𐴀𐴝𐴔𐴠𐴌𐴞𐴑𐴝 𐴐𐴤𐴡𐴣𐴀𐴡 𐴃𐴞𐴕 𐴊𐴠𐴐𐴤𐴠 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌 𐴖𐴡𐴌𐴠 𐴂𐴝𐴁𐴡𐴕𐴊𐴞 𐴓𐴝𐴒𐴝𐴘𐴧𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴀𐴡𐴚𐴏𐴥𐴝𐴕 𐴏𐴥𐴟𐴆𐴞𐴌 𐴁𐴤𐴟𐴍𐴠 𐴎𐴞𐴃𐴧𐴝 𐴑𐴝𐴕𐴟𐴕𐴞 𐴇𐴥𐴡𐴑𐴟𐴔𐴡𐴃 , 𐴑𐴟𐴀𐴟𐴂𐴢 𐴒𐴡𐴌𐴥𐴞 𐴂𐴝𐴂𐴓𐴥𐴞𐴑𐴡𐴌𐴥𐴠 𐴎𐴟𐴓𐴟𐴔 𐴒𐴡𐴌𐴥𐴠𐴌𐴊𐴧𐴠 𐴘𐴥𐴝𐴀𐴝𐴕𐴡𐴌 𐴀𐴠𐴓𐴎𐴝𐴔𐴡𐴃 , 𐴀𐴝𐴔𐴠𐴌𐴞𐴑𐴝 , 𐴁𐴞𐴄𐴤𐴞𐴐𐴢 𐴀𐴝𐴌 𐴑𐴠𐴕𐴠𐴋𐴝 𐴘𐴠 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌, 𐴖𐴡𐴌𐴠 𐴕𐴟𐴖𐴝 𐴁𐴤𐴝𐴉𐴠 𐴂𐴝𐴁𐴡𐴕𐴊𐴞 𐴓𐴝𐴒𐴝𐴘𐴧𐴠 𐴱𐴱

𐴁𐴡𐴌𐴔𐴥𐴝𐴌 𐴑𐴟𐴀𐴟𐴂𐴑𐴝𐴌 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡 𐴌𐴥𐴠 𐴀𐴥𐴝𐴣𐴃𐴞𐴘𐴝𐴌 𐴊𐴠𐴀𐴠𐴌𐴊𐴧𐴠 𐴀𐴠𐴓𐴎𐴝𐴔 𐴓𐴡𐴘 𐴁𐴡𐴀𐴡𐴃 𐴑𐴟𐴔𐴂𐴝𐴕𐴞 𐴀𐴝𐴌 𐴏𐴥𐴞𐴌𐴝 𐴀𐴠𐴑𐴝 𐴀𐴠𐴑𐴝𐴌 𐴁𐴠𐴌𐴟𐴊𐴧𐴤𐴠 , 𐴃𐴞𐴕𐴥𐴡 𐴊𐴠𐴐𐴤𐴠 𐴏𐴥𐴞𐴌𐴝 𐴀𐴠𐴏𐴄𐴠𐴙𐴄 𐴔𐴥𐴠𐴕𐴡𐴃 𐴂𐴝𐴁𐴡𐴕𐴊𐴞𐴌 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠 , 𐴁𐴞𐴄𐴤𐴞𐴐𐴡𐴌 𐴂𐴝𐴁𐴡𐴕𐴊𐴞𐴌 𐴕𐴟𐴖𐴝 𐴀𐴠𐴓𐴝𐴕𐴡𐴃 , 𐴋𐴝𐴑𐴄𐴡𐴌 𐴀𐴡𐴚 𐴔𐴗𐴠 𐴔𐴥𐴞𐴕𐴄 , 𐴀𐴡𐴚 𐴑𐴙𐴡 𐴕𐴝𐴙𐴚 𐴀𐴝𐴌 𐴅𐴡𐴕𐴡𐴌𐴡𐴓 𐴄𐴟𐴚 𐴀𐴡𐴚𐴀𐴥𐴠𐴌 𐴐𐴤𐴡𐴔𐴁𐴡𐴃𐴧𐴞 𐴎𐴡𐴁𐴊𐴤𐴡 𐴒𐴡𐴌𐴥𐴝 𐴐𐴤𐴡𐴣𐴀𐴡 𐴁𐴝𐴀𐴞𐴌𐴠 𐴕𐴠𐴀𐴠𐴓𐴡𐴕𐴡𐴌 𐴖𐴡𐴌𐴠 𐴂𐴝𐴁𐴡𐴕𐴊𐴞 𐴓𐴝𐴒𐴝𐴘𐴧𐴠 𐴱𐴱

