𐴉𐴡𐴙𐴃𐴧𐴡 𐴔𐴥𐴝𐴐𐴤𐴡𐴌 𐴌𐴟𐴇𐴝𐴙𐴚𐴒𐴙𐴝𐴌 𐴑𐴟𐴄𐴤𐴞 𐴄𐴞𐴛𐴝𐴌 𐴘𐴝𐴁𐴤𐴝 𐴁𐴠𐴁𐴐𐴤𐴝 𐴉𐴟𐴓𐴞𐴐𐴡𐴌 𐴇𐴥𐴝𐴃𐴡𐴃 𐴊𐴤𐴡𐴌𐴝 𐴈𐴥𐴝𐴘𐴧𐴠 𐴱𐴱

𐴀𐴟𐴑𐴤𐴞𐴘𐴝 𐴃𐴤𐴝𐴕𐴝𐴌 𐴉𐴟𐴓𐴞𐴐𐴠 𐴘𐴝𐴁𐴤𐴝𐴌 𐴀𐴠𐴅𐴤𐴠𐴕𐴄 𐴌𐴟𐴇𐴝𐴙𐴣𐴚𐴒𐴙𐴝 𐴀𐴠𐴑 𐴎𐴡𐴕𐴡𐴌𐴥𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠 , 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 / 𐴐𐴡𐴉𐴞 𐴀𐴟𐴓𐴧𐴝𐴇𐴢 𐴁𐴡𐴀𐴡𐴃 𐴊𐴞𐴕 𐴀𐴥𐴡𐴘𐴊𐴠 , 𐴁𐴡𐴌𐴔𐴥𐴝𐴃𐴧𐴟 𐴓𐴡𐴑𐴧𐴤𐴡 𐴓𐴡𐴑𐴧𐴤𐴡 𐴉𐴞𐴏𐴢 𐴘𐴝𐴁𐴤𐴝 𐴕𐴞𐴐𐴤𐴝𐴌 𐴒𐴟𐴓𐴞 , 𐴁𐴝𐴚𐴓𐴝𐴊𐴠𐴐𐴤𐴡𐴃 𐴉𐴝𐴌 𐴒𐴡𐴌𐴥𐴝𐴘 𐴐𐴤𐴡𐴊𐴡𐴌𐴞 𐴒𐴡𐴌𐴥𐴞 𐴀𐴝𐴘𐴧𐴠𐴌 𐴱𐴱

𐴒𐴡𐴃𐴡 𐴈𐴝𐴓𐴞𐴘𐴝 𐴐𐴤𐴡𐴕𐴞 𐴁𐴝𐴌𐴠 𐴑𐴠𐴀𐴠𐴔𐴡𐴌 𐴁𐴤𐴟𐴃𐴡𐴌𐴃𐴧𐴟 𐴀𐴥𐴞𐴃𐴝𐴌𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠 , 𐴀𐴟𐴑𐴤𐴞𐴘𐴝 𐴃𐴤𐴝𐴕𐴝𐴌 𐴀𐴡 𐴏𐴞 / 𐴐𐴠𐴙𐴑 𐴔𐴟𐴇𐴝𐴔𐴧𐴡𐴊 𐴀𐴝𐴓𐴞 𐴘𐴠 𐴎𐴝𐴕𐴝𐴘𐴧𐴠𐴊𐴠 , 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴘𐴝𐴁𐴤𐴝𐴌 𐴒𐴤𐴡𐴄 𐴉𐴥𐴝𐴊𐴤𐴝𐴌 / 𐴐𐴡𐴉𐴞 𐴀𐴟𐴓𐴧𐴝𐴇𐴢 𐴁𐴡𐴐𐴢 𐴸 𐴳 𐴁𐴡𐴏𐴥𐴡𐴌 , 𐴀𐴟𐴑𐴤𐴞𐴘𐴝 𐴑𐴟𐴃𐴤𐴟 𐴉𐴝𐴓𐴡𐴚 𐴓𐴝𐴔𐴁𐴝 𐴐𐴤𐴞𐴘𐴝𐴌 𐴱 / 𐴋𐴝𐴁𐴓𐴙𐴟 𐴑𐴠𐴀𐴠𐴔𐴡𐴌 𐴀𐴞 / 𐴲 𐴁𐴡𐴓𐴡𐴑𐴡𐴃 𐴃𐴤𐴝𐴑𐴠𐴊𐴠 𐴀𐴝𐴁𐴊𐴟𐴏𐴢 𐴏𐴡𐴓𐴝𐴔𐴡𐴌 𐴉𐴟𐴖𐴝 𐴱𐴱

