𐴌𐴟𐴇𐴝𐴙𐴚𐴒𐴙𐴝 𐴏𐴥𐴡𐴚𐴑𐴡𐴄 𐴕𐴞𐴂𐴄𐴦𐴡𐴕𐴡𐴃 𐴃𐴟𐴌𐴑𐴞 𐴘𐴠 𐴁𐴝𐴚𐴓𐴝𐴊𐴠𐴐𐴤𐴡𐴌 𐴔𐴡𐴊𐴡𐴊 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 𐴁𐴤𐴡𐴌𐴡𐴐𐴤𐴝 𐴊𐴞𐴘𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝𐴌 𐴏𐴥𐴡𐴚𐴑𐴡𐴄 𐴕𐴞𐴂𐴄𐴦𐴡𐴕𐴡𐴌 𐴑𐴟𐴐𐴤𐴞𐴐𐴡𐴃 , 𐴃𐴟𐴌𐴑𐴞 𐴘𐴠 𐴁𐴝𐴚𐴓𐴝𐴊𐴠𐴐𐴤𐴡𐴌 𐴔𐴡𐴊𐴡𐴊 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 , 𐴊𐴠𐴐𐴤𐴡𐴌 𐴁𐴤𐴟𐴃𐴡𐴌𐴡𐴌 𐴔𐴝𐴀𐴝𐴔𐴠𐴓𐴝𐴌 𐴀𐴟𐴎𐴞𐴌 / 𐴏𐴟𐴓𐴠𐴔𐴝𐴕 𐴏𐴡𐴘𐴓𐴟 𐴘𐴠 𐴁𐴤𐴡𐴌𐴡𐴐𐴤𐴝 𐴊𐴞𐴘𐴠 , 𐴁𐴝𐴚𐴓𐴝𐴊𐴠𐴐𐴤𐴡𐴃 𐴀𐴠𐴑 𐴊𐴞𐴕𐴡𐴌𐴓𐴧𐴝 𐴀𐴝𐴙𐴐𐴧𐴤𐴙𐴠𐴊𐴠 / 𐴏𐴟𐴓𐴠𐴔𐴝𐴕𐴠 , 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴐𐴤𐴡𐴕𐴞 𐴁𐴝𐴌𐴠 𐴈𐴡𐴘𐴧𐴠 𐴱𐴱

𐴁𐴝𐴓𐴟 𐴈𐴥𐴝𐴓𐴞 𐴹 𐴓𐴡𐴁𐴤𐴡𐴌 𐴑𐴠𐴀𐴠𐴔𐴡𐴃 𐴃𐴟𐴌𐴑𐴞 𐴇𐴥𐴡𐴑𐴟𐴔𐴡𐴃𐴞 𐴀𐴠𐴅𐴤𐴠𐴕𐴏𐴞 ( 𐴀𐴠 𐴀𐴠𐴉𐴢 𐴀𐴠 𐴋𐴞 ) 𐴘𐴠 𐴏𐴝𐴓𐴝𐴘𐴃𐴤𐴡𐴊𐴠 𐴇𐴥𐴝𐴐𐴉𐴝𐴃𐴝𐴓 , 𐴎𐴞𐴘𐴥𐴝𐴕 𐴒𐴠𐴓𐴊𐴠 𐴁𐴡𐴏𐴥𐴡𐴌 𐴔𐴝𐴌𐴠𐴆𐴡𐴃 𐴉𐴟𐴌𐴞 𐴒𐴞𐴀𐴞𐴓 𐴒𐴤𐴡𐴘 , 𐴘𐴥𐴝𐴀𐴝𐴕𐴡𐴌𐴠 𐴀𐴝𐴁𐴧𐴝𐴌 𐴕𐴟𐴖𐴝 𐴁𐴝𐴣𐴊𐴤𐴞 𐴁𐴤𐴡𐴓𐴧𐴝 / 𐴏𐴟𐴓𐴠𐴔𐴝𐴕𐴠 𐴀𐴥𐴟𐴃𐴧𐴟𐴌 𐴊𐴞𐴘𐴠 , 𐴀𐴝𐴌 𐴈𐴡𐴘𐴧𐴠𐴊𐴠 𐴀𐴝𐴣𐴀𐴝𐴌𐴝 𐴀𐴠 𐴔𐴡𐴎𐴓𐴟𐴔 𐴀𐴝𐴌 𐴉𐴠𐴌𐴠𐴐𐴝𐴕 𐴌𐴟𐴇𐴝𐴙𐴚𐴒𐴙𐴝 𐴀𐴟𐴀𐴟𐴕𐴡𐴌𐴥𐴠 𐴀𐴝𐴌 𐴁𐴝𐴚𐴓𐴝𐴊𐴠𐴐𐴤𐴡𐴌𐴠 𐴀𐴠𐴑𐴤𐴠𐴓𐴝 𐴀𐴠𐴌𐴞 𐴕𐴡 𐴉𐴝𐴌𐴥𐴞𐴘𐴟𐴔 𐴱𐴱

