𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴀𐴞𐴕𐴏𐴝𐴉𐴢 𐴉𐴝𐴘𐴁𐴝𐴌 𐴁𐴠𐴁𐴡𐴏𐴃𐴝 𐴒𐴡𐴌𐴥𐴞 𐴊𐴞𐴀𐴞𐴁𐴤𐴡𐴓𐴧𐴝 𐴴 𐴸 𐴳 𐴒𐴤𐴗𐴝 𐴏𐴞𐴁𐴤𐴞𐴓 𐴃𐴡𐴕𐴎𐴞𐴔𐴠 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴃 𐴒𐴠𐴓𐴊𐴠 𐴷 𐴱 𐴰 𐴲 𐴐𐴤𐴡𐴕𐴡𐴃 , 𐴌𐴟𐴇𐴝𐴙𐴚𐴒𐴙𐴝𐴌𐴠 𐴅𐴠𐴕𐴟𐴏𐴥𐴝𐴙𐴋 𐴒𐴡𐴙𐴅𐴧𐴤𐴙𐴠𐴊𐴠 𐴘𐴝𐴀𐴝𐴕𐴡𐴌 , 𐴀𐴞𐴕𐴏𐴝𐴉𐴢 𐴉𐴝𐴘𐴁𐴝𐴌 𐴁𐴠𐴁𐴡𐴏𐴃𐴝 𐴒𐴡𐴌𐴥𐴞 𐴊𐴞𐴀𐴞𐴁𐴡𐴓𐴧𐴝 , 𐴅𐴠𐴕𐴟𐴏𐴥𐴝𐴙𐴋 𐴒𐴡𐴙𐴅𐴧𐴤𐴙𐴠𐴊𐴠 𐴉𐴝𐴣𐴏𐴢 𐴁𐴡𐴏𐴥𐴡𐴌 𐴉𐴟𐴌𐴝𐴘𐴧𐴠𐴊𐴠 , 𐴊𐴞𐴕 𐴀𐴡𐴒𐴤𐴡𐴏𐴄 𐴔𐴥𐴝𐴐𐴡𐴌 𐴵 𐴲 𐴃𐴝𐴌𐴥𐴞𐴑 𐴀𐴝𐴙𐴅𐴧𐴙𐴝 𐴊𐴞𐴕𐴡𐴃 , 𐴴 𐴸 𐴳 𐴒𐴤𐴗𐴝 𐴏𐴞𐴁𐴤𐴞𐴓 𐴃𐴡𐴕𐴎𐴞𐴔𐴠 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴎𐴤𐴝𐴑𐴧𐴗𐴝 𐴈𐴝𐴍𐴝 𐴔𐴝𐴌𐴝 𐴀𐴝𐴌 𐴁𐴡𐴓𐴡𐴃𐴑𐴝𐴌 𐴒𐴡𐴌𐴥𐴝 , 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴝 , 𐴉𐴝𐴌𐴝 𐴀𐴥𐴡𐴑𐴧𐴡𐴓 𐴉𐴟𐴌𐴝 𐴊𐴞𐴘𐴝 𐴀𐴝𐴌 𐴊𐴤𐴝𐴘𐴧𐴡𐴌𐴠 𐴁𐴝𐴚𐴓𐴝𐴊𐴠𐴐𐴤𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴁𐴡𐴓𐴧𐴝 𐴔𐴡𐴅𐴁𐴟𐴌 𐴒𐴡𐴌𐴥𐴝 , 𐴁𐴠𐴒𐴧𐴤𐴞𐴕 𐴑𐴟𐴀𐴟𐴂𐴑𐴝𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴒𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 𐴀𐴠𐴏𐴄𐴠𐴙𐴄𐴔𐴥𐴠𐴕𐴡𐴃 𐴓𐴠𐴙𐴑𐴧𐴤𐴙𐴠 𐴱𐴱

𐴀𐴠𐴑 𐴔𐴡𐴓𐴞𐴘𐴟𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴁𐴝𐴚𐴓𐴝𐴊𐴠𐴐𐴢 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 , 𐴎𐴞𐴕𐴊𐴝 𐴃𐴤𐴝𐴑𐴞𐴁𐴡𐴓𐴧𐴝 𐴁𐴠𐴐𐴤𐴞 𐴊𐴟𐴑 𐴔𐴠𐴀𐴠𐴕𐴧𐴡𐴃 𐴒𐴡𐴌𐴥𐴝 𐴉𐴡𐴌𐴞 𐴁𐴦𐴝𐴊𐴠 𐴘𐴥𐴡 , 𐴀𐴞𐴎𐴧𐴡𐴃𐴡𐴌 𐴏𐴥𐴝𐴣𐴀𐴝𐴃𐴠 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴀𐴝𐴘𐴁𐴤𐴝𐴌 𐴀𐴠𐴕𐴃𐴠𐴎𐴝𐴌 𐴒𐴡𐴌𐴥𐴠𐴌 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱𐴱

