𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 ( 𐴁𐴞 𐴅𐴞 𐴂𐴞 ) 𐴘𐴠 𐴌𐴟𐴇𐴝𐴙𐴚𐴒𐴙𐴝𐴌 𐴒𐴝𐴏𐴢 𐴀𐴥𐴡𐴑𐴧𐴡𐴓 𐴈𐴝𐴍𐴞 𐴘𐴥𐴡𐴌𐴠 𐴁𐴠𐴏𐴞 𐴉𐴥𐴠𐴓𐴥𐴝𐴌 𐴱𐴱

𐴷 𐴱 𐴰 𐴲 𐴐𐴤𐴡𐴕𐴡𐴃 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴅𐴠𐴕𐴟𐴏𐴥𐴝𐴙𐴋 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 , 𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴌𐴃𐴧𐴟 𐴊𐴠𐴐𐴢 𐴏𐴥𐴝𐴌𐴞 𐴁𐴝𐴚𐴓𐴝𐴊𐴠𐴐𐴤𐴡𐴃 𐴀𐴝𐴀𐴝𐴘 𐴒𐴞𐴘𐴥𐴠 𐴒𐴤𐴡𐴘𐴊𐴠 𐴀𐴥𐴠𐴕𐴋𐴞𐴓𐴧𐴝 , 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴡𐴌 𐴑𐴞𐴘𐴝𐴌 𐴑𐴡𐴚 𐴄𐴡𐴚 𐴉𐴝𐴌𐴝𐴌 𐴔𐴝𐴕𐴥𐴙𐴐𐴢 𐴀𐴥𐴡 𐴁𐴠𐴐𐴢 𐴀𐴥𐴞𐴏𐴧𐴝 𐴁𐴝𐴚𐴓𐴝𐴊𐴠𐴐𐴤𐴡𐴃 𐴊𐴤𐴝𐴘 𐴀𐴝𐴙𐴐𐴧𐴤𐴙𐴠 , 𐴀𐴠𐴈𐴥𐴡𐴕 𐴁𐴞 𐴅𐴞 𐴂𐴞 𐴀𐴥𐴡𐴑𐴧𐴡𐴓𐴠 𐴀𐴥𐴞𐴃𐴝𐴌𐴝𐴌 𐴁𐴤𐴞𐴍𐴝𐴌 𐴒𐴝𐴏𐴢 𐴀𐴥𐴡𐴑𐴧𐴡𐴓 𐴈𐴝𐴍𐴞 𐴁𐴠𐴏𐴞 𐴉𐴥𐴠𐴓𐴠𐴌 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴔𐴝𐴙𐴕𐴐𐴤𐴙𐴠 𐴈𐴡𐴘𐴧𐴠 𐴱𐴱

𐴀𐴠 𐴉𐴝𐴌𐴝 𐴘𐴥𐴝𐴀𐴝𐴕𐴡𐴃 𐴀𐴠𐴈𐴥𐴡𐴕 𐴐𐴤𐴟𐴊𐴠 𐴹 𐴲 𐴐𐴤𐴗𐴝 𐴒𐴤𐴡𐴌𐴒𐴟𐴐𐴧𐴞 𐴀𐴝𐴏𐴥𐴠𐴊𐴠 𐴀𐴥𐴟𐴀𐴟𐴕𐴡𐴌𐴠 , 𐴕𐴝𐴂𐴧𐴟𐴌𐴥𐴝 𐴏𐴥𐴠𐴑𐴄𐴡𐴌 𐴵 𐴏𐴡𐴌𐴃𐴧𐴤𐴟 𐴓𐴡𐴌𐴞 𐴑𐴞𐴘𐴝𐴌 𐴑𐴡𐴚 𐴄𐴡𐴚 𐴉𐴝𐴌𐴝𐴌 𐴁𐴞 𐴅𐴞 𐴂𐴞 𐴒𐴤𐴝𐴣𐴄𐴞𐴃 𐴀𐴝𐴙𐴐𐴧𐴤𐴙𐴠𐴊𐴠 , 𐴉𐴟𐴓𐴞𐴐𐴡𐴌 𐴐𐴤𐴡𐴎𐴟𐴒𐴞 𐴐𐴤𐴀𐴝𐴉𐴢 / 𐴄𐴟𐴕 𐴄𐴟𐴕 𐴓𐴗𐴞𐴕𐴠 𐴁𐴠𐴐𐴤𐴞 𐴎𐴟𐴓𐴟𐴔 𐴒𐴡𐴌𐴥𐴠𐴌 𐴱𐴱

