𐴔𐴡𐴌𐴥𐴡𐴑 𐴀𐴥𐴟 𐴐𐴤𐴡𐴀𐴡𐴌𐴡𐴃 𐴔𐴦𐴝𐴙𐴕 𐴁𐴟𐴔 𐴉𐴥𐴟𐴍𐴞 𐴏𐴝𐴙𐴌 𐴎𐴡𐴕 𐴔𐴟𐴏𐴡𐴓𐴔𐴝𐴕𐴡𐴌 𐴉𐴟𐴖𐴝𐴙𐴕 𐴒𐴤𐴝𐴙𐴓 𐴀𐴥𐴡𐴘𐴧𐴠 ; 𐴊𐴟𐴘 𐴎𐴡𐴕 𐴔𐴡𐴌𐴞 𐴒𐴞𐴘𐴥𐴡𐴘 , 𐴀𐴝𐴌𐴑𐴝𐴕𐴡𐴃 𐴀𐴝𐴣𐴐𐴄𐴡 𐴊𐴞𐴕𐴡𐴌 𐴁𐴤𐴟𐴃𐴡𐴌𐴠 𐴔𐴦𐴝𐴙𐴕 𐴉𐴥𐴟𐴍𐴞 𐴉𐴝𐴣𐴏𐴢 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴔𐴡𐴌𐴥𐴡𐴑 𐴀𐴥𐴟 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴌 𐴂𐴡𐴗𐴚 𐴄𐴤𐴡 𐴕𐴟𐴖𐴝 𐴉𐴝𐴌𐴝𐴃 , 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴊𐴦𐴟𐴛𐴅𐴧𐴙𐴝 𐴔𐴦𐴝𐴙𐴕 𐴁𐴟𐴔 𐴀𐴟𐴒𐴧𐴤𐴗𐴝 𐴉𐴥𐴟𐴍𐴞 𐴏𐴝𐴙𐴌 𐴎𐴡𐴕 𐴔𐴟𐴏𐴡𐴓𐴔𐴝𐴕𐴡𐴌 𐴉𐴟𐴖𐴝𐴙𐴕 𐴒𐴤𐴝𐴙𐴓 𐴀𐴥𐴡𐴘𐴧𐴠 , 𐴏𐴝𐴙𐴌 𐴎𐴡𐴕𐴡𐴌 𐴁𐴤𐴟𐴃𐴡𐴌𐴃𐴧𐴟 𐴊𐴟𐴘 𐴎𐴡𐴕𐴡𐴌 𐴎𐴡𐴈𐴥𐴡𐴔 𐴁𐴠𐴐𐴤𐴞 𐴈𐴥𐴃𐴡𐴌𐴝 𐴀𐴥𐴡𐴀𐴡𐴕𐴠 , 𐴊𐴟𐴕𐴥𐴞 𐴎𐴡𐴕𐴡𐴌𐴠 𐴇𐴥𐴝𐴐𐴉𐴝𐴃𐴝𐴓𐴡𐴃 𐴁𐴤𐴡𐴃𐴧𐴞 𐴒𐴡𐴌𐴥𐴝𐴘𐴧𐴠 𐴁𐴡𐴓𐴞 , 𐴐𐴤𐴡𐴔𐴝𐴎𐴤𐴑 𐴈𐴝𐴔 𐴒𐴡𐴌𐴥𐴡𐴙𐴕𐴧𐴝 / 𐴀𐴝𐴔𐴝𐴕 𐴃𐴝𐴌 𐴅𐴤𐴞 𐴘𐴠 𐴈𐴡𐴘𐴧𐴠 𐴱𐴱

