𐴑𐴠𐴀𐴠𐴔𐴡𐴃 𐴉𐴟𐴖𐴝𐴙𐴕 𐴓𐴡𐴘 𐴁𐴟𐴌𐴦𐴝𐴘 𐴒𐴡𐴌𐴥𐴡𐴕𐴡𐴌 𐴑𐴠𐴙𐴏𐴡𐴃 𐴊𐴟𐴘 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴄𐴠𐴑𐴕𐴝𐴉𐴢 𐴀𐴠𐴓𐴝𐴑𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 , 𐴔𐴡𐴌𐴡𐴊 𐴉𐴟𐴖𐴝𐴙𐴕 𐴓𐴡𐴘 𐴁𐴟𐴌𐴦𐴝𐴘 𐴒𐴡𐴙𐴅𐴧𐴤𐴙𐴠 𐴊𐴠 𐴀𐴠𐴓𐴎𐴝𐴔 𐴓𐴡𐴘 , 𐴶 𐴱 𐴓𐴡𐴔𐴁𐴤𐴡𐴌 𐴀𐴥𐴝𐴣𐴃𐴞𐴘𐴝𐴌𐴞 𐴉𐴟𐴓𐴞𐴐𐴢 𐴁𐴠𐴄𐴤𐴠𐴓𐴞𐴘𐴠𐴕𐴠 ( 𐴀𐴠 𐴂𐴞 𐴁𐴞 𐴀𐴠𐴕 ) 𐴊𐴟𐴘 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴈𐴥𐴝𐴏𐴢 𐴌𐴠𐴂𐴟𐴄𐴝𐴌𐴠 𐴈𐴡𐴘𐴧𐴠 𐴱𐴱

𐴁𐴡𐴕 𐴀𐴥𐴡𐴘𐴧𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕 𐴀𐴥𐴡𐴙𐴓𐴊𐴠 𐴀𐴟𐴕𐴏𐴞 𐴉𐴝𐴌𐴝𐴚 𐴑𐴠𐴀𐴠𐴔 𐴁𐴡𐴓𐴡𐴑 – 𐴀𐴠 / 𐴳 𐴀𐴞𐴌 𐴀𐴞𐴔𐴝𐴔 𐴇𐴟𐴏𐴝𐴙𐴕𐴡𐴌 𐴉𐴟𐴖𐴝 𐴔𐴟𐴇𐴝𐴔𐴧𐴡𐴊 𐴘𐴟𐴕𐴟𐴏𐴢 𐴁𐴡𐴐𐴢 𐴰 𐴳 𐴁𐴡𐴏𐴥𐴡𐴌 𐴀𐴝𐴌 𐴁𐴡𐴓𐴡𐴑 – 𐴋𐴞 𐴳 𐴀𐴞𐴌 𐴐𐴤𐴡𐴔𐴏𐴟𐴓 𐴀𐴝𐴓𐴡𐴔𐴡𐴌 𐴉𐴟𐴖𐴝 𐴕𐴟𐴌 𐴁𐴡𐴐𐴤𐴡𐴌 𐴁𐴡𐴐𐴢 𐴴 𐴱 𐴁𐴡𐴏𐴥𐴡𐴌 𐴱𐴱

