𐴂𐴥𐴠𐴒𐴤𐴟 𐴋𐴞𐴐𐴄𐴤𐴞𐴑𐴡𐴃 𐴰 𐴳 𐴎𐴡𐴕 𐴔𐴟𐴏𐴡𐴓𐴔𐴝𐴕 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴀𐴠𐴑 𐴈𐴥𐴡𐴁𐴤𐴡𐴌𐴡𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴂𐴥𐴠𐴒𐴤𐴟 𐴋𐴞𐴐𐴄𐴤𐴞𐴑𐴡𐴌 𐴂𐴝𐴋𐴡𐴚 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴃𐴧𐴟 , 𐴅𐴟𐴓𐴝𐴘 𐴔𐴥𐴝𐴐𐴡𐴌 𐴲 𐴲 𐴃𐴝𐴌𐴥𐴞𐴑𐴡𐴃 , 𐴏𐴥𐴡 𐴏𐴝𐴁𐴟𐴃 𐴏𐴥𐴝𐴌𐴝 𐴈𐴡𐴔𐴡𐴃 𐴰 𐴳 𐴎𐴡𐴕 𐴔𐴟𐴏𐴡𐴓𐴔𐴝𐴕 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 , 𐴀𐴥𐴟𐴀𐴟𐴕𐴡𐴌 𐴁𐴝𐴀𐴝𐴌𐴠 𐴀𐴝𐴌𐴀𐴥𐴡 𐴸 𐴱 𐴎𐴡𐴕 𐴁𐴠𐴍𐴞𐴘𐴝𐴙𐴕 𐴋𐴝𐴀𐴝𐴘 𐴀𐴥𐴞𐴁𐴤𐴝𐴃 𐴔𐴞𐴘𐴝𐴘 𐴊𐴞𐴘𐴝 𐴒𐴞𐴘𐴠 𐴱𐴱

𐴀𐴥𐴞𐴃𐴝𐴌𐴝 𐴀𐴠𐴑𐴧𐴤𐴝𐴕 𐴄𐴠𐴌𐴝𐴑 𐴒𐴝𐴌𐴥𐴞 𐴓𐴡𐴘 𐴀𐴝𐴌𐴑𐴝𐴕𐴡𐴃𐴧𐴟 , 𐴔𐴦𐴠𐴙𐴕 𐴁𐴡𐴌𐴔𐴥𐴝𐴌 𐴁𐴤𐴟𐴃𐴡𐴌𐴠 𐴒𐴤𐴡𐴓𐴠𐴌 𐴒𐴤𐴡𐴘𐴊𐴠 𐴐𐴤𐴡𐴣𐴀𐴡𐴃 𐴁𐴤𐴟𐴉 𐴏𐴠𐴑 𐴂𐴗𐴝𐴙𐴕𐴄𐴡𐴃 , 𐴈𐴡𐴀𐴠𐴑 𐴋𐴞𐴂𐴝𐴌𐴔𐴥𐴠𐴕 𐴔𐴞𐴓𐴞 𐴏𐴠𐴑 𐴒𐴡𐴌𐴥𐴠𐴌𐴊𐴧𐴠 𐴏𐴠𐴑𐴡𐴃 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 , 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕 𐴄𐴠𐴌𐴝𐴑 𐴒𐴝𐴌𐴥𐴞𐴌 𐴁𐴤𐴟𐴃𐴡𐴌𐴠 , 𐴕𐴞𐴎𐴠 𐴕𐴞𐴎𐴠 𐴓𐴟𐴖𐴝𐴘 𐴁𐴤𐴡𐴓𐴧𐴝 𐴏𐴠𐴐𐴃𐴝 𐴒𐴡𐴙𐴅𐴧𐴤𐴙𐴠 𐴱𐴱