𐴐𐴤𐴡𐴕𐴞 𐴁𐴝𐴌𐴠 𐴌𐴝𐴙𐴃𐴡𐴌 𐴀𐴡𐴕𐴟 𐴔𐴝𐴕𐴞𐴑 𐴰 𐴱 𐴁𐴝𐴎𐴠 , 𐴀𐴠 𐴂𐴞 𐴁𐴞 𐴀𐴠𐴕 𐴉𐴟𐴓𐴞𐴐𐴡𐴌 𐴐𐴤𐴝𐴀𐴞𐴅𐴧𐴡 𐴔𐴡𐴊𐴡𐴊 𐴓𐴡𐴘 , 𐴀𐴥𐴞𐴃𐴝𐴌𐴠 𐴑𐴠𐴀𐴠𐴔𐴡𐴌 𐴁𐴤𐴟𐴃𐴡𐴌𐴃𐴧𐴟 𐴁𐴡𐴕 𐴒𐴡𐴌𐴥𐴝 𐴒𐴞𐴘𐴠 , 𐴁𐴡𐴕 𐴀𐴥𐴡𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴐𐴡𐴉𐴞 𐴀𐴟𐴓𐴧𐴝𐴇𐴢 , 𐴁𐴡𐴀𐴡𐴃 𐴈𐴡𐴃𐴡𐴀𐴡𐴕 𐴉𐴟𐴏𐴥𐴝𐴌 𐴒𐴡𐴌𐴥𐴡𐴕𐴡𐴌 𐴁𐴦𐴝𐴊𐴠 , 𐴘𐴝𐴁𐴤𐴝 𐴐𐴤𐴡𐴊𐴡𐴌𐴞 𐴒𐴡𐴌𐴥𐴠 𐴁𐴡𐴓𐴞 𐴐𐴤𐴞𐴑𐴝𐴌 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴀𐴡 𐴏𐴞 𐴘𐴠 𐴎𐴝𐴕𐴝𐴘𐴧𐴠 𐴱𐴱

