𐴁𐴡𐴌𐴔𐴥𐴝𐴌 𐴔𐴦𐴝𐴔𐴠𐴓𐴝 𐴊𐴠𐴐𐴁𐴞𐴊𐴠𐴐𐴤𐴞 𐴀𐴡𐴉𐴡𐴌𐴝𐴊𐴞 𐴑𐴟𐴀𐴟𐴍𐴡𐴃 𐴉𐴝𐴌 𐴒𐴡𐴌𐴥𐴝𐴘 𐴊𐴞𐴀𐴞𐴁𐴡𐴓𐴧𐴥𐴝 𐴉𐴡𐴌𐴄𐴞𐴉𐴥𐴝𐴘 𐴌𐴥𐴝𐴙𐴄𐴏𐴢 𐴒𐴟𐴌𐴟𐴉𐴠 𐴀𐴝𐴂𐴞𐴓 𐴒𐴡𐴙𐴅𐴧𐴤𐴙𐴠 𐴱𐴱

𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴌𐴟𐴇𐴝𐴙𐴚𐴒𐴙𐴝𐴌𐴠 𐴕𐴞𐴘𐴡𐴔𐴞 𐴒𐴡𐴃𐴡 𐴁𐴤𐴝𐴉𐴠 𐴏𐴥𐴞𐴏𐴄𐴠𐴔 𐴓𐴡𐴘 𐴅𐴠𐴕𐴟𐴏𐴥𐴝𐴙𐴋 𐴒𐴡𐴌𐴥𐴞 𐴉𐴝𐴌𐴞 𐴁𐴤𐴡𐴓𐴧𐴝 , 𐴏𐴞𐴄𐴞𐴎𐴠𐴕𐴐𐴤𐴞𐴂𐴢 𐴁𐴤𐴠𐴌𐴞𐴉𐴞𐴑𐴦𐴠𐴐𐴤𐴠𐴕 𐴑𐴦𐴝𐴋 ( 𐴀𐴠𐴕 𐴁𐴞 𐴏𐴞 ) 𐴕𐴠𐴀𐴠𐴓𐴝𐴘 𐴊𐴞𐴘𐴠𐴊𐴤𐴠 𐴐𐴡𐴌𐴥𐴡𐴃 𐴀𐴥𐴞𐴀𐴞𐴕𐴡𐴌𐴥𐴠 𐴕𐴡𐴑𐴤𐴡𐴓 𐴒𐴡𐴌𐴥𐴞 𐴉𐴡𐴌𐴄𐴞𐴉𐴥𐴝𐴘 𐴌𐴥𐴝𐴙𐴄𐴏𐴢 𐴒𐴟𐴌𐴥𐴟𐴉𐴢 ) 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴃𐴡𐴕𐴎𐴞𐴔𐴠 𐴀𐴝𐴎𐴞𐴘𐴝 𐴀𐴠𐴏𐴄𐴦𐴠𐴙𐴄𐴔𐴥𐴠𐴕 𐴕𐴠𐴀𐴠𐴓𐴝𐴘𐴧𐴠 𐴱𐴱

