𐴇𐴥𐴡𐴑𐴟𐴔𐴡𐴃𐴞 𐴏𐴦𐴡𐴙𐴅𐴧𐴙𐴝 𐴀𐴠𐴑 𐴎𐴡𐴕𐴡𐴌 𐴑𐴤𐴟𐴕𐴡𐴌 𐴁𐴦𐴝𐴊𐴠 , 𐴁𐴡𐴌𐴔𐴥𐴝𐴌 𐴎𐴝𐴓𐴠𐴔 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 , 𐴹 𐴱 𐴁𐴡𐴏𐴥𐴡𐴌𐴡𐴌 𐴕𐴠𐴏𐴠 𐴔𐴟𐴏𐴥𐴡𐴓𐴔𐴝𐴕𐴡𐴌 𐴉𐴟𐴖𐴝 𐴀𐴟𐴒𐴧𐴤𐴗𐴝 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴃 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 , 𐴀𐴦𐴝𐴔 𐴐𐴤𐴝𐴐𐴡𐴕 𐴋𐴞𐴂𐴦𐴝𐴌𐴔𐴥𐴠𐴕𐴡𐴌 𐴑𐴠𐴌𐴝𐴕𐴞 𐴀𐴠𐴑 𐴎𐴡𐴕𐴡𐴌 𐴑𐴤𐴟𐴕𐴡𐴌 𐴁𐴝𐴁𐴡𐴃𐴠 , 𐴹 𐴱 𐴁𐴡𐴏𐴥𐴡𐴌𐴡𐴌 𐴃𐴧𐴟 𐴈𐴡𐴔 𐴁𐴡𐴐𐴤𐴡𐴌 𐴔𐴟𐴏𐴥𐴡𐴓𐴔𐴝𐴕𐴡𐴌 𐴉𐴟𐴖𐴝 𐴀𐴟𐴒𐴧𐴤𐴗𐴝 𐴏𐴥𐴝𐴁𐴟𐴃𐴡𐴌 𐴏𐴥𐴝𐴣𐴀𐴝𐴃𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 , 𐴀𐴝𐴌𐴑𐴝𐴕𐴡𐴌 𐴐𐴤𐴝𐴐𐴡𐴕 𐴑𐴡𐴗𐴕𐴏𐴥𐴞𐴓𐴡𐴌 𐴈𐴡𐴃𐴤𐴝 𐴈𐴡𐴀𐴡𐴙𐴕𐴧𐴝 / 𐴀𐴥𐴟 𐴓𐴥𐴝 𐴏𐴞𐴕𐴠 𐴈𐴡𐴘𐴧𐴠 𐴱𐴱

𐴀𐴝𐴣𐴀𐴝𐴌𐴝 𐴴 𐴱 𐴁𐴡𐴏𐴥𐴡𐴌 𐴁𐴡𐴐𐴢 𐴀𐴡𐴓𐴝 𐴔𐴟𐴏𐴥𐴡𐴓𐴔𐴝𐴕𐴡𐴌 𐴉𐴟𐴖𐴝 𐴀𐴟𐴒𐴧𐴤𐴗𐴝 𐴁𐴡𐴕 𐴒𐴡𐴙𐴅𐴧𐴤𐴞 , 𐴀𐴝𐴣𐴀𐴝𐴌𐴝 𐴉𐴟𐴖𐴝 𐴀𐴥𐴞𐴁𐴤𐴝𐴌𐴃𐴧𐴟 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠𐴊𐴠 𐴀𐴥𐴞𐴃𐴝𐴌 𐴉𐴥𐴟𐴕 𐴉𐴝𐴘𐴧𐴥𐴞 𐴀𐴝𐴌 𐴓𐴡𐴖𐴧𐴥𐴡𐴌 𐴊𐴝𐴑 𐴀𐴡𐴓𐴝 𐴈𐴦𐴡𐴌 𐴉𐴝𐴘𐴧𐴥𐴞 , 𐴉𐴟𐴖𐴝 𐴀𐴥𐴞𐴁𐴤𐴝 𐴘𐴠 𐴉𐴥𐴟𐴕𐴡𐴌𐴃𐴧𐴟 𐴏𐴦𐴞𐴔 𐴑𐴦𐴝𐴋 𐴕𐴠𐴀𐴠𐴓𐴝𐴘 𐴁𐴤𐴝𐴚𐴞 𐴉𐴥𐴠𐴓𐴥𐴝𐴘 𐴊𐴞𐴘𐴠 𐴱𐴱

