𐴁𐴡𐴌𐴔𐴥𐴝𐴌 𐴏𐴥𐴡𐴚𐴑𐴡𐴄 𐴇𐴥𐴡𐴓 𐴒𐴡𐴌𐴥𐴞𐴁𐴤𐴡𐴓𐴧𐴝 𐴕𐴡𐴘𐴧𐴝 𐴃𐴡𐴌𐴞𐴑𐴝 𐴁𐴝𐴕𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴔𐴡𐴓𐴠𐴆𐴤𐴙𐴝 𐴘𐴠 𐴈𐴡𐴘𐴧𐴠 𐴱𐴱

𐴁𐴡𐴌𐴔𐴥𐴝𐴃 𐴐𐴤𐴝𐴕𐴃𐴞 𐴕𐴞𐴌𐴝𐴉𐴡𐴃 𐴀𐴝𐴕𐴥𐴞𐴁𐴤𐴡𐴓𐴧𐴝 𐴁𐴝𐴕𐴝𐴘 𐴉𐴝𐴌𐴠𐴊𐴠 , 𐴘𐴝𐴃𐴡 𐴁𐴝𐴕𐴝𐴘𐴁𐴤𐴝𐴌 𐴀𐴝𐴏𐴥𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴕𐴡𐴘𐴧𐴠 𐴌𐴝𐴏𐴧𐴝 , 𐴃𐴡𐴌𐴞𐴑𐴝 𐴀𐴥𐴡𐴑𐴧𐴡𐴓 𐴁𐴝𐴕𐴝𐴘 𐴈𐴝𐴔 𐴒𐴡𐴌𐴥𐴞 𐴎𐴝𐴀𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴔𐴡𐴓𐴠𐴆𐴤𐴙𐴝𐴌 𐴇𐴥𐴑𐴟𐴔𐴡𐴃𐴠 𐴈𐴡𐴘𐴧𐴠 𐴱𐴱

𐴁𐴞𐴐𐴤𐴞𐴃 𐴁𐴝𐴌𐴠 𐴀𐴞𐴕𐴋𐴞𐴘𐴝 𐴕𐴙𐴟 𐴊𐴤𐴠𐴓𐴞 𐴐𐴤𐴡𐴀𐴡𐴌𐴡𐴃 𐴀𐴥𐴡𐴘𐴧𐴠𐴊𐴠 , 𐴀𐴝𐴏𐴞𐴘𐴠𐴕-𐴀𐴞𐴕𐴋𐴞𐴘𐴝𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 𐴀𐴥𐴡𐴑𐴧𐴡𐴓𐴡𐴌 𐴈𐴥𐴝𐴏𐴢 𐴔𐴡𐴐𐴖𐴝𐴌𐴝 𐴁𐴡𐴘𐴍𐴡𐴑𐴡𐴃 , 𐴈𐴡𐴃𐴤𐴝 𐴘𐴝𐴀𐴝𐴕 𐴔𐴡𐴓𐴠𐴆𐴤𐴙𐴝𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴏𐴝𐴘𐴉𐴟𐴊𐴧𐴞𐴕 𐴀𐴝𐴁𐴊𐴟𐴓𐴧𐴝𐴇𐴢 𐴘𐴠 𐴈𐴡𐴘𐴧𐴠𐴊𐴠 𐴱𐴱

𐴘𐴥𐴝𐴀𐴝𐴌 𐴁𐴦𐴝𐴊𐴠 𐴔𐴡𐴓𐴠𐴆𐴤𐴙𐴝 𐴀𐴥𐴞𐴏𐴝𐴉𐴠 𐴁𐴠𐴒𐴧𐴤𐴟𐴕 𐴔𐴞𐴓𐴞 𐴋𐴡𐴣𐴀𐴡𐴌 𐴒𐴡𐴌𐴥𐴞 𐴕𐴡𐴘𐴧𐴝 𐴃𐴡𐴌𐴞𐴑𐴝 , 𐴌𐴝𐴏𐴧𐴝 𐴁𐴝𐴕𐴝𐴘 𐴃𐴟𐴖𐴝𐴘 𐴕𐴠𐴀𐴠𐴓𐴝𐴘 𐴁𐴝𐴀𐴞𐴌 𐴒𐴡𐴌𐴥𐴞𐴁𐴤𐴝𐴌 𐴐𐴤𐴡𐴣𐴀𐴡𐴃 , 𐴊𐴠𐴐𐴤𐴡𐴙𐴃𐴧𐴝 𐴀𐴠𐴃𐴧𐴠𐴉𐴝𐴑𐴞 𐴇𐴥𐴡𐴑𐴟𐴔𐴡𐴃 ( 𐴀𐴠𐴕 𐴘𐴟 𐴅𐴞 ) 𐴀𐴝𐴌 𐴕𐴠𐴐𐴕𐴥𐴠𐴓 𐴓𐴞𐴒𐴢 𐴉𐴡𐴌 𐴋𐴞 𐴔𐴟 𐴑𐴠𐴌𐴠𐴏𐴞 ( 𐴀𐴠𐴕 𐴀𐴠𐴓 𐴋𐴞 ) 𐴀𐴝𐴌 𐴘𐴟𐴕𐴝𐴘𐴄𐴤𐴠𐴋 𐴕𐴠𐴐𐴤𐴠𐴕 ( 𐴘𐴟 𐴀𐴠𐴕 ) 𐴱𐴱

