𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴎𐴡𐴌𐴔𐴡 𐴁𐴡𐴕 𐴒𐴡𐴌𐴥𐴝 𐴑𐴝𐴌𐴖𐴝𐴘𐴓𐴧𐴝 𐴒𐴤𐴡𐴌 𐴀𐴟𐴎𐴞𐴌𐴠 𐴏𐴝𐴂𐴢 𐴊𐴞𐴘𐴧𐴥𐴠 𐴱𐴱

𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴁𐴠𐴐𐴤𐴞 𐴈𐴥𐴡𐴃𐴡𐴌𐴝𐴌 𐴏𐴥𐴝𐴣𐴀𐴝𐴃𐴠 𐴁𐴝𐴌𐴥𐴠𐴌𐴊𐴧𐴠 𐴀𐴝𐴁𐴝𐴊𐴞 𐴌𐴟𐴑𐴤𐴞 𐴁𐴤𐴡𐴓𐴧𐴝 , 𐴇𐴥𐴡𐴑𐴟𐴔𐴡𐴃𐴠 𐴎𐴡𐴌𐴔𐴡 𐴁𐴡𐴕 𐴒𐴡𐴌𐴥𐴝 𐴑𐴝𐴌𐴖𐴝𐴘 𐴒𐴡𐴌𐴥𐴞𐴁𐴤𐴡𐴓𐴧𐴝 𐴉𐴥𐴝𐴘𐴏𐴠𐴓𐴝 𐴒𐴡𐴙𐴅𐴧𐴤𐴙𐴠 ,𐴁𐴡𐴌𐴔𐴥𐴝𐴌 𐴌𐴞𐴉𐴟𐴎𐴞𐴌 𐴔𐴟𐴃𐴦𐴝𐴓𐴧𐴠𐴑 𐴁𐴝𐴕𐴝𐴘𐴧𐴥𐴠𐴊𐴠 𐴑𐴡𐴔𐴞𐴄𐴤𐴞 𐴀𐴥𐴞𐴁𐴤𐴝 𐴘𐴠 , 𐴒𐴤𐴡𐴌 𐴀𐴟𐴎𐴞𐴌𐴡𐴌 𐴀𐴡𐴉𐴥𐴞𐴏𐴡𐴃 , 𐴌𐴦𐴡𐴘 𐴁𐴝𐴌𐴠 𐴒𐴡𐴙𐴅𐴧𐴤𐴙𐴊𐴠 𐴏𐴝𐴙𐴌𐴀𐴡𐴔 𐴔𐴞𐴄𐴤𐴞𐴚𐴡𐴃 𐴉𐴥𐴝𐴘𐴏𐴠𐴓𐴝 𐴘𐴝𐴀𐴝𐴕 𐴒𐴡𐴙𐴅𐴧𐴤𐴙𐴠𐴊𐴠 𐴱𐴱

𐴔𐴞𐴄𐴤𐴞𐴚 𐴀𐴥𐴞𐴁𐴤𐴝 𐴒𐴤𐴡𐴌 𐴀𐴟𐴎𐴞𐴌 / 𐴀𐴝𐴏𐴡𐴊𐴟𐴎 𐴎𐴡𐴔𐴝𐴕 𐴈𐴦𐴝𐴕 𐴑𐴡𐴔𐴝𐴓𐴡𐴌 𐴏𐴥𐴡𐴊𐴧𐴝𐴌𐴞𐴃 𐴀𐴥𐴡𐴘𐴧𐴠 , 𐴀𐴥𐴠𐴍𐴠 𐴀𐴠𐴏𐴄𐴠𐴙𐴄 𐴔𐴞𐴕𐴞𐴏𐴄𐴝𐴌 𐴑𐴟𐴊𐴟𐴌𐴡𐴃𐴞 𐴀𐴝𐴉𐴡𐴃𐴡𐴌 𐴁𐴝𐴁𐴡𐴃𐴠 / 𐴔𐴟𐴇𐴝𐴔𐴧𐴡𐴊 𐴀𐴠𐴔𐴌𐴝𐴕𐴟𐴌 𐴌𐴝𐴇𐴔𐴦𐴝𐴕 𐴀𐴥𐴡 𐴇𐴥𐴝𐴎𐴞𐴌 𐴀𐴝𐴐𐴧𐴤𐴞𐴀𐴞𐴓 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴁𐴝𐴚𐴓𐴝𐴊𐴠𐴐𐴤𐴞 𐴂𐴦𐴝𐴏𐴂𐴟𐴄 𐴕𐴡 𐴉𐴝𐴀𐴝 𐴉𐴥𐴝𐴀𐴝𐴕 , 𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌𐴡𐴌 𐴋𐴝𐴄𐴝𐴁𐴦𐴠𐴙𐴏𐴢 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 𐴊𐴠 𐴘𐴥𐴝𐴀𐴝𐴕 𐴀𐴥𐴡 𐴔𐴞𐴄𐴤𐴞𐴚𐴡𐴃 𐴉𐴥𐴝𐴘𐴏𐴠𐴓𐴝 𐴒𐴡𐴌𐴥𐴝 𐴒𐴞𐴘𐴧𐴠 𐴱𐴱

