𐴀𐴠 𐴂𐴞 𐴁𐴞 𐴀𐴠𐴕 𐴉𐴟𐴓𐴞𐴐𐴡𐴌 𐴕𐴡𐴎𐴡𐴌𐴊𐴝𐴌𐴞 𐴕𐴡 𐴃𐴤𐴝𐴑𐴤𐴡𐴕𐴠 𐴑𐴠𐴀𐴠𐴔𐴡𐴌𐴃𐴧𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴊𐴤𐴝𐴌 𐴒𐴤𐴡𐴘 𐴱𐴱

𐴑𐴝𐴑𐴐𐴡 𐴁𐴝𐴎𐴝𐴌 𐴄𐴠𐴑𐴕𐴝𐴉𐴢-𐴀𐴟𐴑𐴤𐴞𐴘𐴝𐴌 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴌𐴃𐴧𐴟 , 𐴊𐴤𐴝𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴐𐴤𐴡𐴣𐴀𐴡𐴃 , 𐴄𐴠𐴑𐴕𐴝𐴉𐴢 𐴃𐴤𐴝𐴕𐴝𐴌 𐴉𐴟𐴓𐴞𐴐𐴡𐴌 𐴇𐴥𐴝𐴃𐴡𐴃 𐴰 𐴵 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 , 𐴁𐴞𐴁𐴤𐴞𐴕𐴧𐴡 𐴎𐴝𐴒𐴝𐴃 𐴔𐴟𐴊𐴝 𐴔𐴟𐴊𐴝 𐴏𐴝𐴀𐴝𐴘 𐴏𐴠𐴑 𐴁𐴟𐴖𐴥𐴝 𐴒𐴡𐴌𐴥𐴝𐴘 , 𐴀𐴠𐴂𐴌𐴞𐴓𐴡𐴌 𐴴 𐴃𐴝𐴌𐴥𐴞𐴑𐴡𐴃 𐴐𐴤𐴡𐴔 𐴁𐴝𐴌𐴠 𐴌𐴝𐴃𐴞𐴘𐴝 𐴱 𐴱 𐴁𐴝𐴎𐴡𐴌 𐴐𐴤𐴡𐴔𐴡𐴃 , 𐴀𐴥𐴞𐴃𐴝𐴌𐴝𐴌𐴥𐴠 𐴊𐴤𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴀𐴝𐴕 , 𐴄𐴠𐴑𐴕𐴝𐴉𐴢 𐴃𐴤𐴝𐴕𐴝𐴌 𐴀𐴡 𐴏𐴞 / 𐴇𐴝𐴉𐴞𐴎𐴟𐴌 𐴌𐴝𐴇𐴔𐴝𐴕𐴠 𐴈𐴥𐴝𐴄𐴞 𐴁𐴡𐴓𐴞 𐴈𐴡𐴘𐴧𐴠 𐴱𐴱

𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴀𐴥𐴟𐴀𐴟𐴕 𐴄𐴠𐴑𐴕𐴝𐴉𐴢 𐴀𐴟𐴑𐴤𐴞𐴘𐴝𐴌 𐴁𐴞𐴁𐴤𐴞𐴕𐴧𐴡 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴃𐴤𐴝𐴑𐴡𐴀𐴡𐴙𐴕𐴝 , 𐴐𐴤𐴠𐴐𐴠 𐴑𐴝𐴕𐴟𐴕𐴞 𐴑𐴝𐴌𐴖𐴝𐴘 𐴒𐴡𐴌𐴥𐴞𐴁𐴤𐴡𐴓𐴧𐴝 𐴄𐴠𐴌𐴝𐴕𐴎𐴤𐴞𐴄 𐴑𐴠𐴀𐴠𐴔𐴡𐴃 𐴉𐴡𐴣𐴀𐴡𐴏𐴝𐴘 𐴊𐴞𐴘𐴠 , 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴠 𐴁𐴦𐴠𐴐𐴢 𐴀𐴥𐴞𐴏𐴧𐴝 𐴁𐴠𐴍𐴞𐴘𐴝𐴙𐴕 , 𐴰 𐴵 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕 𐴑𐴠𐴀𐴠𐴔 𐴏𐴥𐴝𐴌𐴞 𐴁𐴞𐴁𐴤𐴞𐴕𐴧𐴡 𐴎𐴝𐴒𐴝𐴌 𐴀𐴟𐴎𐴟 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴐𐴤𐴡𐴔𐴡𐴃 𐴁𐴝𐴎𐴝𐴌𐴡𐴌 𐴀𐴝𐴐𐴠 𐴉𐴝𐴐𐴤𐴠 𐴑𐴝𐴌𐴖𐴝𐴘𐴃 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 𐴘𐴥𐴡 , 𐴀𐴡 𐴏𐴞 / 𐴇𐴝𐴉𐴞𐴎𐴟𐴌 𐴌𐴝𐴇𐴔𐴝𐴕𐴠 𐴈𐴡𐴘𐴧𐴠 𐴱𐴱