𐴀𐴞𐴃𐴝𐴌𐴥𐴝𐴌𐴠 𐴀𐴥𐴟𐴊𐴧𐴝 𐴉𐴥𐴟𐴣𐴖𐴝𐴣𐴃𐴞 𐴓𐴡𐴘 𐴁𐴡𐴓𐴧𐴥𐴝 𐴁𐴝𐴌 𐴁𐴝𐴌 𐴒𐴡𐴌𐴥𐴞 𐴔𐴡𐴓𐴠𐴆𐴤𐴙𐴝 𐴘𐴠 𐴈𐴡𐴘𐴧𐴠𐴊𐴠 𐴘𐴥𐴝𐴀𐴝𐴕 𐴀𐴠𐴏𐴄𐴦𐴠𐴙𐴄𐴔𐴥𐴠𐴕𐴡𐴃 𐴓𐴠𐴙𐴑𐴧𐴤𐴙𐴠 𐴱𐴱 𐴀𐴝𐴏𐴞𐴘𐴠𐴕- 𐴀𐴞𐴕𐴋𐴞𐴘𐴝 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 𐴀𐴥𐴡𐴑𐴧𐴡𐴓 𐴔𐴞𐴓𐴞 𐴒𐴡𐴙𐴅𐴧𐴤𐴙𐴠𐴊𐴠 𐴔𐴞𐴄𐴤𐴞𐴚𐴡𐴃 𐴐𐴤𐴡𐴊𐴡𐴌𐴞 𐴀𐴝𐴌 𐴉𐴟𐴎𐴞 𐴓𐴝𐴒𐴝 𐴐𐴤𐴡𐴣𐴀𐴡 𐴏𐴝𐴘𐴁𐴝𐴌𐴡𐴌 𐴕𐴞𐴌𐴝𐴉𐴡𐴃 , 𐴁𐴠𐴒𐴧𐴤𐴟𐴕𐴠 𐴔𐴞𐴓𐴞 𐴀𐴠𐴑𐴧𐴟 𐴉𐴥𐴟𐴣𐴖𐴝𐴣𐴃𐴞 𐴒𐴡𐴌𐴥𐴡𐴕𐴡𐴌 𐴖𐴡𐴌𐴠 𐴌𐴝𐴎𐴞𐴕𐴝𐴔𐴝 𐴀𐴥𐴡𐴘𐴧𐴠 𐴱𐴱

𐴑𐴟𐴁𐴤𐴝𐴙𐴋 𐴁𐴞𐴘𐴝𐴌𐴝𐴔𐴡 𐴌𐴥𐴠 𐴁𐴤𐴝𐴌𐴝𐴘 𐴕𐴠𐴀𐴠𐴓𐴞 𐴀𐴝𐴙𐴐𐴧𐴤𐴙𐴠𐴊𐴠 𐴈𐴝𐴓 𐴀𐴞𐴁𐴤𐴝𐴃 ,𐴊𐴠𐴐𐴢 𐴀𐴥𐴡𐴑𐴧𐴡𐴓 𐴁𐴠𐴒𐴧𐴤𐴞𐴕 , 𐴊𐴠𐴐𐴤𐴡𐴌 𐴏𐴥𐴝𐴔𐴧𐴡𐴌 𐴃𐴡𐴌𐴑𐴞𐴌 𐴓𐴥𐴝 𐴀𐴝𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴃𐴡𐴌𐴑𐴞𐴌 𐴓𐴥𐴝 , 𐴀𐴝𐴉𐴡𐴏𐴡𐴃 𐴃𐴦𐴝𐴓𐴧𐴟𐴑 𐴁𐴤𐴝𐴓𐴝 𐴌𐴝𐴑𐴤𐴞 𐴉𐴥𐴟𐴣𐴖𐴝𐴣𐴃𐴞 𐴈𐴝𐴔 𐴒𐴡𐴌𐴥𐴞 𐴎𐴡𐴀𐴡𐴕 𐴎𐴡𐴌𐴟𐴌𐴞 , 𐴀𐴥𐴠𐴃𐴡𐴓𐴧𐴝 𐴀𐴝𐴏𐴞𐴘𐴠𐴕 𐴀𐴝𐴌 𐴀𐴞𐴕𐴋𐴞𐴘𐴝 𐴔𐴞𐴓𐴞 𐴈𐴝𐴔 𐴒𐴡𐴌𐴥𐴞 𐴎𐴝𐴘𐴁𐴡𐴓𐴧𐴥𐴝 𐴔𐴡𐴓𐴠𐴆𐴤𐴙𐴝𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴠 𐴈𐴡𐴘𐴧𐴠 𐴱𐴱

Sources : RFAburmese