𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌 𐴁𐴠𐴌𐴟𐴊𐴧𐴤𐴠 𐴑𐴝𐴌𐴖𐴝𐴘 𐴒𐴡𐴌𐴥𐴞𐴁𐴤𐴡𐴓𐴧𐴝 𐴇𐴙𐴥𐴟𐴔𐴥𐴠𐴕 𐴌𐴥𐴝𐴙𐴄 𐴖𐴥𐴝𐴆𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴑𐴡𐴗𐴕𐴏𐴥𐴞𐴓𐴡𐴌𐴥𐴠 𐴈𐴡𐴘𐴧𐴠 𐴱𐴱

𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑 𐴔𐴝𐴍𐴞 𐴒𐴡𐴌𐴥𐴠𐴌𐴊𐴧𐴠 𐴀𐴥𐴞𐴀𐴞𐴕 𐴁𐴡𐴕 𐴒𐴡𐴌𐴥𐴠 𐴉𐴥𐴝𐴀𐴝𐴕 𐴑𐴝𐴌𐴖𐴝𐴘 𐴒𐴡𐴌𐴥𐴞 𐴁𐴤𐴡𐴓𐴧𐴝 , ( 𐴇𐴥𐴙𐴟𐴔𐴥𐴠𐴕 𐴌𐴥𐴝𐴙𐴄 𐴖𐴥𐴝𐴆 ) 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑 𐴏𐴝𐴀𐴝𐴏𐴞𐴃𐴝 𐴒𐴡𐴌𐴥𐴠𐴊𐴠 𐴋𐴦𐴝𐴘𐴧𐴥𐴠 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴑𐴡𐴗𐴕𐴏𐴥𐴞𐴓𐴥𐴡 ( 𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌𐴡 ) 𐴌𐴥𐴠 𐴈𐴡𐴘𐴧𐴠 𐴱𐴱

𐴀𐴝𐴘𐴧𐴥𐴠𐴌𐴊𐴧𐴠 𐴱 𐴲 𐴃𐴝𐴌𐴥𐴞𐴑 𐴔𐴝𐴌𐴠𐴆𐴡𐴃 𐴁𐴡𐴌𐴔𐴥𐴝𐴌 𐴁𐴝𐴁𐴡𐴃𐴠 , 𐴀𐴝𐴓𐴡𐴏𐴝𐴕𐴝 𐴒𐴡𐴌𐴥𐴞𐴁𐴤𐴡 𐴈𐴡𐴀𐴡𐴘 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴑𐴡𐴗𐴕𐴏𐴥𐴞𐴓𐴠 𐴕𐴡𐴘𐴧𐴝 𐴌𐴠𐴂𐴟𐴄 𐴀𐴠𐴑𐴧𐴤𐴝𐴕 𐴕𐴠𐴀𐴠𐴓𐴝𐴘𐴧𐴥𐴠 , 𐴁𐴡𐴌𐴔𐴥𐴝 𐴌𐴥𐴠 𐴀𐴥𐴝𐴣𐴃𐴞𐴘𐴝𐴌 𐴁𐴠𐴏𐴝 𐴁𐴡𐴕 𐴒𐴡𐴌𐴥𐴝𐴘𐴁𐴤𐴡𐴓𐴧𐴝 , 𐴀𐴝𐴌 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴔𐴞𐴔𐴁𐴤𐴡𐴌 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴡𐴌𐴃𐴧𐴟 , 𐴎𐴠 𐴊𐴠𐴐𐴤𐴠 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴓𐴡𐴘 𐴃𐴦𐴝𐴓𐴧𐴟𐴑 𐴌𐴝𐴑𐴤𐴠 , 𐴊𐴠𐴐𐴢 𐴀𐴥𐴞𐴀𐴞𐴕𐴡𐴌 𐴁𐴠𐴌𐴟𐴊𐴧𐴤𐴠 𐴀𐴞𐴑𐴟𐴕𐴡𐴔𐴥𐴞𐴑 𐴂𐴝𐴁𐴡𐴕𐴊𐴞 𐴓𐴝𐴒𐴤𐴝𐴘𐴁𐴤𐴡𐴓𐴧𐴝 𐴔𐴡𐴐𐴖𐴝𐴌𐴝 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴞𐴝𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴑𐴡𐴕𐴏𐴥𐴞𐴓𐴠 𐴈𐴡𐴘𐴧𐴠 𐴁𐴡𐴓𐴞 , ( 𐴀𐴠𐴆 𐴀𐴝𐴌 𐴋𐴝𐴁𐴓𐴙𐴟 ) 𐴘𐴠 𐴈𐴡𐴘𐴧𐴠 𐴱𐴱

