𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴂𐴡𐴚𐴎𐴝 𐴉𐴝𐴌𐴝𐴌 𐴉𐴟𐴖𐴝𐴙𐴕𐴊𐴤𐴡𐴌𐴓𐴧𐴝 𐴊𐴞𐴘𐴧𐴠𐴊𐴠 𐴇𐴥𐴡𐴑𐴟𐴔𐴡𐴃𐴞 𐴔𐴡𐴊𐴡𐴊 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴘𐴠 𐴈𐴥𐴝𐴘 𐴉𐴥𐴠𐴓𐴧𐴝𐴘𐴧𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴂𐴡𐴚𐴎𐴝 ( 𐴀𐴝𐴐𐴤𐴞𐴑𐴧𐴙𐴝 ) 𐴉𐴝𐴌𐴝𐴌 , 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴀𐴝𐴌 𐴀𐴥𐴞𐴃𐴝𐴌 𐴔𐴦𐴡𐴌𐴞 𐴑𐴠𐴌𐴝𐴕𐴞 𐴀𐴥𐴡𐴑𐴧𐴡𐴓 𐴁𐴠𐴒𐴧𐴤𐴟𐴕𐴠 𐴔𐴞𐴓𐴞 , 𐴄𐴤𐴞𐴑 𐴔𐴡𐴃𐴠 𐴈𐴥𐴝𐴕𐴝 𐴕𐴡 𐴉𐴝𐴀𐴝𐴌𐴊𐴧𐴠 𐴒𐴟𐴌𐴝 𐴉𐴟𐴖𐴝𐴙𐴕𐴊𐴤𐴡𐴌𐴓𐴧𐴝 𐴊𐴞𐴘𐴧𐴠𐴊𐴠 𐴇𐴥𐴡𐴑𐴟𐴔𐴡𐴃𐴞 𐴔𐴡𐴊𐴡𐴊𐴡𐴌 𐴁𐴤𐴝𐴑 𐴈𐴥𐴝𐴘 𐴉𐴥𐴠𐴓𐴧𐴝𐴘𐴧𐴠 𐴊𐴠 𐴘𐴥𐴝𐴀𐴝𐴕 𐴎𐴝𐴕𐴝 𐴒𐴞𐴘𐴧𐴠 𐴱𐴱

𐴑𐴠𐴙𐴏𐴧𐴥𐴟 𐴊𐴞𐴕 𐴀𐴝𐴒𐴠 , 𐴄𐴤𐴞𐴑 𐴔𐴡𐴃𐴠 𐴈𐴥𐴝𐴕𐴝 𐴕𐴡 𐴉𐴝𐴀𐴝𐴌𐴊𐴧𐴠 , 𐴊𐴟𐴘 𐴁𐴡𐴏𐴥𐴡𐴌𐴡𐴌 𐴕𐴞𐴏𐴠 𐴀𐴝𐴌 𐴊𐴟𐴘𐴁𐴡𐴏𐴥𐴡𐴌𐴡𐴌 𐴖𐴡𐴌𐴡𐴌 𐴉𐴟𐴖𐴝𐴙𐴕𐴊𐴤𐴡𐴌𐴓𐴧𐴝 , 𐴇𐴥𐴡𐴑𐴟𐴔𐴡𐴃𐴠 𐴊𐴞𐴘𐴧𐴠𐴊𐴠 𐴔𐴡𐴊𐴡𐴊 , 𐴉𐴠𐴌𐴝𐴔𐴉𐴟𐴌𐴟 𐴀𐴝𐴌 𐴀𐴝𐴐𐴤𐴞𐴑𐴧𐴤𐴙𐴝 𐴉𐴝𐴌𐴝𐴌 , 𐴄𐴤𐴞𐴑 𐴔𐴡𐴃𐴠 𐴈𐴥𐴝𐴕𐴝 𐴕𐴡 𐴉𐴝𐴀𐴝𐴌𐴊𐴧𐴠 𐴀𐴥𐴠𐴕𐴋𐴞𐴓𐴧𐴝 𐴓𐴞𐴐𐴄𐴤𐴞 𐴒𐴡𐴙𐴅𐴧𐴤𐴙𐴝 𐴀𐴝𐴌 𐴀𐴟𐴉𐴡𐴎𐴟𐴑𐴃𐴡 𐴉𐴟𐴖𐴝𐴙𐴕𐴊𐴤𐴡 𐴌𐴥𐴠 𐴕𐴥𐴡 𐴊𐴠𐴀𐴠 𐴱𐴱

