𐴑𐴠𐴀𐴠𐴔𐴡𐴃𐴧𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴋𐴦𐴝𐴘 𐴋𐴦𐴝𐴘 𐴁𐴝𐴀𐴞𐴌 𐴀𐴥𐴡𐴘 𐴎𐴝𐴀𐴝𐴌 𐴒𐴤𐴡𐴘 , 𐴀𐴠 𐴂𐴞 𐴁𐴞 𐴀𐴠𐴕𐴡𐴌 𐴕𐴡𐴎𐴡𐴌𐴊𐴝𐴌𐴞𐴌 𐴖𐴡𐴌𐴠 𐴏𐴥𐴟𐴖𐴝𐴓 𐴱𐴱

𐴀𐴟𐴑𐴤𐴞𐴘𐴝-𐴄𐴠𐴑𐴕𐴝𐴉𐴡𐴌 𐴴 𐴳 𐴐𐴤𐴝𐴕 𐴑𐴠𐴀𐴠𐴔𐴡𐴃𐴧𐴟 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴉𐴡𐴙𐴃𐴧𐴡 𐴊𐴞𐴕 𐴈𐴡𐴕𐴥𐴡 𐴑𐴟𐴐𐴤𐴡𐴓𐴠 𐴕𐴠𐴀𐴠𐴓𐴞 𐴁𐴝𐴚𐴓𐴝𐴊𐴠𐴐𐴤𐴡𐴌 𐴁𐴞𐴁𐴤𐴞𐴕𐴧𐴡 𐴎𐴝𐴒𐴝𐴃 𐴉𐴡𐴣𐴀𐴡𐴏𐴠𐴌 𐴒𐴤𐴡𐴘 , 𐴀𐴥𐴠𐴃𐴧𐴟 𐴑𐴠𐴙𐴏𐴧𐴥𐴟 𐴌𐴟𐴇𐴝𐴙𐴚𐴒𐴙𐴝 𐴀𐴝𐴙𐴕 𐴏𐴝𐴓𐴟 𐴉𐴥𐴡𐴖𐴏𐴡𐴌 𐴇𐴥𐴝𐴃𐴡𐴃 𐴊𐴤𐴡𐴌𐴝 𐴉𐴡𐴙𐴓𐴧𐴠 𐴘𐴥𐴡 , 𐴁𐴦𐴠𐴐𐴢 𐴁𐴤𐴝𐴒𐴢 𐴌𐴟𐴇𐴝𐴙𐴚𐴒𐴙𐴝 𐴕𐴞𐴌𐴝𐴉𐴡𐴃𐴧𐴝 𐴎𐴝𐴒𐴝𐴃 𐴊𐴤𐴝𐴘 𐴓𐴟𐴖𐴝𐴘 𐴎𐴝𐴀𐴝𐴌 𐴒𐴤𐴡𐴘 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃𐴧𐴟 𐴇𐴥𐴡𐴄𐴝𐴃 𐴒𐴡𐴌𐴥𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴠𐴀𐴠𐴕 𐴒𐴡𐴌𐴥𐴞 𐴁𐴝𐴀𐴞𐴌 𐴀𐴥𐴡𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴘𐴥𐴝𐴀𐴝𐴕𐴡𐴃 𐴊𐴠𐴐𐴤𐴡𐴙𐴃𐴧𐴝 𐴐𐴤𐴡𐴔𐴝𐴎𐴠 𐴀𐴡𐴐𐴤𐴝𐴕𐴃𐴞 𐴎𐴝𐴀𐴞𐴌 𐴒𐴡𐴙𐴅𐴧𐴤𐴙𐴠 , 𐴀𐴠 𐴂𐴞 𐴁𐴞 𐴀𐴠𐴕 𐴉𐴟𐴓𐴞𐴐𐴡𐴌 𐴃𐴞𐴕 𐴄𐴞𐴀𐴞𐴔𐴠 𐴉𐴦𐴟𐴓 𐴃𐴦𐴝𐴑𐴡𐴃 𐴓𐴡𐴘 𐴕𐴡𐴎𐴡𐴌𐴊𐴝𐴌𐴞 𐴀𐴝𐴌 𐴑𐴤𐴦𐴟𐴂𐴢 𐴈𐴡𐴌𐴝 𐴐𐴤𐴝𐴐𐴡𐴕 𐴒𐴡𐴌𐴥𐴡𐴕𐴡𐴌 𐴁𐴦𐴝𐴃𐴠 𐴘𐴥𐴡 , 𐴑𐴠𐴣𐴍𐴝 𐴏𐴥𐴞𐴘𐴡𐴓𐴡𐴌 𐴒𐴤𐴞𐴌𐴝 𐴉𐴝𐴌𐴥𐴝𐴘 𐴉𐴡𐴙𐴃𐴧𐴡 𐴊𐴞𐴕 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴕𐴠 𐴕𐴠𐴀𐴠𐴓𐴞 𐴎𐴝𐴘 𐴉𐴝𐴌𐴠𐴌 𐴁𐴡𐴓𐴞 𐴈𐴡𐴀𐴡𐴘 𐴃𐴦𐴝𐴅𐴧𐴟𐴁 𐴀𐴥𐴡𐴘𐴧𐴠 𐴱𐴱

