𐴏𐴥𐴡 𐴔𐴥𐴝𐴐𐴡𐴌 𐴁𐴤𐴟𐴃𐴡𐴌𐴠 𐴒𐴟𐴣𐴍𐴝 𐴁𐴡𐴌𐴔𐴥𐴝𐴃𐴧𐴟 𐴰 𐴰 𐴶 𐴔𐴟𐴏𐴡𐴓𐴔𐴝𐴕 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴝𐴌𐴑𐴝𐴕 𐴐𐴤𐴡𐴣𐴀𐴡 𐴒𐴟𐴣𐴍𐴝 𐴁𐴡𐴌𐴔𐴥𐴝𐴃𐴧𐴟 𐴱 𐴲 𐴰 𐴲 𐴐𐴤𐴡𐴕 𐴋𐴞𐴏𐴡𐴔𐴁𐴡𐴌 𐴔𐴥𐴝𐴐𐴢 𐴀𐴥𐴡𐴘𐴃𐴠 𐴲 𐴲 𐴰 𐴲 𐴐𐴤𐴡𐴕 𐴅𐴟𐴕 𐴔𐴥𐴝𐴐𐴡𐴌 𐴐𐴤𐴟𐴌𐴟 𐴉𐴡𐴙𐴅𐴧𐴡𐴕𐴃𐴡 , 𐴰 𐴰 𐴶 𐴏𐴥𐴡 𐴐𐴤𐴡𐴃𐴡𐴌 𐴖𐴡𐴌𐴠 𐴔𐴟𐴏𐴡𐴓𐴔𐴝𐴕 𐴁𐴡𐴕 𐴒𐴡𐴙𐴅𐴧𐴤𐴙𐴠 , 𐴀𐴝𐴌𐴑𐴝𐴕𐴡𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴀𐴠𐴓𐴝𐴕 𐴀𐴝𐴌 𐴊𐴠𐴐𐴤𐴡𐴌 𐴁𐴤𐴟𐴃𐴡𐴌𐴡𐴌 𐴈𐴥𐴡𐴁𐴡𐴌 𐴀𐴥𐴡𐴑𐴧𐴡𐴓𐴡𐴃 𐴓𐴠𐴙𐴑𐴧𐴤𐴤𐴙𐴠𐴊𐴠 , 𐴀𐴥𐴠𐴃𐴧𐴟 𐴓𐴡𐴘 𐴔𐴟𐴄 𐴒𐴡𐴌𐴥𐴞 𐴀𐴝𐴌 𐴀𐴠𐴉𐴢 𐴀𐴠 𐴘𐴠 𐴓𐴠𐴙𐴑𐴧𐴤𐴙𐴊𐴠 𐴱𐴱

𐴒𐴡𐴃𐴡 𐴋𐴞𐴏𐴡𐴔𐴁𐴡𐴌 𐴔𐴥𐴝𐴐𐴤𐴡𐴃 𐴰 𐴷 𐴲 𐴎𐴡𐴕 , 𐴅𐴝𐴕𐴖𐴝𐴌𐴞 𐴔𐴥𐴝𐴐𐴤𐴡𐴃 𐴴 𐴲 𐴎𐴡𐴕 , 𐴉𐴥𐴠𐴌𐴖𐴝𐴌𐴞 𐴔𐴥𐴝𐴐𐴤𐴡𐴃 𐴵 𐴳 𐴱 𐴎𐴡𐴕 , 𐴔𐴝𐴌𐴠𐴆 𐴔𐴥𐴝𐴐𐴡𐴃 𐴴 𐴱 𐴎𐴡𐴕 , 𐴀𐴠𐴂𐴌𐴞𐴓 𐴔𐴥𐴝𐴐𐴤𐴡𐴃 𐴵 𐴳 𐴎𐴡𐴕 , 𐴔𐴠 𐴔𐴥𐴝𐴐𐴤𐴡𐴃 𐴴 𐴲 𐴱 𐴎𐴡𐴕 𐴁𐴠𐴒𐴧𐴤𐴟𐴕𐴠 𐴔𐴞𐴓𐴝𐴘 𐴲 𐴰 𐴶 𐴎𐴡𐴕 𐴔𐴟𐴏𐴡𐴓𐴔𐴝𐴕 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓 𐴁𐴠𐴀𐴝𐴙𐴕𐴞 𐴃𐴡𐴖𐴌𐴠 , 𐴉𐴝𐴕𐴞𐴌 𐴌𐴝𐴏𐴧𐴝 , 𐴉𐴥𐴟𐴖𐴝𐴕𐴝𐴌 𐴌𐴝𐴏𐴧𐴝 𐴁𐴤𐴝𐴀𐴝𐴘 𐴔𐴡𐴓𐴠𐴆𐴤𐴙𐴝 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 𐴀𐴝𐴌𐴑𐴝𐴕𐴡𐴌 𐴊𐴡𐴙𐴅𐴧𐴤𐴙𐴝 , 𐴀𐴥𐴠𐴔 𐴐𐴤𐴡𐴀𐴡𐴌𐴡𐴌 𐴀𐴞𐴚𐴑𐴟𐴖𐴝𐴌𐴞 𐴒𐴠𐴀𐴞𐴄 , 𐴌𐴠𐴕𐴒𐴟𐴕 , 𐴀𐴥𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴤𐴞𐴑 , 𐴀𐴡𐴒𐴤𐴝𐴘𐴌𐴥𐴝 𐴎𐴝𐴒𐴝 𐴀𐴞𐴀𐴞𐴕𐴡𐴃𐴧𐴟 𐴁𐴡𐴕 𐴀𐴥𐴡𐴘𐴧𐴠𐴊𐴠 𐴱𐴱