𐴔𐴞𐴄𐴤𐴞𐴚𐴡𐴃 𐴒𐴤𐴡𐴌 𐴀𐴟𐴎𐴞𐴌𐴠 𐴈𐴡𐴘𐴧𐴠𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴎𐴡𐴌𐴔𐴡 𐴀𐴥𐴞𐴏𐴝𐴁 𐴑𐴤𐴟𐴀𐴟𐴂𐴢 𐴁𐴠𐴐𐴤𐴞 , 𐴉𐴡𐴙𐴃𐴧𐴡 𐴁𐴡𐴏𐴥𐴡𐴌 𐴰 𐴰 𐴰 𐴵 𐴳 𐴎𐴡𐴕 𐴀𐴥𐴞𐴏𐴝𐴉𐴠 𐴁𐴝𐴌𐴥𐴠𐴌𐴊𐴧𐴠 𐴘𐴥𐴝𐴀𐴝𐴕 𐴎𐴝𐴕𐴝 𐴒𐴞𐴘𐴧𐴠 , 𐴀𐴡𐴑𐴃𐴤𐴡 𐴀𐴝𐴌 𐴎𐴡𐴌𐴟𐴌𐴡𐴃 𐴔𐴡𐴎𐴞𐴕 𐴈𐴝𐴛 𐴁𐴝𐴌𐴥𐴝𐴘 𐴁𐴤𐴡𐴓𐴧𐴝 , 𐴕𐴞𐴘𐴡𐴔 𐴀𐴝𐴌 𐴑𐴝𐴁𐴟𐴌 𐴁𐴤𐴟𐴃𐴡𐴌𐴠 𐴀𐴝𐴕𐴥𐴞𐴁𐴤𐴡𐴓𐴧𐴝 , 𐴏𐴠𐴇𐴥𐴠𐴃𐴡𐴌 𐴎𐴞𐴔𐴧𐴝𐴊𐴝𐴌 𐴀𐴝𐴌 𐴀𐴞𐴏𐴓𐴝𐴔𐴥𐴞𐴑 𐴉𐴥𐴡𐴕𐴋𐴞𐴐𐴤𐴠𐴕 𐴓𐴡𐴘 𐴔𐴡𐴐𐴖𐴝𐴌𐴝 𐴒𐴡𐴌𐴥𐴝 𐴒𐴞𐴘𐴧𐴠 𐴁𐴡𐴓𐴞 𐴀𐴥𐴞𐴁𐴤𐴝 𐴘𐴠 𐴈𐴡𐴘𐴧𐴠 𐴱𐴱