𐴔𐴠 𐴔𐴥𐴝𐴐𐴡𐴌 𐴸 𐴲 𐴃𐴝𐴌𐴥𐴞𐴑 𐴐𐴤𐴡𐴕𐴞 𐴁𐴝𐴌𐴠 𐴌𐴝𐴙𐴃𐴧𐴝 𐴉𐴦𐴡𐴕𐴠 𐴀𐴠𐴑 𐴁𐴝𐴎𐴠 , 𐴖𐴥𐴝𐴙𐴑𐴧𐴡𐴔 𐴘𐴟𐴕𐴞𐴀𐴡𐴕𐴡𐴌 𐴀𐴟𐴕𐴏𐴞 𐴉𐴝𐴌𐴝𐴚 𐴑𐴠𐴀𐴠𐴔𐴡𐴌 𐴋𐴞 𐴁𐴡𐴓𐴡𐴑𐴡𐴌 𐴉𐴝𐴀𐴝𐴌𐴞 𐴀𐴠𐴓𐴝𐴑𐴝𐴃𐴧𐴟 , 𐴀𐴥𐴞𐴃𐴝𐴌𐴝𐴌𐴥𐴠 𐴊𐴤𐴡𐴙𐴅𐴧𐴙𐴠 𐴁𐴡𐴓𐴞 𐴶 𐴱 𐴓𐴡𐴔𐴁𐴤𐴡𐴌 𐴀𐴠 𐴂𐴞 𐴁𐴞 𐴀𐴠𐴕 𐴉𐴟𐴓𐴞𐴐𐴡𐴌 𐴑𐴠𐴂𐴄𐴞𐴕 / 𐴃𐴝𐴌𐴞𐴑𐴟𐴓 𐴀𐴞𐴏𐴓𐴝𐴔𐴠 𐴈𐴡𐴘𐴧𐴠 𐴱𐴱

𐴔𐴠 𐴔𐴥𐴝𐴐𐴡𐴌 𐴷 𐴲 𐴃𐴝𐴌𐴥𐴞𐴑 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴁𐴞𐴀𐴞𐴕𐴧𐴝 𐴀𐴡𐴕𐴟𐴔𐴝𐴕𐴞𐴑 𐴰 𐴱 𐴁𐴝𐴎𐴠 𐴐𐴤𐴡𐴔𐴡𐴃 , 𐴀𐴟𐴕𐴏𐴞 𐴉𐴝𐴌𐴝𐴚 𐴑𐴠𐴀𐴠𐴔 𐴳 𐴲 𐴓𐴡𐴔𐴁𐴤𐴡𐴌𐴡𐴌 𐴁𐴡𐴓𐴡𐴑- 𐴋𐴞/𐴳 𐴑𐴠𐴀𐴠𐴔𐴡𐴃 𐴃𐴤𐴝𐴑𐴠𐴊𐴠 𐴀𐴟𐴒𐴧𐴤𐴗𐴝 𐴀𐴝𐴣𐴐𐴄𐴡 𐴁𐴡𐴏𐴥𐴡𐴙𐴅𐴧𐴙𐴝 𐴌𐴟𐴇𐴝𐴙𐴚𐴒𐴙𐴝 𐴉𐴟𐴖𐴝𐴌𐴥𐴠 , 𐴓𐴟𐴁 𐴓𐴝𐴓𐴥𐴡𐴏𐴢 𐴊𐴠𐴈𐴥𐴝𐴘 𐴀𐴝𐴐𐴤𐴝𐴔𐴞 𐴊𐴟𐴕𐴥𐴞 𐴎𐴡𐴕𐴠 , 𐴓𐴝𐴔𐴁𐴝 𐴁𐴞𐴓 𐴈𐴡𐴀𐴡𐴊𐴠 𐴀𐴥𐴠𐴍𐴠 𐴕𐴞𐴎𐴝𐴘 𐴁𐴟𐴌𐴦𐴝𐴘 𐴒𐴡𐴌𐴥𐴞 𐴊𐴟𐴕𐴥𐴞 𐴎𐴡𐴕 𐴊𐴤𐴝𐴘 𐴒𐴞𐴘𐴥𐴡𐴘 𐴱𐴱