𐴏𐴡𐴓𐴠𐴌 𐴊𐴧𐴠 𐴀𐴡𐴒𐴤𐴡𐴏𐴄 𐴔𐴥𐴝𐴐𐴡𐴌 𐴰 𐴱 𐴃𐴝𐴌𐴥𐴞𐴑𐴡𐴃 , 𐴀𐴝𐴌𐴑𐴝𐴕𐴡𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴃𐴡𐴌𐴉𐴡𐴌 𐴃𐴧𐴟 𐴈𐴡𐴃𐴤𐴝 𐴈𐴡𐴘𐴁𐴝𐴌 𐴀𐴠𐴅𐴝𐴎𐴡𐴃 𐴀𐴝𐴏𐴥𐴠𐴊𐴠 , / 𐴀𐴥𐴟 𐴓𐴥𐴝 𐴏𐴞𐴕𐴠 , 𐴀𐴠𐴑 𐴊𐴞𐴕𐴠 𐴰 𐴵 𐴱 𐴎𐴡𐴕 𐴒𐴡𐴌𐴥𐴞 𐴀𐴝𐴌𐴑𐴝𐴕𐴡𐴃 𐴖𐴝𐴉𐴠𐴏𐴢 𐴀𐴝𐴀𐴝𐴘 𐴉𐴝𐴌𐴞𐴁𐴤𐴝𐴌 𐴁𐴠𐴁𐴡𐴏𐴃𐴝 𐴒𐴡𐴌𐴥𐴠𐴌 𐴁𐴡𐴓𐴞 𐴈𐴡𐴀𐴡𐴘 𐴁𐴦𐴝𐴊𐴠 𐴘𐴥𐴡 , 𐴘𐴝𐴀𐴝𐴕𐴡𐴌 𐴖𐴡𐴌𐴠 𐴊𐴟𐴕𐴞𐴘𐴝𐴘𐴌 𐴐𐴤𐴞𐴑𐴧𐴞𐴌𐴞𐴃𐴡 𐴉𐴝𐴘𐴁𐴡𐴓𐴧𐴝 , 𐴑𐴟𐴐𐴤𐴞𐴐𐴢 𐴒𐴡𐴌𐴡𐴀𐴡𐴕 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴎𐴞𐴔𐴧𐴝 𐴁𐴡𐴓𐴞 𐴘𐴥𐴡 𐴀𐴠𐴏𐴄𐴠𐴙𐴄𐴔𐴥𐴠𐴕𐴡𐴃 𐴓𐴠𐴙𐴑𐴧𐴤𐴙𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴅𐴠𐴕𐴟𐴏𐴥𐴝𐴙𐴋𐴡𐴌 𐴀𐴡𐴉𐴡𐴌𐴝𐴊𐴞 𐴁𐴝𐴕𐴝𐴘 𐴁𐴡𐴓𐴧𐴝 , 𐴒𐴝𐴔𐴁𐴞𐴘𐴝 𐴃𐴧𐴟 𐴀𐴝𐴌𐴀𐴥𐴡 𐴁𐴠𐴐𐴤𐴞 𐴃𐴠𐴎 𐴒𐴡𐴌𐴥𐴞 𐴑𐴟𐴐𐴤𐴞𐴐𐴢 𐴒𐴡𐴌𐴥𐴝 𐴉𐴡𐴌𐴞𐴁𐴡 , 𐴀𐴝𐴌 𐴀𐴝𐴘 𐴏𐴞 𐴅𐴠 𐴘𐴠 𐴈𐴥𐴝𐴄𐴤𐴞 𐴒𐴡𐴌𐴥𐴞 𐴊𐴞𐴘𐴠𐴊𐴠 , 𐴄𐴝𐴙𐴔 𐴊𐴞𐴘𐴝 𐴔𐴡𐴕𐴏𐴟𐴁𐴝 𐴂𐴠𐴓𐴝𐴕 , 𐴄𐴤𐴞𐴑 𐴁𐴤𐴝𐴉𐴠 𐴁𐴠𐴁𐴡𐴏𐴃𐴝 𐴒𐴡𐴌𐴡𐴀𐴡𐴕 𐴎𐴡𐴌𐴟𐴌𐴞 𐴁𐴡𐴓𐴞 , 𐴊𐴠𐴐𐴤𐴡𐴙𐴃𐴧𐴝 𐴀𐴠𐴃𐴧𐴠𐴉𐴝𐴑𐴞 𐴇𐴥𐴡𐴑𐴟𐴔𐴡𐴃 ( 𐴀𐴠𐴕 𐴘𐴟 𐴅𐴞 ) 𐴘𐴠 𐴈𐴡𐴘𐴧𐴠 𐴱𐴱

𐴀𐴠𐴏𐴄𐴠𐴙𐴄𐴔𐴥𐴠𐴕 𐴘𐴝𐴀𐴝𐴕𐴡𐴃 ( 𐴀𐴠𐴕 𐴘𐴟 𐴅𐴞 ) , ( 𐴀𐴠𐴕 𐴘𐴟 𐴏𐴞 𐴏𐴞 ) 𐴀𐴝𐴌 ( 𐴏𐴞 𐴀𐴝𐴌 𐴂𐴞 𐴀𐴠𐴆 ) 𐴃𐴞𐴕𐴥𐴡 𐴋𐴝𐴀𐴝𐴘𐴧𐴠 𐴈𐴡𐴘𐴧𐴠𐴊𐴠 , 𐴲 𐴸 𐴹 𐴱 𐴐𐴤𐴡𐴕𐴡𐴌 𐴊𐴠𐴐𐴤𐴡𐴙𐴃𐴧𐴝𐴃𐴝 𐴑𐴝𐴕𐴟𐴕𐴡𐴃 𐴉𐴡𐴌𐴥𐴡𐴑 𐴒𐴡𐴌𐴡𐴀𐴡𐴕𐴡𐴌 𐴊𐴤𐴝𐴌𐴝 𐴀𐴥𐴡𐴑𐴧𐴡𐴓 𐴉𐴥𐴡𐴄𐴝𐴉𐴥𐴡𐴄 𐴄𐴤𐴞𐴑 𐴒𐴡𐴌𐴥𐴞 𐴉𐴥𐴠𐴓𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴈𐴡𐴘𐴧𐴠 𐴱𐴱

Sources : RFAburmese