𐴔𐴡𐴓𐴠𐴆𐴤𐴙𐴝 𐴎𐴡𐴀𐴡𐴙𐴕𐴧𐴝 𐴌𐴟𐴇𐴝𐴙𐴚𐴒𐴙𐴝 𐴵 𐴲 𐴎𐴡𐴕 𐴏𐴠𐴕𐴋𐴋𐴤𐴗𐴠𐴃 𐴔𐴝𐴎𐴤𐴠 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴀𐴝𐴌𐴑𐴝𐴕𐴡𐴌 𐴔𐴡𐴚𐴋𐴤𐴟𐴃𐴧𐴟 𐴔𐴡𐴓𐴠𐴆𐴤𐴙𐴝 𐴎𐴡𐴀𐴡𐴙𐴕𐴧𐴝 𐴌𐴟𐴇𐴝𐴙𐴚𐴒𐴙𐴝 𐴵 𐴲 𐴎𐴡𐴕 , 𐴀𐴡𐴒𐴤𐴡𐴏𐴄 𐴔𐴥𐴝𐴐𐴡𐴌 𐴸 𐴱 𐴃𐴝𐴌𐴥𐴞𐴑𐴡𐴃 𐴌𐴝𐴃𐴞𐴘𐴝 , 𐴏𐴠𐴕 𐴋𐴤𐴗𐴠 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴃 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴏𐴠𐴕 𐴋𐴤𐴗𐴠 𐴁𐴤𐴝𐴐𐴞 𐴀𐴠𐴑 𐴎𐴡𐴕𐴠 ” 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴁𐴤𐴡𐴌𐴞 𐴓𐴡𐴘 𐴀𐴝𐴘𐴧𐴠𐴌 𐴊𐴧𐴠 𐴁𐴟𐴄 𐴘𐴝𐴀𐴝𐴕𐴡𐴌𐴠 𐴃𐴟𐴖𐴥𐴝𐴕𐴠 𐴉𐴝𐴘𐴧𐴥𐴠 𐴘𐴦𐴝𐴌 , 𐴃𐴟𐴖𐴥𐴝𐴕𐴠 𐴁𐴟𐴄 𐴋𐴟𐴉𐴥𐴝𐴘 𐴉𐴥𐴠𐴓𐴝𐴘𐴁𐴤𐴡 𐴁𐴡𐴓𐴞 𐴋𐴡𐴌𐴠 , 𐴁𐴟𐴄 𐴀𐴡𐴓𐴝 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴠 𐴑𐴟𐴓𐴡𐴃 𐴓𐴝𐴔𐴝𐴘 𐴊𐴞𐴀𐴞 𐴒𐴤𐴡 𐴌𐴥𐴠𐴑𐴧𐴤𐴗𐴝𐴌 𐴈𐴝𐴣𐴏𐴝𐴃 , 𐴒𐴤𐴡 𐴉𐴝𐴀𐴝𐴌𐴡𐴌 𐴖𐴡𐴌𐴠 𐴌𐴝𐴙𐴑𐴧𐴤𐴙𐴠 , 𐴀𐴥𐴞𐴃𐴝𐴌𐴝𐴌𐴠 𐴊𐴠𐴙𐴑𐴧𐴤𐴙𐴠𐴊𐴠 𐴊𐴠𐴐𐴤𐴡𐴙𐴃𐴧𐴝 𐴔𐴝𐴙𐴕𐴐𐴤𐴠 𐴉𐴟𐴓𐴞𐴐𐴡𐴌𐴥𐴠 𐴈𐴥𐴡𐴁𐴡𐴌 𐴈𐴡𐴘𐴧𐴠 , 𐴃𐴡𐴀𐴡𐴘 𐴉𐴥𐴡𐴄𐴝𐴉𐴥𐴡𐴄 𐴉𐴟𐴓𐴞𐴐𐴢 𐴀𐴝𐴀𐴝𐴘 𐴑𐴠𐴙𐴏𐴧𐴥𐴟 𐴔𐴝𐴕𐴥𐴟𐴙𐴐𐴢 𐴊𐴤𐴡𐴌𐴞 𐴉𐴥𐴠𐴓𐴝𐴘𐴧𐴠 , 𐴀𐴝𐴌 𐴑𐴠𐴙𐴏𐴧𐴥𐴟 𐴔𐴝𐴕𐴥𐴟𐴙𐴐𐴢 𐴊𐴤𐴝𐴘 𐴓𐴟𐴖𐴝𐴘 𐴒𐴞𐴘𐴡𐴘 𐴊𐴠 𐴀𐴝𐴏𐴥𐴠 ” 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱𐴱

𐴁𐴟𐴄 𐴘𐴝𐴀𐴝𐴕𐴡𐴃 𐴰 𐴵 𐴎𐴡𐴕 𐴓𐴡𐴃𐴞 𐴔𐴝𐴕𐴥𐴟𐴙𐴐𐴢 𐴀𐴝𐴐𐴧𐴤𐴞𐴀𐴞𐴓 , 𐴊𐴡𐴙𐴅𐴧𐴙𐴝𐴃 𐴃𐴟𐴖𐴥𐴝𐴕 𐴀𐴝𐴘𐴧𐴡𐴕𐴡𐴌 𐴎𐴡𐴌𐴞𐴘𐴝 𐴏𐴥𐴡𐴉𐴡𐴌 𐴓𐴝𐴃𐴧𐴤𐴝𐴃 𐴎𐴝𐴌𐴞 𐴌𐴝𐴑𐴤𐴞 𐴕𐴡 𐴉𐴝𐴌𐴡𐴀𐴡𐴕𐴡𐴌 𐴈𐴝𐴌𐴡𐴕𐴠 , 𐴀𐴠𐴔𐴝𐴌𐴅𐴠𐴕𐴏𐴥𐴞 𐴃𐴡𐴖𐴌𐴠 𐴒𐴤𐴡 𐴎𐴝𐴒𐴝𐴃 𐴑𐴟𐴓𐴡𐴃 𐴃𐴟𐴓𐴥𐴞 𐴊𐴞𐴘𐴠𐴊𐴠 𐴁𐴡𐴓𐴞 , 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴀𐴥𐴞𐴃𐴝𐴌𐴝 𐴈𐴡𐴘𐴧𐴠𐴊𐴠 𐴘𐴝𐴀𐴝𐴕 𐴉𐴟𐴓𐴞𐴐𐴡𐴌 𐴎𐴞𐴔𐴧𐴝𐴊𐴝𐴌 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

𐴊𐴡𐴐𐴢 𐴁𐴡𐴏𐴥𐴡𐴌 𐴁𐴡𐴐𐴢 𐴀𐴡𐴓𐴝 𐴉𐴟𐴖𐴝𐴙𐴕 𐴐𐴤𐴡𐴣𐴀𐴡 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴵 𐴲 𐴎𐴡𐴕 𐴁𐴠𐴒𐴧𐴤𐴟𐴕𐴡𐴌𐴠 𐴏𐴠𐴕 𐴋𐴤𐴗𐴠 𐴐𐴤𐴡𐴀𐴡𐴌𐴡𐴌 𐴒𐴝𐴣𐴌𐴝𐴃𐴡𐴃 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 , 𐴊𐴤𐴝𐴘 𐴓𐴟𐴖𐴝𐴘 𐴒𐴞𐴘𐴡𐴘𐴊𐴠 𐴀𐴥𐴞𐴃𐴝𐴌𐴝𐴌𐴠 𐴃𐴟𐴖𐴝𐴃 𐴀𐴝𐴏𐴥𐴠 , 𐴀𐴡𐴒𐴤𐴡𐴏𐴄 𐴔𐴥𐴝𐴐𐴡𐴌 𐴲 𐴃𐴝𐴌𐴥𐴞𐴑𐴡𐴃 𐴔𐴝𐴎𐴤𐴠 𐴘𐴥𐴡 𐴒𐴤𐴗𐴝 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴃 , 𐴰 𐴲 𐴎𐴡𐴕𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴊𐴤𐴡𐴌𐴝 𐴉𐴡𐴅𐴧𐴞𐴀𐴞𐴓 𐴊𐴠 𐴎𐴝𐴕𐴝 𐴒𐴞𐴘𐴠 𐴱𐴱

𐴔𐴡𐴚𐴋𐴤𐴟𐴌 𐴀𐴠𐴓𐴝𐴑𐴝𐴃 𐴀𐴝𐴀𐴝 𐴎𐴝𐴀𐴝 𐴁𐴡𐴕 𐴒𐴡𐴌𐴥𐴞 𐴌𐴝𐴑𐴤𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 , 𐴊𐴠𐴐𐴤𐴡𐴌 𐴁𐴤𐴟𐴃𐴡𐴌𐴠 𐴈𐴝𐴔 𐴈𐴡𐴔𐴞 𐴎𐴝𐴘 𐴀𐴝𐴘 𐴒𐴡𐴌𐴥𐴝 𐴈𐴡𐴔 𐴀𐴥𐴡𐴘 𐴎𐴡𐴀𐴡𐴕𐴡𐴌 𐴏𐴥𐴡𐴁𐴡𐴁𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴠𐴐𐴤𐴝 𐴁𐴠𐴐𐴤𐴞 𐴄𐴞𐴛𐴝 𐴊𐴞𐴀𐴞 , 𐴉𐴡𐴌𐴝𐴕𐴡𐴌 𐴁𐴝𐴎𐴞 𐴓𐴝𐴒𐴝𐴘 𐴀𐴠𐴕𐴋𐴞𐴓𐴧𐴝 𐴒𐴡𐴌𐴥𐴞 𐴔𐴡𐴓𐴠𐴆𐴤𐴙𐴝𐴃 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴥𐴠𐴌 𐴊𐴠 𐴱𐴱

Sources : burmese.dvb