𐴉𐴟𐴖𐴝𐴙𐴕 𐴀𐴥𐴟𐴀𐴟𐴕𐴡𐴌 𐴔𐴦𐴝𐴣 𐴁𐴝𐴉𐴠 , 𐴀𐴥𐴞𐴃𐴝𐴌𐴝𐴌 𐴁𐴡𐴌𐴝𐴃 𐴕𐴥𐴡 𐴉𐴝𐴀𐴝 𐴊𐴠 𐴘𐴥𐴝𐴀𐴝𐴕 𐴉𐴝𐴌𐴝𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 /𐴕𐴡𐴅𐴔𐴟𐴓 𐴇𐴥𐴝𐴏𐴡𐴕 𐴀𐴝𐴌 𐴀𐴥𐴞𐴃𐴝𐴌 𐴁𐴡𐴌 𐴑𐴠𐴌𐴝𐴕𐴞 𐴌𐴥𐴠 𐴎𐴝𐴕𐴝𐴘𐴧𐴠 , 𐴔𐴡𐴕𐴃𐴡𐴌 𐴊𐴟𐴕𐴥𐴞 𐴎𐴡𐴕𐴠 𐴉𐴟𐴖𐴝𐴙𐴕𐴊𐴤𐴡𐴌 𐴁𐴝𐴉𐴢 𐴀𐴥𐴡𐴑𐴧𐴡𐴓𐴡 𐴌𐴥𐴠 , 𐴀𐴠𐴑 𐴄𐴞𐴛𐴝 𐴀𐴥𐴟𐴊𐴧𐴝 𐴕𐴡 𐴊𐴞𐴘𐴧𐴟𐴔 𐴉𐴟𐴖𐴝𐴙𐴕 𐴀𐴥𐴟𐴀𐴟𐴕𐴡𐴌 𐴕𐴝𐴔 𐴓𐴞𐴐𐴄𐴤𐴞𐴃 𐴕𐴥𐴝𐴘 𐴁𐴡𐴓𐴞 𐴈𐴡𐴀𐴡𐴘 , 𐴇𐴥𐴟𐴚𐴑𐴞 𐴊𐴞𐴀𐴞 𐴊𐴦𐴟𐴣𐴌𐴝𐴘 𐴊𐴞𐴘𐴧𐴠 𐴊𐴠 𐴀𐴥𐴠𐴃𐴧𐴟 𐴋𐴦𐴡𐴌𐴠 𐴕𐴝𐴔 𐴕𐴡 𐴈𐴡𐴘𐴁𐴤𐴝𐴌 𐴐𐴡𐴌𐴥𐴡𐴃 𐴓𐴡𐴘 𐴀𐴠𐴑 𐴎𐴡𐴕𐴠 𐴎𐴝𐴕𐴝𐴘𐴧𐴠 𐴱𐴱

𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴡𐴌 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴇𐴥𐴡𐴑𐴟𐴔𐴡𐴃𐴠 𐴊𐴟𐴘 𐴁𐴡𐴏𐴥𐴡𐴌𐴡𐴌 𐴕𐴞𐴏𐴡𐴌 𐴉𐴟𐴖𐴝𐴙𐴕𐴊𐴤𐴡𐴌𐴓𐴧𐴝 ” 𐴰 𐴰 𐴰 𐴵 𐴴 ” 𐴄𐴞𐴛𐴝 𐴀𐴥𐴞𐴏𐴝𐴉𐴠 𐴊𐴞𐴘𐴧𐴠 , 𐴔𐴡𐴕𐴃𐴡𐴌 𐴒𐴟𐴕𐴋𐴝 𐴊𐴟𐴕𐴥𐴞 𐴎𐴡𐴕𐴠 ( 