𐴁𐴡𐴌𐴔𐴥𐴝𐴌 𐴔𐴟𐴃𐴦𐴝𐴓𐴧𐴠𐴑 𐴘𐴟 𐴀𐴠𐴕𐴡𐴌 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 𐴑𐴝𐴑𐴏𐴡 𐴁𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴀𐴝𐴙𐴐𐴧𐴤𐴙𐴠 𐴱𐴱

𐴁𐴡𐴌𐴔𐴥𐴝𐴌 𐴔𐴟𐴃𐴦𐴝𐴓𐴧𐴠𐴑 𐴘𐴟 𐴀𐴠𐴕𐴡𐴌 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 / 𐴕𐴟𐴓𐴞𐴕 𐴇𐴞𐴎𐴝 , 𐴔𐴡𐴚𐴒𐴡𐴓 𐴁𐴝𐴌𐴠 𐴑𐴡𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴀𐴝𐴙𐴐𐴧𐴤𐴙𐴠 𐴱𐴱

𐴀𐴥𐴞𐴁𐴝 𐴘𐴠 𐴀𐴥𐴞𐴁𐴝𐴌 𐴁𐴞𐴎𐴤𐴞𐴄𐴡𐴌 𐴔𐴟𐴃𐴦𐴝𐴓𐴧𐴠𐴑 𐴏𐴝𐴙𐴌 𐴎𐴡𐴕 𐴈𐴝𐴔𐴡𐴌 𐴔𐴝𐴕𐴥𐴟𐴙𐴐𐴢 𐴉𐴥𐴟𐴣𐴖𐴝𐴣𐴃𐴞 𐴓𐴡𐴘 , 𐴀𐴟𐴑𐴤𐴞𐴘𐴝 𐴑𐴟𐴃𐴤𐴟𐴉𐴝𐴓𐴡𐴚 𐴑𐴠𐴀𐴠𐴔𐴡𐴃 𐴉𐴡𐴣𐴀𐴡𐴙𐴏𐴧𐴙𐴠 , 𐴁𐴦𐴝𐴊𐴠 𐴌𐴞𐴉𐴟𐴎𐴞 𐴌𐴠𐴅𐴞𐴏𐴄𐴠𐴌𐴠𐴐𐴤𐴠𐴕 𐴏𐴠𐴕𐴄𐴝𐴌𐴡𐴃 𐴁𐴞𐴎𐴤𐴞𐴄 𐴒𐴡𐴙𐴅𐴧𐴤𐴙𐴠 𐴱𐴱

