𐴹 𐴵 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴝𐴌 𐴏𐴥𐴡 𐴎𐴡𐴕 𐴓𐴝𐴐𐴢 𐴐𐴤𐴡𐴣𐴀𐴡 𐴁𐴟𐴄 𐴀𐴠𐴑𐴧𐴤𐴝𐴕 𐴁𐴤𐴝𐴐𐴝 𐴀𐴝𐴁𐴡𐴏𐴃𐴤𐴝𐴃 𐴁𐴟𐴑𐴠𐴓𐴥𐴠𐴃 𐴔𐴝𐴎𐴤𐴠 𐴓𐴦𐴡𐴃 𐴉𐴝𐴀𐴝 𐴒𐴞𐴘𐴠 𐴱𐴱

𐴀𐴡𐴒𐴤𐴡𐴏𐴄 𐴔𐴝𐴐𐴡𐴌 𐴹 𐴲 𐴃𐴝𐴌𐴥𐴞𐴑𐴡𐴃 𐴀𐴥𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴤𐴞𐴑 𐴁𐴟𐴑𐴠𐴓𐴥𐴠 𐴐𐴤𐴡𐴀𐴡𐴌 𐴀𐴠𐴓𐴝𐴑𐴝𐴌, 𐴀𐴝𐴔𐴧𐴝 𐴐𐴤𐴡𐴀𐴡𐴌𐴡𐴌 𐴒𐴝𐴘𐴥𐴝 𐴒𐴞𐴌𐴥𐴞 𐴋𐴞𐴘𐴝𐴌 𐴋𐴤𐴝𐴑𐴠 𐴁𐴤𐴝𐴐𐴞 𐴀𐴝𐴘𐴧𐴠𐴌 𐴊𐴧𐴠 𐴁𐴟𐴄 𐴀𐴠𐴑𐴧𐴤𐴝𐴕𐴡𐴃 , 𐴹 𐴵 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝𐴌 𐴉𐴥𐴟𐴣𐴖𐴝𐴣𐴃𐴞 , 𐴏𐴥𐴡 𐴎𐴡𐴕 𐴔𐴡𐴌𐴝 𐴓𐴝𐴐𐴢 𐴀𐴥𐴡 𐴉𐴝𐴀𐴝 𐴒𐴞𐴘𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴀𐴞𐴕𐴅𐴞𐴓 𐴈𐴥𐴡𐴌𐴝𐴉𐴢 𐴀𐴥𐴡𐴘𐴧𐴝 𐴁𐴟𐴄 𐴀𐴠𐴑𐴧𐴤𐴝𐴕 , 𐴒𐴝𐴘𐴥𐴝 𐴒𐴞𐴌𐴥𐴞 𐴋𐴞𐴘𐴝𐴌 𐴋𐴤𐴝𐴑𐴠 𐴊𐴡𐴙𐴅𐴧𐴙𐴝𐴃 , 𐴈𐴡𐴀𐴠𐴑 𐴊𐴞𐴕 𐴊𐴤𐴡𐴌𐴞 𐴁𐴤𐴝𐴐𐴠𐴌 𐴊𐴧𐴠 𐴈𐴥𐴡𐴁𐴡𐴌 𐴉𐴝𐴘 𐴁𐴦𐴝𐴊𐴠 , 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴊𐴡𐴙𐴅𐴧𐴙𐴝 𐴏𐴦𐴡𐴛 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 , 𐴀𐴡𐴒𐴤𐴡𐴏𐴄 𐴔𐴝𐴐𐴡𐴌 𐴹 𐴲 𐴃𐴝𐴌𐴥𐴞𐴑𐴡𐴃 𐴎𐴝𐴘 𐴁𐴡𐴕 𐴒𐴡𐴌𐴥𐴞 𐴀𐴝𐴙𐴕𐴧𐴠 𐴁𐴡𐴓𐴞 , 𐴀𐴝𐴔𐴧𐴝 𐴐𐴤𐴡𐴀𐴡𐴌 𐴁𐴤𐴝𐴐𐴞 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴔𐴡𐴌𐴝 𐴓𐴝𐴐𐴢 𐴀𐴥𐴟𐴀𐴟𐴕 , 𐴁𐴟𐴍𐴡𐴌 𐴀𐴞𐴕𐴅𐴞𐴓 𐴈𐴥𐴡𐴌𐴝𐴉𐴢 𐴀𐴥𐴡𐴘 𐴁𐴦𐴝𐴊𐴠 𐴊𐴡𐴙𐴅𐴧𐴙𐴝𐴌 𐴔𐴟𐴌𐴡𐴃 𐴁𐴤𐴝𐴐𐴠𐴌 𐴊𐴧𐴠 𐴀𐴡𐴑𐴃𐴤𐴡𐴃 , 𐴈𐴥𐴝𐴕𐴝 𐴉𐴝𐴕𐴥𐴞 𐴉𐴥𐴟𐴌𐴝𐴘 𐴎𐴡𐴀𐴡𐴕𐴠 , 𐴖𐴝𐴙𐴆𐴧𐴤𐴙𐴝 𐴃𐴞𐴌𐴝𐴙𐴆𐴧𐴤𐴙𐴝 𐴔𐴡𐴌𐴞 𐴒𐴞𐴘𐴡𐴘 𐴊𐴠 𐴀𐴥𐴡𐴘𐴁𐴡 𐴁𐴡𐴓𐴞 , 𐴕𐴝𐴔 𐴕𐴡 𐴈𐴡𐴀𐴡𐴕𐴡𐴌 𐴐𐴡𐴌𐴡𐴃 𐴓𐴡𐴘 𐴊𐴠𐴐𐴤𐴡𐴙𐴃𐴧𐴝 𐴀𐴠𐴑 𐴎𐴡𐴕𐴠 𐴀𐴝𐴌 𐴀𐴠𐴉𐴢 𐴀𐴠 𐴌𐴥𐴠 𐴈𐴡𐴘𐴧𐴠 , 𐴔𐴡𐴙𐴅𐴧𐴤𐴙𐴠 𐴊𐴠 𐴀𐴥𐴟𐴀𐴟𐴕𐴡𐴃 𐴃𐴞𐴕 𐴎𐴡𐴕 𐴔𐴡𐴌𐴡𐴊 𐴃𐴞𐴕 𐴎𐴡𐴕 𐴔𐴝𐴘𐴧𐴝 𐴁𐴡𐴓𐴞 𐴀𐴥𐴠𐴏𐴃𐴝𐴕𐴞 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴉𐴡𐴌𐴝𐴕𐴠 𐴁𐴝𐴏𐴞 𐴀𐴝𐴏𐴥𐴠𐴊𐴠 𐴀𐴥𐴞𐴃𐴝𐴌𐴝 𐴌𐴠 𐴀𐴠𐴈𐴥𐴡𐴕 , 𐴁𐴟𐴑𐴠𐴓𐴥𐴠 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 𐴁𐴡𐴓𐴞 , 𐴉𐴟𐴓𐴞𐴐𐴢 𐴃𐴤𐴝𐴕𐴝𐴌 𐴋𐴤𐴝𐴑𐴡𐴌 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 , 𐴀𐴥𐴞𐴃𐴝𐴌𐴝 𐴌𐴠 𐴁𐴡𐴕 𐴒𐴡𐴌𐴥𐴞 𐴁𐴟𐴑𐴠𐴓𐴥𐴠 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃 𐴓𐴡𐴘 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 , 𐴌𐴝𐴏𐴧𐴝𐴃 𐴔𐴝𐴎𐴤𐴠 𐴘𐴥𐴡 𐴉𐴟𐴖𐴝 𐴀𐴠𐴑 𐴎𐴡𐴕 𐴔𐴡𐴌𐴞 𐴒𐴞𐴘𐴡𐴘 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴒𐴡𐴃𐴡 𐴅𐴟𐴕 𐴔𐴝𐴐𐴡𐴌 𐴱 𐴲 𐴃𐴝𐴌𐴥𐴞𐴑𐴡𐴃 𐴔𐴝𐴎𐴤𐴠 𐴘𐴥𐴡 , 𐴀𐴥𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴤𐴞𐴑 , 𐴆𐴤𐴙𐴝𐴘 𐴓𐴥𐴝 𐴐𐴤𐴡𐴀𐴡𐴌𐴡𐴌 𐴖𐴥𐴠 𐴏𐴥𐴗𐴠𐴕 𐴉𐴝𐴌𐴝𐴌 𐴋𐴤𐴝𐴑𐴠 𐴘𐴥𐴡 , 𐴸 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴣𐴀𐴡 𐴇𐴥𐴡𐴑𐴟𐴔𐴡𐴃𐴠 𐴕𐴦𐴡 𐴀𐴠𐴑𐴧𐴤𐴝𐴕 𐴁𐴡𐴕 𐴒𐴡𐴙𐴅𐴧𐴤𐴞𐴀𐴞𐴓 𐴱𐴱