𐴑𐴤𐴟𐴕𐴞 𐴔𐴝𐴀𐴝𐴔𐴠𐴓𐴝 𐴘𐴝𐴀𐴝𐴕𐴡𐴃 𐴉𐴟𐴖𐴝 𐴀𐴥𐴞𐴁𐴤𐴝𐴌 𐴋𐴡𐴣𐴀𐴡𐴌 𐴁𐴤𐴝𐴘 𐴊𐴟𐴕𐴥𐴞 𐴎𐴡𐴕𐴀𐴥𐴡 𐴁𐴝𐴎𐴤𐴝𐴘𐴧𐴝 𐴀𐴝𐴏𐴥𐴠 𐴁𐴡𐴓𐴞 𐴀𐴝𐴣𐴀𐴝𐴌𐴝 𐴐𐴟𐴁𐴤𐴝 𐴓𐴡𐴘 𐴁𐴞𐴐𐴧𐴤𐴝𐴐𐴢 𐴒𐴡𐴌𐴥𐴞𐴌 , 𐴀𐴠𐴈𐴥𐴡𐴕 𐴃𐴡𐴊𐴝𐴌𐴟𐴑 𐴀𐴞𐴕𐴑𐴗𐴝𐴌𐴞 𐴏𐴡𐴓𐴠𐴌 𐴁𐴡𐴓𐴞 , 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴞 𐴀𐴟𐴑𐴞𐴓 𐴀𐴥𐴟 𐴓𐴥𐴝 𐴏𐴞𐴕𐴠 𐴀𐴥𐴠𐴌𐴝𐴖𐴡𐴋𐴧𐴞 𐴈𐴥𐴡𐴁𐴡𐴌 𐴀𐴡𐴓𐴝 𐴌𐴥𐴠 𐴈𐴡𐴘𐴧𐴠 , 𐴐𐴟𐴁𐴤𐴝 𐴒𐴡𐴙𐴅𐴧𐴤𐴙𐴠𐴊𐴠 𐴊𐴟𐴕𐴥𐴞 𐴎𐴡𐴕𐴡𐴌𐴥𐴠 𐴘𐴥𐴡 𐴃𐴟𐴖𐴝𐴌 𐴁𐴡𐴓𐴞 𐴀𐴥𐴞𐴃𐴠 𐴈𐴡𐴘𐴧𐴠 𐴱𐴱

𐴔𐴡𐴚𐴋𐴤𐴟𐴌 𐴉𐴟𐴓𐴞𐴐𐴢 𐴀𐴝𐴌 𐴋𐴞𐴐𐴄𐴤𐴞𐴑 𐴐𐴤𐴝𐴐𐴡𐴕𐴑𐴝𐴌 𐴀𐴥𐴡𐴑𐴧𐴡𐴓 𐴊𐴟𐴖𐴝𐴊𐴟𐴙𐴃 𐴔𐴝𐴎𐴤𐴠 , 𐴑𐴟 𐴏𐴠𐴕 𐴄𐴤𐴠 𐴕𐴝𐴙𐴚 𐴁𐴡𐴐𐴢 𐴶 𐴲 𐴁𐴡𐴏𐴥𐴡𐴌𐴡 𐴌𐴥𐴠 𐴒𐴡𐴓𐴝 𐴈𐴝𐴙𐴄𐴧𐴝 𐴔𐴡𐴌𐴝 , 𐴁𐴞𐴐𐴤𐴞𐴃 𐴁𐴝𐴌𐴠 𐴔𐴡𐴚𐴋𐴤𐴟𐴌 𐴎𐴦𐴝𐴣𐴏𐴢 𐴒𐴤𐴝𐴣𐴍𐴝 𐴅𐴠𐴍𐴥𐴞𐴃 𐴉𐴝𐴀𐴝 𐴒𐴞𐴘𐴠 𐴱𐴱

