𐴁𐴡𐴌𐴔𐴥𐴝𐴌 𐴌𐴞𐴉𐴟𐴎𐴞𐴌𐴓𐴧𐴝 𐴀𐴝𐴔𐴠𐴌𐴞𐴑𐴝 𐴘𐴠 𐴉𐴥𐴞𐴃𐴞𐴕 𐴔𐴡𐴊𐴡𐴊 𐴒𐴡𐴙𐴅𐴧𐴤𐴙𐴠 𐴱𐴱

𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴕𐴡𐴏𐴥𐴡𐴓 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 , 𐴁𐴝𐴚𐴓𐴝𐴊𐴠𐴐𐴤𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴓𐴧𐴝 , 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴏𐴥𐴡𐴚𐴑𐴡𐴄 𐴉𐴥𐴟𐴌𐴝𐴘𐴁𐴤𐴝𐴌 𐴂𐴡𐴌𐴟𐴒𐴠𐴌𐴝𐴔 𐴔𐴡𐴎𐴞𐴕 , 𐴈𐴝𐴔 𐴒𐴡𐴌𐴥𐴞 𐴎𐴝𐴘 𐴉𐴝𐴌𐴠 𐴉𐴥𐴝𐴀𐴝𐴕, 𐴀𐴝𐴔𐴠𐴌𐴞𐴑𐴝 𐴘𐴠 𐴉𐴥𐴞𐴃𐴞𐴕 𐴀𐴥𐴡 𐴲 𐴵 𐴱 𐴔𐴡𐴓𐴞𐴘𐴟𐴕𐴡𐴌 𐴖𐴡𐴌𐴠 𐴋𐴦𐴡𐴓𐴝𐴌 𐴔𐴡𐴊𐴡𐴊 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 , 𐴀𐴝𐴔𐴠𐴌𐴞𐴑𐴝𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴞 𐴀𐴡𐴉𐴥𐴞𐴏𐴡𐴌 , 𐴈𐴡𐴃𐴤𐴝 𐴈𐴡𐴘𐴁𐴤𐴝𐴌 𐴀𐴠𐴅𐴝𐴎𐴡𐴃 𐴀𐴝𐴏𐴥𐴠𐴊𐴠 / 𐴕𐴠𐴋 𐴂𐴠𐴌𐴥𐴝𐴙𐴏𐴠 𐴔𐴝𐴌𐴠𐴆𐴡𐴌 𐴹 𐴲 𐴃𐴝𐴌𐴥𐴞𐴑𐴡𐴃 𐴈𐴡𐴘𐴧𐴠 𐴱𐴱

𐴷 𐴱 𐴰 𐴲 𐴐𐴤𐴡𐴕 𐴀𐴡𐴒𐴤𐴡𐴏𐴢 𐴔𐴥𐴝𐴐𐴡𐴌 𐴐𐴤𐴠𐴐𐴠 𐴁𐴝𐴚𐴓𐴝𐴊𐴠𐴐𐴤𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴥𐴠𐴊𐴠 𐴇𐴥𐴝𐴣𐴃 𐴓𐴝𐴑 𐴆𐴝𐴓𐴞𐴐𐴢 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌𐴓𐴧𐴝 , 𐴀𐴝𐴔𐴠𐴌𐴞𐴑𐴝 𐴘𐴠 𐴀𐴠𐴁𐴝𐴌 𐴔𐴡𐴊𐴡𐴊 𐴒𐴡𐴌𐴥𐴞𐴁𐴤𐴡𐴊𐴠 𐴀𐴥𐴟𐴀𐴟𐴕 𐴀𐴥𐴟𐴊𐴧𐴝 𐴔𐴞𐴓𐴝𐴘 𐴁𐴠𐴒𐴧𐴤𐴟𐴕𐴠 𐴷 ٫ 𐴱 𐴁𐴞𐴓𐴞𐴘𐴥𐴠𐴕 𐴋𐴦𐴡𐴓𐴝𐴌 𐴀𐴥𐴡𐴘𐴁𐴡 𐴱𐴱

