𐴁𐴡𐴌𐴔𐴥𐴝𐴌 𐴔𐴦𐴝𐴔𐴠𐴓𐴝 𐴏𐴟𐴂𐴝𐴌𐴔𐴥𐴠𐴕𐴠 𐴀𐴥𐴟𐴊𐴧𐴝 𐴇𐴥𐴡𐴓 𐴒𐴡𐴌𐴥𐴞 𐴉𐴝𐴌𐴞𐴁𐴤𐴡𐴊𐴠 𐴕𐴡 𐴁𐴟𐴎𐴤𐴠𐴌 𐴁𐴡𐴓𐴞 , 𐴀𐴝𐴏𐴞𐴘𐴠𐴕𐴡𐴌 𐴈𐴥𐴝𐴏𐴢 𐴏𐴥𐴡𐴉𐴞𐴌𐴠 𐴈𐴡𐴘𐴧𐴠 𐴱𐴱

𐴁𐴞𐴐𐴧𐴤𐴝𐴐𐴢 𐴀𐴝𐴌 𐴏𐴞𐴘𐴝𐴏𐴞 𐴔𐴡𐴎𐴞𐴕 𐴀𐴞𐴏𐴧𐴥𐴝 𐴕𐴡 𐴃𐴤𐴝𐴑𐴡𐴀𐴡𐴕𐴧𐴝𐴕 , 𐴁𐴡𐴌𐴔𐴥𐴝𐴃 𐴐𐴤𐴝𐴕𐴃𐴞 𐴀𐴝𐴘𐴧𐴡𐴕𐴡𐴌 𐴈𐴝𐴔𐴡𐴃 , 𐴀𐴡𐴣𐴏𐴥𐴝 𐴀𐴝𐴌 𐴋𐴠𐴁𐴝𐴓 𐴀𐴥𐴡𐴘𐴁𐴡 𐴁𐴡𐴓𐴞 , 𐴀𐴞𐴐𐴤𐴞𐴘𐴝𐴌 𐴉𐴟𐴑 𐴊𐴡𐴀𐴡𐴙𐴕 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌 𐴐𐴤𐴡𐴔𐴞𐴃𐴞 , 𐴀𐴝𐴏𐴞𐴘𐴠𐴕𐴡𐴌 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 / 𐴂𐴡𐴌𐴝𐴑 𐴏𐴡𐴑𐴤𐴡𐴕𐴠 𐴈𐴡𐴘𐴧𐴠 𐴱𐴱

𐴁𐴠𐴌𐴟𐴊𐴧𐴤𐴞 𐴅𐴡𐴔𐴦𐴝𐴃 𐴀𐴥𐴡𐴑𐴧𐴡𐴓 𐴓𐴡𐴘 𐴀𐴥𐴟𐴊𐴧𐴝 𐴔𐴞𐴓𐴞 𐴔𐴡𐴐𐴖𐴝𐴌𐴝 𐴒𐴡𐴌𐴥𐴞 , 𐴇𐴥𐴝𐴃 𐴓𐴡𐴘 𐴇𐴥𐴝𐴃 𐴔𐴞𐴓𐴝𐴘 𐴊𐴠𐴈𐴥𐴝𐴘 𐴃𐴡𐴌𐴑𐴞 𐴒𐴡𐴌𐴥𐴞𐴁𐴤𐴝𐴌 𐴀𐴞𐴏𐴧𐴥𐴝 𐴕𐴥𐴝𐴘𐴊𐴠 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌 𐴁𐴟𐴆𐴤𐴙𐴟𐴑 𐴀𐴥𐴡𐴑𐴧𐴡𐴓 𐴓𐴡𐴘 𐴔𐴞𐴓 𐴔𐴞𐴓𐴝𐴂𐴢 𐴒𐴡𐴌𐴡𐴀𐴡𐴕𐴡𐴌 𐴃𐴧𐴟 , 𐴀𐴝𐴏𐴞𐴘𐴠𐴕 𐴇𐴥𐴝𐴔𐴞𐴐𐴇𐴝 𐴁𐴝𐴏𐴞 𐴃𐴤𐴝𐴑𐴤𐴞𐴁𐴡 𐴁𐴡𐴓𐴞 𐴘𐴥𐴡 , 𐴑𐴡𐴔𐴁𐴤𐴡𐴋𐴞𐴘𐴝𐴌 𐴊𐴟𐴘𐴀𐴡𐴔 𐴁𐴡𐴌 𐴀𐴟𐴎𐴞𐴌 , 𐴀𐴝𐴌 𐴀𐴠 𐴇𐴥𐴝𐴉𐴃𐴝𐴃 𐴒𐴡𐴙𐴅𐴧𐴤𐴙𐴠𐴊𐴠 𐴀𐴝𐴏𐴞𐴘𐴠𐴕𐴡𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 𐴀𐴥𐴡𐴑𐴧𐴡𐴓𐴡𐴌 𐴔𐴞𐴄𐴤𐴞𐴚𐴡𐴌 𐴏𐴥𐴡𐴊𐴡𐴌 / 𐴂𐴡𐴌𐴝𐴑 𐴏𐴡𐴑𐴤𐴟𐴕𐴠 𐴈𐴡𐴘𐴧𐴠𐴊𐴠 𐴈𐴡𐴃𐴤𐴝 𐴀𐴥𐴞𐴀𐴞𐴕 ( 𐴏𐴞 𐴀𐴠𐴕 𐴀𐴠 ) 𐴈𐴥𐴡𐴁𐴡𐴌𐴠 𐴓𐴠𐴙𐴑𐴧𐴤𐴙𐴠 𐴱𐴱

