𐴀𐴝𐴘 𐴏𐴞 𐴅𐴠 𐴀𐴝𐴊𐴝𐴓𐴡𐴃𐴠 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴥𐴞𐴓𐴡𐴌 𐴀𐴝𐴉𐴡𐴃𐴧𐴞𐴌 𐴖𐴡𐴌𐴠 , 𐴅𐴟𐴓𐴝𐴘 𐴔𐴥𐴝𐴐𐴡𐴌 𐴲 𐴲 𐴃𐴝𐴌𐴥𐴞𐴑𐴡𐴃 𐴉𐴥𐴝𐴘𐴏𐴠𐴓𐴝 𐴉𐴥𐴟𐴕𐴝𐴘𐴁𐴡 𐴱𐴱

𐴁𐴡𐴌𐴔𐴥𐴝 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴑𐴡𐴗𐴔𐴡𐴌𐴠 𐴅𐴠𐴕𐴟𐴏𐴥𐴝𐴙𐴋 𐴒𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴀𐴝𐴕𐴡𐴓𐴧𐴝 , 𐴒𐴠𐴔𐴁𐴞𐴘𐴝 𐴘𐴠 (𐴀𐴝𐴘 𐴏𐴞 𐴅𐴠 ) 𐴀𐴝𐴊𐴝𐴓𐴡𐴃𐴡𐴃 𐴁𐴡𐴌𐴔𐴥𐴝𐴌 𐴓𐴧𐴝 𐴔𐴦𐴡𐴊𐴧𐴞𐴔𐴝 𐴑𐴤𐴟𐴙𐴓𐴧𐴙𐴠𐴊𐴠 𐴘𐴥𐴝𐴀𐴝𐴕𐴡𐴃 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴕𐴡𐴔𐴝𐴙𐴕𐴊𐴝𐴌 𐴀𐴝𐴉𐴡𐴃𐴧𐴞𐴌 𐴐𐴤𐴡𐴔𐴧𐴡𐴕𐴊𐴠 , 𐴅𐴟𐴓𐴝𐴘 𐴔𐴥𐴝𐴐𐴡𐴌 𐴲 𐴲 𐴃𐴝𐴌𐴥𐴞𐴑𐴡𐴃 𐴅𐴡𐴐𐴢 𐴀𐴥𐴡𐴑𐴧𐴡𐴓𐴡𐴌 𐴉𐴥𐴝𐴘𐴏𐴠𐴓𐴝 𐴉𐴥𐴟𐴕𐴝𐴘 𐴊𐴞𐴀𐴞𐴁𐴡 𐴁𐴡𐴓𐴞 , 𐴊𐴠𐴐𐴁𐴞𐴊𐴠𐴐𐴤𐴞 𐴀𐴝𐴊𐴝𐴓𐴡𐴃 ( 𐴀𐴝𐴘 𐴏𐴞 𐴅𐴠 ) 𐴘𐴠 𐴅𐴟𐴓𐴝𐴘 𐴔𐴥𐴝𐴐𐴡𐴌 𐴱 𐴱 𐴃𐴝𐴌𐴥𐴞𐴑𐴡𐴃 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴕𐴠𐴊𐴝 𐴓𐴠𐴕 𐴊𐴠𐴐𐴢 , 𐴊𐴞𐴇𐴥𐴠𐴒𐴢 𐴐𐴤𐴡𐴀𐴡𐴌𐴡𐴌 𐴐𐴤𐴝𐴕𐴃𐴞𐴌 𐴎𐴝𐴒𐴝 𐴁𐴡𐴓𐴞 𐴈𐴡𐴀𐴡𐴊𐴠 𐴀𐴝𐴘 𐴏𐴞 𐴅𐴠 𐴀𐴝𐴊𐴝𐴓𐴡𐴃𐴡𐴃, 𐴅𐴟𐴓𐴝𐴘 𐴔𐴥𐴝𐴐𐴡𐴌 𐴲 𐴲 𐴃𐴝𐴌𐴥𐴞𐴑 𐴐𐴤𐴟𐴑𐴧𐴟𐴌 𐴁𐴝𐴌𐴠 , 𐴀𐴥𐴝𐴣𐴎𐴡𐴙𐴕𐴧𐴝 𐴃𐴞𐴕𐴧𐴥𐴗𐴝 𐴁𐴝𐴎𐴠 𐴉𐴥𐴟𐴕𐴝𐴘 𐴊𐴞𐴘𐴝 𐴐𐴤𐴟𐴌𐴟 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 𐴈𐴡𐴘𐴧𐴠 , 𐴅𐴡𐴐𐴢 / 𐴅𐴦𐴡𐴕 𐴋𐴡𐴕𐴡𐴒𐴤𐴟 𐴘𐴠 𐴉𐴥𐴝𐴘𐴏𐴠𐴓𐴝 𐴕𐴝𐴔𐴝 𐴉𐴡𐴌𐴥𐴞 𐴉𐴥𐴟𐴕𐴝𐴘𐴁𐴡 𐴱𐴱

