𐴀𐴝𐴘 𐴏𐴞 𐴅𐴠 𐴑𐴟𐴀𐴟𐴍𐴡𐴌 𐴔𐴦𐴡𐴊𐴧𐴞𐴔𐴝 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴁𐴝𐴘𐴁𐴤𐴡 𐴱𐴱

𐴁𐴡𐴌𐴔𐴥𐴝 𐴘𐴠 𐴅𐴠𐴕𐴟 𐴏𐴥𐴝𐴙𐴋 𐴒𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴀𐴝𐴕𐴡𐴌 𐴀𐴠𐴓𐴎𐴝𐴔 𐴊𐴞𐴀𐴞 , 𐴒𐴝𐴔𐴁𐴞𐴘𐴝 𐴘𐴠 𐴊𐴠𐴐𐴁𐴞𐴊𐴠𐴐𐴤𐴞 𐴀𐴝𐴊𐴝𐴓𐴡𐴃𐴡𐴃 𐴁𐴡𐴌𐴔𐴥𐴝𐴌 𐴁𐴠𐴌𐴟𐴊𐴧𐴤𐴠 𐴑𐴤𐴟𐴙𐴓𐴧𐴞𐴀𐴞𐴓 𐴊𐴤𐴠 𐴔𐴝𐴀𐴝𐴔𐴠𐴓𐴝 𐴘𐴥𐴝𐴀𐴝𐴕𐴡𐴌 𐴁𐴝𐴁𐴡𐴃𐴠 , 𐴀𐴝𐴘𐴧𐴥𐴠𐴌𐴊𐴧𐴠 𐴉𐴥𐴠𐴌𐴖𐴝𐴌𐴞 𐴔𐴥𐴝𐴐𐴡𐴌 𐴱 𐴲 𐴃𐴝𐴌𐴥𐴞𐴑𐴤𐴡𐴃 𐴉𐴥𐴟𐴕𐴡𐴀𐴡𐴕𐴞 𐴀𐴝𐴏𐴥𐴠 𐴁𐴡𐴓𐴞 𐴒𐴝𐴔𐴁𐴞𐴘𐴝𐴌 𐴁𐴡𐴌 𐴀𐴟𐴑𐴞𐴓 / 𐴋𐴝𐴀𐴡𐴋𐴝 𐴅𐴤𐴠𐴓𐴡𐴌 𐴇𐴥𐴡𐴓𐴝 𐴊𐴞𐴀𐴞 , 𐴄𐴗𐴠𐴄𐴝𐴌 𐴈𐴥𐴡𐴁𐴤𐴡𐴌𐴡𐴃 𐴅𐴝𐴕𐴖𐴝𐴌𐴞𐴌 𐴴 𐴱 𐴃𐴝𐴌𐴥𐴞𐴑𐴤𐴡𐴃 𐴓𐴠𐴙𐴑𐴧𐴤𐴙𐴠 𐴱𐴱

𐴹 𐴱 𐴰 𐴲 𐴐𐴤𐴡𐴕𐴡𐴃 𐴀𐴠𐴑𐴀𐴡𐴔 𐴁𐴝𐴌 𐴉𐴥𐴟𐴕𐴡𐴀𐴡𐴕𐴞𐴃 𐴁𐴡𐴌𐴔𐴥𐴝𐴌 𐴉𐴡𐴑𐴧𐴡𐴌𐴃𐴧𐴟 𐴕𐴡𐴔𐴝𐴙𐴕𐴊𐴝 𐴁𐴡𐴕𐴞 𐴅𐴟𐴖𐴝𐴁 𐴊𐴞𐴀𐴞𐴓𐴊𐴠 ,𐴊𐴠𐴐𐴤𐴡𐴌 𐴔𐴡𐴐𐴖𐴝𐴌𐴝 𐴊𐴝𐴃𐴝 / 𐴋𐴦𐴡 𐴀𐴡𐴚 𐴏𐴥𐴠𐴕 𐴏𐴥𐴟𐴆𐴞𐴌 𐴁𐴡𐴊𐴡𐴙𐴓𐴧 𐴎𐴝𐴒𐴝𐴃 𐴇𐴥𐴡𐴑𐴟𐴔𐴡𐴃𐴞 𐴀𐴥𐴞𐴏𐴝𐴉𐴠 𐴑𐴝𐴕𐴟𐴕𐴞 𐴃𐴡𐴗𐴌𐴠 𐴔𐴝𐴕𐴥𐴟𐴙𐴐𐴢 𐴁𐴡𐴊𐴡𐴓𐴞 𐴊𐴞𐴘𐴠 𐴁𐴡𐴓𐴞 𐴒𐴝𐴔𐴁𐴞𐴘𐴝𐴌 𐴁𐴡𐴌 𐴀𐴟𐴑𐴞𐴓𐴠 𐴈𐴡𐴘𐴧𐴠 𐴱𐴱

