐴕𐴟𐴕𐴡𐴌 𐴁𐴡𐴌𐴡 / 𐴀𐴥𐴟 𐴓𐴝𐴇 𐴏𐴥𐴞𐴕 𐴓𐴡𐴘 𐴄𐴠𐴓𐴞𐴉𐴟𐴕𐴠 , 𐴈𐴥𐴝𐴄𐴞 𐴅𐴝𐴕𐴑𐴝𐴌𐴞 𐴓𐴡𐴘𐴁𐴝𐴌 𐴑𐴟𐴐𐴤𐴞𐴐𐴢 𐴒𐴡𐴌𐴥𐴝 𐴒𐴞𐴘𐴠 𐴔𐴡𐴕𐴃𐴡𐴌 𐴑𐴝𐴔𐴞𐴘𐴝𐴁 𐴕𐴡 𐴀𐴥𐴡𐴀𐴡 𐴱𐴱

𐴔𐴡𐴄𐴡𐴌 𐴏𐴝𐴙𐴌𐴑𐴤𐴠𐴓 𐴏𐴝𐴓𐴝𐴀𐴡𐴙𐴕𐴧𐴝 𐴌𐴥𐴠 , 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴀𐴠𐴌𐴞 𐴊𐴞𐴀𐴞 𐴉𐴥𐴠𐴓𐴝𐴘𐴧𐴠 𐴁𐴡𐴕 𐴒𐴡𐴌𐴥𐴞 𐴕𐴡𐴀𐴡 𐴌𐴝𐴑𐴤𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 , 𐴀𐴝𐴌𐴑𐴝𐴕𐴡𐴃 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓 𐴀𐴝𐴎𐴝𐴊𐴞𐴌 𐴏𐴥𐴝𐴣𐴀𐴝𐴃𐴠 𐴀𐴝𐴀𐴝 𐴎𐴝𐴀𐴝 , 𐴓𐴡𐴌𐴝 𐴏𐴡𐴌𐴝 𐴒𐴡𐴌𐴡𐴀𐴡𐴕𐴡𐴌 𐴇𐴥𐴡𐴑 𐴀𐴥𐴝𐴌𐴝𐴘 𐴉𐴥𐴠𐴓𐴝𐴘𐴧𐴠 𐴊𐴠 𐴀𐴥𐴠𐴕𐴋𐴞𐴓𐴧𐴝 , 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑 𐴔𐴝𐴍𐴞𐴌 𐴎𐴟𐴓𐴟𐴔𐴡𐴌 𐴐𐴤𐴞𐴑𐴝𐴌 𐴀𐴥𐴡 𐴀𐴥𐴡𐴘𐴧𐴠 𐴁𐴡𐴓𐴞 𐴌𐴟𐴇𐴝𐴙𐴚𐴒𐴙𐴝𐴌 𐴀𐴠𐴑𐴄𐴞𐴁𐴤𐴞𐴏𐴄 ( 𐴑𐴡𐴌𐴔𐴞 ) 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

Sources : RFAburmese