𐴁𐴡𐴌𐴔𐴥𐴝𐴌 𐴔𐴟𐴃𐴦𐴝𐴓𐴧𐴠𐴑 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 𐴌𐴟𐴇𐴝𐴙𐴚𐴒𐴙𐴌 𐴀𐴥𐴠𐴍𐴠 𐴉𐴡𐴣𐴀𐴡𐴙𐴏𐴧𐴥𐴙𐴠 𐴱𐴱

𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴁𐴡𐴌𐴔𐴥𐴝𐴌 𐴔𐴟𐴃𐴦𐴝𐴓𐴧𐴠𐴑 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴈𐴥𐴝𐴏𐴢 𐴕𐴡𐴔𐴝𐴙𐴕𐴊𐴝 / 𐴄𐴡𐴔 𐴀𐴠𐴕𐴋𐴠𐴌𐴠𐴘𐴟𐴏𐴢 , 𐴁𐴝𐴚𐴓𐴝𐴊𐴠𐴐𐴤𐴡𐴃 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌 𐴇𐴥𐴝𐴓𐴡𐴃𐴡𐴌𐴠 𐴏𐴝𐴘𐴁𐴤𐴡𐴓𐴧𐴝 , 𐴋𐴞𐴏𐴡𐴔𐴁𐴡𐴌𐴡𐴌 𐴹 𐴱 𐴃𐴝𐴌𐴥𐴞𐴑 𐴉𐴡𐴙𐴅𐴧𐴡𐴕𐴃𐴡 𐴀𐴠𐴑 𐴇𐴥𐴝𐴉𐴃𐴝𐴌 𐴏𐴥𐴡𐴉𐴡𐴌𐴡𐴌 𐴂𐴡𐴌𐴟𐴒𐴠𐴌𐴝𐴔 𐴓𐴡𐴘 , 𐴀𐴝𐴙𐴅𐴧𐴙𐴝 𐴏𐴥𐴡𐴉𐴡𐴌 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 ( 𐴘𐴟 𐴀𐴠𐴕 𐴀𐴡 𐴀𐴠𐴙𐴆 𐴏𐴞 𐴀𐴠𐴙𐴆 𐴀𐴝𐴌 ) 𐴃𐴡𐴕𐴎𐴞𐴔𐴠 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴕𐴡𐴏𐴥𐴡𐴓 𐴉𐴥𐴟𐴌𐴝 𐴑𐴝𐴌𐴖𐴝𐴘 𐴒𐴡𐴌𐴥𐴞 , 𐴀𐴠𐴑 𐴔𐴡𐴓𐴞𐴘𐴟𐴕 𐴉𐴡𐴙𐴅𐴧𐴡𐴕𐴃𐴡 𐴔𐴝𐴕𐴥𐴟𐴙𐴐𐴢 𐴊𐴠𐴐𐴤𐴡𐴌𐴃𐴟 𐴕𐴠𐴀𐴠𐴓𐴝𐴘 𐴊𐴞𐴘𐴠𐴊𐴠 , 𐴘𐴥𐴝𐴀𐴝𐴕 𐴀𐴠 𐴊𐴟𐴕𐴞𐴘𐴝𐴘 𐴘𐴠 𐴈𐴡𐴕𐴥𐴡 𐴀𐴡𐴑𐴃𐴤𐴠 𐴉𐴡𐴀𐴡𐴌𐴝𐴘 𐴕𐴡 𐴉𐴝𐴌𐴥𐴞𐴁𐴤𐴡 , 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕 𐴕𐴞𐴎𐴡𐴌 𐴊𐴠𐴐𐴤𐴡𐴃 𐴎𐴡𐴀𐴡𐴕 𐴏𐴥𐴝𐴌𐴥𐴝 𐴀𐴝𐴌 𐴑𐴠𐴙𐴏𐴧𐴥𐴟 𐴕𐴡 𐴏𐴝𐴀𐴝𐴌 , 𐴀𐴥𐴞𐴃𐴝𐴌𐴝 𐴌𐴠 𐴐𐴤𐴝𐴕𐴃𐴞 𐴀𐴝𐴌 𐴋𐴡𐴌 𐴏𐴥𐴝𐴌𐴝 𐴕𐴞𐴌𐴝𐴉𐴡𐴃𐴧𐴝𐴌 𐴏𐴥𐴝𐴣𐴀𐴝𐴃𐴠 𐴃𐴤𐴝𐴑𐴞 𐴉𐴝𐴌𐴞𐴁𐴤𐴝𐴌 𐴁𐴠𐴁𐴡𐴏𐴃𐴝 𐴒𐴡𐴌𐴥𐴞 𐴊𐴡𐴀𐴡𐴕 𐴎𐴡𐴌𐴟𐴌𐴞 𐴁𐴡𐴓𐴞 / 𐴄𐴡𐴔 𐴀𐴠𐴕𐴋𐴠𐴌𐴞𐴘𐴟𐴏𐴠 𐴈𐴡𐴘𐴧𐴠 𐴱𐴱