𐴁𐴡𐴌𐴔𐴥𐴝 𐴌𐴥𐴠 ( 𐴀𐴝𐴘 𐴏𐴞 𐴏𐴞 ) 𐴊𐴠𐴐𐴁𐴞𐴊𐴠𐴐𐴤𐴞 𐴀𐴞𐴕𐴏𐴦𐴝𐴉𐴢 𐴑𐴟𐴀𐴟𐴍𐴡𐴃 𐴃𐴟𐴓𐴥𐴞𐴁𐴤𐴡𐴓𐴧𐴝 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴑𐴡𐴗𐴕𐴏𐴥𐴞𐴓𐴠 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴇𐴥𐴠𐴉𐴝𐴎𐴡𐴃𐴞 𐴑𐴡𐴗𐴕𐴏𐴥𐴞𐴓𐴡 𐴌𐴥𐴠 𐴈𐴡𐴘𐴧𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 , 𐴁𐴡𐴌𐴔𐴥𐴝𐴃 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑 𐴀𐴝𐴌 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴏𐴥𐴡𐴚𐴑𐴡𐴄𐴡𐴌 𐴀𐴠𐴔𐴝𐴌𐴅𐴤𐴠𐴕𐴏𐴥𐴞 𐴇𐴥𐴝𐴓𐴡𐴃 𐴉𐴡𐴣𐴀𐴡𐴙𐴏𐴧𐴠 𐴁𐴡𐴓𐴞 , 𐴑𐴡𐴗𐴔𐴞 𐴏𐴥𐴡𐴔𐴡 𐴒𐴤𐴝𐴌 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴑𐴡𐴗𐴕𐴏𐴥𐴞𐴓𐴡𐴌𐴃𐴧𐴟 𐴀𐴠𐴓𐴝𐴕 𐴒𐴡𐴌𐴥𐴡𐴕 𐴏𐴝𐴀𐴝 𐴱𐴱

𐴇𐴥𐴡𐴑 𐴔𐴝𐴍𐴞 𐴀𐴝𐴌 𐴎𐴟𐴓𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴠𐴌𐴊𐴧𐴠 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴡𐴌𐴓𐴧𐴝 𐴁𐴠𐴐𐴤𐴞 𐴊𐴡𐴌𐴥𐴡 𐴔𐴡𐴌𐴥𐴡 𐴑𐴝𐴌𐴖𐴝𐴘 𐴒𐴡𐴌𐴥𐴡𐴕 𐴏𐴝𐴀𐴝 𐴁𐴡𐴓𐴞 𐴘𐴥𐴡 ( 𐴀𐴠𐴆 𐴀𐴝𐴌 𐴋𐴝𐴁𐴓𐴙𐴟 ) 𐴘𐴠 𐴈𐴡𐴘𐴧𐴠 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴊𐴠𐴐𐴁𐴞𐴊𐴠𐴐𐴤𐴞 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑 𐴀𐴝𐴌 𐴀𐴞𐴕𐴏𐴦𐴝𐴕𐴞𐴘𐴡𐴃𐴞𐴌 𐴔𐴟𐴃𐴦𐴝𐴓𐴧𐴠𐴑 𐴑𐴝𐴕𐴟𐴕𐴡𐴌𐴥𐴠 𐴁𐴤𐴝𐴚𐴞 𐴏𐴥𐴡𐴙𐴃𐴧𐴡𐴏𐴧𐴥𐴝𐴕 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 , 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴁𐴡𐴌𐴡 𐴑𐴡𐴔𐴞𐴐𐴕𐴝𐴌𐴡𐴌 𐴀𐴡𐴉𐴥𐴞𐴏𐴡𐴌𐴃𐴧𐴟 , 𐴔𐴠𐴌𐴠𐴆𐴡𐴌 𐴵 𐴱 𐴃𐴝𐴌𐴥𐴞𐴑𐴡𐴃 𐴕𐴞𐴕𐴊𐴝 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴘𐴥𐴡 ( 𐴀𐴠𐴆 𐴀𐴝𐴌 𐴋𐴝𐴁𐴓𐴙𐴟 ) 𐴘𐴠 𐴀𐴠𐴓𐴝𐴕𐴡𐴃 𐴈𐴡𐴘𐴧𐴠 𐴱𐴱

Sources : RFA