𐴑𐴡𐴗𐴔𐴞 𐴏𐴥𐴔𐴡𐴒𐴤𐴝𐴌 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 𐴕𐴟𐴓𐴞𐴕 𐴇𐴠𐴎𐴝 , 𐴁𐴝𐴚𐴓𐴝𐴊𐴠𐴐𐴢 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴎𐴝𐴘𐴁𐴡 𐴱𐴱

𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴅𐴡𐴕𐴡𐴌𐴡𐴓 𐴏𐴥𐴠𐴒𐴠𐴄𐴠𐴌𐴞𐴌 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 / 𐴕𐴟𐴓𐴞𐴕 𐴇𐴠𐴎𐴝 , 𐴁𐴡𐴌𐴔𐴥𐴝𐴌 𐴏𐴥𐴡𐴉𐴡𐴌 𐴉𐴥𐴟𐴌𐴝𐴘 𐴁𐴦𐴝𐴊𐴠 , 𐴔𐴥𐴝𐴐𐴤𐴡𐴌 𐴐𐴤𐴠𐴐𐴠 𐴁𐴝𐴚𐴓𐴝𐴊𐴠𐴐𐴢 𐴎𐴝𐴘𐴧𐴡𐴌𐴠 𐴓𐴝𐴃𐴧𐴤𐴝𐴃 , 𐴑𐴡𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴎𐴝𐴘𐴁𐴡 𐴱𐴱

𐴀𐴠𐴑𐴀𐴡𐴔 𐴁𐴝𐴌 𐴀𐴥𐴞𐴏𐴝𐴉𐴠 𐴁𐴡𐴌𐴔𐴥𐴝𐴃 𐴀𐴝𐴙𐴐𐴧𐴤𐴙𐴠𐴊𐴠 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 / 𐴕𐴟𐴓𐴠𐴕 𐴇𐴠𐴎𐴝 𐴀𐴝𐴌 𐴑𐴟𐴀𐴟𐴂𐴑𐴝𐴌 𐴔𐴠𐴓𐴠𐴄𐴠𐴌𐴞𐴌 𐴕𐴠𐴃𐴝 𐴀𐴥𐴡𐴑𐴧𐴡𐴓 𐴔𐴞𐴓𐴞 , 𐴀𐴡𐴒𐴤𐴡𐴏𐴄 𐴔𐴥𐴝𐴐𐴡𐴌 𐴷 𐴱 𐴃𐴝𐴌𐴥𐴞𐴑𐴡𐴃 𐴕𐴠𐴂𐴙𐴠 𐴋𐴦𐴡𐴃 𐴊𐴡𐴓𐴝 𐴀𐴥𐴡𐴘𐴧𐴠𐴊𐴠 𐴀𐴡𐴑𐴃𐴤𐴡𐴃 ,𐴁𐴝𐴚𐴓𐴝𐴊𐴠𐴐𐴢 𐴒𐴞𐴘𐴠 𐴒𐴤𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴔𐴦𐴝𐴔𐴠𐴓𐴝𐴌 𐴁𐴝𐴁𐴡𐴃𐴠 𐴔𐴡𐴐𐴖𐴝𐴌𐴝 𐴒𐴡𐴌𐴥𐴞 𐴁𐴦𐴝𐴊𐴠 , 𐴊𐴠𐴐𐴢 𐴃𐴞𐴘𐴝𐴒𐴢 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴞𐴃𐴝𐴌𐴝 𐴈𐴡𐴕𐴥𐴡 𐴑𐴞𐴏𐴞𐴔𐴧𐴥𐴝 𐴋𐴡𐴌 𐴁𐴤𐴡𐴘 𐴏𐴥𐴝𐴌𐴝 𐴇𐴥𐴠𐴉𐴝𐴎𐴡𐴃𐴡𐴌 𐴏𐴥𐴝𐴣𐴀𐴝𐴃𐴠 𐴖𐴝𐴉𐴠𐴏𐴢 𐴀𐴝𐴀𐴝𐴘 𐴉𐴝𐴌𐴞𐴁𐴤𐴝𐴌 𐴁𐴠𐴁𐴡𐴏𐴃𐴤𐴝 𐴒𐴡𐴌𐴥𐴞 𐴊𐴞𐴀𐴞𐴁𐴡𐴓𐴧𐴥𐴝 , 𐴔𐴠𐴓𐴠𐴄𐴠𐴌𐴞𐴌 𐴕𐴠𐴃𐴝 𐴌𐴥𐴠 