𐴎𐴝𐴒𐴝 𐴎𐴡𐴁𐴞𐴕 𐴊𐴟𐴖𐴝𐴕 𐴊𐴝𐴌𐴝 𐴁𐴠𐴏𐴞 𐴎𐴤𐴞𐴀𐴞 𐴘𐴡𐴌𐴥𐴠 𐴔𐴡𐴓𐴠𐴆𐴤𐴙𐴝 𐴎𐴝𐴔𐴝𐴘𐴌 𐴈𐴝𐴣𐴏𐴥𐴠 𐴉𐴡𐴣𐴀𐴡𐴏𐴝𐴘𐴁𐴤𐴝𐴌 𐴑𐴟𐴐𐴤𐴞𐴐𐴡𐴃 , 𐴎𐴤𐴞𐴀𐴞 𐴘𐴥𐴡 𐴀𐴥𐴝𐴌𐴝𐴘𐴓𐴝𐴔 𐴀𐴡 𐴐𐴤𐴡𐴔𐴁𐴡𐴃𐴧𐴞 𐴘𐴥𐴡 𐴀𐴥𐴝𐴌𐴝𐴘 𐴁𐴦𐴝𐴊𐴠 , 𐴎𐴞𐴕𐴊𐴞𐴒𐴞 𐴁𐴡𐴌𐴁𐴝𐴊 𐴀𐴥𐴡𐴘 𐴒𐴠𐴓𐴒𐴤𐴡𐴘 𐴁𐴡𐴓𐴞 𐴔𐴡𐴚𐴋𐴤𐴟𐴌𐴃𐴧𐴟 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

𐴔𐴝𐴕𐴥𐴟𐴙𐴐𐴢 𐴀𐴥𐴞𐴁𐴤𐴝𐴌 𐴎𐴤𐴞𐴀𐴞 𐴕𐴡𐴖𐴡𐴔𐴁𐴡𐴌𐴡𐴌 𐴹 𐴲 𐴃𐴝𐴌𐴥𐴞𐴑𐴡𐴃 𐴀𐴝𐴙𐴑𐴧𐴙𐴝𐴁 𐴓𐴡𐴘 𐴈𐴝𐴣𐴏𐴥𐴠 𐴔𐴠𐴘𐴥𐴟 𐴋𐴞𐴘𐴝𐴌 𐴉𐴡𐴏𐴥𐴞𐴔𐴠 𐴀𐴟𐴃𐴧𐴡𐴌𐴠 , 𐴷 𐴱 𐴔𐴝𐴙𐴓 𐴃𐴡𐴁𐴦𐴡𐴃𐴡𐴃 𐴊𐴡𐴙𐴅𐴧𐴙𐴝𐴃 𐴸 𐴲 𐴲 𐴎𐴡𐴕 𐴀𐴡𐴓𐴝 𐴁𐴟𐴄 𐴀𐴠𐴑𐴧𐴝𐴕𐴡𐴌𐴃𐴧𐴟 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 , 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴃𐴧𐴟 𐴹 𐴰 𐴱 𐴎𐴡𐴕𐴡𐴌𐴥𐴠 , 𐴔𐴡𐴚𐴋𐴤𐴟 𐴋𐴞𐴐𐴄𐴤𐴞𐴑𐴡𐴌 𐴀𐴝𐴊𐴝𐴓𐴡𐴃𐴠 𐴋𐴞𐴏𐴡𐴔𐴁𐴡𐴌 𐴔𐴥𐴝𐴐𐴤𐴡𐴌 𐴴 𐴱 𐴃𐴝𐴌𐴥𐴞𐴑𐴡𐴃 𐴱𐴱