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴀𐴝𐴌 𐴑𐴠𐴌𐴝𐴕𐴞 ) 𐴉𐴡𐴙𐴃𐴧𐴡 𐴎𐴡𐴕𐴡𐴌𐴃𐴧𐴟 ” 𐴰 𐴰 𐴰 𐴵 ” 𐴉𐴝𐴣𐴏𐴢 𐴇𐴥𐴝𐴎𐴝𐴌 𐴄𐴞𐴛𐴝𐴌 𐴊𐴡𐴌𐴠 𐴓𐴡𐴘 𐴉𐴥𐴠𐴓𐴥𐴝𐴘𐴧𐴠 , 𐴀𐴝𐴌 𐴊𐴟𐴘 𐴁𐴡𐴏𐴥𐴡𐴌𐴡𐴌 𐴖𐴡𐴌𐴡𐴌 𐴉𐴟𐴖𐴝𐴙𐴕𐴊𐴤𐴡𐴌𐴓𐴧𐴝 ” 𐴰 𐴰 𐴰 𐴵 𐴱 ” 𐴄𐴞𐴛𐴝 𐴀𐴥𐴞𐴏𐴝𐴉𐴠 𐴊𐴞𐴘𐴧𐴠𐴊𐴠 𐴀𐴥𐴠𐴃𐴧𐴟 , 𐴀𐴥𐴠 𐴒𐴟𐴕𐴋𐴝 𐴊𐴟𐴕𐴥𐴞 𐴎𐴡𐴕𐴠 ” 𐴰 𐴰 𐴰 𐴳 ” 𐴃𐴞𐴕 𐴇𐴥𐴝𐴎𐴝𐴌 𐴄𐴞𐴛𐴝𐴌 𐴊𐴡𐴌𐴠 𐴓𐴡𐴘 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 / 𐴕𐴡𐴅𐴔𐴟𐴓 𐴇𐴥𐴝𐴏𐴡𐴕 𐴀𐴝𐴌 𐴀𐴥𐴞𐴃𐴝𐴌 𐴑𐴠𐴌𐴝𐴕𐴞 𐴘𐴠 , 𐴀𐴥𐴞𐴃𐴝𐴌𐴝𐴌 𐴑𐴤𐴠𐴔𐴡𐴃𐴝 𐴀𐴝𐴌 𐴇𐴥𐴡𐴑𐴟𐴔𐴡𐴃𐴡𐴌 𐴉𐴥𐴡𐴕 𐴒𐴡𐴓𐴧𐴡𐴃 𐴀𐴠𐴏𐴃𐴠𐴔𐴝𐴓 𐴒𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴀𐴝𐴕𐴡𐴓𐴧𐴝 , 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴐𐴤𐴡𐴔𐴁𐴡𐴕𐴊𐴤𐴞𐴃 𐴀𐴝𐴊𐴞𐴑𐴝𐴌 𐴀𐴥𐴡𐴑𐴧𐴡𐴓𐴡𐴌 𐴈𐴝𐴣𐴏𐴠 , 𐴎𐴠𐴃𐴡 𐴈𐴥𐴝𐴌𐴥𐴝 𐴉𐴝𐴌𐴠 , 𐴀𐴥𐴞𐴃𐴝𐴌𐴝 𐴌𐴥𐴠 𐴏𐴥𐴝𐴙𐴑 𐴒𐴡𐴌𐴥𐴞 𐴁𐴦𐴝𐴊𐴠 , 𐴀𐴥𐴞𐴃𐴝𐴌𐴝𐴌 𐴁𐴠𐴌𐴟𐴊𐴧𐴤𐴠 𐴀𐴟𐴉𐴡𐴎𐴟𐴑𐴃𐴡 𐴑𐴝𐴌𐴖𐴝𐴘 𐴒𐴡𐴌𐴥𐴞𐴁𐴤𐴡𐴓𐴧𐴝 𐴊𐴝𐴁𐴞 𐴎𐴝𐴕𐴝𐴘𐴧𐴠 𐴱𐴱

ources : Rvision