𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴕𐴞𐴐𐴤𐴝 𐴓𐴝𐴌𐴝 𐴏𐴝𐴌𐴝 𐴁𐴡𐴕 𐴒𐴡𐴌𐴥𐴞 𐴁𐴡𐴓𐴧𐴝 𐴀𐴝𐴌𐴔𐴥𐴞 𐴔𐴟𐴃𐴦𐴝𐴙𐴕 𐴒𐴡𐴌𐴥𐴝 𐴎𐴝𐴙𐴃 𐴉𐴝𐴌𐴠 𐴱𐴱

𐴁𐴝𐴚𐴓𐴝𐴊𐴠𐴐𐴡𐴌 𐴁𐴤𐴟𐴃𐴡𐴌𐴠 𐴕𐴞𐴐𐴤𐴝 𐴓𐴝𐴌𐴝 𐴏𐴝𐴌𐴝 𐴒𐴡𐴌𐴥𐴝 𐴉𐴝𐴏𐴝𐴌 𐴒𐴡𐴌𐴥𐴝 𐴁𐴡𐴕 𐴒𐴡𐴌𐴥𐴞 𐴁𐴡𐴓𐴧𐴝 , 𐴎𐴡𐴌𐴟𐴌𐴡𐴃 𐴉𐴡𐴙𐴓𐴧𐴙𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 , 𐴀𐴝𐴌𐴔𐴥𐴞𐴌 𐴁𐴠𐴄𐴠𐴓𐴞𐴘𐴠𐴕 𐴔𐴟𐴃𐴦𐴝𐴙𐴕 𐴒𐴡𐴌𐴥𐴝 𐴎𐴝𐴘𐴁𐴡 𐴁𐴡𐴓𐴞 𐴈𐴡𐴘𐴧𐴠 : 𐴒𐴤𐴡𐴌 𐴀𐴟𐴎𐴞𐴌 / 𐴀𐴝𐴏𐴡𐴊𐴟𐴎 𐴎𐴡𐴔𐴝𐴕 𐴈𐴦𐴝𐴕 𐴑𐴡𐴔𐴝𐴓 𐴱𐴱

𐴀𐴝𐴏𐴡𐴊𐴟𐴎 𐴎𐴡𐴔𐴝𐴕𐴠 𐴌𐴦𐴡𐴘 𐴁𐴝𐴌𐴠 , 𐴀𐴥𐴞𐴁𐴝𐴌 𐴀𐴡𐴉𐴞𐴏𐴡𐴃 𐴌𐴠𐴂𐴟𐴄𐴝𐴌 𐴀𐴥𐴡𐴑𐴧𐴡𐴓𐴡𐴌𐴠 𐴈𐴡𐴘𐴧𐴠𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴠 𐴈𐴡𐴕𐴥𐴡 𐴑𐴞𐴏𐴠𐴥𐴔𐴧𐴝 𐴀𐴡𐴁𐴡𐴀𐴡𐴘𐴊𐴡 𐴈𐴝𐴔 𐴒𐴡𐴌𐴥𐴞 𐴕𐴡 𐴉𐴝𐴌𐴠 𐴉𐴝𐴀𐴝𐴕 , 𐴀𐴥𐴞𐴃𐴝𐴌𐴝𐴌 𐴔𐴟𐴁𐴦𐴝𐴙𐴓 𐴉𐴥𐴟𐴕 𐴁𐴡𐴕 𐴒𐴡𐴌𐴥𐴞 𐴊𐴞𐴘𐴝 𐴎𐴝𐴘𐴁𐴡 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴏𐴥𐴡𐴚𐴑𐴡𐴄 𐴇𐴥𐴡𐴓 𐴒𐴡𐴌𐴥𐴞𐴁𐴝𐴌 𐴁𐴝𐴁𐴡𐴃𐴠 , 𐴇𐴥𐴡𐴑𐴟𐴔𐴡𐴃𐴞 𐴑𐴟𐴐𐴤𐴞𐴐𐴡𐴌 𐴔𐴟𐴃𐴦𐴝𐴓𐴧𐴠𐴑 𐴒𐴤𐴡𐴌 𐴀𐴟𐴎𐴞𐴌𐴠 𐴈𐴡𐴘𐴧𐴠𐴊𐴠 “𐴀𐴦𐴝𐴛 𐴀𐴝𐴐𐴤𐴝 𐴒𐴡𐴌𐴥𐴞𐴌 𐴊𐴧𐴠 𐴈𐴥𐴝𐴌𐴝𐴃𐴧𐴟 𐴈𐴥𐴝𐴌𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴃𐴝𐴌𐴥𐴝𐴌 𐴊𐴠𐴐𐴡𐴃 𐴖𐴝𐴉𐴠𐴏𐴢 𐴉𐴡𐴣𐴀𐴡𐴏𐴝 𐴎𐴝𐴘𐴁𐴡”𐴘𐴥𐴝𐴀𐴝𐴕𐴡𐴌 𐴖𐴡𐴌𐴠 𐴇𐴥𐴡𐴑𐴟𐴔𐴡𐴃𐴞 𐴑𐴟𐴐𐴤𐴞𐴐𐴢 𐴏𐴡𐴓𐴠𐴌 𐴱𐴱

