𐴁𐴤𐴝𐴐𐴡𐴕 𐴏𐴡𐴌𐴡𐴃𐴧𐴟 𐴊𐴤𐴝𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴐𐴤𐴡𐴣𐴀𐴡𐴃 𐴸 𐴎𐴡𐴕 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴕𐴟𐴖𐴝𐴈𐴥𐴝𐴓𐴞 𐴀𐴠𐴓𐴝𐴑𐴝𐴌 𐴇𐴥𐴝𐴃𐴞𐴘𐴝𐴌 𐴁𐴤𐴝𐴐𐴡𐴕 𐴏𐴡𐴌𐴡𐴃𐴧𐴟 𐴊𐴤𐴝𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴐𐴤𐴡𐴣𐴀𐴡𐴃 𐴸 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 , 𐴀𐴥𐴠𐴏𐴃𐴝𐴕𐴞𐴘𐴡 𐴔𐴝𐴙𐴕𐴐𐴤𐴠 𐴊𐴤𐴡𐴌𐴞 𐴉𐴟𐴓𐴞𐴐𐴡𐴌𐴥𐴠 𐴒𐴡𐴏𐴥𐴝𐴘 𐴊𐴞𐴘𐴧𐴠 , 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴠 , 𐴉𐴝𐴣𐴏𐴢 𐴎𐴡𐴕 𐴁𐴠𐴍𐴞𐴘𐴥𐴝𐴙𐴕 𐴊𐴟𐴘 𐴎𐴡𐴕 𐴁𐴠𐴍𐴝𐴀𐴝𐴙𐴕 𐴀𐴝𐴌 𐴀𐴠𐴑 𐴎𐴡𐴕 𐴒𐴟𐴌𐴝 𐴉𐴟𐴖𐴝 𐴱𐴱

𐴀𐴥𐴞𐴃𐴝𐴌𐴝𐴌 𐴏𐴞𐴕𐴧𐴡 𐴀𐴥𐴡𐴙𐴓𐴊𐴠 𐴁𐴤𐴝𐴐𐴡𐴕 𐴏𐴡𐴌 𐴏𐴥𐴝𐴀𐴝𐴌𐴝 𐴑𐴠𐴀𐴠𐴔𐴡𐴌 𐴶 𐴸 𐴓𐴡𐴔𐴁𐴤𐴡𐴌 𐴑𐴠𐴓𐴝𐴐𐴄𐴝𐴌𐴡𐴌 , 𐴀𐴝𐴁𐴊𐴟𐴓 𐴇𐴝𐴔𐴞𐴊𐴡𐴌 𐴉𐴟𐴖𐴝 𐴀𐴝𐴕𐴖𐴝𐴌 𐴁𐴡𐴐𐴢 ( 𐴸 𐴱 ) 𐴁𐴡𐴏𐴥𐴡𐴌 , 𐴀𐴠𐴑𐴤𐴟𐴀𐴞 𐴑𐴠𐴓𐴝𐴐𐴄𐴝𐴌𐴡𐴌 ( 𐴔𐴡𐴌𐴇𐴟𐴔 ) 𐴘𐴝𐴏𐴞𐴕𐴡𐴌 𐴉𐴟𐴖𐴝 𐴔𐴟𐴇𐴝𐴔𐴧𐴡𐴊 𐴇𐴥𐴝𐴏𐴡𐴕 𐴁𐴡𐴐𐴢 ( 𐴶 𐴱 ) 𐴁𐴡𐴏𐴥𐴡𐴌 𐴱𐴱

𐴔𐴟𐴇𐴝𐴔𐴧𐴡𐴊 𐴘𐴝𐴏𐴞𐴕𐴡𐴌 𐴔𐴝𐴘𐴧𐴝 𐴐𐴤𐴡𐴔𐴐𐴟𐴊𐴝 𐴁𐴠𐴒𐴡𐴔 𐴁𐴡𐴐𐴢 ( 𐴷 𐴱 ) 𐴁𐴡𐴏𐴥𐴡𐴌 , 𐴇𐴝𐴉𐴠𐴎 𐴀𐴝𐴇𐴔𐴡𐴊𐴡𐴌 𐴁𐴡𐴖 𐴇𐴥𐴝𐴉𐴞𐴎𐴝 𐴁𐴡𐴐𐴢 ( 𐴷 𐴱 ) 𐴁𐴡𐴏𐴥𐴡𐴌 , 𐴔𐴟𐴇𐴝𐴔𐴧𐴡𐴊 𐴀𐴟𐴏𐴔𐴝𐴕𐴡𐴌 𐴁𐴡𐴖 𐴊𐴞𐴓 𐴑𐴝𐴘𐴠𐴐𐴢 𐴁𐴡𐴐𐴢 ( 𐴶 𐴱 ) 𐴁𐴡𐴏𐴥𐴡𐴌 , 𐴱 𐴱 𐴓𐴡𐴔𐴁𐴤𐴡𐴌 𐴑𐴠𐴓𐴝𐴐𐴄𐴝𐴌𐴡𐴌 𐴀𐴝𐴁𐴊𐴟𐴏𐴢 𐴏𐴡𐴓𐴝𐴔𐴡𐴌 𐴁𐴡𐴖 𐴌𐴡𐴎𐴞𐴘𐴝 𐴁𐴠𐴒𐴡𐴔 𐴁𐴡𐴐𐴢 ( 𐴴 𐴲 ) 𐴁𐴡𐴏𐴥𐴡𐴌 𐴀𐴝𐴌 𐴉𐴟𐴖𐴝 𐴔𐴟𐴇𐴝𐴔𐴧𐴡𐴊 𐴌𐴡𐴉𐴥𐴞𐴑 𐴁𐴡𐴐𐴢 ( 𐴷 ) 𐴁𐴡𐴏𐴥𐴡𐴌 , 𐴀𐴝𐴌 𐴷 𐴶 𐴓𐴡𐴔𐴁𐴤𐴡𐴌 𐴑𐴠𐴓𐴝𐴐𐴄𐴝𐴌𐴡𐴌 𐴀𐴝𐴁𐴊𐴟𐴐𐴧𐴡𐴑𐴟𐴌𐴡𐴌 𐴁𐴡𐴖 𐴌𐴝𐴎𐴞𐴊𐴝 𐴁𐴡𐴐𐴢 ( 𐴸 𐴱 ) 𐴁𐴡𐴏𐴥𐴡𐴌 𐴱𐴱

