𐴈𐴥𐴝𐴕𐴝𐴌 𐴌𐴡𐴐𐴤𐴡𐴃 𐴉𐴥𐴟𐴌𐴝𐴘 𐴎𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 , 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌 𐴀𐴠𐴓𐴝𐴑𐴝𐴌 𐴑𐴠𐴙𐴏𐴧𐴥𐴟 𐴔𐴝𐴕𐴥𐴟𐴙𐴐𐴢 𐴒𐴤𐴡𐴌𐴁𐴝𐴌𐴞 , 𐴉𐴝𐴌𐴝 𐴃𐴞𐴘𐴝𐴒𐴢 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 , 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴔𐴝𐴙𐴕𐴐𐴤𐴡𐴌 𐴀𐴝𐴀𐴝 𐴎𐴝𐴀𐴝 𐴁𐴡𐴕 𐴒𐴡𐴌𐴥𐴞 𐴌𐴝𐴑𐴤𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 , 𐴈𐴥𐴝𐴕𐴝𐴌 𐴌𐴡𐴐𐴤𐴡𐴃 𐴉𐴥𐴟𐴌𐴝𐴘 𐴒𐴞𐴘𐴡𐴘𐴊𐴠 , 𐴑𐴠𐴙𐴏𐴧𐴥𐴟 𐴔𐴝𐴕𐴥𐴟𐴙𐴐𐴢 𐴉𐴝𐴌𐴝 𐴏𐴥𐴝𐴌𐴞 𐴒𐴞𐴘𐴡𐴘 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴅𐴟𐴓𐴝𐴘 𐴔𐴥𐴝𐴐𐴡𐴌 𐴸 𐴱 𐴃𐴝𐴌𐴥𐴞𐴑𐴡𐴃 , 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴔𐴝𐴎𐴤𐴠 𐴓𐴝𐴌𐴥𐴝𐴘 𐴀𐴥𐴡𐴀𐴡𐴕𐴡𐴌 𐴁𐴦𐴝𐴊𐴠 , 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴌𐴝𐴏𐴧𐴝 𐴒𐴤𐴝𐴣𐴄 𐴁𐴡𐴕 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴠 , 𐴃𐴡𐴔𐴥𐴠𐴕𐴏𐴥𐴝 𐴔𐴝𐴚𐴓𐴝𐴛𐴥𐴗𐴠𐴕 , 𐴏𐴥𐴝 𐴑𐴝𐴙𐴚 𐴛𐴝 , 𐴏𐴥𐴝𐴘 𐴋𐴤𐴟𐴚𐴕𐴝 