𐴉𐴟𐴖𐴝𐴙𐴕 𐴀𐴥𐴟𐴀𐴟𐴕𐴠 𐴑𐴤𐴞𐴓𐴥𐴡𐴃 𐴒𐴡𐴌𐴟 𐴏𐴡𐴌𐴝𐴌𐴊𐴧𐴠 𐴐𐴤𐴡𐴣𐴀𐴡𐴃 , 𐴅𐴟𐴓𐴝𐴘 𐴔𐴥𐴝𐴐𐴡𐴌 𐴸 𐴃𐴝𐴌𐴥𐴞𐴑𐴡𐴃 𐴊𐴦𐴟𐴛𐴅𐴧𐴙𐴝 𐴰 𐴳 : 𐴲 𐴱 𐴁𐴝𐴎𐴠 𐴔𐴦𐴝𐴙𐴕 𐴁𐴟𐴔 𐴉𐴥𐴟𐴙𐴄𐴧𐴙𐴠 𐴊𐴠 , 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴉𐴟𐴖𐴝𐴙𐴕 𐴀𐴥𐴟𐴀𐴟𐴕 𐴀𐴥𐴡𐴙𐴓𐴊𐴠 , 𐴔𐴟𐴐𐴝𐴌𐴝𐴑 𐴁𐴡𐴐𐴢 𐴴 𐴱 𐴁𐴡𐴏𐴥𐴡𐴌 , 𐴐𐴤𐴡𐴔𐴏𐴟𐴓 𐴀𐴝𐴓𐴡𐴔 𐴁𐴡𐴐𐴢 𐴶 𐴱 𐴁𐴡𐴏𐴥𐴡𐴌 , 𐴔𐴟𐴇𐴝𐴔𐴧𐴡𐴊 𐴀𐴝𐴊𐴠𐴑 𐴁𐴡𐴐𐴢 𐴳 𐴱 𐴁𐴡𐴏𐴥𐴡𐴌 𐴀𐴝𐴌 𐴇𐴟𐴔𐴝𐴘𐴟𐴕 𐴏𐴝𐴋𐴞𐴑 𐴁𐴡𐴐𐴢 𐴳 𐴱 𐴁𐴡𐴏𐴥𐴡𐴌 𐴱𐴱

𐴔𐴟𐴐𐴝𐴌𐴝𐴑𐴡𐴌 𐴋𐴠𐴕 𐴄𐴤𐴠𐴚𐴡𐴃 𐴎𐴡𐴈𐴥𐴡𐴔 𐴁𐴠𐴐𐴤𐴞 𐴈𐴥𐴡𐴃𐴡𐴌𐴝 𐴀𐴥𐴡𐴀𐴡𐴕𐴠 , 𐴀𐴥𐴠𐴕𐴋𐴞𐴓𐴧𐴝 𐴁𐴠𐴐𐴤𐴞 𐴎𐴡𐴈𐴥𐴡𐴔 𐴀𐴡𐴓𐴝 𐴀𐴝𐴌𐴀𐴥𐴡 𐴀𐴠𐴑𐴎𐴡𐴕 , 𐴊𐴟𐴕𐴥𐴞 𐴎𐴡𐴕𐴡𐴌𐴠 𐴔𐴙𐴥𐴡𐴚 𐴁𐴗𐴠𐴌 𐴑𐴤𐴡𐴄𐴠𐴅 𐴇𐴥𐴝𐴐𐴉𐴝𐴃𐴝𐴓𐴡𐴃 𐴁𐴤𐴡𐴃𐴧𐴞 𐴒𐴡𐴌𐴥𐴝𐴘𐴧𐴠 𐴁𐴡𐴓𐴞 , 𐴇𐴥𐴝𐴐𐴉𐴝𐴃𐴝𐴓𐴡𐴃 𐴏𐴝𐴘𐴃𐴤𐴡 𐴒𐴞𐴘𐴠𐴊𐴠 𐴐𐴤𐴡𐴔𐴝𐴎𐴞𐴑 𐴈𐴝𐴔 𐴒𐴡𐴌𐴥𐴡𐴙𐴕𐴧𐴝 𐴀𐴥𐴞𐴁𐴤𐴝 𐴘𐴠 𐴈𐴡𐴘𐴧𐴠 𐴱𐴱

