𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴀𐴦𐴡𐴙𐴕𐴠 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔 𐴏𐴞𐴌𐴞 𐴓𐴡𐴘 𐴒𐴞𐴘𐴥𐴡𐴘 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴀𐴦𐴡𐴙𐴕𐴠 𐴉𐴟𐴌𐴞 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔 𐴏𐴥𐴝𐴉𐴢 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 , 𐴈𐴡𐴔𐴡𐴃 𐴰 𐴳 𐴐𐴤𐴝𐴕 𐴒𐴤𐴡𐴌 𐴎𐴡𐴓𐴞 𐴉𐴟𐴌𐴞 𐴏𐴥𐴝𐴘 𐴀𐴥𐴡𐴘 𐴒𐴞𐴘𐴥𐴡𐴘 , 𐴀𐴠 𐴔𐴥𐴝𐴐𐴡𐴌 𐴁𐴤𐴟𐴃𐴡𐴌𐴠 𐴘𐴝𐴀𐴝𐴕 𐴃𐴞𐴕𐴀𐴡𐴔 𐴁𐴝𐴌 𐴉𐴟𐴌𐴝𐴉𐴟𐴌𐴞 , 𐴀𐴟𐴑𐴤𐴞𐴘𐴝 𐴀𐴟𐴉𐴡𐴎𐴞𐴓𐴥𐴝𐴃 𐴵 𐴓𐴡𐴔𐴁𐴡𐴌 𐴑𐴠𐴀𐴠𐴔𐴡𐴃 𐴉𐴟𐴌𐴝 𐴉𐴟𐴌𐴞 𐴀𐴥𐴡𐴘𐴧𐴠𐴊𐴠 𐴀𐴥𐴠𐴍𐴠 , 𐴈𐴡𐴕𐴥𐴡 𐴅𐴝𐴕𐴞 𐴓𐴟𐴏𐴧𐴝𐴕 𐴀𐴝𐴌 𐴒𐴤𐴦𐴝𐴙𐴓 𐴎𐴡𐴈𐴡𐴔 𐴕𐴡𐴀𐴡 𐴀𐴥𐴡𐴀𐴡 𐴁𐴡𐴓𐴞 , 𐴀𐴟𐴑𐴤𐴞𐴘𐴝𐴌 𐴉𐴟𐴓𐴞𐴐𐴢 𐴁𐴠𐴄𐴤𐴠𐴓𐴞𐴘𐴠𐴕𐴡𐴌 𐴁𐴡𐴌𐴡 / 𐴕𐴡𐴀𐴞𐴔𐴟𐴓 𐴇𐴥𐴡𐴑𐴠 𐴈𐴡𐴘𐴧𐴠 𐴱𐴱

𐴁𐴞 𐴁𐴡𐴓𐴡𐴑𐴡𐴌 𐴏𐴥𐴝𐴁 𐴁𐴡𐴓𐴡𐴑 𐴳 / 𐴁𐴞 𐴀𐴝𐴌 𐴲 / 𐴋𐴞 𐴔𐴝𐴎𐴤𐴠 , 𐴌𐴝𐴙𐴃𐴡𐴌 𐴊𐴟𐴘𐴄𐴝 𐴁𐴝𐴎𐴠 𐴀𐴦𐴡𐴙𐴕 𐴎𐴡𐴓𐴞 𐴀𐴟𐴙𐴄𐴧𐴤𐴙𐴠 , 𐴃𐴡𐴌𐴝𐴃𐴡𐴌 𐴀𐴦𐴡𐴙𐴕 𐴕𐴞𐴉𐴡𐴀𐴡𐴙𐴕𐴧𐴝 𐴊𐴡𐴓 𐴉𐴡𐴣𐴀𐴡𐴏𐴡𐴕𐴠 𐴀𐴡𐴙𐴕 𐴕𐴞𐴉𐴥𐴝𐴘 𐴉𐴥𐴠𐴓𐴥𐴝𐴘 𐴉𐴝𐴙𐴅𐴧𐴤𐴙𐴠 𐴁𐴡𐴓𐴞 𐴕𐴡𐴀𐴞𐴔𐴟𐴓 𐴇𐴥𐴡𐴑𐴠 𐴈𐴡𐴘𐴧𐴠 𐴱𐴱

