𐴀𐴝𐴌𐴑𐴝𐴕𐴡𐴃𐴧𐴟 𐴌𐴠𐴚𐴒𐴟𐴕 𐴎𐴝𐴘𐴁𐴝𐴌 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌𐴊𐴧𐴠 𐴉𐴟𐴕𐴊𐴡𐴌𐴡 𐴎𐴡𐴕 𐴔𐴟𐴏𐴡𐴓𐴔𐴝𐴕 𐴀𐴥𐴠𐴔 𐴐𐴤𐴡𐴀𐴡𐴌𐴡𐴃 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴀𐴝𐴌𐴑𐴝𐴕𐴡𐴃𐴧𐴟 𐴌𐴠𐴚𐴒𐴟𐴕 𐴎𐴝𐴘𐴁𐴡𐴓𐴧𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌𐴊𐴧𐴠 𐴵 𐴱 𐴎𐴡𐴕 𐴔𐴟𐴏𐴡𐴓𐴔𐴝𐴕 , 𐴀𐴥𐴠𐴔 𐴐𐴤𐴡𐴀𐴡𐴌𐴡𐴌 𐴏𐴥𐴠 𐴏𐴥𐴞 𐴉𐴝𐴌𐴝𐴌 𐴁𐴤𐴟𐴃𐴡𐴌𐴠 𐴉𐴟𐴓𐴞𐴐𐴡𐴌 𐴀𐴥𐴝𐴃𐴡𐴃 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 , 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕 𐴀𐴝𐴙𐴑𐴧𐴙𐴝𐴁 𐴀𐴝𐴌 𐴁𐴤𐴟𐴏𐴞𐴊𐴡𐴚𐴡𐴃𐴧𐴟 , 𐴎𐴦𐴡𐴣𐴓𐴡𐴌 𐴌𐴝𐴏𐴧𐴝 𐴁𐴝𐴀𐴝𐴘 𐴌𐴠𐴚𐴒𐴟𐴕 𐴎𐴝𐴀𐴝𐴌𐴊𐴧𐴠 𐴁𐴡𐴓𐴞 𐴀𐴥𐴠𐴔 𐴐𐴤𐴡𐴀𐴡𐴌𐴡𐴌 𐴊𐴝𐴌𐴟𐴒𐴝 𐴘𐴠 𐴈𐴡𐴘𐴧𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴓𐴡𐴌𐴝 𐴏𐴡𐴌𐴝 𐴁𐴡𐴕 𐴒𐴡𐴌𐴥𐴞 𐴉𐴞𐴎𐴝𐴌𐴝𐴌 𐴁𐴤𐴟𐴃𐴡𐴌𐴠 𐴁𐴝𐴣𐴊𐴤𐴞 𐴌𐴝𐴙𐴑𐴧𐴤𐴙𐴠𐴊𐴠 , 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓 𐴉𐴡𐴃𐴧𐴞 𐴁𐴡𐴏𐴥𐴡𐴌 𐴔𐴦𐴟𐴏𐴡𐴔 𐴓𐴡𐴘 𐴈𐴝𐴔 𐴃𐴟𐴖𐴝𐴘 𐴁𐴤𐴡𐴓𐴧𐴝 , 𐴌𐴠𐴚𐴒𐴟𐴕 𐴐𐴤𐴡𐴣𐴀𐴡 𐴀𐴡𐴙𐴕𐴧𐴡 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴃 𐴎𐴝𐴘𐴁𐴡𐴓𐴧𐴥𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠 , 𐴀𐴥𐴠𐴕𐴋𐴞𐴓𐴧𐴝 𐴕𐴠𐴀𐴠𐴓𐴞 𐴎𐴝𐴘𐴁𐴝𐴌 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌𐴊𐴧𐴠 𐴵 𐴱 𐴎𐴡𐴕 𐴔𐴟𐴏𐴡𐴓𐴔𐴝𐴕 , 𐴀𐴥𐴠𐴔 𐴐𐴤𐴡𐴀𐴡𐴌𐴡𐴌 𐴏𐴥𐴠 𐴏𐴥𐴞 𐴉𐴝𐴌𐴝𐴌 𐴔𐴝𐴎𐴤𐴠 𐴀𐴠𐴂𐴌𐴞𐴓𐴡𐴌 𐴰 𐴲 𐴃𐴝𐴌𐴥𐴞𐴑𐴡𐴃 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴁𐴡𐴓𐴞 , 𐴀𐴥𐴠𐴔 𐴐𐴤𐴡𐴀𐴡𐴌𐴡𐴌 𐴉𐴟𐴓𐴞𐴐𐴡𐴌 𐴊𐴝𐴌𐴟𐴒𐴝 𐴀𐴥𐴟 𐴔𐴙𐴥𐴟 𐴆𐴙𐴠 𐴘𐴠 𐴈𐴡𐴘𐴧𐴠 𐴱𐴱

𐴒𐴠𐴓𐴊𐴠 𐴈𐴝𐴙𐴓𐴧𐴝 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴔𐴟𐴏𐴡𐴓𐴔𐴝𐴕 𐴀𐴥𐴟𐴀𐴟𐴕 𐴀𐴝𐴙𐴑𐴧𐴙𐴝𐴁 𐴀𐴝𐴌 𐴁𐴤𐴟𐴏𐴞𐴊𐴤𐴡𐴚𐴡𐴃𐴧𐴟 𐴉𐴝𐴀𐴝𐴌𐴡𐴌 𐴌𐴝𐴏𐴧𐴝 𐴁𐴝𐴀𐴝𐴘 𐴌𐴠𐴚𐴒𐴟𐴕 𐴎𐴝𐴀𐴝𐴌𐴊𐴧𐴠 𐴁𐴡𐴓𐴞 𐴘𐴥𐴡 𐴊𐴝𐴌𐴟𐴒𐴝 𐴘𐴠 𐴈𐴡𐴘𐴧𐴠 , 𐴀𐴝𐴌𐴑𐴝𐴕𐴡𐴃𐴧𐴟 𐴌𐴠𐴚𐴒𐴟𐴕 𐴐𐴤𐴡𐴣𐴀𐴡 𐴊𐴠𐴐𐴤𐴡𐴌 𐴁𐴤𐴟𐴃𐴡𐴌𐴠 𐴀𐴝𐴌 𐴊𐴠𐴐𐴤𐴡𐴌 𐴁𐴝𐴀𐴝𐴌𐴠 𐴀𐴡𐴙𐴕𐴧𐴡 𐴊𐴠𐴐𐴤𐴡𐴃 𐴎𐴝𐴘𐴁𐴡𐴓𐴧𐴥𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌𐴊𐴧𐴠 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓 , 𐴀𐴟𐴀𐴟𐴕 𐴀𐴥𐴟𐴊𐴧𐴤𐴝 𐴔𐴞𐴓𐴝𐴘 𐴲 𐴲 𐴰 𐴲 𐴐𐴤𐴡𐴕𐴡𐴌 𐴁𐴤𐴟𐴃𐴡𐴌𐴠 𐴏𐴝𐴙𐴌 𐴁𐴝𐴌𐴡𐴌 𐴖𐴡𐴌𐴠 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴁𐴡𐴓𐴞 , 𐴀𐴥𐴠𐴔 𐴐𐴤𐴡𐴀𐴡𐴌𐴡𐴌 𐴉𐴟𐴓𐴞𐴐𐴡𐴌 𐴊𐴝𐴌𐴟𐴒𐴝 𐴘𐴠 𐴈𐴡𐴘𐴧𐴠 𐴱𐴱