𐴀𐴥𐴝𐴣𐴎𐴡𐴙𐴕𐴧𐴝 𐴉𐴟𐴖𐴝 𐴀𐴥𐴞𐴁𐴤𐴝 𐴒𐴤𐴡𐴌𐴡𐴃 𐴀𐴝𐴀𐴝𐴘 𐴃𐴝𐴌 𐴔𐴝𐴣𐴌𐴥𐴠 𐴉𐴟𐴌𐴝 𐴒𐴤𐴡𐴄𐴡𐴕𐴝 𐴁𐴟𐴎𐴤𐴝𐴘𐴧𐴠 , 𐴃𐴡𐴀𐴡𐴘 𐴉𐴟𐴖𐴝𐴌 𐴔𐴝𐴣 𐴘𐴠 𐴀𐴡𐴕𐴟𐴔𐴝𐴕𐴞𐴑 𐴌𐴝𐴙𐴃𐴡𐴌 𐴹 𐴁𐴝𐴎𐴠 𐴐𐴤𐴡𐴔𐴡𐴃 , 𐴀𐴠 𐴂𐴞 𐴁𐴞 𐴀𐴠𐴕𐴡𐴌 𐴈𐴝𐴣𐴏𐴥𐴠 𐴑𐴠𐴙𐴏𐴢 𐴃𐴟𐴓𐴥𐴞 𐴊𐴞𐴘𐴠 , 𐴃𐴡𐴀𐴡𐴘 𐴀𐴟𐴕𐴏𐴞 𐴉𐴝𐴌𐴝𐴚𐴡𐴌 𐴑𐴠𐴣𐴍𐴝 𐴏𐴥𐴞𐴘𐴡𐴓𐴡𐴌 𐴉𐴝𐴀𐴝𐴌𐴞 𐴀𐴠𐴓𐴝𐴑𐴝𐴃𐴧𐴥𐴟 , 𐴀𐴡𐴕𐴟𐴔𐴝𐴕𐴞𐴑 𐴌𐴝𐴙𐴃𐴡𐴌 𐴀𐴠𐴑 𐴁𐴝𐴎𐴠 𐴐𐴤𐴡𐴔𐴡𐴃 , 𐴀𐴠 𐴂𐴞 𐴁𐴞 𐴀𐴠𐴕𐴠 𐴀𐴝𐴐𐴤𐴝𐴔𐴞 𐴊𐴟𐴕𐴥𐴞 𐴎𐴡𐴕𐴡𐴌𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴉𐴟𐴖𐴝 𐴖𐴥𐴝𐴌𐴥𐴠 𐴑𐴠𐴀𐴠𐴔𐴡𐴌 𐴀𐴠𐴔 𐴀𐴠𐴏𐴢 𐴀𐴠𐴉𐴡𐴌 𐴇𐴥𐴝𐴐𐴉𐴝𐴃𐴝𐴓𐴡𐴃 𐴀𐴠𐴑𐴡𐴔𐴥𐴞𐴑 𐴏𐴞𐴌𐴞𐴐𐴧𐴤𐴝 𐴒𐴡𐴌𐴥𐴞 𐴁𐴦𐴝𐴊𐴠 , 𐴀𐴝𐴌 𐴀𐴥𐴡 𐴀𐴟𐴃𐴧𐴡𐴔 𐴁𐴤𐴝𐴓𐴝 𐴀𐴠𐴓𐴝𐴅 𐴒𐴡𐴌𐴥𐴞𐴁𐴤𐴡𐴓𐴧𐴝 𐴑𐴟𐴃𐴤𐴟𐴉𐴝𐴓𐴡𐴚 𐴇𐴥𐴝𐴐𐴉𐴝𐴃𐴝𐴓𐴡𐴃 𐴁𐴤𐴡𐴃𐴧𐴞 𐴒𐴡𐴌𐴥𐴝𐴘 𐴊𐴞𐴘𐴠 , 𐴊𐴟𐴐𐴤𐴞 𐴀𐴥𐴡𐴑𐴧𐴡𐴓𐴡𐴌𐴠 𐴐𐴤𐴠𐴐𐴠 𐴄𐴠𐴑𐴕𐴝𐴉𐴢 𐴔𐴡𐴋𐴠𐴓 𐴃𐴤𐴝𐴕𐴝𐴃 𐴒𐴡𐴏𐴥𐴝𐴘 𐴊𐴞𐴘𐴠 𐴁𐴡𐴓𐴞 𐴉𐴟𐴓𐴞𐴐𐴠 𐴈𐴡𐴘𐴧𐴠 𐴱𐴱

Sources : Teknaftoday.com