𐴷 𐴴 𐴹 𐴱 𐴐𐴤𐴡𐴕𐴡𐴌 , 𐴀𐴠𐴔𐴞𐴒𐴞𐴌𐴞𐴐𐴤𐴠𐴕𐴡𐴌 𐴑𐴝𐴕𐴟𐴕 𐴊𐴤𐴝𐴌𐴝 𐴓𐴡𐴔𐴁𐴤𐴡𐴌 ( 𐴱 ) 𐴳 𐴱 𐴔𐴡𐴎𐴞𐴕 𐴉𐴝𐴣𐴏𐴢 𐴁𐴡𐴏𐴥𐴡𐴌 𐴎𐴞𐴘𐴡𐴓𐴡𐴌 𐴇𐴥𐴡𐴑𐴟𐴔 𐴒𐴡𐴙𐴅𐴧𐴤𐴙𐴠 , 𐴁𐴝𐴑𐴞 𐴒𐴤𐴟𐴕 𐴁𐴡𐴐𐴢 𐴕𐴡𐴀𐴡 𐴉𐴟𐴌𐴝𐴊𐴠 𐴀𐴥𐴠𐴃𐴡𐴓𐴧𐴝 𐴀𐴠𐴌𐴞 𐴊𐴞𐴀𐴞 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓 𐴑𐴠𐴀𐴠𐴔𐴡𐴃𐴧𐴟 𐴀𐴝𐴌 𐴉𐴝𐴌𐴝𐴌𐴃𐴧𐴟 , 𐴈𐴥𐴝𐴘𐴃𐴠 𐴓𐴡𐴘𐴃𐴠 𐴊𐴟𐴑 𐴉𐴝𐴀𐴝𐴌𐴊𐴧𐴠 𐴀𐴝𐴌 𐴊𐴠𐴐𐴤𐴡𐴌 𐴁𐴤𐴟𐴃𐴡𐴌𐴠 𐴀𐴝𐴎𐴝𐴊𐴞𐴌 𐴏𐴥𐴣𐴀𐴝𐴃𐴠 𐴏𐴡𐴓𐴝𐴉𐴥𐴞𐴌𐴝 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴠𐴌𐴊𐴧𐴠 𐴀𐴥𐴠𐴃𐴡𐴓𐴧𐴝 , 𐴐𐴤𐴡𐴐𐴤𐴡𐴔𐴁𐴡𐴃𐴧𐴞 𐴎𐴝𐴣𐴀𐴝 𐴀𐴝𐴏𐴥𐴠 𐴁𐴡𐴕𐴊𐴤𐴡𐴑 𐴁𐴠𐴏𐴞 𐴔𐴡𐴓𐴠𐴆𐴤𐴙𐴝 𐴎𐴝𐴀𐴝𐴌 𐴒𐴤𐴡𐴘𐴊𐴠 , 𐴀𐴠𐴑 𐴎𐴡𐴕 𐴔𐴝𐴕𐴥𐴟𐴙𐴐𐴢 𐴔𐴡𐴚𐴋𐴤𐴟𐴃𐴧𐴟 𐴰 𐴹 𐴓𐴝𐴑 𐴀𐴝𐴑𐴧𐴙𐴝𐴁𐴡𐴃𐴧𐴟 𐴰 𐴷 𐴓𐴝𐴑 𐴀𐴥𐴞𐴏𐴝𐴉𐴠 𐴔𐴡𐴓𐴠𐴆𐴤𐴙𐴝 𐴓𐴡𐴘 𐴎𐴝𐴀𐴝𐴌𐴊𐴧𐴠 𐴱𐴱

Sources : RFAburmese