𐴀𐴥𐴞𐴃𐴠 𐴀𐴠 𐴏𐴡𐴉𐴥𐴡𐴌𐴡𐴃 𐴁𐴝𐴚𐴓𐴝𐴊𐴠𐴐𐴤𐴡𐴌 𐴌𐴝𐴎𐴊𐴤𐴝𐴕 𐴋𐴤𐴝𐴑𐴝 , 𐴌𐴞𐴉𐴟𐴎𐴞𐴌 𐴑𐴠𐴀𐴠𐴔 𐴀𐴝𐴏𐴥𐴠𐴊𐴠 𐴑𐴡𐴑𐴏𐴡 𐴁𐴝𐴎𐴝𐴌 𐴀𐴝𐴌 𐴁𐴤𐴐𐴡𐴕 𐴏𐴡𐴌𐴡𐴃 𐴀𐴥𐴡 𐴎𐴝𐴘𐴁𐴝𐴌 𐴂𐴡𐴌𐴟𐴒𐴠𐴌𐴝𐴔 𐴁𐴝𐴕𐴝𐴘𐴧𐴥𐴠 , 𐴀𐴠𐴀𐴠𐴕 𐴐𐴤𐴡𐴔𐴡𐴃 𐴎𐴠 𐴀𐴡𐴑𐴃𐴤𐴡𐴃 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴑𐴤𐴟𐴂𐴢 𐴁𐴠𐴐𐴤𐴞 𐴔𐴝𐴌𐴡𐴃𐴧𐴡𐴁 𐴁𐴤𐴝𐴉𐴠 𐴂𐴝𐴂𐴓𐴞𐴑𐴡𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑 𐴔𐴝𐴍𐴞 𐴒𐴡𐴌𐴥𐴠𐴌𐴱𐴱

𐴀𐴥𐴠 𐴀𐴡𐴑𐴃𐴤𐴡𐴃 𐴎𐴟𐴓𐴟𐴔 𐴐𐴤𐴡𐴀𐴡𐴘 𐴕𐴡 𐴉𐴝𐴌𐴥𐴞 𐴁𐴝𐴚𐴓𐴝𐴊𐴠𐴐𐴤𐴡𐴃 𐴊𐴤𐴝𐴘 𐴀𐴝𐴙𐴐𐴧𐴤𐴙𐴠 𐴊𐴠 𐴀𐴥𐴞𐴃𐴝𐴌𐴝𐴌𐴥𐴠 𐴊𐴟𐴕𐴞𐴘𐴝𐴘 𐴘𐴠 𐴔𐴡𐴊𐴡𐴃 𐴒𐴡𐴌𐴥𐴠𐴌 , 𐴀𐴥𐴠 𐴌𐴞𐴉𐴟𐴎𐴞 𐴀𐴥𐴟𐴀𐴟𐴕 𐴓𐴡𐴘 𐴊𐴡𐴓𐴝 𐴀𐴥𐴡𐴘 𐴉𐴝𐴙𐴅𐴧𐴤𐴞 𐴊𐴠 𐴘𐴥𐴝𐴀𐴝𐴕𐴡𐴃 𐴀𐴦𐴝𐴛 𐴉𐴡𐴈𐴥𐴡𐴌 𐴒𐴡𐴌𐴥𐴞𐴌 𐴁𐴡𐴓𐴞 , 𐴄𐴡𐴔 𐴀𐴠𐴕𐴋𐴠𐴌𐴞𐴘𐴟𐴏𐴠 𐴈𐴡𐴘𐴧𐴠 𐴱𐴱

𐴀𐴥𐴞𐴃𐴠 𐴁𐴝𐴚𐴓𐴝𐴊𐴠𐴐𐴤𐴡𐴌 𐴃𐴟 𐴎𐴝𐴘𐴁𐴡 𐴒𐴤𐴡𐴘𐴊𐴠 𐴀𐴥𐴠 𐴊𐴞𐴕 𐴊𐴦𐴟𐴛𐴅𐴧𐴙𐴝 𐴲 𐴁𐴝𐴎𐴠 , 𐴋𐴤𐴝𐴑𐴝𐴌 𐴖𐴞𐴏𐴄𐴞𐴕 𐴇𐴥𐴡𐴄𐴡𐴓𐴡𐴃 𐴂𐴠𐴌𐴠𐴏𐴢 𐴑𐴝𐴕𐴉𐴠𐴣𐴌𐴥𐴠𐴏𐴢 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 𐴈𐴡𐴘𐴧𐴠 , 𐴁𐴡𐴌𐴔𐴥𐴝𐴌 𐴔𐴟𐴃𐴦𐴝𐴓𐴧𐴠𐴑 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴇𐴥𐴝𐴓𐴡𐴃𐴡𐴌 𐴌𐴠𐴂𐴟𐴄 𐴄𐴡𐴔 𐴀𐴠𐴕𐴋𐴠𐴌𐴞𐴘𐴟𐴏𐴠 𐴲 𐴲 𐴰 𐴲 𐴔𐴝𐴌𐴠𐴆 𐴔𐴥𐴝𐴐𐴡𐴃 𐴀𐴝𐴈𐴥𐴠𐴌𐴞 𐴌𐴠𐴂𐴟𐴄 𐴀𐴥𐴞𐴏𐴝𐴉𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴑𐴡𐴔𐴞𐴐𐴠𐴕𐴡𐴃 𐴃𐴟𐴓𐴥𐴞 𐴊𐴞𐴀𐴞𐴁𐴡 𐴱𐴱

Sources : RFA