𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴎𐴝𐴓𐴞 𐴀𐴠𐴕 𐴀𐴝𐴘 𐴋𐴞 – 𐴓𐴝𐴘𐴏𐴥𐴠𐴕 𐴁𐴡𐴕𐴠𐴌 , 𐴵 𐴎𐴡𐴕 𐴒𐴠𐴌𐴠𐴉𐴃𐴝𐴌 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴀𐴟𐴑𐴤𐴞𐴘𐴝 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴎𐴝𐴓𐴞 𐴎𐴝𐴃𐴞𐴘𐴡 𐴏𐴞𐴕𐴧𐴡 𐴀𐴠𐴕 𐴀𐴝𐴘 𐴋𐴞 ( 𐴑𐴦𐴝𐴋 ) , 𐴋𐴠𐴌𐴝𐴘𐴁𐴤𐴞𐴚 𐴓𐴝𐴘𐴏𐴥𐴠𐴕 𐴀𐴝𐴌 𐴁𐴞𐴁𐴤𐴞𐴕𐴧𐴡 𐴎𐴝𐴓𐴞 𐴏𐴥𐴡𐴕𐴡𐴃 𐴉𐴡𐴃𐴧𐴡𐴌𐴡 𐴁𐴝𐴕𐴝𐴌𐴊𐴧𐴠 , 𐴏𐴥𐴝𐴔𐴝𐴕 𐴐𐴤𐴡𐴣𐴀𐴡 𐴉𐴝𐴣𐴏𐴢 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 , ( 𐴀𐴠 𐴂𐴞 𐴁𐴞 𐴀𐴠𐴕 ) 𐴀𐴥𐴝𐴣𐴃𐴞𐴘𐴝𐴌𐴞 𐴉𐴟𐴓𐴞𐴐𐴢 𐴁𐴠𐴄𐴤𐴠𐴓𐴞𐴘𐴠𐴕𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴁𐴟𐴙𐴃 𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 𐴀𐴡𐴕𐴟𐴔𐴝𐴕𐴞𐴑 𐴷 𐴁𐴝𐴎𐴠 𐴀𐴟𐴑𐴤𐴞𐴘𐴝 𐴓𐴝𐴔𐴁𐴝 𐴐𐴤𐴞𐴘𐴝 , 𐴀𐴠𐴑 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔𐴡𐴃 𐴃𐴤𐴝𐴑𐴠𐴊𐴠 𐴀𐴝𐴁𐴊𐴟𐴓𐴧𐴝𐴇𐴢 𐴕𐴝𐴔𐴞 , 𐴀𐴠𐴑 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝𐴌 𐴒𐴤𐴡𐴌𐴡𐴃𐴧𐴟 𐴀𐴥𐴞𐴃𐴝𐴌𐴝𐴌𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴁𐴡𐴕 