𐴀𐴠𐴕𐴋𐴞𐴓𐴧𐴝 𐴒𐴡𐴌𐴥𐴞 𐴊𐴤𐴝𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴐𐴤𐴡𐴔𐴡𐴃 𐴒𐴡𐴃𐴡 𐴈𐴝𐴙𐴓𐴧𐴝 𐴁𐴟𐴙𐴃 𐴁𐴝𐴌𐴠 , 𐴸 𐴲 𐴱 𐴎𐴡𐴕 𐴁𐴡𐴕 𐴒𐴡𐴙𐴅𐴧𐴤𐴙𐴠𐴊𐴠 , 𐴀𐴥𐴟𐴀𐴟𐴕 𐴐𐴤𐴡𐴣𐴀𐴡 𐴒𐴡𐴃𐴡 𐴃𐴞𐴕 𐴊𐴞𐴕 𐴀𐴥𐴡𐴘𐴃𐴠 𐴑𐴝𐴌𐴖𐴝𐴘 𐴒𐴡𐴌𐴥𐴞 𐴁𐴡𐴕 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴟𐴀𐴟𐴕 𐴀𐴥𐴟𐴊𐴧𐴝 𐴔𐴞𐴓𐴝𐴘 𐴲 𐴱 𐴳 𐴎𐴡𐴕 𐴁𐴠𐴒𐴧𐴤𐴟𐴕𐴡𐴌𐴥𐴠 , 𐴀𐴟𐴑𐴤𐴞𐴘𐴝 𐴃𐴤𐴝𐴕𐴝𐴌 𐴉𐴟𐴓𐴞𐴐𐴠 𐴑𐴟𐴃𐴤𐴟𐴉𐴝𐴓𐴡𐴚 𐴄𐴠𐴌𐴝𐴕 𐴎𐴤𐴞𐴄 𐴑𐴠𐴀𐴠𐴔𐴡𐴃 𐴉𐴡𐴣𐴀𐴡𐴏𐴥𐴝𐴘 𐴊𐴞𐴘𐴠 𐴱𐴱

𐴉𐴥𐴝𐴓𐴡𐴚𐴈𐴝𐴓𐴞 𐴘𐴟𐴕𐴞𐴘𐴠𐴕𐴡𐴌 𐴏𐴞𐴘𐴥𐴝𐴌𐴔𐴥𐴠𐴕 / 𐴀𐴠𐴔 𐴒𐴡𐴉𐴟𐴌𐴟𐴊𐴧𐴞𐴕𐴠 𐴏𐴡𐴘𐴊𐴤𐴡𐴌𐴞 𐴘𐴠 𐴈𐴡𐴘𐴧𐴥𐴠𐴊𐴠 ! 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴎𐴠 𐴁𐴤𐴝𐴉𐴠 𐴐𐴤𐴝𐴌𐴝 𐴊𐴠𐴐𐴤𐴡𐴃 𐴏𐴥𐴡𐴌𐴝𐴘 𐴎𐴝𐴀𐴝𐴌 𐴒𐴤𐴡𐴘 , 𐴏𐴥𐴝𐴔𐴧𐴠 𐴎𐴝𐴘 𐴀𐴠𐴀𐴠𐴕 𐴈𐴡𐴕𐴥𐴡 𐴎𐴞𐴓𐴥𐴝 𐴀𐴟𐴉𐴡𐴎𐴞𐴓𐴥𐴝 𐴁𐴝𐴑𐴞 𐴕𐴡 𐴃𐴤𐴝𐴑𐴤𐴞𐴁𐴤𐴡 𐴎𐴠𐴍𐴥𐴠 𐴌𐴟𐴇𐴝𐴙𐴚𐴒𐴙𐴝 𐴉𐴝𐴀𐴝 𐴕𐴡 𐴎𐴝𐴘𐴁𐴤𐴡 , 𐴀𐴥𐴠𐴃𐴡𐴓𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴐𐴤𐴡𐴇𐴡𐴎𐴠 𐴑𐴠𐴀𐴠𐴔𐴡𐴃𐴧𐴟 𐴁𐴝𐴀𐴞𐴌 𐴀𐴥𐴡𐴘 𐴕𐴡 𐴉𐴝𐴌𐴥𐴠 𐴉𐴥𐴝𐴀𐴝𐴕 , 𐴀𐴝𐴌𐴀𐴥𐴡 𐴑𐴡𐴄𐴤𐴞𐴕 𐴁𐴤𐴝𐴉𐴠 𐴐𐴤𐴝𐴐𐴡𐴕𐴑𐴝𐴌 𐴀𐴥𐴡𐴑𐴧𐴡𐴓𐴡𐴌𐴃𐴧𐴟 𐴕𐴡𐴎𐴡𐴌𐴊𐴝𐴌𐴞 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 𐴱𐴱

Sources : Ukhiyanews.com