𐴀𐴡𐴚 𐴏𐴥𐴠𐴕 𐴏𐴥𐴟𐴆𐴞𐴌 𐴇𐴥𐴡𐴑𐴟𐴔𐴡𐴃𐴡𐴌 𐴀𐴡𐴑𐴃𐴤𐴡𐴃 , 𐴁𐴡𐴌𐴔𐴥𐴝𐴃𐴧𐴟 𐴁𐴝𐴚𐴓𐴝𐴊𐴠𐴐𐴡𐴃 𐴘𐴝𐴁𐴤𐴝 𐴕𐴞𐴐𐴤𐴝𐴌 𐴁𐴡𐴌𐴘 𐴉𐴝𐴏𐴝𐴌 𐴒𐴡𐴌𐴥𐴝 𐴉𐴝𐴌 𐴒𐴡𐴌𐴥𐴝 𐴀𐴥𐴡𐴘𐴃𐴡 𐴊𐴠 𐴀𐴥𐴞𐴀𐴞𐴕𐴡𐴌 𐴀𐴥𐴞𐴏𐴝𐴉𐴠 , 𐴏𐴥𐴟𐴆𐴞 𐴌𐴠 𐴇𐴥𐴡𐴑𐴟𐴔𐴡𐴃𐴡𐴌 𐴃𐴧𐴟 𐴕𐴠𐴀𐴠𐴓𐴝𐴘 𐴊𐴞𐴀𐴞 𐴁𐴦𐴝𐴊𐴠 , 𐴀𐴠𐴈𐴥𐴡𐴕 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴀𐴡𐴑𐴃𐴤𐴡𐴃 , 𐴘𐴥𐴝𐴀𐴝𐴌 𐴊𐴠𐴌 𐴋𐴝𐴁𐴤𐴡𐴓 𐴊𐴟𐴘 𐴋𐴝𐴁𐴤𐴡𐴓 𐴉𐴝𐴏𐴝𐴌 𐴒𐴡𐴌𐴥𐴝 𐴁𐴦𐴠𐴐𐴢 𐴀𐴥𐴡𐴘𐴧𐴠 𐴱𐴱

𐴒𐴤𐴡𐴌 𐴀𐴟𐴎𐴞𐴌𐴞 𐴔𐴦𐴝𐴔𐴠𐴓𐴝𐴌 𐴀𐴡𐴉𐴞𐴏𐴡𐴃𐴧𐴟 𐴁𐴞𐴐𐴤𐴞𐴃 𐴁𐴝𐴌𐴠 , 𐴂𐴝𐴌𐴓𐴞𐴔𐴝𐴕𐴞 𐴑𐴝𐴘𐴔𐴝 𐴑𐴡𐴔𐴞𐴄𐴤𐴞 𐴘𐴠 𐴒𐴡𐴙𐴅𐴧𐴤𐴙𐴠𐴊𐴠 𐴔𐴞𐴄𐴤𐴞𐴚𐴡𐴌 𐴌𐴠𐴑𐴦𐴝𐴋𐴡 𐴃𐴧𐴟 𐴅𐴝𐴕𐴑𐴝𐴌𐴞 𐴘𐴝𐴀𐴝𐴕 𐴉𐴝𐴀𐴝 𐴒𐴞𐴘𐴠𐴊𐴠 , 𐴒𐴤𐴡𐴌 𐴀𐴟𐴎𐴞𐴌 𐴀𐴝𐴏𐴡𐴊𐴟𐴎 𐴎𐴡𐴔𐴝𐴕𐴠 𐴈𐴡𐴘𐴧𐴠𐴊𐴠 , 𐴔𐴞𐴄𐴤𐴞𐴚𐴡𐴃 𐴎𐴡𐴑𐴊𐴠 𐴔𐴦𐴝𐴔𐴠𐴓𐴝𐴌 𐴁𐴝𐴁𐴡𐴃𐴠 𐴁𐴟𐴎𐴤𐴝 𐴁𐴟𐴎𐴤𐴞 𐴀𐴥𐴡𐴘𐴁𐴡 , 𐴁𐴝𐴚𐴓𐴝𐴊𐴠𐴐𐴡𐴃 𐴘𐴝𐴁𐴤𐴝 𐴕𐴞𐴐𐴤𐴝𐴌 𐴁𐴡𐴌𐴡𐴘 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴀𐴝𐴕𐴋𐴤𐴝𐴌𐴠 𐴉𐴝𐴏𐴝𐴌 𐴀𐴥𐴡𐴀𐴡𐴌 𐴒𐴤𐴡𐴓𐴠𐴌 𐴀𐴥𐴝𐴘 , 𐴎𐴞𐴘𐴝𐴕𐴡𐴌 𐴈𐴝𐴌𐴡𐴕𐴠 𐴁𐴠𐴀𐴝𐴙𐴕𐴞 𐴕𐴞𐴐𐴤𐴝𐴌 𐴉𐴝𐴏𐴝𐴌 𐴁𐴝𐴌𐴥𐴞 𐴒𐴞𐴘𐴡𐴘 𐴱𐴱

𐴀𐴥𐴞𐴁𐴝 𐴘𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 , 𐴁𐴠𐴐𐴤𐴞 𐴀𐴠𐴏𐴃𐴠𐴔𐴝𐴓 𐴀𐴥𐴡𐴀𐴡𐴊𐴠 𐴁𐴡𐴖𐴋𐴝𐴌 𐴌𐴝𐴏𐴧𐴝 𐴕𐴝𐴉𐴢 𐴊𐴡𐴙𐴅𐴧𐴙𐴝 𐴁𐴦𐴝𐴊𐴠 𐴘𐴥𐴡 , 𐴔𐴝𐴕𐴥𐴝 𐴅𐴞𐴕𐴥𐴞𐴐𐴢 𐴀𐴞𐴀𐴞𐴕 𐴉𐴥𐴟𐴖𐴝𐴕𐴝 𐴁𐴡𐴖𐴋𐴝𐴌 𐴌𐴝𐴏𐴧𐴝 𐴁𐴝𐴀𐴝𐴘 𐴘𐴥𐴡 𐴒𐴤𐴡𐴓𐴠𐴌 𐴱𐴱

Sources : Dhakatribune