𐴔𐴡𐴊𐴡𐴊 𐴀𐴞𐴀𐴞𐴕𐴠 𐴌𐴞𐴉𐴟𐴎𐴞𐴌𐴥𐴠 𐴏𐴥𐴝𐴀𐴝𐴌𐴝 𐴊𐴞𐴘𐴧𐴥𐴠𐴊𐴠 𐴁𐴝𐴚𐴓𐴝𐴊𐴠𐴐𐴤𐴡𐴌𐴥𐴠 𐴘𐴥𐴡 𐴉𐴥𐴝𐴘𐴊𐴝 𐴒𐴡𐴌𐴥𐴞𐴁𐴤𐴡 , 𐴌𐴟𐴇𐴝𐴙𐴚𐴒𐴙𐴝𐴌 𐴔𐴦𐴝𐴔𐴠𐴓𐴝𐴌 𐴉𐴥𐴟𐴣𐴖𐴝𐴣𐴃𐴞 𐴁𐴡𐴌𐴔𐴥𐴝𐴌 𐴁𐴤𐴟𐴃𐴡𐴌𐴠 𐴎𐴟𐴓𐴟𐴔 𐴁𐴝𐴌𐴥𐴞 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴘𐴥𐴝𐴀𐴝𐴕𐴡𐴌𐴓𐴧𐴝 , 𐴀𐴝𐴌𐴀𐴥𐴡 𐴁𐴦𐴠𐴐𐴢 𐴒𐴡𐴌𐴥𐴞 𐴊𐴤𐴞𐴘𐴝𐴕 𐴊𐴞𐴀𐴞𐴁𐴡𐴓𐴧𐴥𐴝 𐴉𐴟𐴌𐴝 𐴊𐴟𐴕𐴞𐴘𐴝𐴘 𐴌𐴥𐴠 𐴀𐴥𐴞𐴁𐴤𐴝 𐴘𐴠 𐴈𐴡𐴘𐴧𐴠 𐴱𐴱

𐴔𐴡𐴊𐴡𐴊 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴃𐴧𐴟 𐴀𐴝𐴔𐴠𐴌𐴞𐴑𐴝𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴞 𐴎𐴡𐴕𐴡 𐴐𐴤𐴡𐴙𐴚𐴑𐴙𐴝 𐴀𐴝𐴌 𐴌𐴞𐴉𐴟𐴎𐴞 𐴌𐴥𐴠 𐴊𐴟𐴖𐴥𐴝𐴌𐴥𐴝 𐴏𐴠𐴄𐴤𐴡𐴓 𐴒𐴡𐴌𐴥𐴡𐴙𐴕𐴧𐴝 𐴀𐴡𐴉𐴥𐴞𐴏𐴠 ( 𐴂𐴞 𐴀𐴝𐴌 𐴀𐴠𐴔𐴠 ) 𐴱 𐴵 𐴔𐴡𐴓𐴞𐴘𐴟𐴕 𐴋𐴦𐴡𐴓𐴝𐴌 𐴊𐴞𐴘𐴧𐴠 , 𐴊𐴠𐴐𐴁𐴞𐴊𐴠𐴐𐴢 𐴔𐴟𐴃𐴦𐴝𐴓𐴧𐴠𐴑 𐴀𐴝𐴔𐴠𐴌𐴞𐴑𐴝𐴌 𐴀𐴟𐴕𐴧𐴡𐴃𐴡 𐴂𐴡𐴌𐴟𐴒𐴠𐴌𐴝𐴔 ( 𐴘𐴟 𐴀𐴠𐴏𐴢 𐴀𐴠 𐴀𐴝𐴘 𐴋𐴞 ) 𐴘𐴠 𐴱 𐴰 𐴱 𐴔𐴡𐴓𐴞𐴘𐴟𐴕 𐴊𐴞𐴘𐴧𐴠 𐴱𐴱

𐴔𐴡𐴊𐴡𐴊𐴡𐴌 𐴄𐴞𐴛𐴝 𐴀𐴥𐴟𐴀𐴟𐴕 𐴐𐴤𐴟𐴊𐴠 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌 𐴂𐴡𐴌𐴟𐴒𐴠𐴌𐴝𐴔 𐴉𐴝𐴓𐴡𐴕 𐴀𐴝𐴌 𐴉𐴟𐴌𐴝 𐴒𐴡𐴌𐴥𐴞𐴁𐴤𐴡𐴓𐴧𐴝 𐴕𐴡𐴀𐴡 , 𐴌𐴞𐴉𐴟𐴎𐴞 𐴌𐴥𐴠 𐴏𐴥𐴝𐴀𐴝𐴌𐴝 𐴊𐴞𐴘𐴧𐴠𐴊𐴠 𐴀𐴡𐴉𐴥𐴞𐴏𐴢 𐴀𐴝𐴌 𐴌𐴞𐴉𐴟𐴎𐴞𐴌𐴥𐴠 𐴏𐴥𐴝𐴀𐴝𐴌𐴝 𐴊𐴞𐴘𐴧𐴠𐴊𐴠 𐴊𐴠𐴐𐴤𐴡𐴌 𐴂𐴝𐴡𐴓𐴥𐴞𐴑 𐴀𐴥𐴡𐴑𐴧𐴡𐴓𐴠 𐴘𐴥𐴡 𐴀𐴥𐴠𐴃𐴧𐴟 𐴉𐴥𐴝𐴘𐴊𐴝 𐴇𐴥𐴝𐴏𐴞𐴓 𐴒𐴡𐴌𐴥𐴞 𐴉𐴝𐴌𐴞𐴁𐴤𐴡 𐴱𐴱

Sources : RFA