𐴐𐴤𐴝𐴔𐴠𐴓 𐴀𐴝𐴏𐴥𐴠𐴊𐴠 𐴔𐴟𐴃𐴦𐴝𐴓𐴧𐴠𐴑𐴝 𐴉𐴝𐴄𐴞 𐴀𐴥𐴡𐴑𐴧𐴡𐴓 𐴈𐴡𐴕𐴥𐴝𐴑𐴧𐴤𐴙𐴝 𐴉𐴞𐴏𐴧𐴥𐴝 𐴕𐴡 𐴎𐴝𐴘 , 𐴓𐴝𐴌𐴥𐴝𐴘𐴃 𐴒𐴤𐴡𐴓𐴞𐴁𐴡 𐴒𐴤𐴡𐴘𐴊𐴠 𐴀𐴞𐴏𐴧𐴥𐴝 𐴔𐴡𐴕𐴐𐴤𐴝 𐴀𐴝𐴏𐴥𐴠𐴊𐴠 𐴘𐴝𐴀𐴝𐴕 , 𐴊𐴠𐴑𐴤𐴠𐴌 𐴊𐴧𐴠 𐴀𐴥𐴠𐴃𐴡𐴓𐴧𐴝 𐴁𐴡𐴌𐴔𐴥𐴝𐴌 𐴔𐴦𐴝𐴔𐴠𐴓𐴝 𐴌𐴥𐴠 𐴀𐴠𐴌𐴞 𐴕𐴡 𐴊𐴞𐴀𐴞𐴁𐴤𐴡 , 𐴇𐴥𐴝𐴃 𐴃𐴟𐴓𐴥𐴞 𐴕𐴡 𐴉𐴥𐴠𐴓𐴥𐴝𐴘𐴁𐴡 𐴁𐴡𐴓𐴞 𐴘𐴥𐴡 𐴀𐴥𐴞𐴁𐴤𐴝 𐴘𐴠 𐴈𐴡𐴘𐴧𐴠 𐴱𐴱

