𐴀𐴝𐴌𐴑𐴝𐴕 𐴀𐴝𐴎𐴝𐴊 𐴉𐴝𐴄𐴞 ( 𐴀𐴠 𐴀𐴠𐴓 𐴂𐴞 ) 𐴀𐴝𐴌 𐴑𐴟𐴀𐴟𐴂𐴑𐴝𐴌 𐴔𐴠𐴓𐴠𐴄𐴠𐴌𐴞𐴌 𐴕𐴠𐴃𐴝 𐴓𐴡𐴘 𐴔𐴞𐴄𐴤𐴞𐴚 𐴱𐴱

𐴊𐴠𐴐𐴤𐴡𐴙𐴃𐴧𐴝 𐴔𐴡𐴒𐴢 𐴀𐴥𐴝𐴣𐴃𐴞𐴘𐴝𐴌𐴞 𐴉𐴝𐴄𐴞 ( 𐴀𐴠 𐴀𐴠𐴓 𐴂𐴞 ) 𐴀𐴝𐴌𐴑𐴝𐴕 𐴀𐴝𐴎𐴝𐴊 𐴉𐴝𐴄𐴞𐴌 𐴊𐴟𐴘𐴀𐴡𐴔 𐴀𐴥𐴟𐴑𐴤𐴝𐴄𐴤𐴝 / 𐴋𐴦𐴡 𐴏𐴥𐴡 𐴔𐴙𐴥𐴝 𐴘𐴝𐴎𐴝 𐴓𐴥𐴞𐴚𐴡𐴌 𐴏𐴥𐴡𐴊𐴧𐴝𐴌𐴞𐴃 , 𐴋𐴦𐴝𐴘 𐴀𐴟𐴒𐴧𐴤𐴗𐴝 , 𐴅𐴟𐴕 𐴔𐴥𐴝𐴐𐴡𐴌 𐴳 𐴱 𐴃𐴝𐴌𐴥𐴞𐴑𐴡𐴃 𐴑𐴟𐴀𐴟𐴂𐴑𐴝𐴌 𐴔𐴠𐴓𐴠𐴄𐴠𐴌𐴞𐴌 𐴕𐴠𐴃𐴝 / 𐴔𐴥𐴞𐴚 𐴀𐴡𐴚 𐴓𐴝𐴙𐴚 𐴓𐴡𐴘 , 𐴕𐴠𐴂𐴙𐴠 𐴋𐴦𐴡𐴃 𐴔𐴞𐴄𐴤𐴞𐴚 𐴔𐴡𐴐𐴖𐴝𐴌𐴝 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴠 𐴐𐴤𐴝𐴕𐴃𐴞 𐴔𐴡𐴐𐴖𐴝𐴌𐴝 𐴁𐴡𐴘𐴍𐴡𐴑𐴡𐴃 , 𐴊𐴠𐴐𐴤𐴡𐴌 𐴑𐴟𐴊𐴟𐴌𐴟𐴃𐴞 𐴇𐴥𐴝𐴓𐴡𐴃 𐴓𐴡𐴘 𐴉𐴥𐴞𐴄 𐴀𐴥𐴡𐴀𐴡𐴊𐴠 𐴁𐴡𐴕𐴠𐴊𐴠 𐴇𐴥𐴝𐴓𐴡𐴃 𐴀𐴝𐴌 𐴈𐴡𐴔 𐴐𐴤𐴡𐴙𐴚𐴒𐴙𐴝 𐴑𐴡𐴗𐴔𐴡𐴌 𐴀𐴥𐴝𐴣𐴃𐴞𐴘𐴝𐴌𐴞 𐴒𐴟𐴌𐴟𐴉𐴡𐴌 𐴐𐴤𐴡𐴔𐴁𐴡𐴁 𐴀𐴥𐴡𐴘 𐴉𐴝𐴌𐴠𐴊𐴠 𐴋𐴞𐴔𐴦𐴝𐴕 𐴀𐴥𐴡𐴑𐴧𐴡𐴓𐴡𐴌 𐴃𐴡𐴉𐴏𐴞𐴓𐴡𐴌 𐴖𐴡𐴌𐴠 𐴎𐴟𐴌 𐴊𐴞𐴘𐴡𐴌𐴥𐴠 𐴈𐴡𐴃𐴤𐴝 𐴈𐴟𐴖𐴝 𐴎𐴝𐴘𐴁𐴡 𐴱𐴱