𐴑𐴗𐴥𐴝 𐴏𐴟𐴕 , 𐴔𐴡𐴌𐴥𐴝𐴖𐴡𐴋𐴧𐴞 , 𐴌𐴠𐴕 𐴀𐴡𐴚 𐴔𐴡𐴌𐴝𐴚 , 𐴔𐴥𐴝𐴚𐴒𐴞𐴌𐴥𐴞 𐴌𐴗𐴝 , 𐴏𐴝𐴘𐴝 𐴒𐴤𐴟𐴚 , 𐴔𐴥𐴞𐴀𐴞 𐴄𐴤𐴝𐴙𐴑 , 𐴏𐴥𐴝𐴔 𐴁𐴡𐴓𐴝 , 𐴕𐴠𐴕 𐴏𐴝 𐴊𐴡𐴚 , 𐴉𐴝𐴌𐴝 𐴀𐴞𐴀𐴞𐴕𐴡𐴃𐴧𐴟 𐴑𐴠𐴙𐴏𐴧𐴥𐴟 𐴔𐴝𐴕𐴥𐴟𐴙𐴐𐴢 𐴔𐴝𐴘𐴧𐴝 𐴔𐴡𐴌𐴡𐴊 𐴀𐴥𐴡𐴑𐴧𐴡𐴓 𐴉𐴝𐴌𐴝 𐴏𐴥𐴝𐴌𐴞 𐴒𐴞𐴘𐴡𐴘 𐴱𐴱

𐴀𐴠𐴕𐴋𐴞𐴓𐴧𐴝 𐴉𐴝𐴌𐴝 𐴏𐴥𐴝𐴌𐴞 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴔𐴝𐴕𐴥𐴟𐴙𐴐𐴢 𐴊𐴞𐴕𐴥𐴡𐴌 𐴃𐴤𐴟 𐴊𐴞𐴕𐴠 𐴁𐴝𐴌𐴥𐴝𐴃 𐴀𐴝𐴏𐴥𐴠 , 𐴌𐴝𐴏𐴧𐴝 𐴒𐴤𐴝𐴣𐴄 𐴁𐴡𐴕 𐴒𐴡𐴌𐴥𐴞 𐴊𐴞𐴀𐴞 , 𐴔𐴟𐴄𐴤𐴠 𐴀𐴟𐴊𐴧𐴤𐴝 𐴈𐴥𐴝𐴕𐴝𐴌 𐴌𐴡𐴐𐴤𐴡𐴃 𐴀𐴝𐴕𐴥𐴞𐴁𐴤𐴝𐴌 𐴀𐴠𐴅𐴝𐴎𐴡𐴃 𐴕𐴥𐴝𐴘 , 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴃 𐴀𐴝𐴏𐴥𐴠𐴊𐴠 𐴀𐴠𐴒𐴝𐴕𐴝 𐴒𐴟𐴐𐴧𐴤𐴞𐴌 𐴒𐴤𐴡𐴌𐴡𐴃 𐴎𐴝𐴘 , 𐴃𐴦𐴡𐴙𐴃𐴧𐴝 𐴃𐴤𐴝𐴑𐴡𐴀𐴡𐴙𐴕𐴧𐴝 𐴔𐴝𐴕𐴥𐴟𐴙𐴐𐴢 𐴁𐴠𐴐𐴤𐴞 𐴁𐴝𐴌𐴥𐴞 𐴎𐴝𐴀𐴝𐴌 𐴒𐴤𐴡𐴘 𐴁𐴡𐴓𐴞 , 𐴔𐴝𐴚𐴓𐴝 𐴛𐴥𐴗𐴠𐴕 𐴉𐴝𐴌𐴝𐴌 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

𐴑𐴞𐴌𐴞𐴔 𐴆𐴤𐴙𐴡𐴚 𐴴 𐴲 𐴓𐴡𐴔𐴁𐴤𐴡𐴌 𐴒𐴠𐴙𐴄 𐴁𐴝𐴀𐴝𐴘 𐴀𐴝𐴀𐴝 𐴎𐴝𐴀𐴝 𐴁𐴡𐴕 𐴒𐴡𐴌𐴥𐴞 𐴊𐴡𐴀𐴡𐴕𐴠 , 𐴈𐴥𐴝𐴕𐴝𐴌 𐴌𐴡𐴐𐴤𐴡𐴃 𐴉𐴥𐴟𐴌𐴥𐴝𐴘 𐴎𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 , 𐴔𐴡𐴚𐴋𐴤𐴟 𐴎𐴝𐴘𐴁𐴡𐴓𐴧𐴥𐴝 𐴓𐴝𐴔𐴞 𐴀𐴝𐴘𐴧𐴥𐴠𐴌𐴊𐴧𐴠 𐴔𐴝𐴙𐴕𐴐𐴤𐴡𐴌𐴠 , 