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴕𐴞𐴎𐴡𐴌 𐴀𐴞𐴏𐴧𐴥𐴝 𐴔𐴡𐴃𐴠 𐴋𐴡𐴌 𐴁𐴤𐴡𐴘 𐴏𐴥𐴝𐴌𐴝 𐴕𐴞𐴌𐴝𐴉𐴡𐴃𐴧𐴝 𐴁𐴤𐴝𐴉𐴠 𐴀𐴞𐴎𐴧𐴡𐴃𐴡𐴌 𐴏𐴥𐴝𐴣𐴀𐴝𐴃𐴠 ,𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴀𐴝𐴀𐴝𐴘 𐴉𐴝𐴌𐴠 𐴉𐴝𐴀𐴝𐴕 𐴇𐴥𐴝𐴓𐴡𐴃 𐴁𐴝𐴕𐴝𐴀𐴡𐴕 , 𐴁𐴡𐴌𐴔𐴥𐴝𐴌 𐴎𐴞𐴔𐴧𐴝𐴊𐴝𐴌𐴞 𐴁𐴡𐴓𐴞 , 𐴔𐴠𐴓𐴠𐴄𐴠𐴌𐴞𐴌 𐴕𐴠𐴃𐴝 𐴀𐴥𐴡𐴑𐴧𐴡𐴓𐴡𐴌𐴠 𐴈𐴡𐴘𐴧𐴠𐴊𐴠 𐴘𐴝𐴀𐴝𐴕 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝 𐴘𐴠 𐴕𐴠𐴀𐴠𐴓𐴝𐴘𐴧𐴠𐴊𐴠 𐴀𐴠𐴓𐴝𐴕 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴷 𐴱 𐴰 𐴲 𐴐𐴤𐴡𐴕𐴡𐴃 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴎𐴤𐴝𐴑𐴧𐴗𐴝 𐴈𐴝𐴍𐴝 𐴔𐴝𐴌𐴝 𐴒𐴡𐴌𐴥𐴡𐴕𐴡𐴌 𐴀𐴝𐴌 𐴔𐴝𐴘𐴧𐴝 𐴀𐴥𐴡𐴑𐴧𐴡𐴓𐴡𐴌𐴠 𐴎𐴤𐴝𐴑𐴧𐴗𐴝 𐴁𐴡𐴓𐴡𐴃𐴑𐴝𐴌 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 , 𐴇𐴥𐴝𐴣𐴃 𐴓𐴝𐴑𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴊𐴤𐴝𐴘𐴧𐴡𐴌𐴠 𐴁𐴝𐴚𐴓𐴝𐴊𐴠𐴐𐴤𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴠 , 𐴔𐴠𐴓𐴠𐴄𐴠𐴌𐴞𐴌 𐴑𐴝𐴌𐴖𐴝𐴘 𐴀𐴥𐴞𐴁𐴤𐴝𐴃 𐴔𐴝𐴎𐴤𐴠 , 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌𐴠 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠𐴊𐴠 , 𐴉𐴝𐴌𐴝 𐴀𐴥𐴡𐴑𐴧𐴡𐴓 𐴉𐴟𐴌𐴝 𐴊𐴞𐴘𐴠𐴊𐴠 𐴀𐴥𐴞𐴀𐴞𐴕𐴡𐴌 𐴒𐴡𐴁𐴤𐴝 , 𐴏𐴥𐴝𐴁𐴟𐴃 𐴀𐴥𐴡𐴑𐴧𐴡𐴓 𐴁𐴠𐴒𐴧𐴤𐴞𐴕 