𐴁𐴠𐴒𐴧𐴤𐴟𐴕 𐴐𐴤𐴝𐴔𐴠𐴓 𐴀𐴥𐴡𐴘 𐴉𐴝𐴌𐴠𐴊𐴠 𐴔𐴡𐴐𐴖𐴝𐴌𐴝 𐴀𐴥𐴡𐴘 𐴉𐴝𐴌𐴠 𐴉𐴥𐴝𐴀𐴝𐴕 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴓𐴝𐴌𐴥𐴝𐴘 𐴁𐴡𐴕 𐴉𐴝𐴄𐴞 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴁𐴡𐴌𐴔𐴥𐴝𐴌 𐴏𐴞𐴘𐴝𐴏𐴞 𐴔𐴦𐴝𐴔𐴠𐴓𐴝𐴌 𐴁𐴝𐴁𐴡𐴃𐴠 𐴁𐴝𐴎𐴤𐴝 𐴃𐴤𐴝𐴑𐴞 𐴐𐴤𐴝𐴔𐴠𐴓 𐴖𐴥𐴝𐴀𐴝 𐴉𐴡𐴌𐴠𐴊𐴠 𐴀𐴥𐴟𐴀𐴟𐴕 𐴁𐴠𐴒𐴧𐴤𐴟𐴕 𐴐𐴤𐴝𐴔𐴠𐴓 𐴀𐴥𐴡𐴘 𐴉𐴝𐴌𐴠𐴊𐴠 𐴔𐴡𐴐𐴖𐴝𐴌𐴝 𐴀𐴥𐴡𐴘 𐴉𐴝𐴌𐴞 𐴁𐴡𐴓𐴧𐴝 , 𐴀𐴝𐴏𐴞𐴘𐴠𐴕𐴡𐴌 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 𐴌𐴥𐴠 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴓𐴝𐴌𐴥𐴝𐴘 𐴁𐴡𐴕 𐴏𐴟𐴑𐴃𐴞 𐴕𐴝𐴔𐴝 ( 𐴀𐴠𐴕 𐴏𐴞 𐴀𐴠 ) 𐴃 𐴏𐴥𐴝𐴀𐴝𐴙𐴕 𐴒𐴡𐴙𐴅𐴧𐴤𐴙𐴠𐴊𐴠 , 𐴊𐴠𐴐𐴤𐴡𐴙𐴃𐴧𐴝 𐴀𐴥𐴝𐴣𐴃𐴞𐴘𐴝𐴌𐴞 𐴉𐴝𐴄𐴞 𐴇𐴥𐴝𐴣𐴃𐴧𐴗𐴝 𐴘𐴠 , 𐴅𐴟𐴓𐴘 𐴔𐴥𐴝𐴐𐴡𐴌 𐴵 𐴃𐴝𐴌𐴥𐴞𐴑𐴡𐴃 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴝𐴏𐴞𐴘𐴠𐴕𐴡𐴌 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝𐴌 𐴊𐴟𐴘𐴀𐴡𐴔 𐴁𐴝𐴌𐴝𐴌𐴡𐴌 𐴁𐴡𐴌𐴔𐴥𐴝𐴌 𐴏𐴥𐴡𐴉𐴡𐴌𐴡𐴃 , 𐴊𐴠𐴐𐴤𐴡𐴙𐴃𐴧𐴝 𐴀𐴥𐴝𐴣𐴃𐴞𐴘𐴝𐴌𐴞 𐴉𐴝𐴄𐴞 𐴇𐴥𐴝𐴣𐴃𐴧𐴗𐴝 , 𐴅𐴟𐴕 𐴔𐴥𐴝𐴐𐴡𐴌 𐴀𐴠𐴑 𐴃𐴝𐴌𐴥𐴞𐴑𐴡𐴃 , 𐴕𐴠 𐴂𐴙𐴠 𐴋𐴦𐴡𐴃 𐴊𐴡𐴓𐴝 𐴀𐴥𐴡𐴘𐴧𐴠𐴊𐴠 𐴐𐴤𐴡𐴣𐴀𐴡𐴃 𐴈𐴡𐴃𐴤𐴝 𐴘𐴝𐴀𐴝𐴕 𐴈𐴡𐴘𐴧𐴠𐴊𐴠 𐴁𐴡𐴓𐴞 𐴀𐴠𐴓𐴝𐴕𐴡𐴃 𐴉𐴝𐴀𐴝 𐴒𐴞𐴘𐴠 𐴱𐴱