𐴑𐴡𐴑𐴏𐴡 𐴁𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴌𐴡𐴐𐴤𐴡𐴃 𐴀𐴝𐴌𐴝𐴔𐴞𐴘𐴡𐴃 𐴀𐴝𐴌 𐴖𐴝𐴉𐴠𐴏𐴞𐴌 𐴑𐴡𐴔𐴞𐴐𐴤𐴠𐴕 𐴀𐴡𐴉𐴥𐴞𐴏𐴡𐴌 , 𐴎𐴟𐴣𐴖𐴝𐴣𐴙𐴓𐴧𐴝 𐴑𐴡𐴔𐴞𐴐𐴕𐴝𐴌 / 𐴐𐴡𐴔𐴏𐴟𐴊 𐴊𐴟𐴅𐴝 𐴕𐴝𐴘𐴝𐴕𐴠 𐴌𐴠𐴂𐴟𐴄𐴝𐴌 𐴀𐴥𐴡𐴑𐴧𐴡𐴓𐴡𐴌𐴠 𐴈𐴡𐴘𐴧𐴠𐴊𐴠 , 𐴕𐴟𐴓𐴞𐴕 𐴇𐴞𐴎𐴝 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌 𐴁𐴞𐴎𐴤𐴞𐴄 𐴀𐴞𐴁𐴤𐴝𐴃 , 𐴘𐴟 𐴀𐴠𐴕 𐴀𐴠𐴙𐴆 𐴏𐴞 𐴀𐴝𐴌 , 𐴋𐴝𐴁𐴓𐴙𐴟 𐴀𐴠𐴉𐴢 𐴂𐴞 , 𐴀𐴝𐴘 𐴀𐴡 𐴀𐴠𐴔 , 𐴃𐴡𐴕𐴎𐴞𐴔 𐴀𐴟𐴀𐴟𐴕𐴡𐴌 𐴈𐴝𐴔 𐴀𐴥𐴡𐴑𐴧𐴡𐴓 𐴏𐴝𐴘𐴧𐴠 𐴃𐴡𐴊𐴝𐴌𐴟𐴑 𐴒𐴡𐴙𐴅𐴧𐴤𐴙𐴠 , 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴞𐴘𐴝𐴙𐴕 , 𐴌𐴟𐴇𐴝𐴙𐴚𐴒𐴙𐴝 𐴅𐴟𐴖𐴝𐴕 , 𐴀𐴝𐴌 𐴊𐴤𐴡𐴌𐴔𐴞𐴘𐴡 𐴕𐴡𐴔𐴝𐴙𐴕𐴊𐴝 𐴀𐴥𐴡𐴑𐴧𐴡𐴓 𐴓𐴡𐴘 𐴑𐴤𐴞𐴘𐴝𐴓 𐴁𐴟𐴎𐴤𐴝 𐴁𐴟𐴎𐴤𐴞 𐴒𐴡𐴙𐴅𐴧𐴤𐴙𐴠 𐴱𐴱

𐴁𐴟𐴙𐴃 𐴁𐴝𐴌𐴠 𐴁𐴞𐴀𐴞𐴕𐴧𐴝 𐴀𐴥𐴞𐴁𐴝 𐴘𐴠 𐴌𐴞𐴉𐴟𐴎𐴞𐴌 𐴌𐴡𐴐𐴤𐴡𐴃 𐴀𐴝𐴌𐴝𐴔𐴞𐴘𐴡𐴃 𐴀𐴝𐴌 𐴖𐴝𐴉𐴠𐴏𐴞𐴌 𐴑𐴡𐴔𐴞𐴐𐴕𐴝𐴌 / 𐴐𐴤𐴝 𐴌𐴞𐴎𐴖𐴝𐴕 𐴇𐴝𐴘𐴝𐴃 𐴐𐴤𐴣𐴀𐴡 , 𐴌𐴞𐴉𐴟𐴎𐴞𐴌 𐴎𐴞𐴔𐴧𐴝𐴊𐴝𐴌𐴞𐴌 𐴈𐴝𐴔𐴡𐴃 𐴀𐴝𐴏𐴥𐴠𐴊𐴠 , 𐴖𐴡𐴌𐴡𐴌 𐴃𐴡𐴑𐴧𐴝𐴌 𐴇𐴥𐴡𐴑𐴟𐴔𐴡𐴃𐴞 𐴀𐴡𐴉𐴥𐴞𐴏𐴝𐴌 𐴀𐴥𐴡𐴑𐴧𐴡𐴓 𐴓𐴡𐴘 𐴔𐴞𐴄𐴤𐴞𐴚 𐴒𐴡𐴌𐴥𐴞𐴁𐴤𐴡 𐴱𐴱

𐴘𐴝𐴀𐴝𐴌 𐴀𐴝𐴒𐴠 𐴘𐴟 𐴀𐴠𐴕 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴇𐴦𐴝𐴘 𐴑𐴡𐴔𐴞𐴐𐴕𐴝𐴌 / 𐴔𐴞𐴆𐴠𐴓 𐴁𐴠𐴆𐴓𐴠𐴄 , 𐴑𐴡𐴑𐴏𐴡 𐴁𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴀𐴝𐴐𐴧𐴤𐴞𐴀𐴞𐴓 𐴊𐴠 𐴘𐴥𐴝𐴀𐴝 𐴈𐴡𐴘𐴧𐴠𐴊𐴠 , 𐴘𐴟 𐴀𐴠𐴕𐴠 𐴌𐴟𐴇𐴝𐴙𐴚𐴒𐴙𐴝𐴌 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡 𐴌𐴠 𐴀𐴠𐴑𐴀𐴡𐴔𐴥𐴞𐴑𐴃𐴝 𐴊𐴞𐴀𐴞𐴁𐴡 𐴀𐴝𐴌 𐴀𐴞𐴏𐴧𐴝 𐴔𐴡𐴃𐴠 𐴖𐴝𐴉𐴠𐴏𐴢 𐴎𐴝𐴀𐴝 𐴀𐴥𐴡𐴘𐴁𐴡 𐴱𐴱

