𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌 𐴇𐴥𐴝𐴃𐴡𐴃 𐴌𐴟𐴇𐴝𐴙𐴚𐴒𐴙𐴝𐴌 𐴅𐴠𐴕𐴟𐴏𐴥𐴝𐴙𐴋 𐴀𐴠𐴑𐴧𐴤𐴝𐴕 𐴊𐴠𐴐𐴁𐴞𐴊𐴠𐴐𐴤𐴞 𐴀𐴞𐴐𐴤𐴟 𐴱𐴱

𐴁𐴝𐴚𐴓𐴝𐴊𐴠𐴐𐴤𐴡𐴃 𐴀𐴝𐴏𐴥𐴠𐴊𐴠 𐴀𐴝𐴔𐴠𐴌𐴞𐴑𐴝𐴌 𐴏𐴥𐴡𐴉𐴞𐴌𐴠 𐴈𐴡𐴘𐴧𐴠𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴅𐴠𐴕𐴟𐴏𐴥𐴝𐴙𐴋𐴡𐴌 𐴁𐴝𐴁𐴡𐴃𐴠 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌 𐴅𐴟𐴖𐴝𐴁 𐴊𐴠𐴇𐴥𐴞 𐴘𐴥𐴡 , 𐴊𐴠𐴐𐴁𐴞𐴊𐴠𐴐𐴤𐴞 𐴁𐴠𐴌𐴝𐴊𐴡𐴌𐴞 𐴀𐴝𐴌 𐴀𐴝𐴏𐴞𐴘𐴠𐴕𐴡𐴌𐴓𐴧𐴝 𐴀𐴠𐴑𐴧𐴤𐴝𐴕 𐴀𐴞𐴐𐴤𐴟 , 𐴅𐴟𐴕 𐴔𐴥𐴝𐴐𐴡𐴌 𐴴 𐴲 𐴃𐴝𐴌𐴥𐴞𐴑𐴡𐴃 , 𐴖𐴝𐴐𐴞𐴕 𐴄𐴡𐴕 𐴋𐴞𐴏𐴞𐴃𐴧𐴟 𐴁𐴝𐴚𐴓𐴝 𐴏𐴠𐴑𐴐𐴤𐴠𐴕𐴡𐴌 𐴀𐴥𐴞𐴕𐴄𐴝𐴌 𐴁𐴙𐴟𐴃 , 𐴀𐴝𐴔𐴠𐴌𐴞𐴑𐴝𐴌 𐴏𐴥𐴡𐴉𐴞𐴌𐴠 𐴈𐴡𐴘𐴧𐴠𐴊𐴠 𐴘𐴝𐴀𐴝𐴕 𐴀𐴠𐴑𐴧𐴤𐴝𐴕 𐴊𐴠𐴐𐴁𐴞𐴊𐴠𐴐𐴤𐴞 𐴀𐴞𐴐𐴤𐴟 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴌𐴠𐴊𐴠 𐴋𐴦𐴡𐴙𐴓𐴧𐴝 𐴇𐴥𐴝𐴓𐴡𐴃 𐴁𐴝𐴕𐴝𐴀𐴡𐴕 , 𐴕𐴡𐴏𐴥𐴡𐴓 𐴉𐴥𐴟𐴌𐴝 𐴑𐴝𐴌𐴖𐴝𐴘𐴌 𐴎𐴞𐴔𐴧𐴝𐴊𐴝𐴌𐴞𐴌 𐴁𐴝𐴁𐴡𐴃𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝 𐴐𐴤𐴣𐴀𐴡 𐴊𐴠𐴐𐴁𐴞𐴊𐴠𐴐𐴢 𐴀𐴝𐴌 𐴀𐴝𐴔𐴠𐴌𐴞𐴑𐴝 𐴘𐴠 𐴌𐴟𐴓 𐴀𐴝𐴊𐴝𐴘 𐴒𐴡𐴌𐴥𐴞 𐴎𐴝𐴀𐴝𐴌 𐴊𐴠 𐴀𐴥𐴠𐴕𐴋𐴞𐴓𐴧𐴝 𐴀𐴥𐴡𐴀𐴡𐴕 , 𐴘𐴥𐴝𐴀𐴝𐴕 𐴀𐴝𐴏𐴞𐴘𐴠𐴕𐴡𐴌 𐴎𐴞𐴔𐴧𐴝𐴊𐴝𐴌𐴞 𐴘𐴥𐴡 𐴁𐴡𐴓𐴞 𐴏𐴥𐴡𐴉𐴞𐴌𐴠 𐴈𐴡𐴘𐴧𐴠 𐴱𐴱

𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴎𐴟𐴓𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴞𐴀𐴞𐴕 , 𐴕𐴡𐴏𐴥𐴡𐴓 𐴉𐴥𐴟𐴌𐴝 𐴑𐴝𐴌𐴖𐴝𐴘 𐴅𐴠𐴕𐴟𐴏𐴥𐴝𐴙𐴋 𐴁𐴡𐴓𐴞 𐴀𐴝𐴔𐴠𐴌𐴞𐴑𐴝 𐴘𐴠 𐴄𐴤𐴞𐴑 𐴊𐴤𐴝𐴙𐴅𐴧𐴡 𐴒𐴡𐴌𐴥𐴞 𐴊𐴞𐴘𐴠𐴊𐴠 𐴔𐴡𐴎𐴞𐴕 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴌𐴞𐴁𐴤𐴡𐴓𐴧𐴝 , 𐴀𐴝𐴔𐴠𐴌𐴞𐴑𐴝 𐴀𐴝𐴌 𐴁𐴝𐴚𐴓𐴝𐴊𐴠𐴐𐴤𐴠 𐴉𐴥𐴟𐴣𐴖𐴝𐴣𐴃𐴞 𐴈𐴝𐴔 𐴒𐴡𐴌𐴥𐴞 𐴉𐴝𐴌𐴞𐴁𐴤𐴡𐴊𐴠 𐴘𐴥𐴝𐴀𐴝𐴕𐴡𐴌 𐴁𐴝𐴁𐴡𐴃𐴠 𐴃𐴦𐴟𐴛 𐴑𐴞 𐴁𐴟𐴎𐴡𐴀𐴡𐴌 , 𐴏𐴥𐴟𐴖𐴝𐴓𐴡𐴌 𐴅𐴟𐴖𐴝𐴁𐴡𐴃 𐴏𐴥𐴡𐴉𐴞𐴌𐴠 𐴀𐴞𐴀𐴞𐴕 𐴈𐴡𐴘𐴧𐴠𐴊𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴎𐴝𐴘𐴁𐴝𐴌 𐴁𐴝𐴁𐴡𐴃𐴠 , 𐴁𐴡𐴌𐴔𐴥𐴝 𐴀𐴝𐴌 𐴁𐴝𐴚𐴓𐴝𐴊𐴠𐴐𐴢 𐴊𐴟𐴕𐴥𐴞 𐴊𐴠𐴐𐴢 𐴔𐴞𐴓𐴞 𐴕𐴞𐴎𐴤𐴝𐴔𐴡𐴌 𐴏𐴥𐴝𐴣𐴀𐴝𐴃𐴠 𐴈𐴝𐴔 𐴒𐴡𐴌𐴥𐴞 𐴎𐴝𐴀𐴝𐴌 𐴁𐴡𐴓𐴞 𐴘𐴥𐴡 𐴏𐴥𐴡𐴉𐴞𐴌𐴠 𐴈𐴡𐴘𐴧𐴠 , 𐴅𐴟𐴕 𐴔𐴥𐴝𐴐𐴡𐴌 𐴹 𐴱 𐴃𐴝𐴌𐴥𐴞𐴑𐴡𐴃 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴀𐴥𐴡𐴑𐴧𐴡𐴓𐴡𐴃 𐴎𐴝𐴒𐴝 𐴎𐴝𐴒𐴝 , 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 , 𐴕𐴞𐴎𐴡𐴌 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴎𐴝𐴘𐴁𐴡𐴓𐴧𐴥𐴝 𐴀𐴠𐴑𐴧𐴟 𐴄𐴝𐴙𐴔𐴡𐴃 𐴇𐴥𐴡𐴌𐴃𐴝𐴓 𐴒𐴡𐴙𐴅𐴧𐴤𐴙𐴠 , 𐴘𐴥𐴝𐴀𐴝𐴌 𐴀𐴥𐴡 𐴀𐴠𐴑 𐴇𐴝𐴉𐴃𐴝 𐴀𐴝𐴒𐴠 , 𐴁𐴡𐴌𐴔𐴥𐴝 𐴀𐴝𐴌 𐴁𐴝𐴚𐴓𐴝𐴊𐴠𐴐𐴢 , 𐴊𐴟𐴕𐴥𐴞 𐴊𐴠𐴐𐴤𐴡𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴞 𐴀𐴡𐴉𐴞𐴏𐴡𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓 𐴔𐴞𐴓𐴞 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴎𐴝𐴘𐴁𐴡𐴓𐴧𐴥 𐴝 𐴎𐴡𐴌𐴟𐴌𐴞 𐴇𐴥𐴝𐴓𐴡𐴃𐴡𐴌 𐴖𐴡𐴌𐴠 𐴔𐴡𐴐𐴖𐴝𐴌𐴝 𐴘𐴥𐴡 𐴒𐴡𐴙𐴅𐴧𐴤𐴙𐴠 𐴱𐴱

Sources : burmese.voanews.com