𐴑𐴟𐴁𐴤𐴝𐴙𐴋 𐴁𐴞𐴘𐴝𐴌𐴝𐴔𐴡𐴌 𐴎𐴡𐴌𐴞𐴘𐴝 𐴂𐴝𐴁𐴡𐴕𐴊𐴞 𐴓𐴝𐴒𐴝𐴘 𐴌𐴝𐴙𐴑𐴧𐴤𐴙𐴠𐴊𐴠 𐴀𐴥𐴠𐴃𐴡𐴓𐴧𐴝 , 𐴀𐴥 𐴠 𐴊𐴞𐴕𐴡𐴃 𐴐𐴤𐴟𐴊𐴠 𐴊𐴟𐴕𐴥𐴞 𐴃𐴡𐴌𐴉𐴡𐴌 𐴕𐴡𐴔𐴝𐴙𐴕𐴊𐴝 𐴀𐴝𐴌 𐴅𐴡𐴐𐴢 𐴀𐴥𐴡𐴑𐴧𐴡𐴓 , 𐴈𐴝𐴣𐴏𐴝𐴌𐴞𐴌 𐴀𐴝𐴔𐴓𐴝 𐴀𐴥𐴡𐴑𐴧𐴡𐴓 , 𐴀𐴠𐴅𐴝𐴎𐴡𐴃 𐴉𐴝𐴘𐴧𐴝 𐴑𐴠𐴙𐴏𐴧𐴥𐴟 𐴔𐴞𐴋𐴞𐴘𐴝 𐴇𐴥𐴝𐴎𐴞𐴌 𐴀𐴥𐴡𐴘𐴁𐴝𐴌 𐴀𐴠𐴅𐴝𐴎𐴡𐴃 𐴀𐴝𐴏𐴥𐴠𐴊𐴠 , 𐴁𐴠𐴐𐴤𐴞 𐴔𐴝𐴕𐴥𐴟𐴙𐴐𐴢 𐴇𐴥𐴝𐴎𐴞𐴌 𐴀𐴥𐴡𐴀𐴡𐴕 𐴔𐴝𐴕𐴥𐴝 𐴒𐴡𐴌𐴥𐴞 𐴊𐴞𐴘𐴝 𐴒𐴞𐴘𐴠 𐴱𐴱

𐴊𐴠𐴐𐴁𐴞𐴊𐴠𐴐𐴤𐴞 ( 𐴀𐴝𐴘 𐴏𐴞 𐴅𐴠 ) 𐴀𐴝𐴊𐴝𐴓𐴡𐴃𐴡𐴃𐴧𐴤𐴟 , 𐴒𐴠𐴔𐴁𐴞𐴘𐴝 𐴘𐴠 𐴒𐴡𐴙𐴅𐴧𐴤𐴙𐴠𐴊𐴠 𐴔𐴦𐴡𐴊𐴧𐴞𐴔𐴝 𐴘𐴥𐴝𐴀𐴝𐴕 𐴉𐴥𐴝𐴘𐴏𐴠𐴓𐴝 𐴒𐴡𐴌𐴥𐴞𐴁𐴤𐴝𐴌 𐴀𐴠𐴑𐴃𐴞𐴘𐴝𐴌 𐴕𐴥𐴝𐴘 𐴁𐴡𐴓𐴞 𐴈𐴡𐴀𐴡𐴘 , 𐴒𐴡𐴃𐴡 𐴉𐴥𐴠𐴌𐴖𐴝𐴌𐴞 𐴔𐴥𐴝𐴐𐴡𐴌 𐴵 𐴲 𐴃𐴝𐴌𐴥𐴞𐴑𐴡𐴌 𐴉𐴥𐴟𐴕𐴝𐴕𐴞𐴃 , 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴕𐴡𐴔𐴝𐴙𐴕𐴊𐴝 𐴘𐴠 𐴀𐴝𐴉𐴡𐴃𐴧𐴞 𐴒𐴡𐴙𐴅𐴧𐴞𐴀𐴞𐴓 𐴱𐴱