𐴀𐴠𐴁𐴝𐴌𐴡𐴌 𐴉𐴥𐴟𐴕𐴝 𐴉𐴥𐴟𐴕𐴞 𐴀𐴞𐴁𐴤𐴝, 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴑𐴟𐴀𐴟𐴂𐴢 𐴒𐴡𐴌𐴥𐴞 𐴁𐴦𐴝𐴊𐴠 𐴀𐴠𐴑𐴀𐴡𐴔 𐴁𐴝𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴁𐴠𐴌𐴟𐴊 𐴒𐴡𐴌𐴥𐴞𐴁𐴤𐴡𐴊𐴠 (𐴅𐴟𐴖𐴝𐴁 𐴊𐴞𐴀𐴞𐴁𐴡 𐴊𐴤𐴠) , 𐴃𐴡𐴊𐴝𐴌𐴟𐴑𐴞 𐴉𐴥𐴟𐴕𐴝 𐴉𐴥𐴟𐴕𐴞 𐴀𐴥𐴡𐴘𐴁𐴡𐴊𐴠 , 𐴀𐴝𐴘 𐴏𐴞 𐴅𐴠 𐴑𐴟𐴀𐴟𐴍𐴡𐴃 𐴔𐴡𐴀𐴡𐴊𐴧𐴞𐴔𐴝 𐴁𐴝𐴘𐴁𐴤𐴡𐴓𐴧𐴝 / 𐴋𐴦𐴡 𐴀𐴡𐴚 𐴏𐴥𐴠𐴕 𐴏𐴥𐴟𐴆𐴞 𐴌𐴥𐴠 𐴀𐴥𐴟𐴑𐴧𐴝𐴄𐴤𐴝 𐴁𐴝𐴕𐴝𐴘 𐴎𐴞𐴔𐴧𐴝𐴊𐴝𐴌𐴞 𐴊𐴞𐴀𐴞 𐴁𐴝𐴕𐴝𐴀𐴝𐴙𐴓𐴊𐴠 𐴑𐴡𐴔𐴞𐴄𐴞 𐴀𐴥𐴞𐴁𐴝 𐴌𐴥𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴑𐴟𐴀𐴟𐴂𐴢 𐴒𐴡𐴌𐴥𐴞 𐴁𐴦𐴝𐴊𐴠 , 𐴔𐴠𐴓𐴠𐴄𐴠𐴌𐴠𐴞 𐴇𐴥𐴡𐴑𐴟𐴔𐴡𐴃𐴡𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 / 𐴀𐴥𐴟 𐴖𐴡𐴕𐴧𐴥𐴝 𐴔𐴡𐴚 𐴓𐴗𐴝𐴚𐴡 𐴌𐴥𐴠 𐴀𐴥𐴟𐴑𐴧𐴝𐴄𐴤𐴝 𐴁𐴝𐴕𐴝𐴘 , 𐴈𐴥𐴝𐴓𐴞 𐴎𐴝𐴒𐴝 𐴉𐴟𐴌𐴝 𐴒𐴡𐴌𐴥𐴞 𐴱 𐴲 𐴰 𐴲 𐴐𐴤𐴡𐴕 𐴅𐴟𐴕 𐴔𐴥𐴝𐴐𐴡𐴃 𐴄𐴤𐴞𐴑𐴄𐴤𐴝𐴑 𐴒𐴡𐴌𐴥𐴞 𐴁𐴝𐴕𐴝𐴘 𐴌𐴝𐴙𐴑𐴧𐴤𐴙𐴠 𐴱𐴱

𐴀𐴠𐴈𐴥𐴡𐴕𐴡𐴌 𐴀𐴡𐴑𐴃𐴤𐴡 𐴑𐴟𐴁𐴤𐴝𐴙𐴋 𐴹 𐴱 𐴁𐴞𐴘𐴝𐴌𐴝𐴔𐴡𐴌 𐴈𐴝𐴓 𐴊𐴠 𐴀𐴥𐴠𐴃𐴡𐴓𐴧𐴝 𐴀𐴝𐴘𐴁𐴤𐴡𐴊𐴠 𐴉𐴥𐴠𐴌𐴖𐴝𐴌𐴞𐴃 , 𐴕𐴠𐴊𐴝𐴌𐴓𐴥𐴠𐴕𐴡𐴌 𐴊𐴞 𐴇𐴥𐴠𐴒𐴢 𐴐𐴤𐴡𐴀𐴡𐴌𐴡𐴃 𐴀𐴝𐴘 𐴏𐴞 𐴅𐴠 𐴑𐴟𐴀𐴟𐴍𐴡𐴃 𐴉𐴥𐴟𐴕𐴝 𐴉𐴥𐴟𐴕𐴞𐴌 𐴀𐴡𐴑𐴃𐴤𐴡𐴃 , 𐴑𐴠𐴙𐴏𐴧𐴥𐴟 𐴔𐴝𐴕𐴥𐴟𐴙𐴐𐴢 𐴕𐴞𐴎𐴠 𐴇𐴥𐴝𐴎𐴞𐴌 𐴀𐴥𐴡𐴘𐴁𐴡 𐴀𐴝𐴌 𐴑𐴠𐴙𐴏𐴧𐴥𐴟 𐴀𐴡𐴕𐴓𐴥𐴝𐴙𐴕 𐴁𐴞𐴋𐴞𐴘𐴟𐴌 𐴃𐴟𐴌𐴥𐴟 𐴇𐴥𐴝𐴎𐴞𐴌 𐴀𐴥𐴡𐴘𐴁𐴡𐴊𐴠 𐴘𐴥𐴝𐴀𐴝𐴕 𐴎𐴝𐴕𐴝 𐴒𐴞𐴘𐴠 𐴱𐴱

Sources : RFA