𐴒𐴗𐴥𐴝 𐴐𐴤𐴡𐴀𐴡𐴌 𐴀𐴠𐴓𐴝𐴑𐴝𐴌 𐴋𐴤𐴡𐴗𐴚 𐴆𐴤𐴙𐴡𐴚 𐴉𐴝𐴌𐴝𐴌 𐴈𐴝𐴣𐴏𐴥𐴠 𐴌𐴟𐴇𐴝𐴙𐴚𐴒𐴙𐴝 𐴈𐴡𐴊𐴦𐴟𐴕 𐴁𐴡𐴕 𐴀𐴥𐴡𐴘𐴧𐴠 𐴱𐴱

𐴒𐴗𐴥𐴝 𐴐𐴤𐴡𐴀𐴡𐴌 𐴀𐴠𐴓𐴝𐴑𐴝𐴌 𐴋𐴤𐴡𐴗𐴚 𐴆𐴤𐴙𐴡𐴚 𐴉𐴝𐴌𐴝𐴌 𐴊𐴡𐴐𐴢 𐴔𐴝𐴙𐴓𐴡𐴌 𐴏𐴠𐴑 𐴂𐴦𐴟𐴏𐴄𐴡𐴃 , 𐴶 𐴀𐴠 𐴴 𐴹 𐴷 𐴳 𐴓𐴡𐴔𐴁𐴤𐴡𐴌 𐴒𐴝𐴌𐴥𐴞 𐴃𐴤𐴞𐴘𐴝 𐴒𐴡𐴌𐴥𐴝𐴘 𐴌𐴝𐴙𐴑𐴧𐴤𐴙𐴠 𐴊𐴠 𐴓𐴡𐴀𐴡𐴃 𐴉𐴝𐴘 𐴁𐴦𐴝𐴊𐴠 , 𐴒𐴝𐴌𐴥𐴞 𐴘𐴝𐴀𐴝𐴕𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴁𐴤𐴡𐴌𐴞 𐴀𐴝𐴙𐴕𐴧𐴥𐴠 𐴊𐴠 𐴒𐴝𐴌𐴥𐴞 𐴀𐴥𐴡𐴙𐴃 𐴉𐴝𐴌𐴠 𐴁𐴡𐴓𐴞 𐴈𐴡𐴀𐴡𐴘 𐴱𐴱

𐴀𐴥𐴠 𐴁𐴞𐴐𐴧𐴤𐴝𐴐𐴡𐴌 𐴖𐴡𐴌𐴠 𐴋𐴤𐴡𐴗𐴚 𐴆𐴤𐴡𐴙𐴚 𐴉𐴝𐴌𐴝 𐴋𐴞𐴛𐴝𐴘 𐴎𐴝𐴘𐴃𐴠 ,𐴀𐴝𐴃𐴠 𐴈𐴝𐴣𐴏𐴥𐴠 𐴎𐴕𐴡𐴣𐴓𐴡𐴌 𐴁𐴤𐴟𐴃𐴡𐴌𐴠 𐴁𐴠𐴐𐴤𐴞 𐴃𐴟𐴖𐴝 𐴃𐴦𐴟𐴘 𐴒𐴡𐴌𐴥𐴝 𐴀𐴥𐴡𐴀𐴡𐴌 , 𐴀𐴥𐴠𐴕𐴋𐴞𐴓𐴧𐴝 𐴃𐴟𐴖𐴝 𐴃𐴦𐴟𐴘 𐴏𐴡𐴓𐴠𐴌 𐴊𐴧𐴠 𐴐𐴤𐴡𐴣𐴀𐴡𐴃 𐴔𐴠𐴀𐴞𐴕 𐴌𐴝𐴏𐴧𐴝𐴌 𐴃𐴧𐴟 , 𐴀𐴠𐴑 𐴉𐴡𐴌𐴡𐴓𐴡𐴚 𐴊𐴟𐴌𐴥𐴠 𐴎𐴦𐴡𐴣𐴓𐴡𐴌 𐴁𐴤𐴟𐴃𐴡𐴌𐴠 𐴱𐴱

𐴀𐴠𐴑 𐴎𐴝𐴒𐴝𐴃 𐴓𐴟𐴖𐴝𐴘 𐴌𐴡𐴘𐴧𐴠𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴝𐴀𐴝𐴙𐴕 𐴶 𐴱 𐴎𐴡𐴕 𐴀𐴝𐴌 𐴁𐴠𐴍𐴞𐴀𐴝𐴙𐴕 𐴳 𐴎𐴡𐴕 𐴔𐴟𐴄 𐴹 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴊𐴤𐴡𐴌𐴞 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 , 𐴀𐴝𐴌𐴑𐴝𐴕𐴡𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴕𐴠𐴀𐴠𐴓𐴝𐴊𐴠 , 𐴈𐴥𐴡𐴁𐴡𐴌𐴞 𐴈𐴝𐴁𐴡𐴏𐴢 / 𐴌𐴠𐴑𐴝𐴙𐴚 𐴕𐴥𐴠𐴎𐴞𐴕 𐴈𐴥𐴡𐴁𐴡𐴌𐴡𐴃 𐴓𐴠𐴙𐴑𐴧𐴤𐴙𐴠𐴊𐴠 𐴉𐴝𐴀𐴝 𐴒𐴞𐴘𐴠 𐴱𐴱