𐴀𐴞𐴀𐴞𐴕 𐴁𐴦𐴝𐴊𐴠 𐴋𐴝𐴘𐴕𐴠𐴏𐴄𐴞 𐴀𐴞𐴕𐴄𐴝𐴌𐴕𐴥𐴠𐴐𐴕𐴠𐴓 𐴑𐴟𐴔𐴂𐴝𐴕𐴞 𐴓𐴞𐴔𐴞𐴄𐴤𐴠𐴋 , 𐴔𐴞𐴘𐴝𐴕𐴔𐴝𐴌 𐴑𐴠𐴔𐴞𐴔𐴠𐴓 𐴀𐴠𐴕𐴋 𐴔𐴞𐴐𐴞𐴕𐴝𐴌𐴞 𐴑𐴟𐴔𐴂𐴝𐴕𐴞 𐴓𐴞𐴔𐴞𐴄𐴤𐴠𐴋 𐴀𐴝𐴌 𐴔𐴞𐴘𐴝 𐴀𐴟𐴀𐴞𐴕 𐴀𐴞𐴕𐴄𐴝𐴌𐴕𐴥𐴠𐴐𐴕𐴠𐴓 𐴓𐴞𐴔𐴞𐴄𐴤𐴞𐴋𐴡𐴌 𐴐𐴤𐴡𐴔𐴁𐴡𐴃𐴧𐴞 𐴎𐴡𐴁𐴊𐴤𐴡 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴀𐴝𐴔𐴠𐴌𐴞𐴑𐴝 𐴘𐴠 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠 , 𐴂𐴝𐴁𐴡𐴕𐴊𐴞 𐴀𐴞𐴀𐴞𐴕𐴡𐴌𐴥𐴠 𐴉𐴟𐴌𐴝 𐴒𐴡𐴌𐴥𐴞𐴁𐴤𐴡𐴓𐴧𐴝 , 𐴁𐴞𐴄𐴤𐴞𐴐𐴤𐴠 𐴀𐴝𐴔𐴠𐴌𐴞𐴑𐴝 𐴀𐴝𐴌 𐴑𐴠𐴕𐴠𐴋𐴝𐴌 𐴁𐴠𐴐𐴤𐴞 𐴈𐴝𐴣𐴏𐴥𐴠 𐴀𐴥𐴡𐴘𐴧𐴡𐴌𐴠 𐴈𐴝𐴔 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 , 𐴁𐴞𐴄𐴤𐴞𐴐𐴠 𐴀𐴠𐴏𐴄𐴠𐴙𐴄𐴔𐴥𐴠𐴕 𐴀𐴠𐴑𐴧𐴤𐴝𐴕𐴡𐴃 𐴈𐴡𐴘𐴧𐴠 𐴱𐴱

𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴌𐴥𐴠 𐴀𐴥𐴝𐴣𐴃𐴞𐴘𐴝𐴌 𐴑𐴞𐴕𐴞 𐴓𐴡𐴘 𐴉𐴡𐴣𐴀𐴡𐴏𐴥𐴝𐴘 𐴊𐴠𐴀𐴠𐴌𐴊𐴧𐴠 , 𐴏𐴝𐴙𐴌 𐴎𐴡𐴕 𐴏𐴥𐴞𐴌𐴝 𐴀𐴠𐴑𐴝 𐴀𐴠𐴑𐴝 𐴀𐴝𐴌 𐴊𐴟𐴖𐴥𐴝 𐴑𐴟𐴔𐴂𐴝𐴕𐴞𐴌 𐴁𐴠𐴌𐴟𐴊𐴧𐴤𐴠 𐴂𐴝𐴁𐴡𐴕𐴊𐴞 𐴓𐴝𐴒𐴝𐴀𐴡𐴕𐴡𐴃 , 𐴀𐴝𐴔𐴠𐴌𐴞𐴑𐴝 𐴀𐴝𐴌 𐴁𐴞𐴄𐴤𐴞𐴐𐴡𐴌 𐴉𐴥𐴟𐴣𐴖𐴝𐴣𐴃𐴞 𐴔𐴞𐴓𐴞 𐴈𐴝𐴔 𐴒𐴡𐴌𐴥𐴠𐴌 𐴁𐴡𐴓𐴞 , 𐴑𐴠𐴕𐴠𐴋𐴝 𐴘𐴠 𐴀𐴠𐴏𐴄𐴠𐴙𐴄𐴔𐴥𐴠𐴕𐴡𐴃 𐴈𐴡𐴘𐴧𐴠 , 𐴐𐴤𐴡𐴕𐴊𐴡 𐴒𐴡𐴌𐴥𐴝 𐴎𐴝𐴀𐴝𐴊𐴠 𐴃𐴞𐴕𐴧𐴥𐴗𐴝 𐴀𐴥𐴝𐴣𐴃𐴞𐴘𐴝𐴌 𐴁𐴞𐴘𐴝𐴌𐴞 𐴋𐴦𐴝𐴘 𐴀𐴝𐴌 𐴀𐴥𐴞𐴃𐴝𐴌𐴝𐴌 𐴓𐴡𐴘 𐴅𐴡𐴍𐴞𐴃𐴡 𐴀𐴝𐴏𐴥𐴠𐴊𐴠 𐴊𐴟𐴖𐴧𐴝 𐴑𐴟𐴔𐴂𐴝𐴕𐴞𐴌 𐴖𐴡𐴌𐴠 𐴘𐴥𐴡 𐴂𐴝𐴁𐴡𐴕𐴊𐴞 𐴓𐴝𐴒𐴝𐴘𐴧𐴥𐴠 𐴁𐴡𐴓𐴞 𐴀𐴝𐴔𐴠𐴌𐴞𐴑𐴝 𐴘𐴠 𐴀𐴠𐴏𐴄𐴠𐴙𐴄𐴔𐴥𐴠𐴕 𐴕𐴠𐴀𐴠𐴓𐴝𐴘 𐴈𐴡𐴘𐴧𐴠 𐴱𐴱

𐴄𐴞𐴏𐴝𐴌 𐴀𐴥𐴝𐴣𐴃𐴞𐴘𐴝𐴌 𐴁𐴞𐴘𐴝𐴌𐴞𐴌 𐴖𐴡𐴌𐴠 𐴀𐴝𐴒𐴠 𐴓𐴡𐴃𐴞 𐴀𐴝𐴔𐴠𐴌𐴞𐴑𐴝𐴌 𐴂𐴝𐴁𐴡𐴕𐴊𐴞 𐴀𐴝𐴏𐴥𐴠 , 𐴊𐴟𐴘𐴧𐴥𐴝𐴕 𐴐𐴤𐴡𐴀𐴡𐴌𐴡𐴃 𐴂𐴝𐴂𐴓𐴥𐴞𐴑𐴡 𐴌𐴥𐴠 𐴎𐴤𐴝𐴑𐴧𐴗𐴝 𐴎𐴟𐴓𐴟𐴔 𐴒𐴡𐴌𐴥𐴠𐴌𐴊𐴧𐴠 𐴀𐴥𐴠𐴃𐴡𐴓𐴧𐴝 , 𐴁𐴡𐴌𐴔𐴥𐴝𐴌 𐴇𐴥𐴝𐴣𐴃𐴀𐴡𐴔 𐴓𐴥𐴝𐴙𐴄 𐴀𐴞𐴕𐴉𐴥𐴠𐴕𐴄𐴠𐴌𐴞 𐴋𐴠𐴖𐴞𐴐𐴤𐴠𐴕 𐴐𐴤𐴡𐴣𐴀𐴡 𐴊𐴟𐴖𐴧𐴥𐴝 𐴑𐴡𐴔𐴝𐴕𐴋𐴤𐴝𐴌𐴡𐴌 𐴖𐴡𐴌𐴠 𐴘𐴥𐴡 𐴂𐴝𐴁𐴡𐴕𐴊𐴞 𐴓𐴝𐴒𐴝𐴘𐴧𐴝 𐴀𐴝𐴏𐴥𐴠 𐴱𐴱

Sources : Ukhiyanews.com