𐴴 𐴲 𐴓𐴡𐴔𐴁𐴤𐴡𐴌 𐴒𐴠𐴙𐴄 𐴁𐴝𐴀𐴝𐴘 𐴓𐴝𐴔𐴞 𐴀𐴝𐴘𐴃𐴤𐴡 𐴊𐴠𐴀𐴠 , 𐴔𐴡𐴕𐴃𐴡𐴌 𐴌𐴠𐴕 𐴀𐴡𐴚 𐴁𐴡𐴌𐴝𐴚 𐴉𐴝𐴌𐴝𐴌 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴡𐴌𐴥𐴠 , 𐴔𐴡𐴚𐴋𐴤𐴟𐴌 𐴋𐴝𐴑𐴄𐴡𐴌 𐴈𐴥𐴝𐴕𐴝𐴃𐴧𐴟 𐴀𐴝𐴘𐴧𐴠𐴌𐴊𐴧𐴠 𐴈𐴝𐴁𐴡𐴏𐴢 𐴉𐴡𐴕𐴧𐴝 𐴊𐴠𐴈𐴥𐴝𐴘 𐴁𐴦𐴝𐴊𐴠 𐴘𐴥𐴡 , 𐴑𐴞𐴌𐴞𐴔 𐴆𐴤𐴙𐴡𐴚 𐴴 𐴲 𐴓𐴡𐴔𐴁𐴤𐴡𐴌 𐴒𐴠𐴙𐴄 𐴁𐴝𐴀𐴝𐴘 𐴖𐴡𐴌 𐴔𐴞𐴑𐴧𐴤𐴙𐴝 𐴎𐴝𐴘𐴃𐴡 𐴕𐴥𐴡 𐴊𐴠𐴀𐴠 𐴁𐴡𐴓𐴞 𐴘𐴥𐴡 𐴔𐴝𐴕𐴥𐴟𐴙𐴐𐴢 𐴀𐴥𐴞𐴁𐴤𐴝 𐴘𐴠 𐴈𐴡𐴘𐴧𐴠 𐴱𐴱

𐴅𐴟𐴓𐴝𐴘 𐴔𐴥𐴝𐴐𐴡𐴌 𐴸 𐴱 𐴃𐴝𐴌𐴥𐴞𐴑𐴡𐴃 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 , 𐴔𐴡𐴌𐴥𐴝 𐴖𐴡𐴋𐴧𐴞 𐴉𐴝𐴌𐴝𐴌 𐴈𐴝𐴣𐴏𐴥𐴠 , 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴦𐴝𐴙𐴕 𐴁𐴟𐴔 𐴉𐴥𐴞𐴄 𐴒𐴡𐴌𐴥𐴞 𐴓𐴝𐴌𐴥𐴝𐴘𐴃 𐴔𐴝𐴎𐴤𐴠 , 𐴔𐴠𐴓𐴠𐴄𐴠𐴌𐴞𐴌 𐴒𐴝𐴌𐴥𐴞 𐴉𐴥𐴟𐴍𐴞 𐴔𐴠𐴓𐴠𐴄𐴠𐴌𐴞 𐴰 𐴲 𐴎𐴡𐴕 𐴔𐴡𐴌𐴞 𐴒𐴞𐴘𐴡𐴘 𐴀𐴝𐴌 𐴴 𐴱 𐴎𐴡𐴕 𐴊𐴤𐴡𐴌𐴝 𐴉𐴡𐴌𐴞 𐴒𐴞𐴘𐴡𐴘 , 𐴀𐴥𐴠 𐴓𐴝𐴌𐴥𐴝𐴘 𐴁𐴦𐴝𐴊𐴠 𐴓𐴡𐴃𐴞 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴔𐴝𐴙𐴕𐴐𐴤𐴡𐴌 𐴀𐴝𐴀𐴝 𐴎𐴝𐴀𐴝 , 𐴈𐴥𐴝𐴕𐴝𐴌 𐴌𐴡𐴐𐴤𐴡𐴃 𐴓𐴡𐴘 𐴎𐴝𐴀𐴝 𐴔𐴠𐴓𐴠𐴄𐴠𐴌𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴊𐴞𐴘𐴠 𐴱𐴱

Sources : burmese.dvb