𐴀𐴞𐴕𐴋𐴟𐴕𐴞𐴆𐴤𐴙𐴝𐴌 𐴀𐴝𐴆𐴤𐴠 𐴀𐴠𐴓𐴝𐴑𐴝𐴌 𐴊𐴡𐴙𐴅𐴧𐴙𐴝𐴌 𐴏𐴡𐴌𐴡𐴃 𐴴 𐴱 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴓𐴝𐴙𐴔𐴧𐴥𐴙𐴠 𐴱𐴱

𐴁𐴝𐴚𐴓𐴝 𐴊𐴠𐴐𐴢 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌𐴃𐴧𐴟 , 𐴁𐴡𐴀𐴡𐴃 𐴉𐴟𐴖𐴝𐴙𐴕 𐴐𐴤𐴡𐴣𐴀𐴡 𐴰 𐴰 𐴱 𐴎𐴡𐴕𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴓𐴡𐴘 𐴁𐴟𐴄 𐴀𐴠𐴑𐴧𐴤𐴝𐴕 , 𐴀𐴞𐴕𐴋𐴟𐴕𐴞𐴆𐴤𐴙𐴝𐴌 𐴀𐴝𐴈𐴥𐴠𐴌𐴞 𐴀𐴟𐴃𐴧𐴡𐴌𐴠 𐴁𐴞𐴌𐴞𐴘𐴝𐴕 𐴋𐴞𐴐𐴄𐴤𐴞𐴑𐴡𐴌 𐴀𐴝𐴆𐴤𐴠 𐴀𐴠𐴓𐴝𐴑𐴝𐴌 𐴊𐴡𐴙𐴅𐴧𐴙𐴝𐴌 𐴏𐴡𐴌𐴡𐴃 , 𐴌𐴦𐴡𐴘 𐴁𐴝𐴌𐴠 𐴀𐴞𐴕𐴋𐴟𐴕𐴞𐴆𐴤𐴙𐴝𐴌 𐴄𐴝𐴙𐴔 𐴰 𐴰 : 𐴳 𐴁𐴝𐴎𐴞 𐴔𐴡𐴃𐴧𐴡𐴌 𐴕𐴡𐴒𐴡𐴓 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴉𐴟𐴓𐴞𐴐𐴠 𐴈𐴡𐴘𐴧𐴠 𐴱𐴱

𐴁𐴟𐴄 𐴘𐴥𐴝𐴀𐴝𐴕𐴡𐴃 𐴸 𐴵 𐴎𐴡𐴕 𐴁𐴠𐴍𐴝𐴀𐴝𐴙𐴃 𐴱 𐴲 𐴎𐴡𐴕 𐴁𐴠𐴍𐴞𐴘𐴝𐴙𐴕 𐴀𐴝𐴌 𐴵 𐴳 𐴎𐴡𐴕 𐴵 𐴱 𐴁𐴡𐴏𐴥𐴡𐴌𐴡 𐴕𐴠𐴏𐴠 𐴉𐴟𐴖𐴝𐴙𐴕 , 𐴁𐴠𐴒𐴧𐴤𐴟𐴕𐴠 𐴔𐴞𐴓𐴝𐴘 𐴴 𐴱 𐴱 𐴎𐴡𐴕 𐴁𐴡𐴓𐴞 𐴉𐴟𐴓𐴞𐴐𐴠 𐴈𐴡𐴘𐴧𐴠 , 𐴀𐴥𐴞𐴃𐴝𐴌𐴝𐴌𐴥𐴠 𐴑𐴡𐴁𐴤𐴞𐴋-𐴹 𐴱 𐴆𐴠𐴑 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴝𐴣𐴀𐴝𐴌𐴝 𐴋𐴝𐴑𐴄𐴡𐴌 𐴔𐴝𐴃𐴝𐴘𐴧𐴥𐴟𐴔 𐴁𐴡𐴓𐴞 , 𐴉𐴟𐴓𐴞𐴐𐴡𐴌 𐴁𐴡𐴌𐴡 / 𐴔𐴝𐴙𐴑 𐴇𐴝𐴌𐴋𐴞 𐴖𐴞𐴌𐴝𐴂𐴡𐴌𐴝 𐴎𐴝 𐴘𐴠 𐴀𐴠 𐴀𐴠𐴉𐴢 𐴂𐴞 𐴌𐴥𐴠 𐴈𐴡𐴘𐴧𐴠 𐴱𐴱