𐴀𐴥𐴡𐴘𐴧𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕 𐴀𐴥𐴡𐴙𐴓𐴊𐴠 , 𐴔𐴟𐴇𐴝𐴔𐴧𐴡𐴊 𐴀𐴝𐴁𐴊𐴟𐴓𐴧𐴇𐴢 𐴁𐴡𐴐𐴢 𐴷 𐴳 𐴁𐴡𐴏𐴥𐴡𐴌 , 𐴀𐴝𐴁𐴟𐴓 𐴈𐴝𐴙𐴌 𐴁𐴡𐴐𐴢 𐴸 𐴱 𐴁𐴡𐴏𐴥𐴡𐴌 , 𐴔𐴟𐴇𐴝𐴔𐴧𐴡𐴊 𐴀𐴞𐴏𐴔𐴝𐴀𐴞𐴓 𐴁𐴡𐴐𐴢 𐴵 𐴴 𐴁𐴡𐴏𐴥𐴡𐴌 , 𐴔𐴟𐴇𐴝𐴔𐴧𐴡𐴊 𐴃𐴡𐴓𐴇𐴥𐴝 𐴁𐴡𐴐𐴢 𐴰 𐴶 𐴁𐴡𐴏𐴥𐴡𐴌 , 𐴔𐴟𐴇𐴝𐴔𐴧𐴡𐴊 𐴇𐴝𐴌𐴟𐴕 𐴁𐴡𐴐𐴢 𐴶 𐴳 𐴁𐴡𐴏𐴥𐴡𐴌 𐴱𐴱

𐴀𐴝𐴣𐴐𐴄𐴡 𐴓𐴡𐴔𐴁𐴤𐴡𐴌 𐴀𐴥𐴝𐴣𐴃𐴞𐴘𐴝𐴌𐴞 𐴉𐴟𐴓𐴞𐴐𐴡𐴌 𐴏𐴟𐴂𐴥𐴝𐴌 𐴎𐴞𐴔𐴧𐴝𐴊𐴝𐴌 / 𐴑𐴝𐴔𐴌𐴝𐴕 𐴇𐴟𐴏𐴝𐴙𐴕𐴠 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕 𐴏𐴥𐴡𐴀𐴞 𐴁𐴡𐴓𐴞 𐴈𐴡𐴘𐴧𐴠 , 𐴀𐴥𐴞𐴁𐴤𐴝 𐴘𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 ! 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕𐴠 𐴌𐴟𐴇𐴝𐴙𐴚𐴒𐴙𐴝𐴌 𐴒𐴤𐴡𐴌𐴡𐴃 𐴁𐴡𐴀𐴡𐴘 , 𐴑𐴤𐴟𐴂𐴢 𐴁𐴠𐴐𐴤𐴞 𐴄𐴞𐴛𐴝 𐴓𐴡𐴀𐴡𐴘 𐴀𐴡𐴓𐴉𐴡 𐴐𐴤𐴡𐴔𐴡𐴃 𐴔𐴝𐴎𐴤𐴠 , 𐴎𐴝𐴓𐴞 𐴀𐴠𐴕 𐴀𐴝𐴘 𐴋𐴞 𐴑𐴦𐴝𐴋 , 𐴋𐴠𐴌𐴥𐴝𐴘𐴁𐴤𐴞𐴚 𐴓𐴝𐴘𐴏𐴥𐴠𐴕 , 𐴁𐴞𐴁𐴤𐴞𐴕𐴧𐴡 𐴋𐴡𐴀𐴡𐴙𐴓𐴧𐴝 𐴎𐴝𐴓𐴞 𐴏𐴥𐴝𐴁𐴟𐴃 𐴀𐴥𐴡𐴑𐴧𐴡𐴓 𐴁𐴝𐴕𐴝𐴘 𐴀𐴝𐴘𐴧𐴥𐴠𐴌 𐴱𐴱

𐴀𐴠 𐴊𐴤𐴡𐴌𐴡𐴕𐴡𐴌 𐴎𐴝𐴓𐴞 𐴁𐴤𐴟𐴛𐴧𐴝 𐴏𐴥𐴝𐴁𐴟𐴃 𐴀𐴝𐴌 𐴀𐴠𐴕 𐴀𐴝𐴘 𐴋𐴞 𐴑𐴦𐴝𐴋 𐴁𐴡𐴕𐴠𐴌𐴊𐴧𐴠 𐴀𐴥𐴞𐴀𐴞𐴕𐴡𐴌 𐴈𐴥𐴡𐴁𐴡𐴌 𐴉𐴝𐴘 , 𐴀𐴝𐴣𐴀𐴝𐴌𐴝 𐴈𐴥𐴝𐴄𐴞 𐴈𐴥𐴡𐴁𐴡𐴌 𐴓𐴡𐴘𐴁𐴡𐴓𐴧𐴥𐴝 𐴒𐴟𐴌𐴞𐴕𐴊𐴝 𐴀𐴝𐴌𐴀𐴥𐴡 𐴁𐴦𐴠𐴐𐴢 𐴒𐴡𐴌𐴥𐴞 𐴁𐴝𐴌𐴥𐴝𐴘 𐴊𐴞𐴘𐴧𐴥𐴞 , 𐴁𐴦𐴝𐴊𐴠 𐴁𐴟𐴙𐴃 𐴁𐴝𐴌𐴠 𐴑𐴝𐴌𐴖𐴝𐴘 𐴏𐴝𐴓𐴝𐴘 , 𐴀𐴠 𐴏𐴡𐴑𐴧𐴡𐴌𐴡𐴌 𐴉𐴝𐴣𐴏𐴢 𐴀𐴥𐴡 𐴎𐴡𐴕𐴡𐴌𐴥𐴠 𐴊𐴤𐴡𐴌𐴞 𐴉𐴝𐴙𐴓𐴧𐴝𐴔 𐴱𐴱