𐴔𐴡𐴚𐴋𐴤𐴟 𐴎𐴝𐴒𐴝 𐴘𐴝𐴀𐴝𐴕 𐴲 𐴱 𐴰 𐴲 𐴐𐴤𐴡𐴕 𐴓𐴡𐴃𐴞 , 𐴔𐴡𐴒𐴢 𐴁𐴟𐴋𐴧𐴤𐴞𐴏𐴢 𐴀𐴝𐴌 𐴔𐴟𐴏𐴥𐴡𐴓𐴔𐴝𐴕𐴡𐴌 𐴔𐴝𐴎𐴤𐴠 𐴈𐴡𐴙𐴅𐴧𐴝 𐴀𐴟𐴍𐴥𐴠𐴊𐴠 𐴎𐴝𐴒𐴝 , 𐴑𐴤𐴟𐴕 𐴘𐴝𐴀𐴝𐴕𐴡𐴌 𐴎𐴡𐴌𐴞𐴘𐴝 𐴔𐴟𐴀𐴟𐴔𐴧𐴥𐴞𐴑𐴧𐴤𐴙𐴝 𐴈𐴡𐴙𐴅𐴧𐴙𐴝 𐴀𐴟𐴍𐴥𐴞𐴁𐴤𐴡 𐴁𐴡𐴓𐴞 𐴋𐴡𐴌 𐴀𐴥𐴡𐴘𐴧𐴠 𐴱𐴱

𐴔𐴡𐴚𐴋𐴤𐴟 𐴋𐴞𐴐𐴄𐴤𐴞𐴑 𐴁𐴤𐴟𐴏𐴞𐴊𐴡𐴚𐴡𐴌 𐴀𐴠𐴓𐴝𐴑𐴝𐴌 𐴔𐴟𐴏𐴥𐴡𐴓𐴔𐴝𐴕 𐴉𐴝𐴌𐴝 𐴑𐴝𐴕 𐴕𐴡𐴖𐴝 𐴉𐴝𐴌𐴝𐴃 𐴀𐴥𐴡 , 𐴒𐴠𐴓𐴊𐴠 𐴔𐴡𐴚𐴒𐴡𐴓 𐴁𐴝𐴌𐴠 𐴊𐴝𐴘𐴧𐴝 𐴊𐴤𐴝𐴕 𐴉𐴟𐴌𐴝 𐴊𐴞𐴀𐴞 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴑𐴧𐴡𐴓 𐴔𐴡𐴒𐴢 𐴀𐴝𐴌 𐴁𐴡𐴔𐴥𐴝 𐴇𐴥𐴡𐴑𐴟𐴔𐴡𐴃𐴡𐴌 𐴎𐴟𐴓𐴟𐴠𐴔 𐴀𐴡𐴃𐴧𐴞𐴏𐴝𐴌 𐴁𐴡𐴊𐴧𐴝𐴐𐴢 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴞 𐴉𐴞𐴏𐴧𐴥𐴝 𐴋𐴠𐴁𐴝𐴓𐴡𐴃 𐴁𐴝𐴎𐴤𐴞 𐴒𐴞𐴘𐴥𐴡𐴘𐴁𐴤𐴝𐴌 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴡𐴙𐴃 𐴉𐴝𐴌𐴠 ) 𐴁𐴠𐴒𐴧𐴤𐴟𐴕𐴠 𐴊𐴟𐴀𐴝 𐴒𐴡𐴌𐴥𐴡 𐴏𐴥𐴝𐴔𐴧𐴡𐴌 𐴈𐴡𐴕𐴥𐴡 𐴔𐴡𐴏𐴞𐴁𐴡𐴃𐴡𐴌𐴃𐴧𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴀𐴝𐴓𐴧𐴝𐴇 𐴃𐴝𐴀𐴝𐴓𐴝 𐴘𐴠 𐴁𐴝𐴏𐴝𐴘 𐴌𐴝𐴑𐴤𐴠 𐴉𐴥𐴝𐴀𐴝𐴕 𐴱𐴱

Sources : irrawaddy.com