𐴀𐴦𐴡𐴙𐴕 𐴈𐴡𐴕𐴥𐴞𐴑𐴧𐴤𐴙𐴝 𐴊𐴤𐴡𐴌𐴝𐴘 𐴊𐴞𐴘𐴠𐴊𐴠 𐴕𐴡𐴀𐴡 , 𐴑𐴦𐴝𐴌𐴡𐴕 𐴐𐴦𐴡𐴄 𐴀𐴥𐴡𐴘 𐴊𐴤𐴡𐴙𐴅𐴧𐴙𐴠𐴊𐴠 𐴀𐴥𐴡𐴙𐴃 𐴉𐴝𐴌𐴠 𐴁𐴡𐴓𐴞 𐴉𐴟𐴓𐴞𐴐𐴡𐴌 𐴁𐴡𐴌 𐴀𐴡𐴉𐴞𐴏𐴥𐴝𐴌 𐴀𐴥𐴞𐴁𐴤𐴝 𐴘𐴠 𐴈𐴡𐴘𐴧𐴠 , 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴁𐴝𐴣𐴐𐴢 𐴀𐴝𐴌 𐴃𐴠𐴌𐴉𐴝𐴓 𐴓𐴡𐴘 𐴒𐴤𐴡𐴌 𐴁𐴝𐴕𐴝𐴘 , 𐴁𐴠𐴐𐴤𐴞 𐴒𐴤𐴞𐴐𐴝 𐴒𐴤𐴞𐴐𐴧𐴝 𐴒𐴡𐴌𐴥𐴞 𐴃𐴤𐴝𐴙𐴑𐴧𐴤𐴙𐴠𐴊𐴠 , 𐴀𐴠𐴑 𐴔𐴡𐴓𐴞𐴘𐴟𐴕𐴡𐴌 𐴖𐴡𐴌𐴠 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 , 𐴓𐴝𐴒𐴝𐴃𐴝𐴌 𐴀𐴦𐴡𐴙𐴕𐴠 𐴓𐴟𐴏𐴧𐴝𐴕 𐴒𐴡𐴌𐴥𐴝𐴃 𐴀𐴝𐴏𐴥𐴠 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴀𐴟𐴑𐴤𐴞𐴘𐴝 𐴀𐴠𐴓𐴝𐴑𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴀𐴝𐴌 𐴀𐴠𐴑𐴧𐴤𐴝𐴕𐴡𐴃 , 𐴅𐴝𐴕𐴖𐴝𐴌𐴞𐴌 𐴹 𐴃𐴝𐴌𐴥𐴞𐴑𐴤𐴡𐴃 , 𐴑𐴠𐴀𐴠𐴔 𐴶 𐴱 𐴐𐴤𐴟𐴓𐴧𐴡𐴃 𐴐𐴤𐴡𐴃𐴝 𐴐𐴤𐴡𐴃𐴞 𐴒𐴤𐴡𐴌 𐴀𐴦𐴡𐴙𐴕𐴠 𐴎𐴝𐴓𐴞 𐴏𐴥𐴝𐴘 𐴁𐴝𐴕𐴝𐴘 𐴉𐴥𐴠𐴓𐴥𐴝𐴘𐴧𐴠 , 𐴀𐴝𐴌 𐴰 𐴰 𐴰 𐴵 𐴉𐴝𐴣𐴏𐴢 𐴇𐴥𐴝𐴎𐴝𐴌𐴡𐴌 𐴖𐴡𐴌𐴠 𐴔𐴝𐴙𐴕𐴐𐴤𐴡𐴌𐴠 𐴒𐴤𐴡𐴌 𐴏𐴥𐴝𐴌𐴥𐴝 𐴃𐴤𐴡𐴌 𐴏𐴥𐴝𐴌𐴥𐴝 𐴁𐴝𐴕𐴝𐴘 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴘𐴥𐴝𐴀𐴝𐴌 𐴀𐴠𐴑 𐴇𐴥𐴝𐴉𐴃𐴝 𐴀𐴝𐴒𐴠 𐴅𐴝𐴕𐴖𐴝𐴌𐴞𐴌 𐴲 𐴃𐴝𐴌𐴥𐴞𐴑𐴤𐴡𐴃 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴑𐴡𐴁𐴤𐴞𐴋 – 𐴹 𐴱 𐴐𐴤𐴡𐴌 𐴀𐴠𐴓𐴝𐴅 𐴒𐴡𐴌𐴥𐴠𐴊𐴠 𐴇𐴥𐴝𐴐𐴉𐴝𐴃𐴝𐴓 𐴐𐴤𐴡𐴣𐴀𐴡 𐴰 𐴲 𐴑𐴟𐴌𐴞 𐴘𐴥𐴝𐴕 𐴓𐴡𐴃𐴞 𐴒𐴤𐴡𐴌 𐴉𐴟𐴌𐴞 𐴒𐴞𐴀𐴞𐴓 𐴒𐴤𐴡𐴘 , 𐴒𐴠𐴓𐴊𐴠 𐴁𐴡𐴏𐴥𐴡𐴌 𐴔𐴝𐴌𐴠𐴆𐴡𐴃 𐴔𐴝𐴌𐴡𐴃𐴧𐴡𐴂𐴢 𐴁𐴤𐴡𐴘𐴡𐴕𐴑𐴝𐴌 𐴀𐴦𐴡𐴙𐴕𐴠 𐴎𐴝𐴓𐴞 𐴉𐴟𐴌𐴞 𐴈𐴡𐴔𐴡𐴃 𐴵 𐴱 𐴎𐴡𐴕 𐴔𐴝𐴕𐴥𐴟𐴙𐴐𐴢 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴀𐴝𐴌 𐴰 𐴰 𐴰 𐴰 𐴱 𐴊𐴡𐴐𐴢 𐴇𐴥𐴝𐴎𐴝𐴌𐴡𐴌 𐴖𐴡𐴌𐴠 𐴒𐴤𐴡𐴌 𐴎𐴝𐴓𐴞 𐴉𐴟𐴌𐴞 𐴏𐴥𐴝𐴘 𐴁𐴝𐴕𐴝𐴘 𐴊𐴞𐴀𐴞𐴓 𐴱𐴱

Sources : Dhakatribune