𐴁𐴡𐴌 𐴀𐴟𐴎𐴞𐴌 𐴐𐴠𐴙𐴑 𐴇𐴥𐴝𐴏𐴞𐴕𐴠 𐴘𐴠 𐴘𐴟 𐴀𐴠𐴕 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴁𐴡𐴌𐴡 𐴓𐴡𐴘 𐴔𐴞𐴄𐴤𐴞𐴚 𐴒𐴡𐴙𐴅𐴧𐴤𐴙𐴠𐴊𐴠 𐴀𐴡𐴑𐴃𐴤𐴡𐴃 , 𐴁𐴝𐴚𐴓𐴝𐴊𐴠𐴐𐴤𐴡𐴃 𐴃𐴡𐴀𐴡𐴙𐴃𐴧𐴝 𐴏𐴥𐴝𐴀𐴝𐴌𐴝 𐴓𐴡𐴘𐴧𐴠𐴊𐴠 , 𐴀𐴠𐴑 𐴔𐴡𐴓𐴞𐴘𐴟𐴕𐴡𐴌 𐴖𐴡𐴌𐴠 𐴁𐴡𐴌𐴔𐴥𐴝𐴌 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴖𐴝𐴉𐴠𐴏𐴢 𐴓𐴡𐴘 𐴎𐴝𐴘 𐴁𐴡𐴓𐴧𐴥𐴝 , 𐴁𐴡𐴌𐴔𐴥𐴝 𐴌𐴠 𐴊𐴟𐴖𐴥𐴝𐴌𐴝𐴘 𐴊𐴟𐴖𐴥𐴝𐴌𐴝𐴘 𐴈𐴡𐴘𐴧𐴠 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴁𐴝𐴚𐴓𐴝𐴊𐴠𐴐𐴤𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴠 , 𐴑𐴤𐴟𐴕𐴡𐴌 𐴖𐴡𐴌𐴠 𐴑𐴤𐴟𐴕 𐴀𐴥𐴡𐴀𐴡𐴌 𐴊𐴠 𐴘𐴝𐴀𐴝𐴕𐴡𐴌 𐴕𐴞𐴌𐴝𐴉𐴡𐴃𐴧𐴝𐴌 𐴓𐴧𐴝 , 𐴘𐴟 𐴀𐴠𐴕 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴁𐴡𐴌𐴡𐴌 𐴈𐴝𐴣𐴏𐴠 𐴁𐴠𐴐𐴤𐴞 𐴕𐴡𐴌𐴡𐴔 𐴀𐴥𐴡𐴘 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠 , 𐴀𐴡𐴒𐴤𐴡𐴏𐴄 𐴔𐴥𐴝𐴐𐴡𐴌 𐴸 𐴃𐴝𐴌𐴥𐴞𐴑𐴡𐴃 𐴆𐴞𐴕𐴝𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴖𐴝𐴚 𐴀𐴥𐴞 𐴘𐴠 , 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴖𐴝𐴉𐴠𐴏𐴢 𐴎𐴡𐴀𐴡𐴕𐴡𐴃 𐴁𐴝𐴚𐴓𐴝𐴊𐴠𐴐𐴤𐴡𐴌 𐴇𐴥𐴠𐴔𐴝𐴘𐴡𐴃 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 𐴈𐴡𐴘𐴧𐴠 𐴱𐴱

Sources : Dhakatribune