𐴌𐴟𐴇𐴝𐴙𐴚𐴒𐴙𐴝𐴌 𐴓𐴞𐴐𐴄𐴤𐴞 𐴉𐴡𐴣𐴀𐴡𐴏𐴝𐴘𐴓𐴠 𐴘𐴦𐴡 𐴁𐴡𐴌𐴔𐴥𐴝 𐴘𐴠 𐴅𐴟𐴖𐴝𐴁 𐴕𐴥𐴡 𐴊𐴠𐴀𐴠 : 𐴀𐴠𐴏𐴄𐴠𐴙𐴄 𐴀𐴟𐴎𐴞𐴌 𐴱𐴱

𐴊𐴟𐴘 𐴔𐴥𐴝𐴐𐴢 𐴀𐴝𐴒𐴠 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴈𐴝𐴣𐴏𐴠 , 𐴵 𐴳 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝𐴌 𐴓𐴞𐴐𐴄𐴤𐴞 𐴊𐴞𐴘𐴝 𐴒𐴞𐴘𐴠 , 𐴔𐴡𐴕𐴃𐴡𐴌 𐴀𐴠𐴈𐴥𐴡𐴕 𐴉𐴡𐴙𐴅𐴧𐴡𐴕𐴃𐴡 𐴈𐴡𐴕𐴥𐴡 𐴅𐴟𐴖𐴝𐴁 𐴉𐴝𐴀𐴝 𐴕𐴥𐴡 𐴎𐴝𐴀𐴝 𐴁𐴡𐴓𐴞 , 𐴑𐴟𐴊𐴟𐴌𐴡𐴃𐴞 𐴀𐴝𐴉𐴡𐴃𐴡𐴌 𐴁𐴠𐴁𐴡𐴏𐴃𐴝 𐴀𐴝𐴌 𐴁𐴝𐴏𐴝 𐴀𐴟𐴎𐴞𐴌 𐴋𐴝𐴑𐴄𐴡𐴌 / 𐴀𐴠𐴕𐴀𐴝𐴔𐴟𐴌 𐴌𐴝𐴇𐴔𐴝𐴕𐴠 𐴈𐴡𐴘𐴧𐴠 𐴱𐴱

𐴃𐴡𐴁𐴡 𐴘𐴥𐴡 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃 𐴓𐴡𐴘 𐴀𐴥𐴠 𐴁𐴝𐴁𐴡𐴃𐴠 𐴁𐴞𐴘𐴝𐴏𐴝𐴕𐴝 𐴐𐴤𐴟𐴌𐴟 𐴀𐴥𐴡𐴀𐴡𐴕𐴧𐴝𐴕 𐴐𐴤𐴟𐴎𐴝𐴕 𐴀𐴥𐴞𐴏𐴝𐴉𐴠 𐴀𐴥𐴞𐴁𐴤𐴝 𐴘𐴠 𐴁𐴤𐴝𐴉𐴠𐴌 𐴊𐴠𐴑𐴤𐴠𐴌 , 𐴀𐴡𐴒𐴤𐴡𐴏𐴄𐴡 𐴔𐴥𐴝𐴐𐴡𐴌 𐴳 𐴃𐴝𐴌𐴥𐴞𐴑 𐴁𐴟𐴙𐴃 𐴁𐴝𐴌𐴠 , 𐴀𐴥𐴞𐴁𐴤𐴝𐴌 𐴀𐴡𐴉𐴞𐴏𐴡𐴃 , 𐴘𐴟𐴌𐴟𐴂𐴞𐴘𐴠𐴕 𐴑𐴡𐴔𐴞𐴐𐴤𐴠𐴕𐴡𐴌 𐴁𐴝𐴚𐴓𐴝𐴊𐴠𐴐𐴤𐴡𐴌 𐴁𐴡𐴌𐴡 / 𐴀𐴝𐴕𐴝 𐴀𐴡𐴌𐴓𐴝𐴕 𐴋𐴞𐴕𐴞𐴌 𐴓𐴡𐴘 𐴒𐴡𐴙𐴅𐴧𐴤𐴙𐴠𐴊𐴠 𐴁𐴡𐴘𐴍𐴥𐴡𐴑𐴡𐴃 , 𐴀𐴠 𐴈𐴡𐴃𐴤𐴝 𐴀𐴞𐴀𐴞𐴕 𐴀𐴟𐴎𐴞𐴌 𐴀𐴠𐴕𐴝𐴔𐴟𐴌 𐴌𐴝𐴇𐴔𐴝𐴕𐴠 𐴈𐴡𐴘𐴧𐴠𐴊𐴠 𐴱𐴱

𐴊𐴟𐴘 𐴔𐴥𐴝𐴐𐴢 𐴀𐴝𐴒𐴠 𐴖𐴝𐴉𐴠𐴏𐴞𐴌 𐴁𐴝𐴁𐴡𐴃𐴠 𐴵 𐴳 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝𐴌 𐴓𐴞𐴐𐴄𐴤𐴞 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴈𐴝𐴣𐴏𐴥𐴠 𐴊𐴞𐴘𐴝 𐴒𐴞𐴘𐴠 , 𐴎𐴝𐴣𐴏𐴝𐴘 𐴁𐴤𐴝𐴏𐴝𐴘 𐴒𐴡𐴌𐴥𐴞 𐴀𐴥𐴠 𐴔𐴦𐴝𐴔𐴠𐴓𐴝𐴌 𐴁𐴝𐴁𐴡𐴃𐴠 𐴃𐴝𐴌𐴥𐴝𐴌 𐴀𐴠𐴃𐴔𐴞𐴕𐴝𐴕𐴞 𐴈𐴡𐴘𐴁𐴤𐴡 , 𐴔𐴡𐴕𐴃𐴡𐴌 𐴀𐴠𐴈𐴥𐴡𐴕 𐴀𐴥𐴡 𐴀𐴥𐴞𐴃𐴝𐴌𐴝𐴌 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴝 𐴅𐴟𐴖𐴝𐴁 𐴉𐴝𐴀𐴝 𐴕𐴥𐴡 𐴎𐴝𐴀𐴝 𐴱𐴱