𐴀𐴥𐴝𐴛 𐴀𐴠𐴑 𐴎𐴡𐴕 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 , 𐴀𐴦𐴝𐴛 𐴏𐴟𐴂𐴝𐴌𐴔𐴥𐴠𐴕 𐴀𐴥𐴡 𐴕𐴡𐴀𐴡 𐴁𐴡𐴓𐴞 , 𐴂𐴡𐴕𐴧𐴗𐴥𐴠𐴕 𐴁𐴝𐴚 𐴐𐴤𐴡𐴀𐴡𐴌𐴡𐴃 𐴌𐴠𐴂𐴟𐴄𐴝𐴌 𐴀𐴥𐴡𐴑𐴧𐴡𐴓𐴡𐴌𐴠 / 𐴂𐴡𐴌𐴝𐴑 𐴏𐴡𐴑𐴤𐴟𐴕𐴠 𐴈𐴡𐴘𐴧𐴠 , 𐴏𐴟𐴂𐴝𐴌𐴔𐴥𐴠𐴕𐴠 𐴀𐴥𐴟𐴊𐴧𐴝 𐴁𐴡𐴌𐴔𐴥𐴝𐴌 𐴔𐴦𐴝𐴔𐴠𐴓𐴝 𐴇𐴥𐴡𐴓 𐴒𐴡𐴌𐴥𐴞 𐴉𐴝𐴌𐴞𐴁𐴤𐴡𐴊𐴠 𐴕𐴡 𐴁𐴟𐴎𐴤𐴠𐴌 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱𐴱

𐴋𐴞𐴔𐴟𐴑𐴠𐴌𐴠𐴏𐴞𐴌 𐴁𐴝𐴁𐴡𐴃𐴠 𐴈𐴝𐴔 𐴒𐴡𐴌𐴡𐴀𐴡𐴙𐴕𐴧𐴝 𐴑𐴡𐴌𐴔𐴞 𐴊𐴟𐴘 𐴎𐴡𐴕𐴡𐴌𐴥𐴠 , 𐴑𐴠𐴙𐴏𐴧𐴥𐴟 𐴊𐴞𐴕 𐴀𐴝𐴒𐴠 𐴉𐴥𐴝𐴣𐴐𐴞 𐴊𐴞𐴘𐴠𐴊𐴠 𐴘𐴝𐴀𐴝𐴕 , 𐴐𐴤𐴝𐴕𐴃𐴞𐴌 𐴁𐴝𐴁𐴡𐴃𐴠 𐴀𐴝𐴐𐴤𐴝 𐴒𐴡𐴌𐴥𐴞𐴁𐴤𐴝𐴌 𐴈𐴡𐴃𐴤𐴝 𐴏𐴥𐴝𐴌𐴡 , 𐴉𐴥𐴠𐴓𐴡𐴀𐴡 , 𐴋𐴞𐴔𐴟𐴑𐴠𐴌𐴠𐴏𐴞𐴌 𐴖𐴡𐴌𐴠 𐴀𐴟𐴒𐴧𐴤𐴗𐴝 𐴋𐴡𐴣𐴀𐴡𐴌 𐴅𐴤𐴝𐴄𐴑𐴝 𐴀𐴥𐴡𐴘 𐴁𐴦𐴝𐴊𐴠 𐴘𐴥𐴡 , 𐴐𐴤𐴠𐴐𐴠 𐴋𐴔𐴟𐴑𐴠𐴌𐴠𐴏𐴞𐴌 𐴀𐴟𐴎𐴟 𐴎𐴝𐴀𐴝 𐴕𐴡 𐴃𐴤𐴝𐴑𐴤𐴞𐴓 , 𐴁𐴡𐴌𐴔𐴥𐴝𐴌 𐴖𐴞𐴡𐴌𐴠 𐴀𐴝𐴏𐴥𐴠𐴊𐴠 𐴑𐴤𐴞𐴘𐴝𐴓 𐴔𐴡𐴕𐴐𐴤𐴝 , 𐴘𐴝𐴀𐴝𐴕𐴡𐴌 𐴖𐴡𐴌𐴠 𐴊𐴟𐴖𐴝𐴌𐴝 𐴁𐴤𐴝𐴉𐴝 𐴏𐴞𐴕𐴃𐴝 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡𐴊𐴠 𐴘𐴝𐴀𐴝𐴕𐴡𐴌 𐴖𐴡𐴌𐴠 𐴀𐴝𐴏𐴞𐴘𐴠𐴕 𐴀𐴠𐴑𐴔𐴡𐴃 𐴀𐴥𐴡𐴘𐴧𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱𐴱

Sources : RFAburmese