𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌𐴡𐴌 𐴕𐴝𐴀𐴞𐴁𐴢 𐴏𐴥𐴡 𐴊𐴞𐴕𐴧𐴝 𐴁𐴠𐴌𐴝 𐴓𐴡𐴘 𐴉𐴡𐴣𐴀𐴡𐴙𐴏𐴧𐴙𐴠 𐴱𐴱

𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌𐴡𐴌 𐴕𐴝𐴀𐴞𐴁𐴢 / 𐴑𐴠𐴓𐴞 𐴄𐴞 𐴑𐴠𐴓𐴠𐴔𐴥𐴠𐴕𐴄 , 𐴏𐴥𐴡 𐴊𐴞𐴕𐴧𐴝 𐴁𐴠𐴌𐴝𐴘𐴁𐴤𐴝𐴌 𐴈𐴝𐴔 𐴓𐴡𐴘 , 𐴌𐴦𐴡𐴘 𐴁𐴝𐴌𐴠 𐴁𐴝𐴚𐴓𐴝𐴊𐴠𐴐𐴤𐴡𐴃 𐴉𐴡𐴣𐴀𐴡𐴙𐴏𐴧𐴙𐴠 𐴱𐴱

𐴀𐴥𐴞𐴁𐴤𐴝 𐴎𐴞𐴔𐴧𐴝𐴊𐴝𐴌𐴞 𐴓𐴡𐴘 𐴁𐴠𐴌𐴝𐴘𐴃𐴤𐴡 𐴀𐴝𐴙𐴐𐴧𐴤𐴙𐴠𐴊𐴠 𐴁𐴠𐴌𐴝 𐴀𐴞𐴁𐴤𐴝𐴃 , 𐴁𐴝𐴚𐴓𐴝𐴊𐴠𐴐𐴤𐴠 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴏𐴥𐴝𐴀𐴝𐴌𐴝 𐴊𐴞𐴘𐴠𐴊𐴤𐴠 , 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴇𐴥𐴝𐴔𐴞𐴐𐴤𐴝 𐴓𐴝𐴒𐴝𐴃𐴝𐴌 𐴇𐴥𐴠𐴔𐴝𐴘𐴡𐴃 𐴒𐴡𐴌𐴞𐴁𐴤𐴡𐴓𐴧𐴝 𐴉𐴟𐴌𐴝 𐴊𐴟𐴕𐴞𐴘𐴝𐴘 𐴌𐴥𐴠 𐴈𐴡𐴘𐴁𐴤𐴡 𐴱𐴱

𐴎𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴡𐴌𐴔𐴥𐴝𐴌 𐴕𐴞𐴌𐴝𐴉𐴡𐴃𐴧𐴝 𐴉𐴥𐴡𐴗𐴏𐴢 𐴀𐴝𐴌 𐴀𐴥𐴞𐴃𐴝𐴌𐴝𐴌 𐴇𐴥𐴠𐴔𐴝𐴘𐴡𐴃𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴎𐴟𐴓𐴟𐴔 𐴀𐴡𐴃𐴧𐴞𐴏𐴝𐴌𐴡𐴌 𐴎𐴡𐴌𐴞𐴘𐴝 𐴊𐴤𐴝𐴘 𐴁𐴝𐴚𐴓𐴝𐴊𐴠𐴐𐴤𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴠 , 𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌𐴡𐴌 𐴕𐴝𐴀𐴞𐴁𐴢 , 𐴏𐴥𐴡 𐴊𐴞𐴕𐴧𐴝 𐴁𐴠𐴌𐴝 𐴈𐴝𐴔 𐴓𐴡𐴘 𐴁𐴝𐴚𐴓𐴝𐴊𐴠𐴐𐴤𐴡𐴌 𐴏𐴥𐴡𐴉𐴡𐴌 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 , 𐴁𐴝𐴚𐴓𐴝𐴊𐴠𐴐𐴤𐴡𐴌 𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌𐴡𐴌 𐴎𐴞𐴔𐴧𐴝𐴊𐴝𐴌 𐴀𐴠𐴑 𐴎𐴡𐴕𐴠 𐴋𐴤𐴝𐴑𐴝 𐴄𐴠𐴌𐴞𐴁𐴙𐴟𐴕𐴡𐴌𐴥𐴠 𐴈𐴡𐴘𐴧𐴠 𐴱𐴱