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴠 𐴎𐴡𐴔𐴝 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴎𐴟𐴓𐴟𐴔 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴞𐴀𐴞𐴕𐴡𐴌 𐴓𐴝 , 𐴒𐴝𐴔𐴁𐴞𐴘𐴝 𐴘𐴠 𐴁𐴡𐴌𐴔𐴥𐴝𐴌 𐴁𐴠𐴌𐴟𐴊𐴧𐴠 𐴕𐴠𐴊𐴝𐴓𐴥𐴠𐴕𐴡𐴃 𐴀𐴝𐴏𐴥𐴠𐴊𐴠 𐴁𐴞𐴐𐴧𐴤𐴡 𐴀𐴝𐴊𐴝𐴓𐴡𐴃𐴡𐴃 𐴑𐴠𐴙𐴏𐴢 𐴑𐴤𐴟𐴓𐴞 𐴌𐴝𐴙𐴑𐴧𐴤𐴙𐴠 , 𐴀𐴝𐴊𐴝𐴓𐴡𐴃𐴠 𐴘𐴥𐴡 𐴑𐴠𐴙𐴏𐴢 𐴒𐴡𐴏𐴥𐴞 𐴓𐴡𐴘 𐴃𐴡𐴊𐴝𐴌𐴟𐴑 𐴒𐴡𐴌𐴥𐴞𐴁𐴤𐴡𐴓𐴧𐴝 𐴉𐴥𐴝𐴘𐴏𐴠𐴓𐴝 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴞𐴕𐴏𐴦𐴝𐴕𐴞 𐴇𐴥𐴡𐴑 𐴑𐴡𐴔𐴞𐴐𐴠𐴕𐴡𐴌 𐴁𐴡𐴌𐴡 𐴔𐴞𐴆𐴠𐴓 𐴁𐴝𐴐𐴠𐴓 , 𐴁𐴝𐴚𐴓𐴝𐴊𐴠𐴐𐴤𐴡𐴌 𐴏𐴝𐴙𐴌 𐴊𐴞𐴕𐴧𐴝 𐴏𐴥𐴡𐴉𐴡𐴌𐴡𐴃 , 𐴁𐴞𐴐𐴧𐴤𐴡𐴃 𐴀𐴥𐴡𐴑𐴧𐴡𐴓𐴡𐴌 𐴋𐴡𐴣𐴀𐴡𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴀𐴡𐴒𐴤𐴡𐴏𐴄 𐴔𐴥𐴝𐴐𐴡𐴌 𐴶 𐴱 𐴃𐴝𐴌𐴥𐴞𐴑𐴡𐴃 𐴀𐴝𐴙𐴐𐴧𐴤𐴙𐴠 , 𐴊𐴠𐴐𐴢 𐴏𐴥𐴝𐴌𐴞 𐴁𐴝𐴚𐴓𐴝𐴊𐴠𐴐𐴤𐴡𐴃 𐴒𐴞𐴘𐴠𐴊𐴠 𐴀𐴥𐴞𐴃𐴝𐴌𐴝 𐴖𐴝𐴉𐴠𐴏𐴢 𐴀𐴝𐴘𐴓𐴠 , 𐴊𐴠𐴐𐴤𐴡𐴙𐴃𐴧𐴝𐴃𐴝 𐴊𐴞𐴘𐴡𐴌𐴥𐴠 𐴀𐴝𐴏𐴥𐴡𐴓 𐴎𐴝𐴒𐴝𐴃 𐴃𐴤𐴝𐴑𐴞𐴃𐴡 𐴊𐴞𐴘𐴝 𐴉𐴡𐴌𐴞𐴁𐴤𐴡 𐴀𐴝𐴌 𐴀𐴝𐴎𐴝𐴊𐴞𐴌 𐴏𐴥𐴝𐴣𐴀𐴝𐴃𐴠 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴥𐴞 𐴉𐴝𐴌𐴡𐴀𐴡𐴕 𐴐𐴤𐴡𐴣𐴀𐴡 𐴉𐴟𐴌𐴝 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑 𐴊𐴞𐴘𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴌𐴟𐴇𐴝𐴙𐴕𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

Sources : burmese.dvb