𐴈𐴥𐴝𐴔𐴝𐴈𐴥𐴝 𐴓𐴟𐴖𐴥𐴝 𐴀𐴥𐴡𐴌𐴝𐴘𐴁𐴤𐴝𐴌 𐴕𐴞𐴘𐴡𐴃 𐴓𐴡𐴘 𐴐𐴤𐴝𐴕𐴃𐴞 𐴁𐴡𐴘𐴍𐴡𐴑𐴡𐴃 𐴕𐴡 𐴀𐴝𐴀𐴝𐴘 , 𐴊𐴠𐴐𐴤𐴡𐴙𐴃𐴧𐴝 𐴀𐴥𐴝𐴣𐴃𐴞𐴘𐴝𐴌𐴞 𐴒𐴟𐴌𐴟𐴉𐴢 𐴀𐴥𐴞𐴏𐴝𐴉𐴠 , 𐴊𐴠𐴐𐴤𐴡𐴌 𐴀𐴝𐴌 𐴎𐴝𐴒𐴝𐴌 𐴉𐴥𐴝𐴘𐴊𐴝𐴌𐴠 𐴑𐴝𐴔𐴞𐴘𐴝𐴁 𐴁𐴝𐴕𐴝𐴘 𐴁𐴤𐴡𐴓𐴧𐴝 , 𐴁𐴡𐴀𐴡𐴘 𐴔𐴡𐴐𐴖𐴝𐴌𐴝 𐴒𐴡𐴌𐴥𐴞𐴁𐴤𐴝𐴌 𐴊𐴞𐴓 𐴃𐴤𐴝𐴑𐴞𐴓𐴥𐴠 , 𐴀𐴝𐴁𐴧𐴝𐴌 𐴊𐴟𐴀𐴝𐴌𐴝 𐴁𐴡𐴀𐴡𐴘 𐴔𐴡𐴐𐴖𐴝𐴌𐴝 𐴒𐴡𐴌𐴥𐴞𐴁𐴤𐴡𐴓𐴧𐴝 𐴊𐴝𐴖𐴡𐴃 𐴊𐴞𐴀𐴞𐴁𐴡 𐴁𐴡𐴓𐴞 , 𐴔𐴠𐴓𐴠𐴄𐴠𐴌𐴞𐴌 𐴕𐴠𐴃𐴝 𐴘𐴠 𐴈𐴡𐴘𐴧𐴠𐴊𐴠 𐴘𐴥𐴝𐴀𐴝𐴕 𐴔𐴠𐴓𐴠𐴄𐴠𐴌𐴞𐴌 𐴈𐴥𐴡𐴁𐴡𐴌𐴡𐴃 𐴈𐴡𐴘𐴧𐴠 𐴱𐴱