𐴁𐴡𐴌𐴔𐴥𐴝𐴌 𐴓𐴧𐴝 𐴔𐴦𐴡𐴊𐴧𐴞𐴔𐴝 𐴑𐴤𐴟𐴓𐴞𐴁𐴡𐴓𐴧𐴝 , 𐴔𐴟𐴏𐴡𐴓𐴔𐴝𐴕 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌 𐴃𐴡𐴕𐴎𐴞𐴔 ( 𐴀𐴡 𐴀𐴝𐴘 𐴏𐴞 ) 𐴘𐴠 , 𐴒𐴠𐴔𐴁𐴞𐴘𐴝 𐴌𐴥𐴠 𐴃𐴤𐴞𐴘𐴝 𐴒𐴡𐴌𐴥𐴝𐴘 𐴁𐴦𐴝𐴊𐴠 , 𐴹 𐴱 𐴰 𐴲 𐴅𐴟𐴓𐴝𐴘 𐴔𐴥𐴝𐴐𐴡𐴃 𐴒𐴠𐴔𐴁𐴞𐴘𐴝𐴌 𐴂𐴝𐴓𐴞𐴔𐴠𐴕𐴠 𐴉𐴝𐴑𐴧𐴝 𐴈𐴥𐴝𐴄𐴞 𐴒𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴀𐴝𐴕 , 𐴑𐴠𐴙𐴏𐴢 𐴘𐴝𐴀𐴝𐴕𐴡𐴌 𐴁𐴝𐴁𐴡𐴃𐴠 𐴈𐴥𐴡𐴏𐴧𐴝 𐴁𐴠𐴒𐴧𐴤𐴞𐴕 𐴀𐴡 𐴀𐴝𐴘 𐴏𐴞 𐴘𐴠 𐴊𐴠𐴀𐴠𐴌𐴊𐴧𐴠 𐴕𐴡𐴀𐴡𐴘 𐴁𐴡𐴓𐴞 , 𐴒𐴠𐴔𐴁𐴞𐴘𐴝 𐴘𐴠 𐴈𐴡𐴀𐴡𐴘 𐴕𐴡 𐴉𐴝𐴌𐴥𐴞𐴁𐴤𐴡𐴊𐴠 𐴘𐴝𐴀𐴝𐴕 , 𐴀𐴠𐴑 𐴊𐴠𐴐𐴤𐴠 𐴀𐴝𐴌𐴀𐴠𐴑 𐴊𐴠𐴐𐴤𐴡𐴓𐴧𐴝 𐴔𐴦𐴡𐴊𐴧𐴞𐴔𐴝 𐴒𐴡𐴌𐴥𐴠𐴊𐴠 𐴘𐴝𐴀𐴝𐴕 𐴐𐴤𐴟𐴊𐴠 𐴀𐴝𐴘 𐴏𐴞 𐴅𐴠 𐴘𐴠 𐴉𐴥𐴟𐴕𐴞 𐴃𐴡𐴊𐴝𐴌𐴟𐴑 𐴒𐴡𐴌𐴥𐴞 𐴉𐴝𐴌𐴞𐴁𐴤𐴡𐴊𐴠 , 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌 𐴃𐴡𐴕𐴎𐴞𐴔𐴠 𐴀𐴝𐴌𐴀𐴠𐴑𐴧𐴝𐴕 𐴊𐴠𐴐𐴤𐴡𐴓𐴧𐴝 𐴒𐴡𐴌𐴥𐴠𐴊𐴠 𐴔𐴦𐴡𐴊𐴧𐴞𐴔𐴝 𐴒𐴡𐴏𐴥𐴞 𐴓𐴡𐴘 𐴃𐴡𐴊𐴝𐴌𐴟𐴑 𐴀𐴞𐴕𐴑𐴟𐴖𐴝𐴌𐴞 𐴒𐴡𐴌𐴥𐴞𐴁𐴤𐴝𐴌 𐴇𐴥𐴡𐴑 𐴀𐴝𐴘 𐴏𐴞 𐴅𐴠 𐴀𐴝𐴊𐴝𐴓𐴡𐴃𐴡𐴃𐴧𐴤𐴟 𐴕𐴥𐴝𐴘 𐴁𐴡𐴓𐴞 , 𐴁𐴡𐴌𐴔𐴥𐴝𐴌 𐴑𐴠𐴌𐴝𐴘𐴝 𐴒𐴡𐴙𐴅𐴧𐴤𐴙𐴝 𐴀𐴟𐴑𐴞𐴓 / 𐴑𐴠𐴌𐴠𐴏𐴄𐴟𐴉𐴝𐴌 𐴀𐴠𐴏𐴄𐴠𐴑𐴝𐴌𐴠 𐴊𐴡𐴌𐴈𐴥𐴝𐴏𐴡𐴃 𐴓𐴠𐴑𐴤𐴞 𐴀𐴝𐴉𐴡𐴃𐴧𐴞 𐴒𐴡𐴙𐴅𐴧𐴤𐴞𐴀𐴞𐴓 𐴱𐴱

Sources : RFAburmese