𐴉𐴟𐴌𐴝𐴉𐴟𐴌𐴞𐴌 𐴎𐴡𐴌𐴞𐴘𐴝 𐴓𐴟𐴏𐴧𐴝𐴕 𐴀𐴥𐴡𐴘𐴧𐴠𐴊𐴠 𐴀𐴥𐴞𐴀𐴞𐴕𐴡𐴌 𐴈𐴥𐴡𐴃𐴞 𐴉𐴟𐴌𐴝 𐴒𐴡𐴌𐴥𐴞 𐴁𐴤𐴡𐴓𐴧𐴝 𐴈𐴥𐴝𐴌𐴝𐴃𐴧𐴟 𐴈𐴥𐴝𐴌𐴝 𐴈𐴝𐴛 𐴁𐴝𐴌𐴥𐴝𐴘𐴁𐴤𐴡 𐴁𐴡𐴓𐴞 𐴘𐴥𐴡 𐴃𐴟𐴌𐴑𐴞𐴌 𐴀𐴟𐴎𐴞𐴌𐴠 ( 𐴘𐴟 𐴀𐴠𐴕 𐴁𐴞 )𐴌 𐴌𐴠𐴂𐴟𐴄𐴝𐴌 𐴀𐴥𐴡𐴑𐴧𐴡𐴓𐴡𐴌𐴥𐴠 𐴈𐴡𐴘𐴧𐴠 , 𐴇𐴥𐴝𐴐𐴉𐴝𐴃𐴝𐴓 𐴘𐴥𐴝𐴀𐴝𐴕𐴡𐴃 𐴀𐴠𐴈𐴥𐴡𐴕 𐴉𐴡𐴙𐴅𐴧𐴡𐴕𐴃𐴡 𐴰 𐴲 𐴘𐴥𐴝𐴕 𐴀𐴡𐴂𐴝𐴌𐴠𐴐𐴤𐴠𐴕 𐴒𐴡𐴙𐴅𐴧𐴤𐴙𐴠 𐴀𐴝𐴌 𐴰 𐴰 𐴰 𐴲 𐴔𐴝𐴙𐴕𐴐𐴤𐴡𐴌𐴠 𐴉𐴡𐴌𐴞𐴑𐴧𐴤𐴙𐴝 𐴒𐴡𐴙𐴅𐴧𐴤𐴙𐴠 𐴀𐴝𐴌 𐴰 𐴰 𐴰 𐴰 𐴰 𐴷 𐴇𐴥𐴝𐴣𐴃 𐴓𐴝𐴑 𐴔𐴝𐴙𐴕𐴐𐴤𐴡𐴌𐴠 𐴊𐴝𐴁𐴝𐴘 𐴒𐴡𐴙𐴅𐴧𐴤𐴙 𐴱𐴱

