𐴁𐴤𐴝𐴐𐴡𐴕 𐴏𐴡𐴌𐴡𐴃𐴧𐴟 𐴊𐴤𐴝𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴳 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴒𐴠𐴌𐴠𐴉𐴃𐴝𐴌 𐴱𐴱

𐴕𐴟𐴖𐴝 𐴈𐴥𐴝𐴓𐴞𐴌 𐴇𐴥𐴝𐴃𐴞𐴘𐴝𐴌 𐴁𐴤𐴝𐴐𐴡𐴕 𐴏𐴡𐴌 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃𐴧𐴟 𐴊𐴤𐴝𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴐𐴤𐴡𐴣𐴀𐴡𐴃 , 𐴁𐴠𐴍𐴞 𐴀𐴝𐴌 𐴒𐴟𐴌𐴝 𐴉𐴟𐴖𐴝 𐴐𐴤𐴡𐴣𐴀𐴡 𐴃𐴞𐴕 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴠 , 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴊𐴤𐴡𐴌𐴞 𐴉𐴟𐴓𐴞𐴐𐴡𐴌𐴠 𐴒𐴡𐴏𐴥𐴝𐴘 𐴊𐴞𐴘𐴠 𐴱𐴱

𐴀𐴠𐴑𐴀𐴡𐴔 𐴀𐴞𐴕𐴑𐴗𐴝𐴌𐴞𐴃 , 𐴀𐴥𐴞𐴃𐴝𐴌𐴝 𐴋𐴝𐴓𐴝𐴓𐴡𐴌 𐴔𐴝𐴙𐴊𐴧𐴤𐴡𐴔𐴠 , 𐴁𐴤𐴝𐴐𐴡𐴕 𐴏𐴡𐴌𐴡𐴃𐴧𐴟 𐴑𐴝𐴑𐴏𐴡 𐴁𐴝𐴎𐴝𐴌 𐴑𐴟𐴃𐴤𐴟 𐴉𐴝𐴓𐴡𐴚 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴎𐴝𐴘 𐴁𐴡𐴓𐴧𐴥𐴝 , 𐴁𐴤𐴝𐴐𐴡𐴕 𐴏𐴡𐴌𐴡𐴃𐴧𐴟 𐴁𐴝𐴀𐴞𐴌 𐴀𐴥𐴡𐴘𐴧𐴠 𐴁𐴡𐴓𐴞 𐴉𐴟𐴓𐴞𐴐𐴡𐴌𐴠 𐴈𐴡𐴘𐴧𐴠 𐴱𐴱

𐴁𐴡𐴕 𐴀𐴥𐴡𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕 𐴀𐴥𐴡𐴙𐴓𐴊𐴠 , 𐴁𐴤𐴝𐴐𐴡𐴕 𐴏𐴡𐴌 𐴲 𐴸 𐴓𐴡𐴔𐴁𐴤𐴡𐴌 𐴏𐴥𐴝𐴀𐴝𐴌𐴝 𐴒𐴤𐴡𐴌𐴡𐴃 𐴃𐴤𐴝𐴑𐴠𐴊𐴠 / 𐴔𐴟𐴇𐴝𐴔𐴧𐴡𐴊 𐴌𐴡𐴉𐴞𐴑𐴡𐴌 𐴁𐴠𐴍𐴞 / 𐴔𐴡𐴕𐴖𐴝𐴌𐴝 𐴁𐴠𐴒𐴡𐴔 𐴁𐴡𐴐𐴢 𐴵 𐴲 𐴁𐴡𐴏𐴥𐴡𐴌 𐴀𐴥𐴞𐴁𐴤𐴝𐴌 𐴔𐴝𐴘𐴧𐴝 𐴏𐴡𐴔𐴞𐴌𐴝 𐴁𐴡𐴐𐴢 𐴸 𐴁𐴡𐴏𐴥𐴡𐴌 𐴀𐴥𐴞𐴁𐴤𐴝𐴌 𐴉𐴟𐴖𐴝 𐴑𐴡𐴖𐴏𐴡𐴌 ( 𐴱-𐴳 𐴔𐴥𐴝𐴐𐴢 ) 𐴱𐴱

