𐴏𐴠𐴕𐴋𐴤𐴗𐴠 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴃 𐴰 𐴵 𐴎𐴡𐴕𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴏𐴠𐴕𐴋𐴤𐴗𐴠 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴌 𐴔𐴟𐴇𐴥𐴝𐴚 𐴂𐴡𐴌𐴝𐴚 𐴉𐴝𐴌𐴝𐴌 𐴋𐴤𐴝𐴑𐴠 , 𐴀𐴡𐴒𐴤𐴡𐴏𐴄 𐴔𐴝𐴐𐴡𐴌 𐴹 𐴱 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 𐴶 𐴲 𐴃𐴝𐴌𐴥𐴞𐴑𐴡𐴌 𐴁𐴤𐴟𐴃𐴡𐴌𐴠 , 𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴝 𐴹 𐴳 𐴎𐴡𐴕 𐴁𐴠𐴍𐴞 𐴴 𐴱 𐴎𐴡𐴕 , 𐴁𐴠𐴒𐴧𐴤𐴟𐴕𐴠 𐴔𐴞𐴓𐴝𐴘 𐴳 𐴵 𐴎𐴡𐴕 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴁𐴡𐴓𐴞 , 𐴀𐴝𐴌𐴑𐴝𐴕𐴡𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 ” 𐴌𐴠𐴑𐴝𐴙𐴚 𐴕𐴥𐴠𐴎𐴞𐴚 ” 𐴈𐴥𐴡𐴁𐴡𐴌𐴡𐴃 𐴓𐴠𐴙𐴑𐴧𐴤𐴙𐴠 𐴱𐴱

𐴊𐴤𐴡𐴌𐴝 𐴉𐴡𐴙𐴅𐴧𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕 𐴈𐴝𐴔 𐴒𐴡𐴌𐴥𐴞 𐴌𐴞𐴎𐴤𐴞𐴑 𐴃𐴟𐴖𐴝𐴘 𐴁𐴡𐴓𐴧𐴝 , 𐴔𐴡𐴚𐴋𐴤𐴟𐴃𐴧𐴟 𐴌𐴠𐴕𐴒𐴟𐴕 𐴎𐴝𐴀𐴝𐴌 𐴊𐴧𐴠 𐴐𐴤𐴡𐴣𐴀𐴡𐴃 , 𐴀𐴡𐴒𐴤𐴡𐴏𐴄 𐴔𐴝𐴐𐴡𐴌 𐴶 𐴱 𐴃𐴝𐴌𐴥𐴞𐴑𐴡𐴃 𐴃𐴟𐴖𐴥𐴝𐴕𐴠 𐴉𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 , 𐴁𐴟𐴄 𐴈𐴥𐴡𐴌𐴝𐴉𐴢 𐴀𐴥𐴡𐴀𐴡𐴕𐴠 𐴑𐴟𐴓𐴡𐴃 𐴓𐴝𐴔𐴝𐴘 𐴊𐴞𐴘𐴠 , 𐴃𐴡𐴀𐴡𐴘 𐴎𐴦𐴡𐴣𐴓𐴡𐴌 𐴁𐴤𐴟𐴃𐴡𐴌𐴠 𐴓𐴟𐴖𐴝𐴘 𐴌𐴡𐴘𐴧𐴠𐴊𐴠 𐴀𐴥𐴠𐴍𐴠 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴃𐴧𐴟 𐴸 𐴲 𐴎𐴡𐴕𐴡𐴌𐴠 𐴀𐴡𐴒𐴤𐴡𐴏𐴄 𐴔𐴝𐴐𐴡𐴌 𐴹 𐴱 𐴃𐴝𐴌𐴥𐴞𐴑𐴡𐴃, 𐴒𐴤𐴡 𐴌𐴥𐴠𐴑𐴧𐴤𐴗𐴝𐴌 𐴋𐴤𐴝𐴑𐴡𐴌 𐴉𐴝𐴀𐴝𐴌𐴡𐴌 𐴁𐴤𐴟𐴃𐴡𐴌𐴃𐴧𐴟 𐴊𐴤𐴡𐴙𐴅𐴧𐴙𐴠 , 𐴁𐴝𐴑𐴞 𐴒𐴤𐴟𐴕𐴡𐴌𐴠 𐴀𐴡𐴒𐴤𐴡𐴏𐴄 𐴔𐴝𐴐𐴡𐴌 𐴳 𐴲 𐴃𐴝𐴌𐴥𐴞𐴑 𐴀𐴝𐴌 𐴶 𐴲 𐴃𐴝𐴌𐴥𐴞𐴑𐴡𐴌 𐴁𐴤𐴟𐴃𐴡𐴌𐴠 𐴊𐴤𐴡𐴙𐴅𐴧𐴙𐴠 𐴁𐴡𐴓𐴞 𐴈𐴥𐴡𐴁𐴡𐴌𐴡𐴃 𐴓𐴠𐴙𐴑𐴧𐴤𐴙𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴈𐴥𐴝𐴕𐴝 𐴉𐴝𐴕𐴞 𐴓𐴡𐴘 𐴊𐴟𐴑𐴧𐴤𐴡𐴃 𐴀𐴥𐴡𐴀𐴡𐴕𐴠 , 𐴌𐴞𐴎𐴤𐴞𐴑 𐴃𐴟𐴖𐴝𐴘 𐴁𐴡𐴓𐴧𐴝 𐴌𐴠𐴕𐴒𐴟𐴕 , 𐴀𐴥𐴠𐴌𐴝𐴖𐴡𐴋𐴧𐴞 𐴐𐴤𐴡𐴣𐴀𐴡 𐴋𐴡𐴣𐴀𐴡𐴌 𐴐𐴤𐴡𐴀𐴡𐴌 𐴀𐴥𐴡𐴑𐴧𐴡𐴓𐴡𐴃 𐴀𐴝𐴌 𐴔𐴡𐴓𐴠𐴆𐴤𐴙𐴝𐴃 𐴎𐴝𐴘 𐴁𐴡𐴓𐴧𐴝 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓𐴡𐴌𐴠 𐴈𐴡𐴔𐴡𐴃 𐴵 𐴳 𐴓𐴝𐴑 𐴄𐴞𐴛𐴝 𐴊𐴞𐴘𐴡𐴌𐴠 𐴎𐴝𐴀𐴝𐴌 𐴱𐴱