𐴔𐴠𐴓𐴠𐴄𐴠𐴌𐴞 𐴘𐴠 𐴑𐴟𐴀𐴟𐴂𐴢 𐴒𐴡𐴌𐴥𐴞 𐴁𐴦𐴝𐴊𐴠 𐴀𐴠 𐴁𐴝𐴁𐴡𐴃𐴠 𐴈𐴝𐴔 𐴀𐴥𐴡𐴀𐴡𐴙𐴓 , 𐴘𐴝𐴀𐴝𐴕 𐴀𐴥𐴡 𐴀𐴠𐴈𐴥𐴡𐴕 𐴏𐴥𐴞𐴌𐴞 𐴒𐴞𐴘𐴡𐴘 , 𐴀𐴥𐴞𐴃𐴝𐴌𐴝𐴌 𐴓𐴡𐴘 𐴁𐴡𐴘𐴍𐴥𐴡𐴑 𐴀𐴥𐴡𐴘𐴧𐴠 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴅𐴟𐴖𐴝𐴁 𐴉𐴝𐴘𐴓𐴠 , 𐴖𐴝𐴉𐴠𐴏𐴞𐴌 𐴈𐴝𐴔 𐴐𐴤𐴟𐴌𐴟 𐴀𐴥𐴡𐴘𐴁𐴤𐴡 , 𐴖𐴝𐴉𐴞𐴏𐴞𐴌 𐴁𐴝𐴁𐴡𐴃𐴠 𐴀𐴝𐴌𐴀𐴥𐴡 𐴐𐴤𐴝𐴀𐴝𐴌𐴡 𐴀𐴝𐴣𐴐𐴄𐴡 𐴓𐴝𐴑𐴡𐴌 𐴓𐴞𐴐𐴄𐴤𐴞 𐴒𐴡𐴙𐴅𐴧𐴤𐴙𐴝 𐴃𐴡𐴘𐴧𐴝𐴌 𐴱𐴱

𐴈𐴡𐴃𐴤𐴝 𐴀𐴞𐴀𐴞𐴕 𐴁𐴦𐴝𐴊𐴠 , 𐴑𐴟𐴊𐴟𐴌𐴡𐴃𐴞 𐴀𐴝𐴉𐴡𐴃𐴡𐴌 𐴁𐴠𐴁𐴡𐴏𐴃𐴝 𐴀𐴝𐴌 𐴁𐴝𐴏𐴝 𐴀𐴟𐴎𐴞𐴌 , 𐴋𐴝𐴑𐴄𐴡𐴌 / 𐴀𐴠𐴕𐴀𐴝𐴔𐴟𐴌 𐴌𐴝𐴇𐴔𐴝𐴕𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 , 𐴁𐴝𐴚𐴓𐴝𐴊𐴠𐴐𐴤𐴡𐴃 𐴎𐴤𐴡𐴌 𐴃𐴟𐴖𐴥𐴝𐴕𐴡𐴌 𐴋𐴡𐴀𐴡𐴙𐴓𐴧𐴝 𐴑𐴟𐴊𐴟𐴌𐴟𐴃𐴞 𐴀𐴝𐴉𐴡𐴃𐴡𐴌 𐴈𐴥𐴡𐴃𐴞 𐴓𐴟𐴏𐴧𐴝𐴕 𐴈𐴡𐴔𐴝𐴘 𐴀𐴝𐴙𐴕𐴃𐴤𐴠 , 𐴘𐴟𐴌𐴟𐴂𐴞𐴘𐴠𐴕 𐴑𐴡𐴔𐴞𐴐𐴤𐴠𐴕𐴠 𐴁𐴝𐴚𐴓𐴝𐴊𐴠𐴐𐴤𐴡𐴌 𐴉𐴥𐴟𐴣𐴖𐴝𐴣𐴃𐴞 𐴈𐴝𐴔 𐴒𐴡𐴌𐴥𐴞𐴁𐴤𐴡 , 𐴘𐴟𐴌𐴟𐴂𐴞𐴘𐴠𐴕 𐴑𐴡𐴔𐴞𐴐𐴤𐴠𐴕𐴠 𐴀𐴠 𐴁𐴡𐴏𐴥𐴡𐴌 𐴁𐴝𐴚𐴓𐴝𐴊𐴠𐴐𐴤𐴡𐴌𐴠 𐴵 . 𐴲 𐴔𐴡𐴓𐴞𐴘𐴟𐴕 𐴋𐴦𐴡𐴓𐴝𐴌 𐴔𐴡𐴊𐴡𐴊 𐴒𐴡𐴙𐴅𐴧𐴤𐴙𐴠 , 𐴁𐴡𐴙𐴕𐴧𐴝𐴌 𐴓𐴟𐴏𐴧𐴝𐴕 𐴉𐴟𐴌𐴝 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴝𐴌𐴀𐴥𐴡 𐴲 . 𐴱 𐴔𐴡𐴓𐴞𐴘𐴟𐴕 𐴘𐴟𐴌𐴟 𐴔𐴡𐴊𐴡𐴊 𐴒𐴡𐴌𐴥𐴞𐴁𐴤𐴡 𐴱𐴱

Sources : Ukhiyanews.com