𐴏𐴞𐴘𐴝𐴏𐴞 𐴔𐴦𐴝𐴔𐴠𐴓𐴝 𐴏𐴞𐴘𐴝𐴏𐴞 𐴀𐴠𐴃𐴠𐴁𐴝𐴌𐴠 𐴃𐴡𐴌𐴃𐴞𐴁 𐴀𐴥𐴡𐴘 𐴉𐴝𐴌𐴠 𐴉𐴥𐴝𐴀𐴝𐴕 , 𐴐𐴤𐴝𐴔𐴠𐴓 𐴖𐴥𐴝𐴀𐴝 𐴉𐴡𐴌𐴠𐴊𐴠 𐴀𐴥𐴟𐴀𐴟𐴕 𐴐𐴤𐴝𐴔𐴠𐴓 𐴀𐴥𐴡𐴘 𐴉𐴝𐴌𐴞 𐴁𐴤𐴡𐴓𐴧𐴝 , 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌𐴠 𐴇𐴥𐴠𐴉𐴝𐴎𐴡𐴃 𐴒𐴡𐴌𐴥𐴞𐴁𐴤𐴡𐴓𐴧𐴝 , 𐴀𐴞𐴕𐴏𐴝𐴕𐴞𐴘𐴡𐴃𐴞 𐴔𐴟𐴃𐴦𐴝𐴓𐴧𐴠𐴑 𐴔𐴡𐴊𐴡𐴊 𐴒𐴡𐴌𐴥𐴞 𐴉𐴝𐴌𐴞 𐴁𐴤𐴡𐴓𐴧𐴝 𐴘𐴥𐴡 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 , 𐴓𐴝𐴌𐴥𐴝𐴘 𐴁𐴡𐴕 𐴉𐴝𐴄𐴞 𐴀𐴥𐴡𐴑𐴧𐴡𐴓𐴡𐴌 𐴀𐴠𐴓𐴝𐴕𐴡𐴃 𐴓𐴠𐴙𐴑𐴧𐴤𐴙𐴠 𐴱𐴱

𐴊𐴡𐴓𐴝 𐴀𐴥𐴡𐴘𐴧𐴠𐴊𐴠 𐴁𐴡𐴘𐴍𐴡𐴑𐴡𐴃 , 𐴓𐴝𐴌𐴥𐴝𐴘 𐴁𐴡𐴕 𐴏𐴟𐴑𐴃𐴞 𐴕𐴝𐴔𐴝 ( 𐴀𐴠𐴕 𐴏𐴞 𐴀𐴠 ) 𐴃 , 𐴏𐴥𐴝𐴀𐴝𐴙𐴕 𐴒𐴡𐴙𐴅𐴧𐴤𐴙𐴠𐴊𐴠 𐴐𐴤𐴠𐴔 𐴋𐴞𐴐𐴄𐴤𐴑𐴡𐴌 ( 𐴀𐴝𐴌 𐴏𐴞 𐴀𐴠𐴏𐴢 𐴀𐴠𐴏𐴢 ) 𐴑𐴠𐴀𐴞𐴚𐴡𐴌 ( 𐴋𐴞 𐴑𐴠 𐴁𐴞 𐴀𐴠 ) 𐴀𐴝𐴌𐴑𐴝𐴕𐴡𐴌 ( 𐴀𐴠 𐴀𐴠𐴓 𐴂𐴞 ) 𐴑𐴠𐴀𐴞𐴚𐴡𐴌 ( 𐴑𐴠 𐴀𐴠𐴕 𐴀𐴠𐴓 𐴀𐴠 / 𐴂𐴞 𐴏𐴞 ) 𐴔𐴗𐴠𐴕𐴡𐴌 ( 𐴀𐴠𐴕 𐴀𐴠𐴔 𐴀𐴠𐴏𐴢 𐴂𐴞 ) 𐴓𐴝𐴇𐴥𐴟 𐴑𐴡𐴗𐴔𐴡𐴌 ( 𐴀𐴠𐴓 𐴋𐴞 𐴘𐴟 ) 𐴂𐴡𐴀𐴥𐴟 𐴑𐴡𐴗𐴔𐴡𐴌 ( 𐴂𐴞 𐴀𐴠𐴕 𐴀𐴠𐴓 𐴀𐴡 ) 𐴀𐴟𐴀𐴟𐴕 𐴁𐴠𐴒𐴧𐴤𐴟𐴕 𐴐𐴤𐴝𐴔𐴠𐴓 𐴀𐴝𐴐𐴧𐴤𐴞𐴓 𐴱𐴱

𐴀𐴝𐴏𐴞𐴘𐴠𐴕𐴡𐴌 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 , 𐴏𐴥𐴡𐴉𐴡𐴌 𐴀𐴞𐴁𐴤𐴝𐴃 𐴔𐴝𐴎𐴠 , 𐴑𐴟𐴀𐴟𐴂𐴑𐴝𐴌 𐴔𐴠𐴓𐴠𐴄𐴠𐴌𐴞𐴌 𐴕𐴠𐴃𐴝 𐴁𐴟 𐴆𐴤𐴙𐴟𐴑 𐴔𐴥𐴟𐴅𐴤𐴞 / 𐴔𐴥𐴞𐴚 𐴀𐴡𐴗𐴚 𐴓𐴝𐴚𐴡𐴌 𐴓𐴡𐴘 𐴊𐴡𐴓𐴝 𐴀𐴥𐴡𐴘𐴧𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 , 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴀𐴥𐴟 