𐴀𐴠𐴈𐴥𐴡𐴕 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕𐴡𐴌𐴠 𐴀𐴠𐴔𐴞𐴒𐴞𐴌𐴞𐴐𐴤𐴠𐴕𐴡𐴌 𐴑𐴝𐴕𐴟𐴕 𐴔𐴡𐴎𐴞𐴕 𐴑𐴠𐴙𐴏𐴢 𐴑𐴤𐴟𐴓𐴞 𐴐𐴤𐴝𐴎𐴝 𐴊𐴞𐴀𐴞 𐴁𐴦𐴝𐴊𐴠 , 𐴉𐴝𐴄𐴤𐴝𐴀𐴡𐴙𐴕𐴧𐴝 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓𐴡𐴌𐴠 𐴘𐴥𐴡 𐴊𐴤𐴡𐴌𐴞𐴁𐴝𐴌 𐴁𐴠𐴁𐴡𐴏𐴃𐴤𐴝 𐴒𐴡𐴌𐴥𐴠𐴌 𐴁𐴡𐴓𐴞 , 𐴌𐴠𐴑𐴝𐴙𐴚 𐴕𐴥𐴠𐴎𐴞𐴚 𐴈𐴥𐴡𐴁𐴡𐴌𐴡𐴃 𐴓𐴠𐴙𐴑𐴧𐴤𐴙𐴠 𐴱𐴱

𐴈𐴥𐴝𐴘𐴃𐴠 𐴓𐴡𐴘𐴃𐴠 𐴊𐴟𐴑 𐴉𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴀𐴝𐴘 𐴒𐴡𐴌𐴥𐴞 𐴁𐴡𐴓𐴧𐴝 𐴀𐴠𐴑 𐴎𐴝𐴒𐴝𐴃𐴧𐴟 𐴀𐴝𐴌𐴀𐴠𐴑 𐴎𐴝𐴒𐴝𐴃 𐴎𐴡𐴀𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴡𐴌𐴠 , 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴀𐴠𐴕𐴋𐴞𐴓𐴧𐴝 𐴁𐴡𐴕 𐴒𐴡𐴌𐴥𐴞 𐴔𐴦𐴡𐴊𐴧𐴞𐴔𐴝 𐴑𐴤𐴟𐴓𐴡𐴀𐴡𐴕𐴧𐴝𐴕 𐴄𐴤𐴞𐴑 𐴕𐴡𐴀𐴡 𐴁𐴡𐴓𐴞 , 𐴌𐴟𐴇𐴝𐴙𐴚𐴒𐴙𐴝𐴌 𐴔𐴦𐴝𐴔𐴠𐴓𐴝 𐴌𐴠 𐴔𐴡𐴊𐴡𐴊 𐴒𐴡𐴌𐴡𐴀𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴠 𐴀𐴝𐴌 𐴀𐴠𐴉𐴢 𐴀𐴠 𐴌𐴥𐴠 𐴈𐴡𐴘𐴧𐴠 , 𐴀𐴝𐴌𐴑𐴝𐴕 𐴐𐴤𐴡𐴣𐴀𐴡 𐴒𐴟𐴣𐴍𐴝 𐴁𐴡𐴌𐴔𐴥𐴝𐴌 𐴁𐴤𐴟𐴃𐴡𐴌𐴃𐴧𐴟 , 𐴱 𐴲 𐴰 𐴲 𐴋𐴞𐴏𐴡𐴔𐴁𐴡𐴌 𐴔𐴝𐴐𐴢 𐴀𐴥𐴡𐴘𐴃𐴠 𐴀𐴠 𐴁𐴡𐴏𐴥𐴡𐴌 𐴀𐴡𐴒𐴤𐴡𐴏𐴄 𐴔𐴝𐴐𐴢 𐴓𐴦𐴡𐴃 , 𐴇𐴥𐴝𐴣𐴃 𐴐𐴤𐴡𐴃 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴁𐴡𐴕 𐴀𐴥𐴡𐴘𐴧𐴠𐴊𐴠 𐴀𐴝𐴏𐴥𐴠 𐴱𐴱

Sources : RFAburmese