𐴔𐴟𐴁𐴦𐴝𐴙𐴓𐴡𐴃 𐴋𐴦𐴡 𐴀𐴡𐴗𐴚 𐴏𐴥𐴠𐴕 𐴏𐴥𐴟𐴆𐴞𐴌 𐴉𐴡𐴄𐴤𐴟 𐴉𐴝𐴘𐴧𐴥𐴠𐴊𐴠 𐴘𐴥𐴝𐴀𐴝𐴕𐴡𐴓𐴧𐴝 𐴔𐴠𐴓𐴠𐴄𐴠𐴌𐴞 𐴘𐴠 𐴰 𐴳 𐴕𐴡𐴌 𐴖𐴡𐴌𐴠 𐴊𐴠𐴐𐴤𐴡𐴙𐴃𐴧𐴝 𐴊𐴤𐴡𐴌𐴞 𐴉𐴞𐴍𐴞 𐴁𐴦𐴝𐴊𐴠 𐴑𐴠𐴙𐴏𐴢 𐴑𐴤𐴟𐴙𐴓𐴧𐴙𐴠 𐴱𐴱

𐴀𐴥𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴤𐴞𐴑𐴡𐴌 𐴐𐴤𐴡𐴀𐴡𐴌 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴡𐴌𐴠 , 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴔𐴟𐴁𐴦𐴝𐴙𐴓𐴡𐴃 𐴎𐴡𐴕𐴡𐴒𐴡𐴕𐴡𐴌 𐴕𐴠𐴃𐴝 𐴊𐴠𐴐𐴤𐴡𐴌 𐴔𐴡𐴐𐴖𐴝𐴌𐴝 𐴊𐴝𐴃𐴝 / 𐴋𐴦𐴡 𐴀𐴡𐴗𐴚 𐴏𐴥𐴠𐴕 𐴏𐴥𐴟𐴆𐴞𐴌 𐴉𐴡𐴄𐴤𐴟 𐴓𐴦𐴡𐴃 𐴉𐴝𐴘𐴧𐴥𐴠𐴊𐴠 𐴀𐴥𐴠𐴃𐴡𐴓𐴧𐴝 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴰 𐴳 𐴎𐴡𐴕𐴡𐴌 𐴖𐴡𐴌𐴠 𐴔𐴝𐴕𐴥𐴟𐴙𐴐𐴢 𐴊𐴤𐴡𐴌𐴞 𐴔𐴝𐴙𐴌 𐴉𐴞𐴄 𐴒𐴡𐴌𐴥𐴞 𐴁𐴦𐴝𐴊𐴠 𐴈𐴝𐴍𐴝 𐴈𐴝𐴍𐴞𐴌 𐴊𐴤𐴝𐴌𐴝 𐴵 𐴰 𐴵 𐴓𐴡𐴔𐴁𐴤𐴡𐴌 𐴓𐴡𐴘 𐴑𐴠𐴙𐴏𐴢 𐴑𐴤𐴟𐴙𐴓𐴧𐴙𐴠 𐴊𐴠 , 𐴘𐴥𐴝𐴀𐴝𐴕 𐴉𐴟𐴓𐴞𐴐𐴡𐴌 𐴃𐴟𐴌𐴥𐴟 𐴎𐴝𐴕𐴝 𐴒𐴞𐴘𐴠 𐴱𐴱

𐴎𐴡𐴕𐴡𐴒𐴡𐴕𐴡𐴌 𐴕𐴠𐴃𐴝 𐴋𐴦𐴡 𐴀𐴡𐴗𐴚 𐴏𐴥𐴠𐴕 𐴏𐴥𐴟𐴆𐴞𐴌 𐴎𐴡𐴕𐴡𐴔 𐴊𐴞𐴕 , 𐴅𐴟𐴕 𐴔𐴥𐴝𐴐𐴡𐴌 𐴹 𐴱 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 , 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴉𐴡𐴙𐴃𐴧𐴡 𐴏𐴡𐴔𐴡𐴀𐴡𐴕𐴞𐴃 𐴔𐴝𐴙𐴕𐴐𐴤𐴡𐴌 𐴉𐴥𐴟𐴕 𐴀𐴥𐴡𐴑𐴧𐴡𐴓 𐴏𐴠𐴑 𐴒𐴡𐴌𐴥𐴠𐴌 , 𐴀𐴥𐴠𐴏𐴥𐴞𐴓𐴏𐴞𐴓𐴝𐴃 𐴀𐴠𐴑 𐴇𐴥𐴝𐴉𐴃𐴝𐴌 𐴁𐴤𐴟𐴃𐴡𐴌𐴠 𐴰 𐴳 𐴎𐴡𐴕𐴡𐴌 𐴖𐴡𐴌𐴠 𐴁𐴡𐴕 𐴒𐴡𐴌𐴥𐴞 𐴑𐴠𐴙𐴏𐴢 𐴑𐴤𐴟𐴙𐴓𐴧𐴙𐴠 𐴁𐴡𐴓𐴞 𐴉𐴟𐴓𐴞𐴐𐴢 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