𐴖𐴡𐴕𐴧𐴝 𐴔𐴡𐴗𐴚 𐴓𐴗𐴝𐴚 , 𐴀𐴠𐴕 𐴏𐴞 𐴀𐴠 𐴏𐴟𐴑𐴃𐴞 𐴕𐴝𐴔𐴝𐴃 𐴏𐴥𐴝𐴀𐴝𐴙𐴕 𐴒𐴡𐴙𐴅𐴧𐴤𐴙𐴝 𐴊𐴠𐴐𐴤𐴡𐴙𐴃𐴧𐴝 𐴀𐴥𐴝𐴣𐴃𐴞𐴘𐴝𐴌𐴞 𐴇𐴥𐴝𐴣𐴃 𐴉𐴝𐴄𐴞 , 𐴏𐴞𐴘𐴝𐴏𐴞 𐴇𐴥𐴝𐴣𐴃 𐴉𐴝𐴄𐴞 𐴀𐴝𐴌 𐴉𐴠𐴌𐴝𐴀𐴝𐴣𐴏𐴢 , 𐴀𐴝𐴔𐴠𐴌𐴞𐴑𐴝 , 𐴀𐴡𐴏𐴄𐴡𐴌𐴡𐴓𐴞𐴘𐴝𐴌 𐴏𐴥𐴡𐴉𐴞𐴌 𐴀𐴥𐴡𐴑𐴧𐴡𐴓 𐴓𐴡𐴘 𐴘𐴥𐴡 , 𐴊𐴡𐴓𐴝 𐴀𐴥𐴡𐴘𐴧𐴠 𐴁𐴡𐴓𐴞 𐴑𐴡𐴔𐴁𐴤𐴡𐴋𐴞𐴘𐴝𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴞 𐴃𐴝𐴕𐴥𐴝𐴌𐴃𐴧𐴟 𐴒𐴡𐴃𐴡 𐴈𐴝𐴓𐴞𐴘𐴝 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴠 𐴏𐴥𐴡𐴉𐴡𐴌𐴡𐴃 / 𐴋𐴦𐴡 𐴀𐴡𐴗𐴚 𐴏𐴥𐴠𐴕 𐴏𐴥𐴟𐴆𐴞 𐴓𐴡𐴘 𐴊𐴡𐴓𐴝 𐴀𐴥𐴡𐴘𐴁𐴤𐴝𐴌 𐴀𐴠𐴅𐴝𐴎𐴡𐴃 𐴕𐴥𐴡 𐴉𐴝𐴀𐴝 , 𐴋𐴦𐴡 𐴏𐴥𐴟 𐴏𐴥𐴟 𐴓𐴗𐴝𐴚 𐴓𐴡𐴘 𐴊𐴡𐴓𐴝 𐴀𐴥𐴡𐴘𐴁𐴤𐴝𐴌 𐴀𐴠𐴅𐴝𐴎𐴡𐴃 𐴕𐴥𐴡 𐴉𐴝𐴀𐴝 𐴊𐴠 𐴘𐴥𐴝𐴀𐴝𐴕 𐴑𐴡𐴔𐴁𐴤𐴡𐴋𐴞𐴘𐴝𐴌 𐴏𐴥𐴡𐴉𐴞𐴌𐴡𐴌𐴥𐴠 𐴎𐴝𐴕𐴝𐴘 𐴌𐴝𐴑𐴤𐴞 𐴁𐴦𐴝𐴊𐴠 , 𐴏𐴥𐴟𐴆𐴞 𐴌𐴠 𐴖𐴝𐴉𐴠𐴏𐴢 𐴒𐴤𐴡𐴌𐴡𐴃 𐴕𐴞𐴎𐴝𐴘 𐴌𐴝𐴑𐴤𐴞 𐴁𐴤𐴡𐴓𐴧𐴝 , 𐴀𐴝𐴏𐴞𐴘𐴠𐴕𐴡𐴌 𐴐𐴡𐴌𐴥𐴡𐴃 𐴉𐴝𐴣𐴏𐴥𐴡𐴖𐴧𐴝𐴕 𐴔𐴡𐴎𐴞𐴕 𐴀𐴝𐴔𐴥𐴡𐴓 𐴒𐴡𐴌𐴥𐴞𐴁𐴤𐴡𐴓𐴧𐴝 , 𐴉𐴥𐴝𐴣𐴐𐴞𐴌 𐴐𐴤𐴝𐴎𐴝 𐴊𐴞𐴘𐴠𐴊𐴠 𐴊𐴟𐴕𐴥𐴞 𐴎𐴡𐴕𐴡𐴌𐴥𐴠 𐴕𐴡 𐴔𐴝𐴌𐴞𐴁𐴤𐴡𐴓𐴧𐴝 𐴀𐴝𐴌 𐴀𐴥𐴠𐴕𐴋𐴞𐴓𐴧𐴝 𐴐𐴡𐴌𐴥𐴡𐴃 𐴀𐴥𐴡𐴑𐴧𐴡𐴓𐴡𐴌 𐴁𐴝𐴁𐴡𐴃𐴠 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 , 𐴑𐴡𐴔𐴁𐴤𐴡𐴋𐴞𐴘𐴝𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴞 𐴃𐴝𐴕𐴥𐴝 𐴘𐴠 𐴓𐴠𐴙𐴑𐴧𐴤𐴙𐴠 𐴱𐴱

Sources : RFA.org/burmese