𐴇𐴥𐴡𐴑𐴟𐴔𐴡𐴃 𐴑𐴟𐴀𐴟𐴂𐴢 𐴒𐴡𐴌𐴥𐴞 𐴁𐴦𐴝𐴊𐴠 , 𐴀𐴝𐴌𐴑𐴝𐴕𐴡𐴌 𐴁𐴤𐴟𐴃𐴡𐴌𐴠 𐴊𐴠𐴐𐴤𐴡𐴙𐴃𐴧𐴝 𐴔𐴝𐴙𐴕𐴐𐴤𐴡𐴌 𐴇𐴥𐴝𐴓𐴡𐴃 𐴁𐴠𐴐𐴤𐴝 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴀𐴥𐴡𐴀𐴡𐴕𐴠 , 𐴉𐴟𐴃 𐴎𐴤𐴞𐴀𐴞 , 𐴁𐴝𐴉𐴢 𐴔𐴝𐴣 𐴉𐴝𐴓𐴞𐴁𐴤𐴡𐴓𐴧𐴝 𐴁𐴠𐴐𐴤𐴞 𐴔𐴝𐴕𐴥𐴟𐴙𐴐𐴢𐴌𐴠𐴕𐴒𐴟𐴕 , 𐴄𐴤𐴝𐴘𐴓𐴠𐴕 𐴀𐴝𐴌 𐴔𐴡𐴓𐴠𐴆𐴤𐴙𐴝 , 𐴊𐴠𐴐𐴢 𐴀𐴞𐴀𐴞𐴕𐴡𐴌 𐴀𐴟𐴎𐴟 𐴇𐴥𐴝𐴁𐴝𐴌 𐴓𐴝𐴙𐴕𐴠 𐴘𐴦𐴝𐴃𐴡 𐴔𐴠𐴍𐴞𐴌 𐴓𐴝𐴙𐴕𐴠 , 𐴈𐴝𐴔 𐴒𐴡𐴌𐴥𐴞 𐴌𐴞𐴎𐴤𐴞𐴑 𐴈𐴝𐴔𐴝𐴘 𐴁𐴡𐴓𐴧𐴝 𐴕𐴠𐴀𐴠𐴓𐴞 𐴎𐴝𐴀𐴝𐴃 𐴀𐴝𐴏𐴥𐴠 𐴱𐴱

𐴁𐴠𐴐𐴤𐴝 𐴁𐴠𐴐𐴤𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓 𐴈𐴝𐴔 𐴒𐴡𐴌𐴥𐴞𐴁𐴡𐴓𐴧𐴝 𐴄𐴤𐴝𐴘𐴓𐴠𐴕 𐴔𐴡𐴓𐴠𐴆𐴤𐴙𐴝 𐴎𐴝𐴀𐴝𐴌 𐴊𐴧𐴠 𐴀𐴥𐴠𐴕𐴋𐴞𐴓𐴧𐴝 , 𐴊𐴠𐴐𐴡𐴌 𐴁𐴤𐴟𐴃𐴡𐴌𐴠 𐴀𐴝𐴎𐴝𐴊𐴞𐴌 𐴏𐴥𐴝𐴣𐴀𐴝𐴃𐴠 𐴓𐴡𐴌𐴝 𐴏𐴡𐴌𐴝 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴠𐴊𐴠 , 𐴀𐴝𐴌𐴑𐴝𐴕 𐴁𐴤𐴝𐴐𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴥𐴡 , 𐴋𐴝𐴓𐴝𐴓𐴡𐴌 𐴃𐴟𐴌𐴥𐴟 𐴘𐴠 𐴀𐴝𐴌𐴑𐴝𐴕𐴡𐴃𐴧𐴟 𐴊𐴠𐴐𐴢 𐴏𐴥𐴝𐴌𐴞 𐴕𐴠𐴀𐴠𐴓𐴞 𐴎𐴝𐴀𐴝𐴌 𐴒𐴤𐴡𐴘 𐴱𐴱

𐴔𐴠𐴓𐴠𐴄𐴠𐴌𐴞 𐴘𐴠 𐴇𐴥𐴡𐴑𐴟𐴔𐴡𐴃 𐴑𐴟𐴀𐴟𐴂𐴢 𐴒𐴡𐴌𐴥𐴞 𐴁𐴦𐴝𐴊𐴠 𐴕𐴠𐴀𐴠𐴓𐴞 𐴎𐴝𐴀𐴝 𐴁𐴠𐴐𐴤𐴞 𐴁𐴝𐴌𐴥𐴞 𐴒𐴞𐴘𐴡𐴘 , 𐴀𐴥𐴠𐴕𐴋𐴞𐴓𐴧𐴝 𐴕𐴠𐴀𐴠𐴓𐴞 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 , 𐴉𐴟𐴓𐴞𐴐𐴢 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓 𐴔𐴞𐴓𐴞 , 𐴏𐴥𐴝𐴁𐴟𐴃 𐴏𐴥𐴝𐴌𐴝 𐴑𐴞𐴘𐴥𐴡𐴓𐴧𐴝 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴡𐴀𐴡𐴌 𐴁𐴡𐴓𐴞 𐴈𐴡𐴀𐴡𐴘 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴎𐴞𐴘𐴡𐴓𐴡𐴃 𐴕𐴞𐴎𐴝𐴘 𐴎𐴟𐴓𐴟𐴔 𐴒𐴡𐴌𐴥𐴝𐴃 𐴀𐴝𐴏𐴥𐴠 𐴱𐴱

Sources : The Arakan Express News