𐴁𐴦𐴝𐴊𐴠 𐴀𐴥𐴞𐴃𐴝𐴌𐴝𐴌𐴥𐴠 𐴑𐴝𐴕𐴟𐴕𐴞 𐴑𐴝𐴌𐴖𐴝𐴘 𐴒𐴡𐴌𐴥𐴞𐴁𐴤𐴡𐴓𐴧𐴝 , 𐴄𐴠𐴌𐴝𐴕𐴎𐴤𐴞𐴄 𐴑𐴠𐴀𐴠𐴔𐴡𐴃 𐴄𐴠𐴌𐴝𐴣𐴏𐴉𐴥𐴝𐴌 𐴒𐴡𐴌𐴥𐴝 𐴒𐴞𐴘𐴠 , 𐴑𐴝𐴌𐴖𐴝𐴘 𐴀𐴠𐴈𐴥𐴡𐴕 𐴀𐴥𐴡 𐴏𐴝𐴓𐴟 𐴀𐴝𐴏𐴥𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴡𐴀𐴡𐴃 𐴋𐴦𐴡𐴙𐴓𐴧𐴝 𐴓𐴟𐴁 𐴓𐴝𐴓𐴥𐴡𐴏𐴢 𐴊𐴠𐴈𐴥𐴝𐴘 , 𐴑𐴠𐴀𐴠𐴔𐴡𐴃𐴧𐴟 𐴕𐴠𐴀𐴠𐴓𐴝𐴘 𐴏𐴞𐴄𐴝𐴚 𐴐𐴤𐴡𐴣𐴀𐴡 𐴁𐴞𐴁𐴤𐴞𐴕𐴧𐴡 𐴐𐴤𐴡𐴀𐴡𐴌 𐴀𐴥𐴡𐴑𐴧𐴡𐴓𐴡𐴃 𐴓𐴡𐴘 𐴎𐴝𐴀𐴝 𐴒𐴤𐴡𐴘 𐴱𐴱

𐴋𐴝𐴓𐴝𐴓 𐴀𐴥𐴟𐴀𐴟𐴕𐴠 𐴁𐴠𐴍𐴘𐴝𐴙𐴕 𐴊𐴤𐴡𐴌𐴠 𐴈𐴥𐴡𐴌𐴝𐴁 𐴈𐴝𐴔𐴡𐴌 𐴄𐴤𐴠𐴑𐴝𐴃 𐴔𐴝𐴎𐴠 𐴊𐴠𐴀𐴠 , 𐴀𐴝𐴌 𐴁𐴠𐴍𐴝𐴀𐴝𐴙𐴕 𐴊𐴤𐴡𐴌𐴠 𐴁𐴞𐴁𐴤𐴞𐴕𐴧𐴡 𐴈𐴝𐴔 𐴊𐴤𐴡𐴌𐴝𐴘 𐴊𐴠𐴀𐴠 , 𐴋𐴝𐴓𐴝𐴓 𐴀𐴥𐴟𐴀𐴟𐴕𐴡𐴌𐴥𐴠 𐴑𐴡𐴔𐴞𐴐𐴤𐴠𐴕𐴡𐴌 𐴔𐴝𐴙𐴊𐴧𐴤𐴡𐴔𐴠 𐴄𐴞𐴛𐴝 𐴀𐴝𐴊𐴝𐴘 𐴒𐴡𐴌𐴥𐴠 𐴁𐴡𐴓𐴞 , 𐴑𐴝𐴑𐴐𐴡 𐴁𐴝𐴎𐴝𐴌 𐴉𐴟𐴓𐴞𐴐𐴡𐴌 𐴁𐴡𐴌𐴡 / 𐴔𐴟𐴇𐴝𐴔𐴧𐴡𐴊 𐴇𐴝𐴏𐴡𐴕𐴟𐴎 𐴎𐴡𐴔𐴝𐴕𐴠 𐴎𐴝𐴕𐴝𐴘𐴧𐴠 𐴱𐴱

𐴘𐴝𐴀𐴝𐴌 𐴀𐴝𐴒𐴠 𐴁𐴠𐴀𐴞𐴕𐴧𐴝 𐴏𐴥𐴡𐴌𐴠 𐴘𐴥𐴡 𐴀𐴟𐴑𐴤𐴞𐴘𐴝 𐴃𐴤𐴝𐴕𐴝𐴌 𐴉𐴟𐴓𐴞𐴐𐴠 𐴶 𐴳 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴡𐴕 𐴒𐴡𐴙𐴅𐴧𐴤𐴙𐴠 , 𐴀𐴥𐴝𐴣𐴃𐴞𐴘𐴝𐴌𐴞 𐴉𐴟𐴓𐴞𐴐𐴢 𐴁𐴠𐴄𐴤𐴠𐴓𐴞𐴘𐴠𐴕𐴡𐴌 𐴃𐴞𐴕 𐴋𐴦𐴝𐴘𐴧𐴠 𐴎𐴞𐴔𐴧𐴝𐴊𐴝𐴌𐴞 𐴉𐴝𐴓𐴡𐴕 𐴒𐴡𐴌𐴥𐴞 𐴁𐴦𐴝𐴊𐴠 𐴘𐴥𐴡 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴑𐴠𐴀𐴠𐴔𐴡𐴌 𐴁𐴝𐴀𐴝𐴌𐴠 𐴑𐴠𐴀𐴠𐴕𐴥𐴠 𐴕𐴠𐴀𐴠𐴓𐴞 𐴎𐴝𐴘 𐴒𐴤𐴡𐴘 𐴉𐴝𐴌𐴠𐴌 𐴁𐴡𐴓𐴞 𐴈𐴡𐴀𐴡𐴘 𐴏𐴥𐴟𐴖𐴝𐴓 𐴃𐴟𐴙𐴓𐴧𐴥𐴙𐴠 𐴱𐴱

Sources : Ukhiyanews.com