𐴔𐴡𐴓𐴠𐴆𐴤𐴙𐴝𐴃 𐴁𐴡𐴕𐴈𐴥𐴝𐴕𐴝𐴃 𐴋𐴝𐴚𐴒𐴝 , 𐴏𐴥𐴡 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴞 𐴒𐴞𐴘𐴥𐴡𐴘 𐴱𐴱

𐴔𐴡𐴓𐴠𐴆𐴤𐴙𐴝𐴌 𐴂𐴞𐴕𐴝𐴚 𐴋𐴞𐴐𐴄𐴤𐴞𐴑𐴡𐴌 𐴀𐴟𐴃𐴧𐴡𐴌 𐴀𐴥𐴞𐴏𐴧𐴝𐴃 , 𐴀𐴞𐴔𐴞𐴒𐴞𐴌𐴞𐴐𐴤𐴠𐴕𐴡𐴌 𐴃𐴡𐴀𐴡𐴙𐴃𐴧𐴝 𐴁𐴡𐴕𐴈𐴥𐴝𐴕𐴝 𐴀𐴠𐴑𐴧𐴤𐴝𐴕𐴡𐴃 , 𐴀𐴝𐴙𐴅𐴧𐴙𐴝 𐴁𐴞𐴀𐴞𐴕𐴧𐴝 𐴋𐴝𐴚𐴒𐴝 𐴀𐴥𐴡𐴘 𐴁𐴦𐴝𐴊𐴠 , 𐴊𐴟𐴘 𐴎𐴡𐴕 𐴒𐴟𐴌𐴝 𐴉𐴟𐴖𐴝𐴙𐴕 𐴐𐴤𐴡𐴣𐴀𐴡 𐴏𐴥𐴡 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴞 𐴒𐴞𐴘𐴥𐴡𐴘 𐴁𐴡𐴓𐴞 𐴄𐴗𐴠𐴄𐴝𐴌 𐴈𐴥𐴡𐴁𐴡𐴌𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴝𐴎𐴞𐴘𐴝 𐴁𐴞𐴀𐴞𐴕𐴧𐴝 𐴏𐴥𐴡𐴌𐴠 𐴀𐴥𐴡𐴘𐴧𐴠𐴊𐴠 𐴒𐴟𐴓𐴔𐴝𐴓 , 𐴀𐴟𐴎𐴦𐴡𐴌𐴡𐴌 𐴎𐴡𐴌𐴞𐴘𐴝 , 𐴁𐴡𐴕𐴈𐴥𐴝𐴕𐴝𐴃 𐴃𐴤𐴝𐴙𐴑𐴧𐴤𐴙𐴠𐴊𐴠 𐴐𐴤𐴡𐴃𐴝 𐴐𐴤𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴁𐴡𐴕𐴈𐴥𐴝𐴕𐴝𐴃𐴧𐴟 , 𐴒𐴠𐴀𐴞𐴄 𐴒𐴤𐴞𐴌𐴝 𐴁𐴤𐴝𐴚𐴞 𐴊𐴤𐴝𐴘 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 , 𐴒𐴝𐴌𐴥𐴞𐴌 𐴏𐴡𐴓𐴝𐴏𐴡𐴓 𐴁𐴠𐴐𐴤𐴞 𐴀𐴝𐴏𐴥𐴠𐴊𐴠 𐴌𐴝𐴎 𐴉𐴡𐴣𐴃𐴤𐴡𐴃 ( 𐴇𐴝𐴀𐴝𐴘 𐴖𐴥𐴠 ) 𐴒𐴝𐴌𐴥𐴞𐴃 𐴄𐴡𐴑𐴧𐴡𐴌 𐴈𐴥𐴝𐴘 𐴏𐴥𐴡 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴞 𐴒𐴞𐴘𐴥𐴡𐴘 𐴁𐴡𐴓𐴞 , 𐴔𐴡𐴓𐴠𐴆𐴤𐴙𐴝𐴌 𐴀𐴠𐴔𐴞𐴒𐴞𐴌𐴞𐴐𐴤𐴠𐴕 𐴋𐴞𐴂𐴦𐴝𐴌𐴔𐴥𐴠𐴕𐴡𐴌 𐴎𐴞𐴔𐴧𐴝𐴊𐴝𐴌 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