𐴀𐴞𐴀𐴞𐴕 𐴊𐴟𐴘𐴀𐴡𐴔 𐴁𐴞𐴐𐴧𐴤𐴡 𐴎𐴟𐴊𐴧𐴤𐴡𐴃 𐴘𐴟𐴇𐴟𐴊𐴞 𐴀𐴥𐴡𐴑𐴧𐴡𐴓𐴡𐴌𐴠 𐴎𐴤𐴝𐴑𐴧𐴗𐴝 𐴔𐴝𐴌𐴞 𐴉𐴥𐴥𐴠𐴙𐴓𐴧𐴙𐴠 , 𐴎𐴤𐴝𐴑𐴧𐴗𐴝 𐴉𐴟𐴌𐴝 𐴊𐴞𐴘𐴠𐴊𐴤𐴠 𐴀𐴥𐴠𐴕𐴋𐴞𐴓𐴧𐴝 , 𐴀𐴝𐴌 𐴴 𐴹 𐴹 𐴱 𐴐𐴤𐴡𐴕𐴡𐴃 𐴌𐴝𐴖𐴝𐴕𐴋𐴝𐴃 𐴊𐴠𐴐𐴤𐴡𐴌 𐴁𐴤𐴟𐴃𐴡𐴌𐴡𐴌 𐴓𐴝𐴌𐴥𐴝𐴘𐴃 , 𐴈𐴡𐴔𐴐𐴤𐴡𐴙𐴚𐴒𐴙𐴝 𐴃𐴤𐴟𐴃𐴏𐴥𐴞 𐴑𐴡𐴗𐴔𐴡𐴌𐴠 𐴋𐴦𐴝𐴘 𐴋𐴦𐴝𐴘 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴘𐴥𐴡 𐴇𐴥𐴟 𐴁𐴟𐴇𐴥𐴟 𐴀𐴥𐴠 𐴃𐴡𐴌𐴞𐴑𐴝 𐴓𐴡𐴘 𐴒𐴡𐴌𐴥𐴞 𐴒𐴞𐴘𐴥𐴠𐴊𐴠 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴀𐴠𐴕 𐴁𐴞 𐴏𐴞 𐴑𐴦𐴝𐴍𐴡𐴃 𐴌𐴟𐴇𐴝𐴙𐴚𐴒𐴙𐴝 𐴕𐴡 𐴓𐴠𐴑𐴤𐴞 𐴁𐴝𐴚𐴒𐴝𐴓𐴞 𐴓𐴠𐴑𐴤𐴞 𐴁𐴦𐴝𐴊𐴠 , 𐴀𐴟𐴒𐴧𐴤𐴗𐴝 𐴑𐴡𐴗𐴔𐴡𐴌𐴥𐴠 𐴕𐴞𐴘𐴡𐴔𐴞 𐴒𐴡𐴃𐴡 𐴁𐴤𐴝𐴉𐴠 𐴏𐴥𐴞𐴏𐴄𐴠𐴔 𐴓𐴡𐴘 𐴈𐴝𐴍𐴞 𐴔𐴝𐴌𐴞 𐴉𐴥𐴟𐴌𐴝𐴘 𐴉𐴥𐴠𐴓𐴥𐴝𐴘𐴁𐴝𐴌 𐴔𐴡𐴑𐴏𐴥𐴡𐴊 𐴓𐴡𐴘 𐴒𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 𐴀𐴠𐴏𐴄𐴦𐴠𐴙𐴄𐴔𐴥𐴠𐴕𐴡𐴃 𐴓𐴠𐴙𐴑𐴧𐴤𐴙𐴠 𐴱𐴱

𐴕𐴝𐴎𐴞 𐴇𐴥𐴡𐴑𐴟𐴔𐴡𐴃𐴠 𐴑𐴡𐴗𐴔𐴞 𐴌𐴠𐴅𐴞𐴏𐴄𐴠𐴌𐴠𐴐𐴤𐴠𐴕 𐴑𐴦𐴝𐴋 𐴕𐴠𐴀𐴠𐴓𐴝𐴘 𐴊𐴞𐴀𐴞 𐴁𐴦𐴝𐴊𐴠 , 𐴘𐴟𐴇𐴟𐴊𐴞 𐴀𐴥𐴡𐴑𐴧𐴡𐴓𐴡𐴌𐴠 𐴔𐴝𐴙𐴅𐴧𐴤𐴠𐴙𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 , 𐴌𐴝𐴖𐴝𐴕𐴋𐴝𐴃 𐴔𐴝𐴎𐴤𐴠 𐴘𐴥𐴡 𐴃𐴤𐴟𐴃𐴏𐴥𐴞 𐴑𐴡𐴗𐴔𐴡𐴌𐴥𐴠 𐴊𐴠𐴐𐴤𐴡𐴙𐴃𐴧𐴝 𐴌𐴠𐴅𐴞𐴏𐴄𐴠𐴌𐴠𐴐𐴤𐴠𐴕 𐴑𐴦𐴝𐴋𐴡𐴌 𐴐𐴡𐴌𐴥𐴡𐴃 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴞 𐴈𐴝𐴍𐴝 𐴔𐴝𐴌𐴝 𐴒𐴡𐴙𐴅𐴧𐴤𐴙𐴠𐴊𐴠 , 𐴁𐴡𐴌𐴝𐴁𐴡𐴌 𐴇𐴥𐴟 𐴁𐴡𐴇𐴥𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴘𐴥𐴡 𐴀𐴥𐴠𐴕𐴋𐴞𐴓𐴧𐴝 𐴀𐴥𐴡𐴘𐴧𐴠 𐴁𐴡𐴓𐴞 , 𐴉𐴡𐴌𐴄𐴞𐴉𐴥𐴝𐴘 𐴌𐴥𐴝𐴙𐴄𐴏𐴢 𐴒𐴟𐴌𐴟𐴉𐴠 𐴈𐴡𐴘𐴧𐴠 𐴱𐴱