𐴁𐴟𐴙𐴃 𐴁𐴝𐴌𐴠 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴔𐴟𐴏𐴡𐴓𐴔𐴝𐴕 𐴀𐴥𐴟𐴀𐴟𐴕𐴡𐴌𐴥𐴠 𐴀𐴞𐴔𐴞𐴒𐴞𐴌𐴞𐴐𐴤𐴠𐴕𐴡𐴌 𐴇𐴥𐴡𐴓𐴝 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 , 𐴀𐴥𐴠𐴔 𐴐𐴤𐴡𐴀𐴡𐴌𐴡𐴌 𐴉𐴟𐴓𐴞𐴐𐴡𐴌 𐴊𐴝𐴌𐴟𐴒𐴝 𐴀𐴥𐴟 𐴔𐴙𐴥𐴟 𐴆𐴙𐴠 𐴘𐴠 𐴈𐴡𐴘𐴧𐴠 , 𐴖𐴞 𐴀𐴡 𐴀𐴠𐴌 𐴌𐴠𐴂𐴟𐴄𐴝𐴌𐴠 , 𐴔𐴟𐴏𐴡𐴓𐴔𐴝𐴕 𐴀𐴥𐴟𐴀𐴟𐴕𐴡𐴌𐴥𐴠 𐴑𐴠𐴀𐴠𐴕 𐴒𐴡𐴌𐴥𐴞𐴁𐴤𐴡𐴊𐴠 𐴘𐴥𐴝𐴀𐴝𐴕𐴡𐴌 𐴁𐴝𐴁𐴡𐴃𐴠 , 𐴀𐴥𐴠𐴔 𐴐𐴤𐴡𐴀𐴡𐴌𐴡𐴌 𐴀𐴞𐴔𐴞𐴒𐴞𐴌𐴞𐴐𐴤𐴠𐴕𐴡𐴌𐴃𐴧𐴟 𐴉𐴟𐴏𐴥𐴝𐴌 𐴒𐴡𐴙𐴅𐴧𐴤𐴙𐴠 , 𐴔𐴡𐴕𐴃𐴡𐴌 𐴈𐴡𐴕𐴥𐴡 𐴅𐴟𐴖𐴝𐴁 𐴕𐴡𐴀𐴡 𐴉𐴝𐴀𐴝 𐴱𐴱

𐴁𐴡𐴌𐴔𐴥𐴝𐴌 𐴀𐴝𐴌𐴑𐴝𐴕𐴡𐴃 𐴓𐴡𐴌𐴝 𐴏𐴡𐴌𐴝 𐴁𐴡𐴕 𐴒𐴡𐴌𐴥𐴞 𐴉𐴞𐴎𐴝𐴌𐴝𐴌 𐴁𐴤𐴟𐴃𐴡𐴌𐴠 𐴁𐴝𐴣𐴊𐴤𐴞 𐴌𐴝𐴙𐴑𐴧𐴤𐴙𐴠𐴊𐴠 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓 , 𐴈𐴥𐴝𐴘𐴃𐴠 𐴓𐴡𐴘𐴃𐴠 𐴊𐴟𐴑 𐴉𐴡𐴀𐴡𐴕𐴠 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓𐴡𐴌 𐴔𐴡𐴊𐴡𐴊 𐴓𐴡𐴘 , 𐴁𐴠𐴀𐴝𐴙𐴕𐴞 𐴃𐴡𐴖𐴌𐴠 𐴁𐴝𐴀𐴝𐴌 𐴔𐴟𐴓𐴧𐴟𐴑 𐴕𐴠𐴀𐴠𐴓𐴞 𐴎𐴡𐴀𐴡𐴙𐴕𐴧𐴝 𐴀𐴥𐴡𐴑𐴧𐴡𐴓 , 𐴑𐴠𐴙𐴏𐴧𐴟 𐴊𐴠𐴐𐴤𐴡𐴌 𐴁𐴤𐴟𐴃𐴡𐴌𐴠 𐴊𐴤𐴡𐴌𐴝 𐴉𐴡𐴌𐴠𐴌 , 𐴀𐴝𐴌 𐴑𐴠𐴙𐴏𐴧𐴥𐴟 𐴄𐴤𐴝𐴀𐴝𐴘𐴓𐴠𐴕 𐴔𐴡𐴓𐴠𐴆𐴤𐴙𐴝𐴃 𐴊𐴤𐴡𐴌𐴝 𐴉𐴡𐴌𐴠𐴌 𐴱𐴱

Sources : burmese.voanews.com