𐴘𐴥𐴝𐴀𐴝𐴌 𐴁𐴦𐴝𐴊𐴠 , 𐴎𐴝𐴒𐴝 𐴘𐴝𐴀𐴝𐴕 𐴓𐴡𐴘 𐴁𐴝𐴎𐴤𐴝𐴘𐴧𐴝 𐴓𐴟𐴇𐴑 𐴏𐴙𐴟𐴔𐴝 𐴖𐴠 , 𐴎𐴠𐴍𐴥𐴠 𐴌𐴞𐴉𐴟𐴎𐴞 𐴌𐴝𐴑𐴤𐴞 𐴁𐴤𐴡𐴓𐴧𐴝 𐴑𐴠𐴀𐴠𐴔 𐴁𐴝𐴕𐴝𐴘𐴧𐴝 𐴀𐴝𐴏𐴥𐴠 , 𐴀𐴥𐴠𐴍𐴠 𐴉𐴡𐴣𐴀𐴡𐴏𐴥𐴝𐴘 𐴊𐴞𐴘𐴝 𐴎𐴝𐴘𐴁𐴡 , 𐴈𐴡𐴊𐴦𐴟𐴕 𐴌𐴟𐴇𐴝𐴙𐴚𐴒𐴙𐴝 𐴓𐴡𐴘 𐴁𐴟𐴄 𐴀𐴠𐴑𐴧𐴤𐴝𐴕 𐴏𐴡𐴌𐴡𐴃 𐴀𐴡𐴀𐴡𐴙𐴎𐴧𐴤𐴙𐴠 𐴒𐴤𐴝𐴘 𐴁𐴡𐴓𐴞 𐴈𐴡𐴀𐴡𐴘 𐴎𐴝𐴙𐴓𐴧𐴝 𐴀𐴥𐴡𐴑𐴧𐴡𐴓𐴠 𐴈𐴥𐴡𐴁𐴡𐴌 𐴊𐴞𐴘𐴧𐴠𐴊𐴠 , 𐴁𐴟𐴄 𐴘𐴥𐴝𐴀𐴝𐴕𐴡𐴌 𐴇𐴥𐴝𐴓𐴡𐴃 𐴄𐴤𐴞𐴑 𐴀𐴝𐴏𐴥𐴠 , 𐴏𐴥𐴡𐴉𐴡𐴌𐴡𐴌 𐴄𐴝𐴙𐴔𐴡𐴃 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌𐴃𐴧𐴟 𐴈𐴥𐴝𐴕𐴝 𐴉𐴝𐴕𐴥𐴞 𐴘𐴥𐴡 𐴁𐴡𐴌𐴝𐴁𐴡𐴌 𐴑𐴟𐴓𐴝𐴘𐴧𐴥𐴠 𐴱𐴱

𐴀𐴠𐴑 𐴎𐴡𐴕 𐴌𐴞𐴉𐴟𐴎𐴞 / 𐴀𐴟𐴔𐴡𐴌 𐴉𐴦𐴝𐴌𐴟𐴑𐴠 , 𐴀𐴝𐴣𐴀𐴝𐴌𐴝 𐴔𐴟𐴓𐴥𐴝 𐴀𐴥𐴞𐴏𐴝𐴉𐴠 𐴁𐴡𐴌𐴔𐴥𐴝𐴌 , 𐴔𐴡𐴕𐴃𐴡𐴌 𐴀𐴝𐴣𐴀𐴝𐴌𐴝 𐴁𐴝𐴚𐴓𐴝 𐴊𐴠𐴐𐴤𐴡𐴃 𐴒𐴞𐴘𐴧𐴥𐴞𐴒𐴤𐴡𐴘 , 𐴀𐴠𐴈𐴥𐴡𐴕 𐴀𐴝𐴣𐴀𐴝𐴌𐴝 𐴁𐴝𐴚𐴓𐴝𐴊𐴠𐴐𐴢 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌𐴃𐴧𐴟 𐴀𐴝𐴙𐴐𐴧𐴤𐴞𐴊𐴠 𐴀𐴝𐴌 𐴀𐴝𐴣𐴀𐴝𐴌𐴝 𐴵 𐴲 𐴊𐴞𐴕 𐴊𐴡𐴙𐴅𐴧𐴙𐴝𐴃 𐴀𐴝𐴐𐴧𐴤𐴞𐴓𐴝𐴔 𐴁𐴡𐴓𐴞 𐴀𐴠 𐴀𐴠𐴉𐴢 𐴂𐴞 𐴈𐴥𐴡𐴁𐴡𐴌𐴡𐴌 𐴌𐴠𐴂𐴟𐴄𐴝𐴌𐴡𐴌𐴥𐴠 𐴈𐴡𐴘𐴧𐴠 , 𐴁𐴝𐴚𐴓𐴝𐴊𐴠𐴐𐴤𐴡𐴃 𐴑𐴠𐴀𐴠𐴔𐴡𐴃 𐴀𐴠𐴈𐴥𐴡𐴕 𐴌𐴟𐴇𐴝𐴙𐴚𐴒𐴙𐴝𐴌 𐴇𐴥𐴝𐴓𐴡𐴃 𐴁𐴠𐴐𐴤𐴞 𐴈𐴥𐴡𐴌𐴝𐴁 , 𐴀𐴥𐴠𐴃𐴡𐴓𐴧𐴝 𐴀𐴝𐴣𐴀𐴝𐴌𐴝 𐴁𐴝𐴚𐴓𐴝𐴊𐴠𐴐𐴢 𐴏𐴥𐴝𐴌𐴞 𐴀𐴝𐴀𐴝𐴘 𐴒𐴞𐴘𐴞 𐴒𐴤𐴡𐴘𐴊𐴠 𐴁𐴡𐴓𐴞 𐴱 𐴱 𐴁𐴡𐴏𐴥𐴡𐴙𐴅𐴧𐴙𐴝 𐴉𐴟𐴖𐴝 𐴘𐴠 𐴀𐴞𐴚𐴓𐴞𐴐𐴤𐴡𐴃 𐴈𐴡𐴘𐴧𐴠 𐴱𐴱