𐴴 𐴱 𐴃𐴝𐴌𐴥𐴞𐴑 𐴀𐴠𐴂𐴌𐴞𐴓 𐴁𐴞𐴐𐴤𐴞𐴃 𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 , 𐴐𐴤𐴟𐴁𐴡𐴌𐴕𐴡 𐴏𐴡𐴌 𐴀𐴟𐴉𐴡𐴎𐴞𐴓𐴥𐴝𐴌 𐴔𐴟𐴇𐴝𐴔𐴧𐴡𐴊 𐴉𐴟𐴌 𐴘𐴟𐴕𐴞𐴘𐴥𐴡𐴕𐴡𐴃 , 𐴀𐴥𐴠𐴏𐴃𐴝𐴕𐴞𐴘𐴡 𐴔𐴝𐴙𐴕𐴐𐴤𐴠 𐴀𐴥𐴞𐴃𐴝𐴌𐴝𐴌𐴥𐴠 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 , 𐴁𐴦𐴝𐴊𐴠 𐴉𐴟𐴓𐴞𐴐𐴡𐴌𐴥𐴠 𐴈𐴥𐴡𐴁𐴡𐴌 𐴊𐴞𐴀𐴞 𐴒𐴡𐴏𐴥𐴝𐴘 𐴊𐴞𐴘𐴧𐴠 , 𐴃𐴡𐴀𐴡𐴘 𐴉𐴟𐴓𐴞𐴐𐴠 𐴀𐴥𐴞𐴃𐴝𐴌𐴝 𐴌𐴥𐴠 𐴏𐴡𐴌𐴎𐴡𐴁𐴧𐴡𐴌 𐴃𐴤𐴝𐴕𐴝𐴃 𐴓𐴡𐴘 𐴒𐴞𐴘𐴥𐴡𐴘 𐴱𐴱

𐴏𐴡𐴌𐴎𐴡𐴁𐴧𐴡𐴌 𐴃𐴤𐴝𐴕𐴝𐴌 𐴃𐴡𐴊𐴡𐴕𐴃𐴡𐴑𐴝𐴌/ 𐴑𐴝𐴎𐴞 𐴔𐴟𐴇𐴝𐴔𐴧𐴡𐴊 𐴏𐴥𐴟𐴓𐴃𐴝𐴕 𐴀𐴝𐴎𐴇𐴝𐴌𐴟𐴊𐴧𐴞𐴕𐴠 , 𐴀𐴝𐴣𐴐𐴄𐴡 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴟𐴀𐴟𐴕 , 𐴇𐴥𐴝𐴃𐴞𐴘𐴝𐴌 𐴁𐴤𐴝𐴐𐴡𐴕 𐴏𐴡𐴌 𐴑𐴠𐴀𐴠𐴔𐴡𐴃𐴧𐴟 𐴕𐴦𐴡 𐴓𐴡𐴘 𐴊𐴤𐴝𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴏𐴥𐴡𐴀𐴞 , 𐴎𐴠𐴈𐴥𐴡𐴕 𐴀𐴥𐴞𐴃𐴝𐴌 𐴐𐴤𐴟𐴁𐴡𐴌𐴕𐴡 𐴏𐴡𐴌 𐴀𐴟𐴉𐴡𐴎𐴞𐴓𐴥𐴝𐴌 𐴔𐴟𐴇𐴝𐴔𐴧𐴡𐴊 𐴉𐴟𐴌 𐴘𐴟𐴕𐴞𐴘𐴥𐴡𐴕 𐴀𐴠𐴓𐴝𐴑𐴝𐴃 𐴉𐴡𐴣𐴀𐴣𐴙𐴏𐴧𐴙𐴠 , 𐴀𐴥𐴠𐴍𐴞𐴘𐴥𐴝𐴌 𐴔𐴝𐴙𐴕𐴐𐴤𐴠 𐴀𐴥𐴞𐴃𐴝𐴌𐴝𐴌𐴥𐴠 𐴊𐴤𐴡𐴌𐴞 𐴃𐴤𐴝𐴕𐴝𐴃 𐴉𐴡𐴣𐴀𐴣𐴏𐴥𐴝𐴘 𐴊𐴞𐴘𐴧𐴠 , 𐴀𐴠𐴈𐴥𐴡𐴕 𐴀𐴝𐴙𐴕 𐴔𐴡𐴃𐴠 𐴁𐴠𐴁𐴡𐴏𐴃𐴤𐴝 𐴒𐴡𐴌𐴥𐴝 𐴎𐴝𐴘𐴁𐴡 𐴁𐴡𐴓𐴞 𐴈𐴡𐴘𐴧𐴠 𐴱𐴱

Sources : Ukhiyanews.com