𐴀𐴡𐴒𐴤𐴡𐴏𐴄 𐴔𐴝𐴐𐴡𐴌 𐴹 𐴲 𐴃𐴝𐴌𐴥𐴞𐴑𐴡𐴃 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴊𐴠 𐴀𐴥𐴞𐴃𐴝𐴌𐴝 𐴌𐴠 , 𐴑𐴠𐴀𐴠𐴕 𐴒𐴡𐴌𐴥𐴞𐴁𐴡 𐴕𐴡 𐴎𐴝𐴕𐴥𐴞 , 𐴔𐴡𐴕𐴃𐴡𐴌 𐴀𐴝𐴒𐴠 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴀𐴥𐴞𐴃𐴝𐴌𐴝 𐴌𐴠 𐴀𐴠𐴔𐴞𐴒𐴞𐴌𐴞𐴐𐴤𐴠𐴕𐴡𐴌 𐴑𐴝𐴕𐴟𐴕 𐴔𐴡𐴎𐴞𐴕 , 𐴃𐴞𐴕 𐴔𐴝𐴐𐴡𐴌 𐴃𐴧𐴟 𐴏𐴥𐴡 𐴔𐴝𐴐𐴢 𐴎𐴞𐴘𐴡𐴓𐴡𐴌 𐴇𐴥𐴡𐴑𐴟𐴔 𐴒𐴡𐴙𐴅𐴧𐴤𐴞𐴀𐴞𐴓 𐴱𐴱

𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴌 𐴔𐴡𐴚𐴋𐴤𐴟 𐴁𐴤𐴟𐴏𐴞𐴊𐴡𐴚𐴡𐴃 𐴀𐴠𐴑 𐴔𐴡𐴓𐴞𐴘𐴟𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕 𐴃𐴤𐴝𐴑𐴞𐴃𐴡 , 𐴷 𐴱 𐴰 𐴲 𐴐𐴤𐴡𐴕𐴡𐴃 𐴔𐴠𐴓𐴠𐴄𐴠𐴌𐴞 𐴘𐴠 𐴕𐴡𐴏𐴥𐴡𐴓 𐴉𐴥𐴟𐴌𐴝 𐴑𐴝𐴌𐴖𐴝𐴘 𐴒𐴡𐴌𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 , 𐴀𐴝𐴣𐴐𐴄𐴡 𐴓𐴝𐴑 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴊𐴤𐴝𐴘 𐴁𐴝𐴚𐴓𐴝𐴊𐴠𐴐𐴤𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴠 𐴱𐴱

𐴀𐴥𐴠 𐴑𐴝𐴌𐴖𐴝𐴘 𐴀𐴥𐴞𐴁𐴝𐴃 𐴐𐴤𐴡𐴃 𐴐𐴤𐴡𐴃 𐴉𐴟𐴖𐴝𐴙𐴕 𐴁𐴠𐴍𐴞𐴘𐴝𐴙𐴕 𐴔𐴝𐴌𐴞 𐴉𐴥𐴠𐴓𐴝𐴘 𐴁𐴦𐴝𐴊𐴠 𐴁𐴠𐴐𐴤𐴝 𐴁𐴠𐴐𐴤𐴞 𐴉𐴝𐴌𐴝 𐴀𐴥𐴡𐴑𐴧𐴡𐴓 𐴉𐴟𐴌𐴝 𐴊𐴞𐴀𐴞 𐴁𐴡𐴌𐴁𐴝𐴊 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴠 , 𐴎𐴟𐴓𐴟𐴔 𐴀𐴞𐴀𐴞𐴕𐴡 𐴌𐴠 𐴅𐴠𐴕𐴟𐴏𐴥𐴝𐴙𐴋 𐴁𐴡𐴓𐴞 𐴔𐴝𐴕𐴞 𐴓𐴡𐴘 , 𐴊𐴠𐴐𐴁𐴞𐴊𐴠𐴐𐴤𐴞 𐴀𐴝𐴊𐴝𐴓𐴡𐴃 ( 𐴀𐴝𐴘 𐴏𐴞 𐴅𐴠 ) 𐴑𐴟𐴀𐴟𐴍𐴡𐴃 𐴑𐴠𐴙𐴏𐴢 𐴏𐴡𐴓𐴠𐴌 , 𐴲 𐴲 𐴰 𐴲 𐴀𐴡𐴒𐴤𐴡𐴏𐴄 𐴔𐴝𐴐𐴢 𐴓𐴡𐴃 𐴉𐴝𐴣𐴏𐴢 𐴁𐴡𐴏𐴥𐴡𐴌 𐴉𐴡𐴙𐴅𐴧𐴡𐴕𐴃 𐴊𐴠𐴐𐴢 𐴏𐴥𐴝𐴌𐴝 𐴎𐴞𐴕𐴊𐴞𐴒𐴞 𐴈𐴝𐴍𐴝𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 , 𐴕𐴞𐴎𐴡𐴌 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴀𐴝𐴀𐴝𐴘 𐴕𐴥𐴡 𐴉𐴝𐴌𐴠 𐴁𐴡𐴓𐴞 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝 𐴀𐴝𐴌 𐴊𐴠𐴁𐴞𐴊𐴠𐴐𐴤𐴞 𐴔𐴞𐴋𐴞𐴘𐴝 𐴀𐴥𐴡𐴑𐴧𐴡𐴓𐴠 𐴓𐴠𐴙𐴑𐴧𐴤𐴙𐴠 𐴱𐴱

Sources : RFAburmese