𐴐𐴤𐴟𐴑𐴧𐴟𐴌 𐴁𐴝𐴌 𐴀𐴡𐴒𐴤𐴡𐴏𐴄 𐴔𐴥𐴝𐴐𐴡𐴌 𐴹 𐴱 𐴃𐴝𐴌𐴥𐴞𐴑𐴡𐴃 𐴌𐴝𐴙𐴃𐴡𐴌 𐴐𐴤𐴝𐴀𐴝𐴌𐴡 𐴱 𐴱 𐴁𐴝𐴎𐴠 ,𐴎𐴝𐴒𐴝 𐴀𐴠𐴑𐴧𐴝𐴕𐴡𐴃𐴧𐴟 𐴉𐴟𐴓𐴞𐴐𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴠 𐴁𐴡𐴕 𐴒𐴡𐴌𐴥𐴞 𐴃𐴤𐴝𐴕𐴝𐴃 𐴀𐴝𐴕𐴥𐴞 𐴌𐴝𐴙𐴑𐴧𐴤𐴙𐴠 , 𐴘𐴝𐴀𐴝𐴌 𐴀𐴝𐴒𐴠 𐴀𐴥𐴠 𐴊𐴞𐴕 𐴀𐴥𐴝𐴣𐴎𐴡𐴙𐴕𐴧𐴝 𐴷 𐴁𐴝𐴎𐴠 , 𐴀𐴟𐴉𐴡𐴎𐴞𐴓𐴝𐴌 𐴔𐴟𐴇𐴝𐴔𐴧𐴡𐴊 𐴉𐴟𐴌 𐴘𐴟𐴕𐴞𐴀𐴡𐴕𐴡𐴌 𐴀𐴝𐴈𐴃𐴡𐴌 𐴔𐴞𐴛𐴝𐴌 𐴀𐴥𐴝𐴣𐴄 𐴀𐴠𐴓𐴝𐴑𐴝𐴃𐴧𐴟 , 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴀𐴥𐴞𐴃𐴝𐴌𐴝 𐴌𐴠 𐴁𐴡𐴕 𐴒𐴞𐴌𐴥𐴞 𐴌𐴝𐴙𐴑𐴧𐴤𐴙𐴠 𐴱𐴱

𐴀𐴥𐴠𐴏𐴃𐴝𐴕𐴞𐴘𐴡 𐴁𐴤𐴝𐴐𐴞𐴕𐴊𐴝 𐴐𐴞𐴔𐴟𐴓 𐴔𐴟𐴇𐴝𐴔𐴧𐴡𐴊𐴠 𐴈𐴡𐴘𐴧𐴠𐴊𐴠 , 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 𐴐𐴤𐴟𐴁𐴡𐴌𐴕𐴡 𐴏𐴡𐴌 𐴀𐴟𐴉𐴡𐴎𐴞𐴓𐴝𐴌 𐴔𐴟𐴇𐴝𐴔𐴧𐴡𐴊 𐴉𐴟𐴌 𐴘𐴟𐴕𐴞𐴀𐴡𐴕𐴡𐴌 , 𐴀𐴝𐴈𐴃𐴡𐴌 𐴔𐴞𐴛𐴝𐴌 𐴀𐴥𐴝𐴣𐴄 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 , 𐴀𐴠𐴑 𐴎𐴡𐴕 𐴁𐴠𐴍𐴞 𐴊𐴟𐴘 𐴎𐴡𐴕 𐴉𐴟𐴖𐴝 𐴓𐴡𐴘 𐴐𐴤𐴡𐴕𐴊𐴡 𐴓𐴝𐴒𐴠 𐴉𐴝𐴀𐴝𐴕 𐴀𐴞𐴑𐴧𐴙𐴝 𐴀𐴟𐴙𐴑𐴧𐴙𐴝 𐴉𐴝𐴑𐴧𐴤𐴝𐴌 , 𐴀𐴥𐴠 𐴀𐴝𐴁𐴡𐴏𐴃𐴤𐴝𐴃 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴀𐴥𐴞𐴃𐴝𐴌𐴝 𐴌𐴠 𐴊𐴤𐴡𐴌𐴞 𐴉𐴥𐴠𐴓𐴝𐴘𐴧𐴠 𐴱𐴱