𐴁𐴤𐴝𐴐𐴡𐴕 𐴏𐴡𐴌 𐴀𐴝𐴌 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴇𐴥𐴝𐴓𐴡𐴃𐴡𐴌 𐴖𐴡𐴌𐴠 , 𐴀𐴥𐴞𐴁𐴤𐴝𐴌 𐴁𐴡𐴌𐴝𐴁𐴡𐴙𐴅𐴧𐴙𐴝 𐴁𐴝𐴚𐴓𐴝𐴊𐴠𐴐𐴤𐴡𐴃 𐴀𐴝𐴏𐴥𐴠𐴊𐴠 𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌𐴡𐴌 𐴎𐴞𐴔𐴧𐴝𐴊𐴝𐴌 𐴓𐴡𐴘 𐴁𐴞𐴘𐴝𐴏𐴝𐴕𐴝 𐴒𐴡𐴌𐴥𐴞𐴁𐴤𐴡 , 𐴀𐴥𐴞𐴁𐴤𐴝 , 𐴔𐴟𐴀𐴟𐴔 𐴈𐴝𐴓𐴡𐴌 𐴀𐴝𐴐𐴤𐴝 𐴀𐴝𐴌 𐴀𐴠𐴈𐴥𐴡𐴕𐴡𐴌 𐴎𐴡𐴌𐴟𐴌𐴡𐴃 𐴀𐴝𐴌 𐴀𐴝𐴉𐴡𐴃𐴧𐴞𐴌 𐴁𐴝𐴁𐴡𐴃𐴠 , 𐴔𐴟𐴌𐴡𐴃 𐴎𐴝𐴘 𐴁𐴟𐴎𐴤𐴝𐴁𐴟𐴎𐴤𐴞 𐴒𐴡𐴌𐴥𐴞𐴁𐴤𐴡𐴓𐴧𐴝 , 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴓𐴡𐴘 𐴘𐴥𐴡 𐴊𐴡𐴓𐴝 𐴀𐴥𐴡𐴘𐴁𐴡 𐴱𐴱

𐴀𐴝𐴌𐴀𐴥𐴡 𐴀𐴥𐴞𐴀𐴞𐴕𐴡𐴌 𐴉𐴥𐴟𐴣𐴖𐴝𐴣𐴃𐴞 , 𐴀𐴥𐴞𐴁𐴤𐴝 𐴊𐴝𐴕 𐴈𐴥𐴡𐴌𐴝𐴃 𐴒𐴡𐴌𐴥𐴡𐴙𐴕𐴧𐴝 , 𐴏𐴞𐴁𐴤𐴞𐴓 𐴐𐴤𐴡𐴔𐴝𐴎 𐴋𐴦𐴝𐴘 𐴀𐴝𐴌 𐴌𐴞𐴉𐴟𐴎𐴞𐴌 𐴔𐴦𐴝𐴔𐴠𐴓𐴝𐴃 𐴈𐴝𐴔 𐴒𐴡𐴌𐴥𐴡𐴙𐴕𐴧𐴝 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓 𐴓𐴡𐴘 𐴘𐴥𐴡 𐴁𐴞𐴘𐴝𐴏𐴝𐴕𐴝 𐴒𐴡𐴌𐴥𐴞𐴁𐴡 𐴱𐴱

𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌𐴡𐴌 𐴀𐴝𐴏𐴞𐴘𐴝 𐴀𐴝𐴌 𐴉𐴠𐴏𐴞𐴉𐴥𐴞𐴑 𐴀𐴠𐴓𐴝𐴑𐴝𐴘 𐴀𐴡𐴉𐴥𐴞𐴏𐴡𐴌 𐴋𐴝𐴘𐴌𐴠𐴑𐴄𐴝𐴌 / 𐴀𐴞𐴕𐴋𐴞𐴌𐴞𐴑𐴝 𐴌𐴝𐴄𐴖𐴝𐴄 𐴀𐴥𐴡 𐴀𐴥𐴞𐴁𐴤𐴝𐴌 𐴉𐴥𐴟𐴣𐴖𐴥𐴝𐴣𐴃𐴞 𐴃𐴤𐴝𐴑𐴞𐴁𐴤𐴡 , 𐴋𐴞𐴂𐴙𐴟𐴄𐴞 𐴇𐴥𐴝𐴘 𐴑𐴡𐴔𐴞𐴐𐴕𐴝𐴌 𐴀𐴥𐴞𐴏𐴝𐴉𐴠 , 𐴑𐴠𐴓𐴠𐴔𐴥𐴠𐴕𐴄 𐴁𐴝𐴚𐴓𐴝𐴊𐴠𐴐𐴤𐴡𐴃 𐴃𐴞𐴕𐴀𐴡𐴔 𐴁𐴝𐴌 𐴀𐴝𐴙𐴐𐴧𐴤𐴙𐴠𐴊𐴠 𐴱𐴱

Sources : Dhakatribune