𐴂𐴞𐴕𐴝𐴚𐴡𐴌 𐴀𐴟𐴃𐴧𐴡𐴌 𐴀𐴥𐴞𐴏𐴧𐴝𐴃 𐴀𐴝𐴏𐴥𐴠𐴊𐴠 , 𐴏𐴟𐴚𐴒𐴝𐴘 𐴁𐴝𐴑𐴤𐴝𐴂𐴢 𐴈𐴡𐴀𐴡𐴊𐴠 𐴀𐴠𐴔𐴞𐴒𐴞𐴌𐴞𐴐𐴤𐴠𐴕 𐴋𐴞𐴂𐴦𐴝𐴌𐴔𐴥𐴠𐴕𐴡𐴌 𐴃𐴡𐴀𐴡𐴙𐴃𐴧𐴝 𐴁𐴡𐴕𐴈𐴥𐴝𐴕𐴝𐴃𐴧𐴟 , 𐴲 𐴸 𐴵 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴊𐴡𐴌𐴎𐴝 𐴀𐴝𐴌 𐴒𐴤𐴞𐴌𐴝 𐴁𐴤𐴝𐴚𐴞 𐴊𐴤𐴝𐴘𐴧𐴠 𐴒𐴤𐴡𐴘 , 𐴀𐴥𐴠𐴍𐴠 𐴁𐴤𐴟𐴃𐴡𐴌𐴃𐴧𐴟 𐴲 𐴶 𐴳 𐴎𐴡𐴕 𐴊𐴤𐴡𐴌𐴞 𐴉𐴥𐴠𐴓𐴥𐴝𐴘 𐴉𐴝𐴙𐴅𐴧𐴤𐴙𐴠 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴁𐴡𐴌𐴔𐴥𐴝 𐴀𐴝𐴌 𐴁𐴝𐴚𐴓𐴝𐴊𐴠𐴐𐴤𐴡𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴧𐴟 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴔𐴡𐴓𐴠𐴆𐴤𐴙𐴝𐴃 𐴒𐴤𐴡𐴓𐴠𐴌 𐴒𐴤𐴝𐴘𐴊𐴠 , 𐴔𐴡𐴓𐴠𐴆𐴤𐴙𐴝 𐴇𐴥𐴡𐴑𐴟𐴔𐴡𐴃𐴠 𐴰 𐴲 𐴰 𐴲 𐴐𐴤𐴡𐴕 𐴀𐴥𐴡𐴘𐴃𐴠 , 𐴑𐴡𐴌𐴟𐴕𐴝 𐴁𐴞𐴘𐴝𐴌𐴝𐴔 𐴏𐴥𐴡𐴌𐴝𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴘𐴥𐴝𐴕𐴡𐴌𐴠 𐴌𐴟𐴑𐴤𐴞𐴁𐴤𐴡𐴓𐴧𐴝 , 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 , 𐴃𐴡𐴀𐴡𐴙𐴃𐴧𐴝 𐴁𐴡𐴕𐴈𐴥𐴝𐴕𐴝𐴃 𐴎𐴡𐴔𐴝 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 𐴱𐴱

𐴏𐴟𐴚𐴒𐴝𐴘 𐴁𐴝𐴑𐴤𐴝𐴂𐴢 𐴁𐴡𐴕𐴈𐴥𐴝𐴕𐴝𐴃 𐴀𐴟𐴎𐴦𐴡𐴌𐴝 𐴀𐴟𐴎𐴦𐴡𐴌𐴞 𐴒𐴟𐴓𐴔𐴝𐴓 𐴑𐴠𐴘𐴥𐴡𐴓𐴧𐴝 𐴀𐴥𐴡𐴘𐴧𐴠𐴊𐴠 , 𐴘𐴥𐴝𐴀𐴝𐴕𐴡𐴌 𐴁𐴝𐴁𐴡𐴃𐴠 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 𐴃𐴡𐴊𐴝𐴌𐴟𐴑 𐴃𐴡𐴊𐴡𐴕𐴃𐴡 𐴒𐴡𐴌𐴥𐴠𐴌 , 𐴊𐴤𐴡𐴌𐴞 𐴕𐴡𐴀𐴡 𐴉𐴡𐴌𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴥𐴠 𐴃𐴟𐴖𐴝𐴌 𐴁𐴡𐴓𐴞 𐴈𐴡𐴘𐴧𐴠 𐴱𐴱

Sources : RFA