𐴑𐴝𐴑𐴐𐴡 𐴁𐴝𐴎𐴝𐴌𐴡𐴌 𐴄𐴠𐴑𐴕𐴝𐴉𐴢 𐴀𐴝𐴌 𐴀𐴟𐴑𐴤𐴞𐴘𐴝 𐴀𐴟𐴉𐴡 𐴎𐴞𐴓𐴥𐴝𐴃 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴌 𐴁𐴤𐴟𐴃𐴡𐴌𐴠 𐴀𐴝𐴌 𐴕𐴟𐴈𐴥𐴝𐴓𐴞𐴌 𐴁𐴤𐴝𐴐𐴡𐴕 𐴏𐴡𐴌𐴡𐴃 , 𐴉𐴝𐴀𐴝𐴌𐴥𐴝 𐴁𐴝𐴌𐴥𐴝𐴘 𐴁𐴤𐴡𐴓𐴧𐴝 𐴏𐴥𐴟𐴖𐴝𐴌𐴞𐴐𐴢 𐴒𐴡𐴌𐴥𐴝 𐴒𐴞𐴘𐴧𐴠 , 𐴁𐴤𐴝𐴐𐴡𐴕 𐴏𐴡𐴌𐴡𐴃𐴧𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴟𐴄 𐴓𐴡𐴘 𐴀𐴝𐴀𐴝𐴘 𐴕𐴡 𐴉𐴝𐴌𐴥𐴠 𐴉𐴥𐴝𐴀𐴝𐴕 , 𐴊𐴡𐴙𐴅𐴧𐴙𐴝𐴌 𐴈𐴝𐴣𐴏𐴝 𐴀𐴠𐴓𐴝𐴑𐴝 𐴀𐴥𐴡𐴑𐴧𐴡𐴓𐴡𐴃 𐴕𐴠𐴁𐴤𐴞𐴌 𐴉𐴝𐴀𐴝𐴌𐴥𐴝 𐴁𐴠𐴐𐴤𐴞 𐴊𐴡𐴌𐴥𐴡 𐴔𐴡𐴌𐴥𐴡 𐴁𐴝𐴌𐴥𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴘𐴥𐴡 𐴀𐴟𐴎𐴞𐴌𐴠 𐴈𐴡𐴘𐴧𐴠 𐴱𐴱

𐴀𐴝𐴌 𐴑𐴠𐴀𐴠𐴔𐴡𐴌 𐴐𐴤𐴝𐴐𐴡𐴕 𐴀𐴝𐴌 𐴕𐴞𐴘𐴡𐴔 𐴑𐴝𐴕𐴟𐴕 𐴄𐴤𐴞𐴑 𐴀𐴥𐴡𐴀𐴡 𐴉𐴥𐴝𐴀𐴝𐴕 , 𐴉𐴟𐴓𐴞𐴐𐴢 , 𐴀𐴠 𐴂𐴞 𐴁𐴞 𐴀𐴠𐴕 , 𐴀𐴝𐴕𐴏𐴦𐴝𐴌 𐴀𐴝𐴌 𐴌𐴦𐴠𐴁 𐴁𐴠𐴒𐴧𐴤𐴟𐴕 𐴔𐴞𐴓𐴝𐴘𐴧𐴝 𐴄𐴞𐴀𐴞𐴔 𐴁𐴝𐴕𐴝𐴘 𐴊𐴞𐴘𐴝 𐴉𐴡𐴌𐴞𐴁𐴤𐴡 , 𐴑𐴠𐴀𐴠𐴔𐴡𐴌 𐴁𐴝𐴀𐴝𐴌𐴠 𐴘𐴥𐴡 𐴁𐴞 𐴅𐴞 𐴁𐴞 , 𐴌𐴦𐴠𐴁 𐴀𐴝𐴌 𐴉𐴟𐴓𐴞𐴐𐴢 𐴔𐴞𐴘𐴥𐴝𐴘 𐴉𐴝𐴀𐴝𐴌𐴥𐴝 𐴊𐴞𐴘𐴝 𐴉𐴡𐴌𐴞𐴁𐴤𐴡 , 𐴊𐴡𐴌𐴈𐴝𐴌 𐴀𐴥𐴡𐴘𐴓𐴠 𐴅𐴗𐴥𐴝𐴙𐴕 𐴑𐴝𐴌𐴖𐴝𐴘 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 , 𐴀𐴝𐴘𐴅𐴤𐴡 𐴑𐴠𐴀𐴠𐴔𐴡𐴌 𐴁𐴤𐴟𐴃𐴡𐴌𐴠 𐴁𐴠𐴀𐴝𐴙𐴕𐴞 𐴊𐴟𐴖𐴝𐴕 𐴀𐴥𐴡𐴑𐴧𐴡𐴓 𐴏𐴝𐴓𐴟 𐴁𐴡𐴓𐴞 𐴘𐴥𐴡 𐴒𐴤𐴡𐴌 𐴀𐴟𐴎𐴞𐴌𐴠 𐴈𐴡𐴘𐴧𐴠 𐴱𐴱

Sources : Dhakatribune