𐴁𐴦𐴝𐴊𐴠 𐴀𐴥𐴞𐴃𐴝𐴌𐴝𐴌 𐴓𐴡𐴘 𐴈𐴡𐴃𐴤𐴝 𐴁𐴝𐴃𐴧𐴝𐴌𐴝 𐴈𐴟𐴖𐴥𐴝𐴃 𐴁𐴟𐴎𐴤𐴝 𐴒𐴠𐴓𐴊𐴠 𐴃𐴝𐴌𐴥𐴝 𐴌𐴟𐴇𐴝𐴙𐴚𐴒𐴙𐴝 , 𐴑𐴝𐴑𐴏𐴡 𐴁𐴝𐴎𐴝𐴌 𐴎𐴝𐴘𐴁𐴝𐴌 𐴀𐴞𐴏𐴧𐴝 𐴓𐴡𐴘 𐴋𐴝𐴓𐴝𐴓𐴡𐴌 𐴃𐴟𐴌𐴥𐴟 𐴄𐴡𐴓𐴝𐴌 𐴓𐴡𐴘 𐴁𐴤𐴝𐴐𐴡𐴕 𐴏𐴡𐴌𐴡𐴃𐴧𐴟 𐴊𐴤𐴝𐴘 𐴀𐴝𐴙𐴐𐴧𐴤𐴙𐴠 𐴊𐴠 , 𐴁𐴦𐴝𐴊𐴠 𐴏𐴡𐴌 𐴎𐴡𐴁𐴧𐴡𐴌 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃 𐴈𐴥𐴡𐴁𐴡𐴌 𐴊𐴡𐴀𐴡𐴕𐴌 𐴔𐴡𐴃𐴧𐴡𐴌 𐴉𐴟𐴓𐴞𐴐𐴢 𐴀𐴝𐴀𐴝𐴘 𐴀𐴥𐴞𐴃𐴝𐴌𐴝𐴌𐴠 𐴃𐴤𐴝𐴕𐴝𐴃 𐴓𐴡𐴘 𐴒𐴞𐴘𐴡𐴘 𐴱𐴱

𐴏𐴡𐴌 𐴎𐴡𐴁𐴧𐴡𐴌 𐴉𐴟𐴓𐴞𐴐𐴢 𐴃𐴤𐴝𐴕𐴝𐴌 𐴀𐴡 𐴏𐴞 / 𐴋𐴠𐴁 𐴂𐴞𐴌𐴞𐴘𐴝 𐴋𐴝𐴏𐴠 𐴈𐴡𐴘𐴧𐴠𐴊𐴠 , 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕 𐴏𐴥𐴡𐴀𐴞 , 𐴀𐴥𐴞𐴃𐴝𐴌𐴝𐴌𐴠 𐴀𐴝𐴌𐴀𐴥𐴡 𐴖𐴡𐴌𐴡𐴌 𐴃𐴡𐴑𐴧𐴝𐴌 𐴇𐴥𐴡𐴑𐴟𐴔𐴡𐴃𐴞 𐴀𐴝𐴊𐴞𐴑𐴝𐴌𐴡𐴌 𐴈𐴝𐴣𐴏𐴠 𐴕𐴞𐴎𐴝𐴘 𐴑𐴝𐴕𐴟𐴕𐴞 𐴑𐴝𐴌𐴖𐴝𐴘 𐴒𐴡𐴌𐴥𐴝 𐴎𐴝𐴘𐴁𐴡 𐴱𐴱

Sources : ukhiyanews.com