𐴀𐴥𐴠 𐴄𐴟𐴕 𐴄𐴟𐴕 𐴓𐴗𐴞𐴕𐴠 𐴀𐴠𐴈𐴥𐴡𐴕 𐴉𐴝𐴌𐴝𐴃 𐴀𐴝𐴏𐴥𐴠𐴊𐴠 𐴀𐴥𐴞𐴃𐴝𐴌𐴝𐴌 𐴁𐴤𐴞𐴍𐴝𐴌𐴃𐴧𐴟 𐴀𐴝𐴌 𐴁𐴝𐴚𐴓𐴝𐴊𐴠𐴐𐴤𐴡𐴃 𐴌𐴞𐴉𐴟𐴎𐴞 𐴁𐴡𐴙𐴕𐴧𐴥𐴙𐴠𐴊𐴠 𐴀𐴥𐴞𐴃𐴝𐴌𐴝𐴌 𐴁𐴤𐴞𐴍𐴝𐴌𐴃𐴧𐴟 𐴃𐴝𐴌 𐴔𐴡𐴕 𐴔𐴥𐴝𐴙𐴑 𐴒𐴝𐴏𐴢 𐴀𐴥𐴡𐴑𐴧𐴡𐴓 𐴈𐴝𐴍𐴞 , 𐴀𐴥𐴟 𐴏𐴞𐴕 𐴅𐴝 𐴉𐴝𐴌𐴝𐴌 𐴴 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝𐴃 𐴃𐴤𐴝𐴑𐴠𐴊𐴠 𐴔𐴝𐴔𐴟𐴕 𐴌𐴡𐴐𐴞𐴊 𐴁𐴡𐴐𐴢 𐴰 𐴴 𐴁𐴡𐴏𐴥𐴡𐴌𐴡𐴌𐴥𐴠 𐴁𐴠𐴏𐴠𐴌 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

𐴕𐴝𐴔 𐴕𐴡 𐴈𐴡𐴘𐴁𐴤𐴝𐴌 𐴐𐴡𐴌𐴥𐴡𐴃 𐴓𐴡𐴘 𐴀𐴠𐴑 𐴎𐴡𐴕 𐴊𐴟𐴑𐴧𐴤𐴞𐴃𐴝 𐴘𐴠 𐴈𐴡𐴘𐴧𐴠𐴊𐴠 ! 𐴀𐴝𐴣𐴀𐴝𐴌𐴝𐴌 𐴐𐴤𐴡𐴔𐴁𐴡𐴃𐴧𐴞 𐴀𐴥𐴡𐴑𐴧𐴡𐴓𐴡𐴌𐴥𐴠 𐴀𐴥𐴞𐴃𐴝𐴌 𐴁𐴝𐴉𐴡𐴌 𐴊𐴧𐴞𐴕𐴧𐴝 𐴔𐴞𐴌𐴝𐴏𐴞 𐴀𐴥𐴞𐴏𐴝𐴉𐴠 𐴉𐴥𐴟𐴌𐴝𐴘 𐴉𐴥𐴠𐴓𐴥𐴝𐴌 , 𐴀𐴥𐴞𐴃𐴝𐴌𐴃𐴧𐴟 𐴀𐴥𐴝𐴣𐴃𐴞𐴘𐴝𐴌 𐴀𐴝𐴏𐴥𐴠𐴊𐴠 𐴀𐴥𐴠𐴃𐴡𐴓𐴧𐴝 𐴀𐴥𐴞𐴃𐴝𐴌 𐴁𐴠𐴌𐴟𐴊𐴧𐴤𐴠 𐴐𐴤𐴠𐴑𐴝𐴘𐴡𐴃 𐴒𐴡𐴌𐴥𐴞𐴁𐴤𐴡𐴓𐴧𐴝 𐴈𐴡𐴕𐴥𐴞𐴑𐴧𐴤𐴙𐴝 𐴀𐴥𐴞𐴔𐴧𐴡𐴃 𐴕𐴡 𐴒𐴡𐴌𐴥𐴠 , 𐴀𐴝𐴌 𐴒𐴡𐴙𐴓𐴧𐴥𐴙𐴠 𐴘𐴥𐴡 𐴈𐴝𐴌𐴥𐴠 𐴒𐴡𐴙𐴅𐴧𐴤𐴙𐴟𐴔 𐴁𐴤𐴡𐴘 𐴱𐴱