𐴀𐴥𐴠 𐴐𐴤𐴡𐴔𐴡𐴃 𐴏𐴝𐴙𐴌 𐴒𐴤𐴗𐴝 𐴓𐴠𐴂𐴄𐴤𐴡𐴂𐴢 , 𐴀𐴝𐴣𐴐𐴄𐴡 𐴖𐴥𐴝 𐴀𐴠𐴏𐴔𐴦𐴝𐴄 𐴉𐴟𐴕 ( 𐴔𐴟𐴁𐴦𐴝𐴙𐴓 ) 𐴏𐴝𐴙𐴌 𐴒𐴤𐴗𐴝 𐴂𐴥𐴠𐴕 𐴋𐴠𐴌𐴥𐴝𐴙𐴁 , 𐴊𐴟𐴖𐴧𐴝 𐴀𐴠𐴏𐴑𐴦𐴠𐴙𐴕𐴝𐴌-𐴂𐴞𐴌𐴞𐴕𐴄𐴝𐴌 𐴀𐴝𐴌 𐴏𐴠𐴑 𐴁𐴡𐴀𐴡𐴘 𐴐𐴤𐴡𐴣𐴀𐴡 , 𐴁𐴠𐴐𐴤𐴞 𐴒𐴡𐴌𐴞 𐴎𐴝𐴓𐴞 𐴀𐴠𐴕 𐴀𐴝𐴘 𐴋𐴞 𐴑𐴦𐴝𐴋 , 𐴋𐴠𐴌𐴥𐴝𐴘𐴁𐴤𐴞𐴚 𐴓𐴝𐴘𐴏𐴥𐴠𐴕 , 𐴀𐴝𐴌 𐴁𐴞𐴁𐴤𐴞𐴕𐴧𐴡 𐴎𐴝𐴓𐴞 𐴏𐴥𐴝𐴁𐴟𐴃 𐴀𐴥𐴡𐴑𐴧𐴡𐴓 𐴀𐴥𐴞𐴃𐴝𐴌𐴝𐴌 𐴇𐴥𐴝𐴃𐴡𐴃 𐴉𐴝𐴀𐴝 𐴒𐴞𐴘𐴠 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴀𐴥𐴞𐴁𐴤𐴝 𐴘𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 , 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴀𐴥𐴞𐴃𐴝𐴌𐴝𐴌 𐴁𐴠𐴌𐴟𐴊𐴧𐴤𐴠 𐴔𐴦𐴝𐴔𐴠𐴓𐴝 𐴒𐴡𐴌𐴥𐴝 𐴒𐴞𐴘𐴠 , 𐴀𐴠𐴑𐴀𐴡𐴔𐴥𐴞𐴑 𐴁𐴤𐴝𐴉𐴠 𐴀𐴥𐴞𐴃𐴝𐴌𐴝 𐴐𐴤𐴞𐴑𐴝𐴌 𐴒𐴡𐴙𐴅𐴧𐴤𐴙𐴠𐴊𐴠 ! 𐴁𐴡𐴀𐴡𐴃 𐴊𐴞𐴕 𐴀𐴥𐴡𐴘𐴃𐴠 𐴀𐴥𐴞𐴃𐴝𐴌𐴝 𐴁𐴠𐴀𐴝𐴙𐴕𐴞 𐴃𐴡𐴖𐴌𐴠 𐴁𐴡𐴀𐴡𐴃 𐴌𐴟𐴇𐴝𐴙𐴚𐴒𐴙𐴝 𐴌𐴠 , 𐴎𐴝𐴓𐴞 𐴁𐴝𐴚𐴓𐴝𐴊𐴠𐴐𐴤𐴞 𐴎𐴝𐴃𐴞𐴘𐴡 𐴏𐴞𐴕𐴧𐴡 𐴉𐴡𐴃𐴧𐴡𐴌𐴡 , 𐴎𐴡𐴌𐴔𐴡 𐴕𐴞𐴁𐴡𐴕𐴊𐴡𐴕 𐴀𐴝𐴌 𐴎𐴝𐴓𐴞 𐴂𐴦𐴝𐴏𐴂𐴟𐴄 𐴊𐴞𐴀𐴞 𐴁𐴡𐴀𐴡𐴃 𐴄𐴞𐴛𐴝 𐴈𐴝𐴔𐴝𐴘𐴧𐴠 𐴱𐴱

Sources : Ukhiyanews.com