𐴔𐴡𐴕𐴃𐴡𐴌 𐴀𐴥𐴟 𐴆𐴞𐴄 𐴂𐴞𐴕 𐴁𐴟𐴄𐴠𐴑 𐴁𐴞𐴌𐴞𐴅 𐴒𐴦𐴠𐴙𐴄 𐴏𐴠𐴑 𐴂𐴗𐴝𐴙𐴕𐴄𐴤𐴡𐴃 , 𐴋𐴞𐴘𐴟𐴄𐴞𐴃 𐴀𐴝𐴏𐴥𐴠𐴊𐴠 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴁𐴞𐴏𐴑𐴤𐴝𐴘 𐴃𐴟𐴖𐴝𐴘 𐴁𐴝𐴀𐴝𐴙𐴌 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴠 , 𐴀𐴠𐴈𐴥𐴡𐴕 𐴀𐴥𐴞𐴃𐴝𐴌𐴝𐴌𐴥𐴠 𐴀𐴥𐴟 𐴆𐴞𐴄 𐴂𐴞𐴕 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 𐴁𐴡𐴓𐴞 , 𐴊𐴠𐴐𐴤𐴡𐴙𐴃𐴧𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕 𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴌 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌𐴃𐴧𐴟 𐴀𐴝𐴘𐴧𐴥𐴠𐴌 𐴁𐴡𐴓𐴞 𐴌𐴠𐴂𐴟𐴄𐴡𐴃 𐴈𐴡𐴘𐴧𐴠 , 𐴅𐴟𐴕 𐴔𐴥𐴝𐴐𐴡𐴌 𐴸 𐴲 𐴃𐴝𐴌𐴥𐴞𐴑𐴡𐴃 𐴔𐴝𐴎𐴤𐴠 𐴘𐴥𐴡 , 𐴂𐴥𐴠𐴒𐴤𐴟 𐴋𐴞𐴐𐴄𐴤𐴞𐴑𐴡𐴌 𐴂𐴙𐴠 𐴀𐴠𐴓𐴝𐴑𐴝𐴌 𐴂𐴝𐴋𐴡𐴚 𐴐𐴤𐴡𐴀𐴡𐴌𐴡𐴃𐴧𐴟 , 𐴔𐴞𐴘𐴝𐴊 𐴏𐴥𐴝𐴌𐴝 𐴏𐴥𐴝𐴁𐴟𐴃 𐴓𐴡𐴘 𐴏𐴥𐴡𐴉𐴡𐴌 𐴒𐴡𐴌𐴥𐴠𐴌𐴊𐴧𐴠 , 𐴀𐴠𐴑 𐴎𐴡𐴕 𐴁𐴠𐴍𐴞 𐴐𐴤𐴡𐴣𐴀𐴡 𐴉𐴝𐴣𐴏𐴢 𐴎𐴡𐴕 𐴔𐴟𐴏𐴡𐴓𐴔𐴝𐴕 𐴊𐴤𐴡𐴌𐴝 𐴉𐴡𐴅𐴧𐴤𐴞𐴀𐴞𐴓 𐴱𐴱

𐴀𐴥𐴠 𐴉𐴝𐴣𐴏𐴢 𐴎𐴡𐴕 𐴔𐴟𐴏𐴡𐴓𐴔𐴝𐴕𐴡𐴌 𐴁𐴤𐴟𐴃𐴡𐴌𐴃𐴧𐴟 𐴃𐴞𐴕 𐴎𐴡𐴕 , 𐴁𐴝𐴚𐴓𐴝𐴊𐴠𐴐𐴢 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴎𐴝𐴇𐴝𐴏𐴟𐴌𐴝 𐴀𐴝𐴌 𐴇𐴝𐴎𐴠𐴀𐴡𐴚 𐴉𐴝𐴌𐴝𐴌𐴃𐴧𐴟 𐴀𐴝𐴘𐴧𐴥𐴠𐴌𐴊𐴧𐴠 , 𐴁𐴝𐴑𐴞 𐴊𐴟𐴘 𐴎𐴡𐴕 𐴁𐴝𐴚𐴓𐴝𐴊𐴠𐴐𐴢 𐴓𐴡𐴘 𐴐𐴤𐴞𐴔𐴝𐴃 𐴀𐴝𐴏𐴥𐴠𐴊𐴠 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴱𐴱

Sources : narinjara.com