𐴁𐴡𐴌𐴔𐴥𐴝𐴌 𐴔𐴦𐴝𐴔𐴠𐴓𐴝 𐴌𐴥𐴠 𐴈𐴥𐴝𐴌𐴝𐴃𐴧𐴟 𐴈𐴥𐴝𐴌𐴝 𐴊𐴠𐴐𐴁𐴞𐴊𐴠𐴐𐴤𐴞 𐴀𐴡𐴉𐴡𐴌𐴝𐴊𐴞 𐴀𐴝𐴊𐴝𐴓𐴡𐴃 , 𐴀𐴝𐴘 𐴏𐴞 𐴏𐴞 𐴑𐴟𐴀𐴟𐴍𐴡𐴃 𐴉𐴝𐴌 𐴒𐴡𐴌𐴥𐴝𐴘 𐴊𐴞𐴀𐴞 𐴁𐴡𐴓𐴧𐴥𐴝 , 𐴉𐴡𐴌𐴄𐴞𐴉𐴥𐴝𐴘 𐴌𐴥𐴝𐴙𐴄 𐴒𐴟𐴌𐴟𐴉𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴇𐴥𐴠𐴉𐴝𐴎𐴡𐴃𐴞 𐴑𐴡𐴕𐴏𐴥𐴞𐴓𐴡𐴌𐴥𐴠 𐴈𐴡𐴘𐴧𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴌𐴥𐴠 𐴔𐴝𐴕𐴞 𐴕𐴡 𐴓𐴡𐴘 𐴁𐴤𐴡𐴓𐴧𐴝 𐴀𐴝𐴌 𐴔𐴠𐴓𐴠𐴄𐴠𐴌𐴞𐴌 𐴈𐴝𐴣𐴏𐴥𐴠 𐴀𐴥𐴝𐴣𐴃𐴞𐴘𐴝𐴌 𐴀𐴡 𐴄𐴞𐴛𐴝 𐴉𐴡𐴣𐴀𐴡𐴏𐴠𐴊𐴠 𐴎𐴠𐴊𐴞𐴀𐴞𐴕 𐴌𐴝𐴏𐴧𐴝 𐴀𐴝𐴏𐴥𐴠 , 𐴁𐴠𐴒𐴧𐴤𐴞𐴕 𐴁𐴡𐴕 𐴒𐴡𐴌𐴥𐴞 𐴊𐴞𐴀𐴞𐴁𐴡𐴓𐴧𐴥𐴝 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴁𐴤𐴟𐴃𐴡𐴌𐴠 𐴀𐴝𐴏𐴥𐴠𐴊𐴤𐴠 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌 𐴈𐴝𐴣𐴏𐴥𐴠 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠 , 𐴀𐴝𐴌 𐴊𐴠𐴐𐴤𐴡𐴙𐴃𐴧𐴝 𐴀𐴠𐴃𐴧𐴠𐴉𐴝𐴑𐴞 𐴉𐴦𐴝𐴄𐴞 ( 𐴀𐴠𐴕 𐴘𐴟 𐴅𐴞 ) 𐴓𐴡𐴘 𐴃𐴦𐴝𐴓𐴧𐴟𐴑 𐴒𐴡𐴌𐴥𐴞 𐴔𐴡𐴊𐴡𐴊 𐴀𐴥𐴡𐴑𐴧𐴡𐴓 𐴊𐴞𐴀𐴞𐴁𐴡𐴓𐴧𐴥𐴝 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝 𐴀𐴝𐴌 𐴀𐴝𐴏𐴞𐴘𐴠𐴕𐴡𐴌𐴥𐴠 𐴈𐴡𐴘𐴧𐴠𐴊𐴠 𐴘𐴥𐴝𐴀𐴝𐴕 𐴉𐴡𐴌𐴄𐴞𐴉𐴥𐴝𐴘 𐴌𐴥𐴝𐴙𐴄 𐴒𐴟𐴌𐴟𐴉𐴠 𐴀𐴠𐴏𐴄𐴦𐴠𐴙𐴄𐴔𐴥𐴠𐴕𐴡𐴃 𐴓𐴠𐴙𐴑𐴧𐴤𐴙𐴠 𐴱𐴱

Sources : RFAburmese