𐴀𐴝𐴐𐴤𐴝𐴔𐴞 𐴘𐴠 𐴐𐴤𐴞𐴑𐴝𐴌 𐴒𐴡𐴙𐴅𐴧𐴤𐴙𐴠𐴊𐴠 𐴔𐴡𐴎𐴞𐴕 𐴀𐴡 𐴏𐴞𐴌 𐴏𐴥𐴡𐴊𐴧𐴝𐴌𐴞𐴃 𐴀𐴟𐴑𐴤𐴞𐴘𐴝 𐴃𐴤𐴝𐴕𐴝𐴌 𐴉𐴟𐴓𐴞𐴐𐴡𐴌 𐴄𐴞𐴀𐴞𐴔 𐴀𐴟𐴒𐴧𐴤𐴙𐴝 , 𐴀𐴝𐴐𐴤𐴝𐴔𐴞 𐴐𐴤𐴡𐴣𐴀𐴡 𐴌𐴝𐴙𐴑𐴧𐴤𐴙𐴠𐴊𐴠 𐴎𐴝𐴒𐴝 𐴀𐴥𐴡𐴑𐴧𐴡𐴓𐴡𐴃𐴧𐴟 𐴘𐴝𐴁𐴤𐴝 𐴁𐴝𐴀𐴝𐴙𐴌 𐴒𐴡𐴌𐴥𐴞𐴁𐴤𐴡𐴓𐴧𐴝 𐴒𐴞𐴘𐴠 , 𐴀𐴝𐴐𐴤𐴝𐴔𐴞 𐴘𐴠 𐴊𐴠𐴈𐴥𐴝𐴘 𐴊𐴠𐴀𐴠𐴌𐴊𐴧𐴠 𐴔𐴡𐴎𐴞𐴕 , 𐴀𐴟𐴑𐴤𐴞𐴘𐴝 𐴌𐴝𐴎𐴝 𐴉𐴝𐴓𐴡𐴚 𐴘𐴟𐴕𐴞 𐴀𐴡𐴕𐴡𐴌 𐴊𐴡𐴀𐴡𐴙𐴕 𐴉𐴝𐴃𐴝𐴁𐴝𐴌𐴞𐴌 𐴉𐴝𐴀𐴝𐴌𐴞 𐴀𐴠𐴓𐴝𐴑𐴝𐴌 𐴔𐴠𐴍𐴞𐴌 𐴁𐴤𐴟𐴃𐴡𐴌𐴠 𐴒𐴝𐴣𐴌𐴝𐴘 𐴌𐴝𐴙𐴑𐴧𐴤𐴙𐴠𐴊𐴠 𐴰 𐴲 𐴇𐴥𐴝𐴎𐴝𐴌 𐴉𐴞𐴏𐴢 𐴘𐴝𐴁𐴤𐴝 𐴉𐴟𐴓𐴞𐴐𐴠 𐴎𐴡𐴁𐴊𐴤𐴡 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴝𐴐𐴤𐴝𐴔𐴞 𐴐𐴡𐴉𐴞 𐴀𐴟𐴓𐴧𐴝𐴇𐴢 𐴁𐴡𐴀𐴡𐴃 𐴊𐴞𐴕 𐴀𐴥𐴡𐴘𐴃𐴠 𐴘𐴝𐴁𐴤𐴝𐴌 𐴀𐴠𐴅𐴤𐴠𐴕𐴄 𐴀𐴥𐴞𐴏𐴝𐴉𐴠 𐴁𐴡𐴌𐴔𐴥𐴝 𐴓𐴡𐴘 𐴈𐴝𐴔 𐴒𐴡𐴙𐴅𐴧𐴤𐴙𐴠 , 𐴐𐴡𐴉𐴞 𐴀𐴟𐴓𐴧𐴝𐴇𐴢 𐴘𐴠 𐴉𐴡𐴙𐴃𐴧𐴡 𐴔𐴥𐴝𐴐𐴠 𐴵 𐴳 – 𐴰 𐴴 𐴓𐴡𐴑𐴧𐴤𐴡 𐴉𐴞𐴏𐴢 𐴘𐴝𐴁𐴤𐴝 𐴁𐴡𐴌𐴔𐴥𐴝𐴃𐴧𐴟 𐴀𐴝𐴕𐴥𐴞 𐴁𐴝𐴚𐴓𐴝𐴊𐴠𐴐𐴤𐴡𐴃 𐴁𐴠𐴏𐴠 , 𐴀𐴥𐴞𐴃𐴠 𐴀𐴝𐴕𐴥𐴞 𐴁𐴠𐴏𐴠𐴊𐴠 𐴘𐴝𐴁𐴤𐴝𐴌 𐴔𐴟𐴙𐴓𐴧𐴡 𐴰 𐴰 𐴱 – 𐴰 𐴲 𐴱 𐴑𐴟𐴄𐴤𐴞 𐴄𐴞𐴛𐴝 𐴓𐴡𐴃𐴞 𐴀𐴥𐴡𐴘𐴁𐴡 𐴁𐴡𐴓𐴞 𐴀𐴡 𐴏𐴞 𐴐𐴠𐴙𐴑 / 𐴔𐴟𐴇𐴝𐴔𐴧𐴡𐴊 𐴀𐴝𐴓𐴞 𐴘𐴠 𐴈𐴡𐴘𐴧𐴠 𐴱𐴱

Sources : Ukhiyanews.com