𐴀𐴦𐴝𐴛 𐴀𐴝𐴣𐴀𐴝𐴌 𐴔𐴦𐴝𐴣𐴌𐴥𐴠 𐴁𐴝𐴚𐴓𐴝𐴊𐴠𐴐𐴤𐴡𐴃 𐴀𐴠𐴌𐴞 𐴕𐴟𐴖𐴝 𐴎𐴞𐴕𐴊𐴞𐴒𐴞 𐴁𐴝𐴕𐴝𐴘𐴁𐴤𐴡𐴓𐴧𐴝 , 𐴀𐴞𐴕𐴋𐴟𐴕𐴞𐴆𐴤𐴙𐴝 𐴀𐴝𐴌 𐴔𐴡𐴓𐴝𐴘𐴆𐴤𐴙𐴝𐴌 𐴋𐴦𐴡𐴙𐴓𐴧𐴝 𐴁𐴦𐴠𐴐𐴢 𐴐𐴤𐴡𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕𐴡𐴌 𐴊𐴠𐴐𐴢 𐴁𐴝𐴏𐴥𐴞 𐴓𐴡𐴘 𐴀𐴝𐴣𐴀𐴝𐴌 𐴔𐴝𐴔𐴟𐴌 𐴉𐴥𐴟𐴣𐴖𐴝𐴣𐴃𐴞 𐴀𐴝𐴙𐴐𐴧𐴤𐴞𐴊𐴠 , 𐴀𐴝𐴌 𐴀𐴝𐴣𐴀𐴝𐴌𐴃𐴧𐴟 𐴁𐴝𐴉𐴢 𐴀𐴥𐴡 𐴕𐴥𐴝𐴘 𐴀𐴝𐴌 𐴀𐴦𐴝𐴛 𐴐𐴤𐴟𐴕𐴊𐴡𐴌 𐴔𐴟𐴀𐴟𐴔𐴈𐴝𐴓 𐴀𐴝𐴌 𐴀𐴝𐴣𐴀𐴝𐴌 𐴐𐴤𐴞𐴑𐴧𐴝 𐴃𐴦𐴝𐴓𐴞𐴔 𐴁𐴝𐴌𐴥𐴝𐴘𐴁𐴤𐴡𐴓𐴧𐴝 𐴁𐴝𐴚𐴓𐴝𐴊𐴠𐴐𐴤𐴡𐴌𐴃𐴧𐴟 𐴕𐴠𐴀𐴠𐴓𐴞 𐴒𐴞𐴘𐴧𐴥𐴞 𐴒𐴤𐴡𐴘𐴊𐴠 𐴁𐴡𐴓𐴞 𐴉𐴦𐴝𐴌𐴟𐴑𐴠 𐴈𐴡𐴘𐴧𐴠 𐴱𐴱

Sources : Dhakatribune