𐴑𐴠𐴙𐴏𐴧𐴥𐴟 𐴉𐴝𐴙𐴅𐴧𐴙𐴝 𐴔𐴝𐴙𐴕𐴐𐴤𐴠 𐴀𐴥𐴞𐴔𐴧𐴡𐴃 𐴒𐴡𐴌𐴥𐴞 𐴃𐴝𐴌𐴥𐴠 𐴎𐴝𐴘 𐴈𐴡𐴘𐴧𐴥𐴠 𐴔𐴡𐴕𐴃𐴡𐴌 , 𐴀𐴞𐴀𐴞𐴕 𐴃𐴟𐴣𐴖𐴥𐴝𐴣𐴝𐴌𐴝𐴌𐴊𐴧𐴠 𐴘𐴥𐴝𐴀𐴝𐴕𐴡𐴌 𐴏𐴥𐴝𐴁𐴟𐴃 𐴀𐴝𐴕𐴥𐴡 𐴒𐴤𐴡𐴘 𐴈𐴡𐴀𐴡𐴘 𐴉𐴥𐴞𐴌𐴝𐴘 𐴊𐴞𐴘𐴠 , 𐴁𐴦𐴝𐴎 𐴀𐴡𐴑𐴃𐴤𐴡𐴃 𐴉𐴟𐴓𐴞𐴐𐴡𐴌 𐴐𐴤𐴡𐴎𐴟𐴒𐴞 𐴐𐴤𐴝𐴀𐴝𐴉𐴢 / 𐴄𐴟𐴕 𐴄𐴟𐴕 𐴓𐴗𐴞𐴕𐴠 𐴒𐴝𐴏𐴢 𐴀𐴥𐴡𐴑𐴧𐴡𐴓 𐴈𐴝𐴍𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴀𐴥𐴡𐴓𐴞𐴌 𐴁𐴤𐴟𐴃𐴤𐴡𐴌𐴠 𐴌𐴝𐴃𐴞𐴘𐴝 𐴀𐴠𐴌𐴠 , 𐴁𐴦𐴝𐴊𐴠 𐴊𐴞𐴕𐴡𐴃 𐴀𐴝𐴀𐴝𐴘 𐴀𐴝𐴣𐴀𐴝𐴌 𐴒𐴝𐴏𐴢 𐴏𐴟𐴌 𐴒𐴡𐴙𐴅𐴧𐴤𐴡𐴏𐴢 𐴁𐴡𐴓𐴞 𐴈𐴡𐴀𐴡𐴘 𐴄𐴞𐴛𐴝 𐴒𐴟𐴕𐴥𐴝𐴌𐴞 𐴓𐴡𐴀𐴡 𐴁𐴡𐴓𐴞 , 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 , 𐴑𐴞𐴘𐴝𐴌 𐴑𐴡𐴚 𐴄𐴡𐴚 𐴉𐴝𐴌𐴝𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴘𐴥𐴡 𐴀𐴥𐴞𐴃𐴝𐴌 𐴉𐴥𐴟𐴣𐴖𐴥𐴝𐴣𐴃𐴞 𐴐𐴤𐴞𐴘𐴝𐴌 𐴀𐴝𐴏𐴥𐴠 𐴁𐴡𐴓𐴞 𐴘𐴥𐴡 𐴒𐴡𐴁𐴤𐴝 𐴘𐴠 𐴈𐴡𐴘𐴧𐴠 𐴱𐴱

𐴶 𐴱 𐴰 𐴲 𐴀𐴝𐴌 𐴷 𐴱 𐴰 𐴲 𐴐𐴤𐴡𐴕𐴡𐴃 𐴊𐴠𐴐𐴢 𐴏𐴥𐴝𐴌𐴞 𐴀𐴝𐴀𐴝𐴘 𐴒𐴞𐴘𐴥𐴠 𐴒𐴤𐴡𐴘𐴊𐴠 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴉𐴝𐴌𐴝𐴌 𐴕𐴝𐴔 𐴕𐴞𐴐𐴤𐴝𐴕 𐴁𐴤𐴟𐴎𐴝𐴘 𐴉𐴥𐴠𐴓𐴥𐴝𐴘𐴁𐴤𐴡𐴓𐴧𐴝 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴐𐴤𐴡𐴔𐴁𐴡𐴃𐴧𐴞 𐴉𐴥𐴟𐴌𐴝𐴘 𐴉𐴥𐴠𐴓𐴥𐴝𐴘 𐴁𐴤𐴡𐴓𐴧𐴝 , 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴁𐴞 𐴅𐴞 𐴂𐴞 𐴀𐴥𐴡𐴑𐴧𐴡𐴓𐴠 𐴀𐴠𐴕𐴋𐴞𐴓𐴧𐴝 𐴑𐴠𐴌𐴦𐴝𐴙𐴔 𐴀𐴥𐴡𐴑𐴧𐴡𐴓 𐴒𐴡𐴌𐴠𐴌𐴊𐴧𐴠 𐴱𐴱

Sources : Rvision