𐴎𐴡𐴕𐴡𐴔 𐴊𐴞𐴕 𐴓𐴡𐴃𐴞 𐴏𐴠𐴑 𐴒𐴡𐴌𐴥𐴝 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 , 𐴀𐴝𐴒𐴠 𐴘𐴥𐴡 𐴏𐴠𐴑 𐴒𐴡𐴙𐴅𐴧𐴤𐴞𐴓𐴊𐴠 𐴀𐴝𐴏𐴥𐴠 , 𐴏𐴠𐴑 𐴕𐴡 𐴒𐴡𐴌𐴥𐴠𐴌𐴊𐴧𐴠 𐴑𐴠𐴙𐴏𐴧𐴥𐴟 𐴊𐴠𐴌𐴞 𐴀𐴥𐴡𐴘𐴓𐴠 𐴘𐴥𐴡 , 𐴀𐴥𐴠𐴊𐴞𐴕 𐴀𐴥𐴡𐴘𐴃𐴠 𐴉𐴥𐴞𐴃𐴞𐴕 𐴔𐴟𐴁𐴦𐴝𐴙𐴓 𐴀𐴥𐴡𐴑𐴧𐴡𐴓 𐴏𐴠𐴑 𐴒𐴡𐴌𐴥𐴝 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 , 𐴋𐴦𐴡 𐴀𐴡𐴗𐴚 𐴏𐴥𐴠𐴕 𐴏𐴥𐴟𐴆𐴞𐴌 𐴉𐴡𐴄𐴤𐴟 𐴊𐴠𐴑𐴤𐴞𐴓𐴠 𐴔𐴡𐴕𐴃𐴡𐴌 𐴉𐴞𐴍𐴞 𐴁𐴦𐴝𐴊𐴠 𐴁𐴡𐴕 𐴒𐴡𐴌𐴥𐴞 𐴃𐴤𐴝𐴕𐴝𐴃 𐴒𐴡𐴏𐴥𐴝𐴘 𐴊𐴠𐴀𐴠 𐴁𐴡𐴓𐴞 , 𐴕𐴝𐴔 𐴕𐴡 𐴈𐴡𐴘𐴁𐴤𐴝𐴌 𐴐𐴡𐴌𐴥𐴡𐴃 𐴓𐴡𐴘 𐴉𐴟𐴓𐴞𐴐𐴢 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 ” 𐴱𐴱

𐴁𐴡𐴕 𐴒𐴡𐴙𐴅𐴧𐴤𐴙𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕 , 𐴂𐴡𐴏𐴧𐴞𐴔 , 𐴂𐴥𐴠𐴕 𐴃𐴡𐴕𐴡 , 𐴀𐴞𐴔 𐴔𐴥𐴠 , 𐴔𐴡𐴌𐴥𐴡𐴚 𐴔𐴡𐴌𐴥𐴝 , 𐴛𐴥𐴡𐴚 𐴄𐴟𐴕 , 𐴔𐴡𐴀𐴟 𐴁𐴝𐴚 , 𐴐𐴤𐴡𐴀𐴡𐴌 𐴀𐴞𐴀𐴞𐴕𐴡𐴃𐴧𐴟 , 𐴀𐴞𐴀𐴞𐴕 𐴁𐴦𐴝𐴊𐴠 𐴁𐴦𐴠𐴐𐴢 𐴀𐴥𐴞𐴏𐴧𐴝 𐴔𐴝𐴕𐴥𐴟𐴙𐴐𐴢 , 𐴆𐴤𐴙𐴝𐴘 𐴓𐴥𐴠 𐴐𐴤𐴡𐴀𐴡𐴌𐴡𐴃𐴧𐴟 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴊𐴠𐴐𐴤𐴡𐴙𐴃𐴧𐴝𐴌 𐴕𐴠𐴃𐴝 𐴋𐴦𐴡 𐴀𐴡𐴗𐴚 𐴏𐴥𐴠𐴕 𐴏𐴥𐴟𐴆𐴞𐴌 𐴉𐴡𐴄𐴤𐴟 𐴉𐴝𐴘𐴧𐴡𐴌𐴥𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠𐴊𐴠 𐴔𐴝𐴕𐴥𐴟𐴙𐴐𐴢 𐴰 𐴰 𐴱 𐴐𐴤𐴡𐴃𐴡𐴌 𐴖𐴡𐴌𐴠 𐴀𐴝𐴏𐴥𐴠 , 𐴑𐴠𐴙𐴏𐴧𐴥𐴟𐴃𐴧𐴟 𐴄𐴞𐴛𐴝 𐴔𐴝𐴒𐴠 , 𐴄𐴞𐴛𐴝 𐴊𐴞𐴀𐴞𐴓𐴥𐴠 𐴀𐴠𐴌𐴞 𐴊𐴞𐴀𐴞𐴉𐴠𐴓𐴥𐴝 , 𐴐𐴤𐴠𐴐𐴠 𐴄𐴞𐴛𐴝 𐴊𐴞𐴀𐴞 𐴕𐴡𐴀𐴡 𐴉𐴝𐴌𐴠𐴊𐴠 𐴰 𐴳 𐴎𐴡𐴕𐴡𐴌𐴥𐴠 𐴔𐴦𐴡𐴊𐴧𐴞𐴔𐴝 𐴑𐴤𐴟𐴓𐴞 𐴁𐴡𐴓𐴧𐴥𐴝 𐴉𐴟𐴓𐴞𐴐𐴡𐴌𐴥𐴠 𐴒𐴡𐴏𐴥𐴝𐴘 𐴊𐴞𐴘𐴠𐴊𐴠 𐴘𐴥𐴝𐴀𐴝𐴕 𐴎𐴝𐴕𐴝 𐴒𐴞𐴘𐴠 𐴱𐴱

Sources : burmese.dvb.no