𐴀𐴥𐴞𐴀𐴞𐴕 𐴁𐴦𐴝𐴊𐴠 𐴉𐴝𐴄𐴞 𐴁𐴠𐴒𐴧𐴤𐴟𐴕 𐴔𐴞𐴓𐴞 𐴋𐴞𐴔𐴟𐴑𐴠𐴌𐴠𐴏𐴞 𐴌𐴥𐴠 𐴀𐴝𐴔𐴥𐴡𐴓𐴡𐴃 𐴀𐴝𐴕𐴥𐴞𐴁𐴤𐴝𐴌 𐴈𐴝𐴔 , 𐴋𐴞𐴔𐴟𐴑𐴠𐴌𐴠𐴏𐴞 𐴀𐴝𐴌 𐴉𐴠𐴋𐴠𐴌𐴠𐴓𐴞𐴎𐴠𐴔𐴡𐴌 𐴔𐴟𐴓𐴡𐴌 𐴖𐴡𐴌𐴠 𐴊𐴠𐴐𐴤𐴡𐴌 𐴕𐴞𐴘𐴡𐴔 𐴑𐴝𐴕𐴟𐴕 𐴁𐴝𐴕𐴝𐴁𐴤𐴝𐴌 𐴁𐴝𐴁𐴡𐴃𐴠 𐴈𐴝𐴔 , 𐴏𐴥𐴞𐴘𐴝𐴏𐴞 𐴀𐴠𐴃𐴠𐴁𐴝𐴌𐴠 𐴉𐴡𐴌𐴥𐴡𐴑 𐴀𐴥𐴡𐴘𐴧𐴠𐴊𐴠 𐴌𐴝𐴘 𐴀𐴝𐴌 𐴔𐴡𐴕𐴡𐴌 𐴁𐴤𐴝𐴉𐴢 , 𐴀𐴥𐴞𐴀𐴞𐴕𐴡𐴌𐴠 𐴐𐴤𐴟𐴊𐴠 𐴐𐴤𐴝𐴕𐴃𐴞 𐴁𐴡𐴘𐴍𐴡𐴑 𐴁𐴡𐴀𐴡𐴘 𐴘𐴡𐴌𐴥𐴠 𐴉𐴥𐴝𐴘𐴏𐴠𐴓𐴝 𐴒𐴡𐴌𐴥𐴞𐴁𐴤𐴡𐴓𐴧𐴝 𐴘𐴥𐴡 𐴏𐴥𐴝𐴉𐴢 𐴏𐴥𐴝𐴉𐴢 𐴒𐴡𐴌𐴥𐴞 𐴔𐴡𐴐𐴖𐴝𐴌𐴝 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴁𐴡𐴘𐴍𐴡𐴑𐴡𐴃 𐴔𐴠𐴓𐴠𐴄𐴠𐴌𐴞𐴌 𐴕𐴠𐴃𐴝𐴌 𐴉𐴥𐴟𐴣𐴖𐴝𐴣𐴃𐴞 𐴁𐴟 𐴆𐴤𐴙𐴟𐴑 𐴅𐴤𐴞 / 𐴔𐴙𐴥𐴝 𐴄𐴤𐴗𐴠𐴕 𐴀𐴥𐴟 , 𐴊𐴟𐴘𐴀𐴡𐴔 𐴁𐴟 𐴆𐴤𐴙𐴟𐴑 𐴅𐴤𐴞 / 𐴔𐴥𐴟 𐴔𐴙𐴥𐴝𐴚 𐴄𐴤𐴗𐴠𐴕 𐴀𐴝𐴌 𐴘𐴝 𐴂𐴙𐴠 𐴀𐴝𐴙𐴐𐴧𐴤𐴙𐴠 , 𐴀𐴠 𐴀𐴠𐴓 𐴂𐴞𐴌 𐴃𐴡𐴌𐴉𐴡𐴌𐴃𐴧𐴟 𐴊𐴟𐴘𐴀𐴡𐴔 𐴀𐴥𐴟𐴑𐴤𐴝𐴄𐴤𐴝 / 𐴋𐴦𐴡 𐴏𐴥𐴡 𐴔𐴙𐴥𐴝 𐴘𐴝 𐴎𐴝𐴓𐴥𐴞𐴚 𐴀𐴝𐴌 𐴀𐴝𐴔𐴠𐴓𐴝𐴌 𐴔𐴞𐴔𐴁𐴤𐴡𐴌 𐴑𐴝𐴙𐴚 𐴏𐴥𐴟 𐴔𐴙𐴥𐴝 𐴀𐴝𐴌 𐴑𐴝𐴙𐴚 𐴂𐴡 𐴓𐴥𐴞𐴚 𐴀𐴝𐴙𐴐𐴧𐴤𐴙𐴠 𐴱𐴱

𐴑𐴟𐴀𐴟𐴂𐴑𐴝𐴌 𐴔𐴠𐴓𐴠𐴄𐴠𐴌𐴞𐴌 𐴕𐴠𐴃𐴝 𐴁𐴟 𐴆𐴤𐴙𐴟𐴑 𐴔𐴥𐴟 𐴅𐴤𐴞 / 𐴔𐴥𐴞𐴚 𐴀𐴡𐴚 𐴓𐴝𐴙𐴚𐴠 𐴐𐴤𐴝𐴕𐴃𐴞 𐴔𐴡𐴐𐴖𐴝𐴌𐴝 𐴁𐴡𐴘𐴍𐴡𐴑 𐴁𐴡𐴘 𐴁𐴤𐴡𐴓𐴧𐴝 𐴀𐴠𐴂𐴌𐴞𐴓 𐴔𐴥𐴝𐴐𐴡𐴌 𐴲 𐴲 𐴃𐴝𐴌𐴥𐴞𐴑𐴡𐴃 𐴊𐴝𐴖𐴡𐴃 𐴊𐴞𐴘𐴠 , 𐴁𐴡𐴘𐴍𐴡𐴑 𐴁𐴡𐴘𐴁𐴤𐴡𐴓𐴧𐴝 𐴰 𐴱 𐴉𐴝𐴄𐴞 𐴘𐴠 𐴕𐴝𐴔 𐴃𐴟𐴓𐴥𐴞 𐴊𐴞𐴘𐴠 , 𐴉𐴡𐴙𐴃𐴧𐴡 𐴉𐴝𐴄𐴞 𐴓𐴡𐴘 𐴀𐴠𐴑𐴤𐴠𐴓𐴝 𐴁𐴤𐴝𐴉𐴠 𐴕𐴠𐴂𐴙𐴠 𐴋𐴦𐴡𐴃 𐴔𐴡𐴐𐴖𐴝𐴌𐴝 𐴒𐴡𐴌𐴥𐴠𐴌 𐴱𐴱

Sources : dvbburmese