𐴀𐴥𐴠 𐴀𐴠𐴓𐴝𐴑𐴝𐴃 𐴈𐴡𐴀𐴠𐴑 𐴊𐴞𐴕𐴡𐴌 𐴁𐴤𐴟𐴃𐴡𐴌𐴠 𐴑𐴤𐴟𐴁 𐴔𐴝𐴌𐴡𐴃𐴧𐴡𐴁 𐴁𐴤𐴝𐴉𐴠 𐴔𐴦𐴝𐴙𐴕 𐴁𐴟𐴔 𐴉𐴥𐴟𐴍𐴡𐴀𐴡𐴕𐴠 𐴊𐴟𐴘 𐴎𐴡𐴕 𐴔𐴡𐴌𐴞 𐴒𐴞𐴘𐴥𐴡𐴘 , 𐴉𐴝𐴣𐴏𐴢 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴘𐴧𐴠 , 𐴅𐴟𐴓𐴝𐴘 𐴔𐴥𐴝𐴐𐴡𐴌 𐴴 𐴃𐴝𐴌𐴥𐴞𐴑𐴡𐴃 𐴑𐴙𐴡𐴑 𐴄𐴡 𐴀𐴠𐴓𐴝𐴑𐴝𐴌 𐴔𐴙𐴝𐴓𐴞 𐴑𐴝𐴕 𐴉𐴝𐴌𐴝𐴌 / 𐴓𐴥𐴝 𐴔𐴡𐴗𐴚 𐴁𐴡𐴐𐴢 𐴵 𐴳 𐴁𐴡𐴏𐴥𐴡𐴌 , 𐴉𐴝𐴌𐴝𐴌 𐴋𐴤𐴝𐴑𐴠 𐴒𐴡𐴌𐴟 𐴏𐴡𐴌𐴝𐴌𐴊𐴧𐴠 𐴐𐴤𐴡𐴣𐴀𐴡𐴃 𐴔𐴦𐴝𐴙𐴕 𐴁𐴟𐴔 𐴉𐴥𐴟𐴍𐴞 𐴔𐴡𐴌𐴞 𐴒𐴞𐴘𐴥𐴡𐴘 𐴱𐴱

𐴀𐴥𐴠𐴕𐴋𐴞𐴓𐴧𐴝 𐴅𐴟𐴓𐴝𐴘 𐴔𐴥𐴝𐴐𐴡𐴌 𐴳 𐴃𐴝𐴌𐴥𐴞𐴑 𐴁𐴝𐴣𐴐𐴢 𐴈𐴝𐴍𐴞𐴃𐴤𐴡 𐴒𐴞𐴘𐴠𐴊𐴠 𐴀𐴥𐴠𐴍𐴠 𐴀𐴠𐴑 𐴎𐴡𐴕 𐴔𐴦𐴝𐴙𐴕 𐴉𐴥𐴟𐴍𐴞 𐴁𐴠𐴐𐴤𐴞 𐴒𐴤𐴝𐴙𐴓 𐴀𐴥𐴡𐴘𐴧𐴠 , 𐴅𐴟𐴓𐴝𐴘 𐴔𐴥𐴝𐴐𐴡𐴌 𐴀𐴠𐴑 𐴃𐴝𐴌𐴥𐴞𐴑𐴡𐴃 𐴔𐴝𐴎𐴤𐴠 𐴑𐴤𐴞𐴓𐴡𐴃 𐴒𐴡𐴌𐴟 𐴏𐴡𐴌𐴝𐴌𐴊𐴧𐴠 𐴐𐴤𐴡𐴣𐴀𐴡𐴃 𐴔𐴦𐴝𐴙𐴕 𐴁𐴟𐴔 𐴉𐴥𐴟𐴍𐴞 𐴀𐴠𐴑 𐴎𐴡𐴕 𐴁𐴠𐴐𐴤𐴞 𐴒𐴤𐴝𐴙𐴓 𐴀𐴥𐴡𐴘 𐴔𐴡𐴌𐴞 𐴒𐴞𐴘𐴥𐴡𐴘 , 𐴌𐴠𐴂𐴟𐴄 𐴔𐴡𐴎𐴞𐴕 𐴒𐴡𐴃𐴡 𐴔𐴠 𐴔𐴥𐴝𐴐𐴢 𐴀𐴝𐴌 𐴅𐴟𐴕 𐴔𐴥𐴝𐴐𐴡𐴃 𐴔𐴝𐴎𐴤𐴠 , 𐴑𐴙𐴡𐴑 𐴄𐴡 , 𐴀𐴥𐴝𐴀𐴝𐴕 , 𐴔𐴡𐴌𐴥𐴡𐴑 𐴀𐴥𐴟 𐴀𐴝𐴌 𐴌𐴝𐴏𐴞𐴊𐴡𐴚 𐴀𐴠𐴓𐴝𐴑𐴝𐴃 𐴔𐴦𐴝𐴙𐴕 𐴁𐴟𐴔 𐴉𐴥𐴟𐴍𐴞 𐴁𐴡𐴀𐴡𐴃 𐴔𐴝𐴕𐴥𐴟𐴙𐴐𐴢 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴁𐴡𐴀𐴡𐴃 𐴔𐴝𐴕𐴥𐴟𐴙𐴐𐴢 𐴁𐴠𐴐𐴤𐴞 𐴊𐴡𐴌𐴥𐴡 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴱𐴱

Sources : Narinjara.com