𐴏𐴟𐴓𐴠𐴔𐴝𐴕 𐴏𐴡𐴘𐴓𐴟 𐴘𐴠 𐴑𐴠𐴀𐴠𐴔𐴡𐴃 𐴃𐴤𐴝𐴑𐴤𐴠𐴊𐴠 𐴁𐴡𐴀𐴡𐴃 𐴁𐴞𐴁𐴤𐴞𐴕𐴧𐴡 𐴁𐴡𐴐𐴤𐴡𐴌 𐴌𐴟𐴇𐴝𐴙𐴚𐴒𐴙𐴝 𐴓𐴡𐴘 𐴈𐴡𐴃𐴤𐴝 𐴈𐴡𐴘𐴧𐴠 , 𐴘𐴝𐴀𐴝𐴌 𐴀𐴝𐴒𐴠 𐴃𐴟𐴌𐴑𐴞𐴌 𐴏𐴥𐴡𐴉𐴞𐴌𐴠 𐴀𐴟𐴒𐴧𐴤𐴗𐴝 𐴂𐴡𐴌𐴟𐴒𐴠𐴌𐴝𐴔𐴡𐴃 𐴈𐴡𐴘𐴧𐴠𐴊𐴠 , 𐴁𐴡𐴌 𐴀𐴟𐴎𐴞𐴌 𐴐𐴠𐴙𐴑 𐴇𐴥𐴝𐴏𐴞𐴕𐴝 𐴘𐴠 𐴃𐴟𐴌𐴑𐴞 𐴘𐴠 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴈𐴝𐴔 𐴒𐴡𐴌𐴥𐴞 , 𐴎𐴟𐴓𐴟𐴔 𐴀𐴡𐴃𐴧𐴞𐴏𐴝𐴌 𐴁𐴡𐴊𐴧𐴝𐴐𐴢 𐴒𐴡𐴌𐴥𐴞 𐴕𐴡𐴉𐴝𐴌𐴥𐴞 𐴕𐴞𐴎𐴡𐴌 𐴊𐴠𐴐𐴢 𐴀𐴝𐴌𐴑𐴝𐴕𐴡𐴃𐴧𐴟 𐴊𐴤𐴝𐴘 𐴀𐴝𐴙𐴐𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴊𐴡𐴌𐴡𐴎𐴝 𐴑𐴤𐴟𐴓𐴞 𐴊𐴞𐴀𐴞 ” 𐴀𐴞𐴕𐴏𐴝𐴕𐴞𐴘𐴡𐴃𐴞𐴌 𐴔𐴝𐴣 ” 𐴈𐴡𐴀𐴡𐴘 𐴓𐴡𐴑𐴤𐴡𐴁𐴢 𐴈𐴝𐴔𐴝𐴘𐴧𐴠 𐴱𐴱

𐴊𐴟𐴕𐴞𐴘𐴝𐴘𐴃 𐴀𐴠 𐴔𐴡𐴘𐴊𐴝𐴕𐴡𐴃 ( 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌𐴠 𐴏𐴥𐴝𐴀𐴝𐴌𐴝 𐴊𐴡𐴀𐴡𐴕 ) 𐴃𐴟𐴌𐴑𐴞 𐴀𐴝𐴌 𐴁𐴝𐴚𐴓𐴝𐴊𐴠𐴐𐴢 𐴔𐴠𐴏𐴥𐴝𐴓 𐴁𐴡𐴙𐴕𐴧𐴥𐴙𐴠 𐴁𐴡𐴓𐴞 𐴘𐴥𐴡 𐴏𐴟𐴓𐴠𐴔𐴝𐴕𐴠 𐴈𐴡𐴘𐴧𐴠 , 𐴁𐴝𐴚𐴓𐴝𐴊𐴠𐴐𐴤𐴠 𐴁𐴤𐴝𐴐𐴡𐴕 𐴏𐴡𐴌 𐴀𐴝𐴌 𐴑𐴝𐴑𐴏𐴡 𐴁𐴝𐴎𐴝𐴌 𐴔𐴞𐴓𐴝𐴘 𐴀𐴠𐴑 𐴔𐴡𐴓𐴞𐴘𐴟𐴕 𐴀𐴠𐴑 𐴓𐴝𐴑 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴏𐴥𐴝𐴀𐴝𐴌𐴝 𐴊𐴞𐴘𐴠 , 𐴓𐴡𐴒𐴁𐴤𐴡𐴒𐴢 𐴁𐴠𐴒𐴧𐴤𐴟𐴕 𐴷 𐴱 𐴰 𐴲 𐴐𐴤𐴡𐴕𐴡𐴃 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌 𐴅𐴠𐴕𐴟𐴏𐴥𐴝𐴙𐴋𐴡𐴌𐴃𐴧𐴟 𐴉𐴡𐴌𐴝𐴕 𐴁𐴝𐴏𐴝𐴘 𐴊𐴤𐴝𐴘 𐴀𐴝𐴙𐴐𐴧𐴤𐴙𐴠𐴊𐴠 𐴁𐴡𐴓𐴞 𐴘𐴟 𐴀𐴠𐴕𐴡𐴌 𐴃𐴡𐴊𐴝𐴌𐴟𐴑𐴞 𐴄𐴞𐴀𐴞𐴔𐴠 𐴈𐴡𐴘𐴧𐴠 𐴱𐴱

Sources : Dhakatribune