𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴕𐴞𐴎𐴡𐴌 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴊𐴞𐴀𐴞𐴁𐴡 𐴈𐴡𐴘𐴧𐴠 : 𐴀𐴞𐴕𐴋𐴤𐴞𐴘𐴝𐴌 𐴒𐴤𐴡𐴌 𐴀𐴟𐴎𐴞𐴌 𐴱𐴱

𐴀𐴞𐴕𐴋𐴤𐴞𐴘𐴝𐴃 𐴉𐴡𐴣𐴀𐴡𐴙𐴏𐴧𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴁𐴝𐴁𐴡𐴃𐴠 , 𐴀𐴞𐴕𐴋𐴤𐴞𐴘𐴝𐴌 𐴒𐴤𐴡𐴌 𐴀𐴟𐴎𐴞𐴌𐴠 𐴁𐴟𐴙𐴃 𐴁𐴝𐴌𐴠 𐴕𐴀𐴠𐴓𐴝𐴘𐴧𐴠𐴊𐴠 𐴀𐴠𐴙𐴏𐴄𐴠𐴙𐴄𐴔𐴥𐴠𐴕 𐴘𐴝𐴀𐴝𐴕 , 𐴀𐴞𐴕𐴋𐴤𐴞𐴘𐴝𐴌 𐴒𐴤𐴡𐴌 𐴁𐴝𐴣𐴊𐴤𐴝 𐴀𐴝𐴌 𐴐𐴤𐴡𐴀𐴡𐴌 𐴃𐴡𐴌𐴑𐴞 𐴒𐴡𐴌𐴥𐴝 𐴀𐴟𐴎𐴞𐴌𐴠 , 𐴘𐴝𐴀𐴝𐴌 𐴀𐴝𐴒𐴠 𐴈𐴡𐴘𐴧𐴠𐴊𐴠 𐴘𐴝𐴀𐴝𐴕 𐴓𐴡𐴘 𐴁𐴞𐴓𐴑𐴤𐴟𐴓 𐴀𐴟𐴓𐴋𐴝 𐴁𐴡𐴓𐴞 𐴌𐴗𐴠𐴄𐴝𐴌 𐴈𐴥𐴡𐴁𐴡𐴌𐴡𐴃 𐴓𐴠𐴙𐴑𐴧𐴤𐴙𐴠 𐴱𐴱

𐴒𐴤𐴡𐴌 𐴁𐴝𐴣𐴊𐴤𐴝 𐴀𐴝𐴌 𐴐𐴤𐴡𐴀𐴡𐴌 𐴃𐴡𐴌𐴑𐴞 𐴒𐴡𐴌𐴥𐴝 𐴀𐴟𐴎𐴞𐴌𐴠 , 𐴊𐴤𐴠𐴓𐴞 𐴐𐴤𐴡𐴀𐴡𐴌𐴡𐴌 𐴉𐴡𐴏𐴥𐴞𐴔𐴠 𐴁𐴝𐴑𐴝𐴖𐴝𐴓𐴝 𐴎𐴝𐴒𐴝𐴃 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴇𐴥𐴠𐴉𐴝𐴎𐴡𐴃 𐴕𐴞𐴌𐴝𐴉𐴡𐴃𐴧𐴝𐴌 𐴏𐴥𐴝𐴣𐴀𐴝𐴃𐴠 𐴃𐴤𐴝𐴑𐴞 𐴉𐴝𐴌𐴞𐴁𐴤𐴝𐴌 𐴁𐴠𐴁𐴡𐴏𐴃𐴤𐴝 𐴒𐴡𐴌𐴥𐴞 𐴊𐴞𐴘𐴟𐴔 𐴁𐴡𐴓𐴞 𐴏𐴟𐴆𐴠𐴓 𐴕𐴦𐴠𐴄𐴖𐴥𐴝𐴑 𐴄𐴗𐴠𐴄𐴝𐴌𐴡𐴃 𐴓𐴠𐴑𐴤𐴞 𐴈𐴡𐴘𐴧𐴠 𐴱𐴱

𐴈𐴡𐴃𐴤𐴝 𐴘𐴝𐴀𐴝𐴕 𐴏𐴟𐴆𐴠𐴓 𐴕𐴦𐴠𐴄𐴖𐴥𐴝𐴑𐴡𐴃 𐴀𐴝𐴀𐴝𐴘 𐴁𐴦𐴝𐴊𐴠 𐴈𐴡𐴀𐴠𐴑 𐴒𐴤𐴡𐴕𐴄𐴤𐴝𐴌 𐴁𐴤𐴟𐴃𐴡𐴌𐴠 , 𐴒𐴤𐴡𐴌 𐴀𐴟𐴎𐴞𐴌𐴠 ! 𐴒𐴝𐴙𐴌 𐴑𐴝𐴕𐴟𐴕𐴞 𐴃𐴡𐴖𐴌𐴠 𐴀𐴝𐴀𐴝𐴘𐴧𐴡𐴌𐴠 𐴊𐴤𐴠𐴓𐴞 𐴐𐴤𐴡𐴀𐴡𐴌𐴡𐴃 𐴃𐴤𐴝𐴑𐴠𐴌𐴊𐴧𐴠 𐴁𐴞𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 , 𐴁𐴡𐴌𐴔𐴥𐴝𐴃 𐴖𐴝𐴉𐴠𐴏𐴢 𐴉𐴡𐴣𐴀𐴡𐴏𐴝𐴘 𐴊𐴞𐴘𐴝 𐴎𐴝𐴘𐴁𐴡 𐴁𐴡𐴓𐴞 𐴈𐴡𐴘𐴧𐴠 , 𐴀𐴥𐴞𐴃𐴝𐴌𐴝 𐴌𐴥𐴠 𐴑𐴠𐴀𐴠𐴔 𐴁𐴝𐴕𐴝𐴘 𐴀𐴠𐴑 𐴎𐴝𐴒𐴝𐴃 𐴊𐴡𐴓𐴝 𐴒𐴡𐴌𐴥𐴞 , 𐴑𐴝𐴕𐴟𐴕 𐴔𐴡𐴎𐴞𐴕 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴒𐴡𐴌𐴥𐴝 𐴎𐴝𐴘𐴁𐴡 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 , 𐴔𐴡𐴕𐴃𐴡𐴌 𐴑𐴠𐴀𐴠𐴔 𐴀𐴥𐴞𐴀𐴞𐴕 𐴈𐴡𐴍𐴥𐴠 𐴁𐴝𐴕𐴝𐴘𐴁𐴤𐴡𐴊𐴠 𐴘𐴝𐴀𐴝𐴕𐴡𐴌 𐴁𐴝𐴁𐴡𐴃𐴠 𐴕𐴥𐴡 𐴈𐴡𐴀𐴡 𐴱𐴱

𐴒𐴡𐴃𐴡 𐴁𐴡𐴏𐴥𐴡𐴌𐴡𐴃 𐴕𐴠𐴘𐴥𐴟 𐴊𐴤𐴠𐴓𐴞 𐴐𐴤𐴡𐴀𐴡𐴌𐴡𐴃 𐴰 𐴰 𐴱 𐴱 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴃𐴤𐴝𐴑𐴤𐴠 , 𐴁𐴦𐴝𐴊𐴠 𐴉𐴟𐴌𐴝 𐴀𐴞𐴕𐴋𐴞𐴘𐴝𐴃 𐴊𐴡𐴌𐴥𐴡 𐴈𐴝𐴔 𐴊𐴟𐴑 𐴔𐴠𐴀𐴠𐴕𐴧𐴡𐴃 𐴒𐴡𐴌𐴥𐴞 𐴈𐴥𐴝𐴀𐴝𐴊𐴠 , 𐴊𐴡𐴐𐴢 𐴇𐴥𐴝𐴎𐴝𐴌 𐴇𐴥𐴝𐴣𐴃 𐴐𐴤𐴡𐴃 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴀𐴝𐴏𐴥𐴠 𐴁𐴡𐴓𐴞 , 𐴌𐴟𐴇𐴝𐴙𐴚𐴒𐴙𐴝𐴌 𐴑𐴡𐴌𐴔𐴞 / 𐴀𐴝𐴓𐴞 𐴅𐴟𐴇𐴥𐴝𐴌𐴠 𐴈𐴡𐴘𐴧𐴠 𐴱𐴱

𐴀𐴠 𐴁𐴡𐴏𐴥𐴡𐴌 𐴁𐴡𐴌𐴔𐴥𐴝𐴃 𐴖𐴝𐴉𐴠𐴏𐴢 𐴉𐴝𐴌 𐴒𐴡𐴌𐴥𐴝𐴘 𐴊𐴞𐴀𐴞𐴁𐴡 𐴈𐴡𐴘𐴧𐴠𐴊𐴠 𐴘𐴝𐴀𐴝𐴕𐴡𐴌 𐴀𐴡𐴐𐴤𐴝𐴕𐴃𐴞𐴌 𐴎𐴡𐴌𐴞𐴘𐴝 , 𐴀𐴞𐴕𐴋𐴞𐴘𐴝𐴃𐴧𐴟 𐴰 𐴰 𐴰 𐴲 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴁𐴝𐴚𐴓𐴝𐴊𐴠𐴐𐴤𐴡𐴃 𐴉𐴝𐴌𐴥𐴝𐴘 𐴒𐴞𐴘𐴠 𐴒𐴤𐴡𐴘 𐴁𐴡𐴓𐴞 𐴘𐴥𐴡 𐴀𐴥𐴞𐴁𐴤𐴝 𐴘𐴠 𐴈𐴡𐴘𐴧𐴠 ,𐴀𐴠𐴈𐴥𐴡𐴕𐴡𐴌 𐴀𐴡𐴑𐴃𐴤𐴡𐴃 𐴕𐴞𐴘𐴥𐴟 𐴊𐴤𐴠𐴓𐴞𐴃 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴒𐴙𐴝 𐴀𐴥𐴡𐴑𐴧𐴡𐴓𐴠 𐴐𐴤𐴝𐴕𐴃𐴞 𐴕𐴞𐴌𐴝𐴉𐴡𐴃 𐴀𐴝𐴏𐴥𐴠𐴊𐴠 , 𐴀𐴥𐴠𐴕𐴋𐴞𐴓𐴧𐴝 𐴒𐴤𐴡𐴌𐴡𐴌 𐴑𐴝𐴔𐴌𐴥𐴝 𐴀𐴥𐴡𐴑𐴧𐴡𐴓 𐴑𐴠𐴌𐴝𐴘𐴝 𐴒𐴡𐴌𐴥𐴞 𐴃𐴤𐴝𐴑𐴠𐴌 𐴱𐴱

Sources : RFAburmese